Kulesihloko, safundza kutsi kunendzaba yinye lebaluleke kakhulu letsintsa tonkhe tidalwa letihlakaniphile, lokukungcweliswa kwelibito laJehova. Indzaba yekutsi kubusa kwaJehova kuncono kakhulu yini ihambisana nekungcweliswa kwelibito lakhe. Ngendlela lefanako, indzaba yekutsi umuntfu utawuhlala yini acotfo kuNkulunkulu nayo ihambisana nendzaba yekungcweliswa kweligama laJehova.

Yini lesenta sigcizelele nyalo kutsi indzaba lenkhulu imayelana neligama laJehova kanye nekungcweliswa kwalo? Asesihlole tizatfu letintsatfu.

Sekucala, Sathane wahlasela ligama laJehova nobe lidvumela lakhe ensimini yase-Edeni. Sathane wabuta Eva umbuto ngebucili lebewuveta kutsi Jehova unguNkulunkulu lowemanako nalobekela bantfu bakhe imincele lengacabangeli. Ngemuva kwaloko Sathane washintja emavi aJehova, kwafana nekutsi ubita Nkulunkulu ngemcambimanga. Ngako wanyundzela ligama laJehova. Waba ‘nguDeveli’ lokusho “umnyundzeli.” (Joh. 8:44) Ngenca yekutsi Eva wawetsemba lamanga aSathane, akamlalelanga Nkulunkulu futsi wavukela bukhosi bakhe. (Gen. 3:1-6) Kuze kube ngulamuhla, Sathane unyundzela libito laNkulunkulu futsi usakata emanga ngeluhlobo lweMuntfu Jehova langilo. Labo labawetsembako lamanga bayavama kungamlaleli Jehova. Ngako kubantfu baNkulunkulu lokunyendzelwa kwelibito laNkulunkulu lelingcwele kukungalungi lokubi kakhulu. Kuyimbangela lenkhulu yako konkhe kuhlupheka nebubi emhlabeni.

Sesibili, loku utakwentela yonkhe indalo yakhe. Jehova utimisele kungcwelisa libito lakhe, alihlante kuko konkhe kuhlanjalatwa. Lesi sizatfu lesibaluleke kakhulu kuJehova. Kungako atsi: “Nakanjani ngitalingcwelisa libito lami lelikhulu.” (Hez. 36:23) Ngetulu kwaloko, Jesu wakwenta kwacaca loko lokufanele kubaluleke kakhulu emthantazweni wabo bonkhe bantfu labetsembekile labakhonta Jehova, nakatsi: “Alingcweliswe libito lakho.” (Mat. 6:9) Ngalokuphindzaphindziwe liBhayibheli ligcizelela kubaluleka kwekungcwelisa ligama Jehova. Cabanga nganati tibonelo: “Nikani Jehova ludvumo lolufanele libito lakhe.” (1 Khr. 16:29; Hla. 96:8) “Hlabelani nidvumise libito lakhe.” (Hla. 66:2) “Ngitawudvumisa libito lakho kuze kube phakadze.” (Hla. 86:12) Ngalesinye sikhatsi Jehova watikhulumela yena matfupha asezulwini ethempelini leliseJerusalema ngesikhatsi Jesu atsi: “Babe, khatimulisa libito lakho.” Jehova wamphendvula watsi: “Ngilikhatimulisile, futsi ngitawuphindze ngilikhatimulise.”—Joh. 12:28. a

Sesitsatfu, injongo yaJehova itawuhlale ihambisana nelibito lakhe nobe lidvumela lakhe. Cabanga nganaku: Ngemuva kweluvivinyo lwekugcina lolutawulandzela Iminyaka Leyinkhulungwane Yekubusa KwaKhristu, yini letawenteka? Indalo lehlakaniphile itawuchubeka yini inemibono lengafani mayelana nalendzaba lebalulekile, lokukungcweliswa  kwelibito laJehova? Kuze siwuphendvule lombuto asesikhumbule nati tintfo letimbili letihambisana nako, lokubucotfo bebantfu nelilungelo laNkulunkulu lekubusa indalo yonkhe. Ngaleso sikhatsi, kutawuba bete sidzingo sekutsi bantfu bakhombise kutsi bacotfo. Bantfu batawube sebete sono futsi batawube bavivinywe kwefika ekugcineni. Batawutfola kuphila lokuphakadze. Ngetulu kwaloko, kutawuba bete sidzingo sekukhombisa kutsi indlela yaJehova yekubusa incono kakhulu. Ngaleso sikhatsi, tonkhe tidalwa taNkulunkulu letihlakaniphile titawuba nebunye futsi temukele kubuswa nguJehova. Kutawentekani ngelibito laNkulunkulu?

Ngaleso sikhatsi, bonkhe bantfu batawulati liciniso ngaJehova futsi libito lakhe litawungcweliswa ngalokuphelele. Nanobe kunjalo, litawuchubeka liyintfo lebaluleke kakhulu kuto tonkhe tidalwa takhe letisezulwini nasemhlabeni. Leni? Ngobe titawubona kutsi Jehova uyachubeka enta tintfo letinhle. Cabanga nganaku: Ngenca yekutsi Jesu utawubuyisela bukhosi kuJehova, Nkulunkulu utawuba “nguko konkhe kubo bonkhe.” (1 Khor. 15:28) Ngemuva kwaloko, bantfu emhlabeni batawujabulela “inkhululeko lekhatimulako yebantfwana baNkulunkulu.” (Rom. 8:21) Ngetulu kwaloko, Jehova utayifeza ngalokuphelele injongo yakhe yekwenta tonkhe tidalwa takhe letihlakaniphile letisezulwini nasemhlabeni kutsi tibe ngumndeni lomkhulu lonebunye.​—Ef. 1:10.

Loku kutawutsintsa njani umndeni waJehova losezulwini nalosemhlabeni? Kusebaleni kutsi sitawuchubeka sinesifiso lesikhulu sekudvumisa ligama laNkulunkulu lelihle. Umhlabeleli Davide waphefumulelwa kutsi ahlabele atsi: “Akadvunyiswe Jehova Nkulunkulu . . . Shengatsi libito lakhe lelikhatimulako lingadvunyiswa kuze kube phakadze.” (Hla. 72:18, 19) Sitawuchubeka sitfola tizatfu letinsha naletijabulisako tekukwenta loko kuze kube phakadze.

Ligama laNkulunkulu limelela konkhe ngaye. Nasicabanga ngalo, sicabanga ngelutsandvo lwakhe. (1 Joh. 4:8) Sitawuhlale sikhumbula kutsi Jehova wasidala ngobe asitsandza, wasipha inhlawulo ngobe asitsandza futsi wakhombisa kutsi kubusa kwakhe kulungile ngenca yekutsi uyasitsandza. Kodvwa sitawuchubeka sibona indlela Jehova latawukhombisa ngayo kutsi indalo yakhe uyayitsandza. Sitawusondzela kakhulu kuBabe wetfu futsi sihlabele tingoma tekudvumisa ligama lakhe lelingcwele kuze kube phakadze.​—Hla. 73:28.