1-2. Simo setfu sifana njani nesalelijaha lokukhulunywe ngalo kusigaba 1?

 CABANGA ngalelinye lijaha lelikhulele emndenini lonjingile. Ngalelinye lilanga kugadla inhlekelele; batali balo batfola ingoti futsi bayashona. Letindzaba tilivisa buhlungu kakhulu. Kodvwa kusenalokukhulu lelitakuva lokutalimangalisa kakhulu. Lelijaha litjelwa kutsi batali balo badlabhatise yonkhe imali futsi badala tikweleti letinyenti. Kunekutsi litfole lifa leliyimali, litfola tikweleti, futsi labo labakweletwako bayifuna la imali yabo. Lelijaha aliyuze likhone kutibhadala letikweleti.

² Ngandlela tsite, simo setfu siyafana nesalelijaha. Batali betfu bekucala lokungu-Adamu na-Eva bebete sono futsi bahlala epharadisi. (Gen. 1:27; 2:7-9) Bebatawuba nemphilo lemnandzi kuze kube phakadze. Kodvwa konkhe loko kwashintja. Balahlekelwa liPharadisi lebelilikhaya labo kanye nelitfuba lekuphila kuze kube phakadze. Nguliphi lifa labalishiyela bantfwana babo? LiBhayibheli litsi: “Ngemuntfu munye [lokungu-Adamu] sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.” (Rom. 5:12) Lelifa Adamu lalishiyela bantfu bekusono lesiholela ekufeni. Lesono sifana nesikweleti lesikhulu lokute ngisho namunye kitsi longakhona kusibhadala.​—Hla. 49:8.

 3. Yini leyenta tono tetfu tifananiswe ‘netikweleti’?

 ³ Jesu wafananisa sono ‘netikweleti.’ (Mat. 6:12, umbhalo longentasi; Luk. 11:4) Nasona, kufanana nekutsi sidala sikweleti kuJehova. Kufanele sisibhadale lesikweleti. Kube bekungatsiwa sihlala singabhadalwa, besingesulwa kuphela nasifa.​—Rom. 6:7, 23.

 4. (a) Yini lebeyingenteka kuto tonkhe toni kube atilutfolanga lusito? (Tihlabelelo 49:7-9) (b) EBhayibhelini lisho kutsini ligama lelitsi “sono”? (Buka libhokisi lelitsi “ Sono.”)

⁴ Besingakhona yini kutitfolela loko bo-Adamu na-Eva labakulahla? Besingeke sikhone ngemandla etfu. (Fundza Tihlabelelo 49:7-9.) Ngaphandle kwelusito, besitawuba bete litsemba lekuphila esikhatsini lesitako nobe lekuvuswa ekufeni. Ecinisweni, kufa kwetfu bekutawufanana nekwetilwane.​—Shu. 3:19; 2 Phet. 2:12.

 5. Yini Babe wetfu lositsandzako layentile kuze asisite ngesikweleti lesasitfola? (Buka sitfombe lesisekhasini lekucala.)

⁵ Nasicabanga ngalelijaha lesike sakhuluma ngalo, belingativa njani kube bekungatsiwa kufika indvodza lenjingile itsi itatibhadala tonkhe letikweleti talo? Siyaciniseka kutsi belitawujabula kakhulu futsi lisemukele lesipho. Ngendlela lefanako, Babe wetfu lositsandzako Jehova usiphe sipho lesibhadala lesikweleti lesisono lesasitfola ku-Adamu. Jesu wayichaza kanjena lendzaba: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Joh. 3:16) Ngetulu kwaloko, lesipho siphindze sisinikete litfuba lekuba nebuhlobo lobuhle naJehova.

 6. Yini lesitawucoca ngayo kulesihloko, futsi ngasiphi sizatfu?

⁶ Yini lesingayenta kuze sizuze kulesipho lesihle futsi kusulwe tono, nobe “tikweleti” tetfu? Kuze sitfole imphendvulo yalombuto, sitawucoca ngalamanye emagama laseBhayibhelini kanye nenchazelo yawo. Njengobe sicabangisisa ngaletinchazelo, itawukhula indlela lesimbonga ngayo Jehova ngaloko lakwentile kuze asicolele.

UMGOMO: JEHOVA UFUNA SIBE NEBUHLOBO LOBUHLE NAYE

 7. (a) Yini lenye leyalahlekela bo-Adamu na-Eva? (b) Njengobe sisitukulwane sa-Adamu na-Eva, yini lesiyidzinga kakhulu? (KubaseRoma 5:10, 11)

⁷ Bo-Adamu na-Eva abagcinanga nje ngekulahlekelwa litfuba lekuphila phakadze, kodvwa balahlekelwa nabuhlobo lobuhle  naBabe wabo Jehova. Ekucaleni, bo-Adamu na-Eva bebayincenye yemndeni waNkulunkulu. (Luk. 3:38) Kodvwa ngesikhatsi bangamlaleli Jehova, bacoshwa emndenini wakhe basengakabi nebantfwana. (Gen. 3:23, 24; 4:1) Kute ngisho munye kubantfwana babo, lokufaka ekhatsi natsi, lebekangaba yincenye yemndeni waJehova. (Fundza KubaseRoma 5:10, 11.) Ngako besiludzinga lusito kuze sibe nebuhlobo lobuhle naye. Bekufanele singasabi titsa taNkulunkulu, kodvwa sibe bangani bakhe. Lokuhle kakhulu kutsi nguJehova lowatsatsa sinyatselo kucala kuze akwente loko. Njani?

LOKO LOKWENTIWA: KUBUYISANA NANKULUNKULU

 8. Kuyini kubuyisana naNkulunkulu?

⁸ Kubuyisana naNkulunkulu nguloko Jehova lakwenta kuze bantfu labanesono baphindze babe nebuhlobo lobuhle naye. Kufaka ekhatsi kushintjisa intfo letsite ngalenye lenelinani lelilinganako. Ngalendlela, intfo lelahlekile nobe lelimele ingaphindze itfolakale nobe kufakwe lokunye esikhundleni sayo. ImiBhalo YemaKhristu YesiGriki ikhuluma ngaloko Jehova lakwenta kuze umuntfu abe nebuhlobo lobuhle naye.​—Rom. 3:25.

 9. Nguyiphi indlela Jehova layisebentisa kwesikhashana kuze tono tema-Israyeli ticolelwe?

⁹ Kuze Jehova ente ema-Israyeli kutsi abe nebuhlobo lobuhle naye, wenta indlela lebeyitawusebenta kwesikhashana kuze tono tawo ticolelwe. Ka-Israyeli, Lilanga Lekubuyisana NaNkulunkulu beliba kanye ngemnyaka. Ngalelo langa, umphristi lophakeme bekentela labantfu umnikelo wetilwane. Kuliciniso kutsi lomnikelo wetilwane bewungeke utihlawulele ngalokuphelele tono tebantfu ngobe tilwane tingephansi kunebantfu. Kodvwa nangabe umIsrayeli lophendvukile enta leminikelo lebeyilindzelekile, Jehova bekakulungela kumcolela tono takhe. (Heb. 10:1-4) Ngetulu kwaloko, iminikelo lebeyentiwa Ngelilanga Lekubuyisana NaNkulunkulu nangaletinye tikhatsi beyisita ema-Israyeli abone kutsi atoni nekutsi bekadzinga lokutsite lokungetulu lebekutawukhona kumbonya tono tawo ngalokuphelele.

10. Yini Jehova layenta kuze tono tichubeke ticolelwa?

¹⁰ Jehova wenta kutsi kube nendlela lebeyitawuchubeka isebenta kuze kutsetselelwe tono. Wahlela kutsi iNdvodzana yakhe layitsandzako ‘inikelwe kanye kuphela kuze yetfwale tono talabanyenti.’ (Heb. 9:28) Jesu ‘wanikela ngekuphila kwakhe kuze kube yinhlawulo yalabanyenti.’ (Mat. 20:28) Iyini inhlawulo?

LINANI LELAKHISHWA: INHLAWULO

11. (a) Ngekusho kweliBhayibheli, iyini inhlawulo? (b) Ngubani lebekangakhipha inhlawulo?

¹¹ Ngekusho kweliBhayibheli, inhlawulo linani lelibhadalwako kuze kuhlawulelwe intfo letsite. a Ngembono waJehova, inhlawulo ibuyisela loko lokwalahleka. Kanjani? Khumbula kutsi bo-Adamu na-Eva balahlekelwa kuphila kwabo lokute sono kanye nelitsemba lekuphila phakadze. Ngako inhlawulo bekutawudzingeka kube linani lelilingana ncamashi naloko lokwalahleka. (1 Thim. 2:6) Beyingabhadalwa kuphela ngumuntfu losakhulile (1) lote sono; (2) lobekangaphila phakadze emhlabeni; futsi (3) lebekakulungele kunikela ngalokuphila kwakhe nobe akwente umhlatjelo ngenca yetfu. Nguleyondlela  kuphela kuphila kwalomuntfu lebekungabuyisela ngayo kuphila lebekulahlekile nobe kungene esikhundleni sako.

12. Yini leyenta Jesu wakhona kukhipha inhlawulo lebeyidzingekile?

¹² Cabanga nganati tizatfu letintsatfu letenta Jesu wakhona kubhadala inhlawulo. (1) Bekete sono futsi “akentanga sono.” (1 Phet. 2:22) (2) Ngenca yaloko, bekangaphila phakadze emhlabeni. (3) Bekakulungele kufa futsi anikele ngekuphila kwakhe ngenca yetfu. (Heb. 10:9, 10) Njengobe Jesu bekangumuntfu lote sono, bekalingana nemuntfu wekucala, lokungu-Adamu, ngaphambi kwekutsi one. (1 Khor. 15:45) Ngako ngekufa kwakhe, Jesu wakhona kuhlawulela sono sa-Adamu, lokusho kubhadala loko Adamu lakulahla. (Rom. 5:19) Ngako Jesu waba ‘ngu-Adamu wekugcina.’ Kute sidzingo sekutsi kufike lomunye umuntfu lote sono futsi abhadale loko Adamu lakulahla. Jesu wafa “kanye kuphela” kwenela.​—Heb. 7:27; 10:12.

13. Ngumuphi umehluko lokhona emkhatsini waloko lokwentiwa kuze sibuyisane naNkulunkulu kanye nenhlawulo?

¹³ Ngako yini umehluko emkhatsini waloko lokwentiwa kuze sibuyisane naNkulunkulu kanye nenhlawulo? Kubuyisana naNkulunkulu nguloko Jehova lakwenta kuze abuyisele buhlobo lobuhle emkhatsini webantfu naye. Inhlawulo linani lelabhadalwa kuze bantfu labanesono babuyisane naNkulunkulu. Lelinani limelelwa yingati yaJesu leligugu leyacitseka ngenca yetfu.​—Ef. 1:7; Heb. 9:14.

IMIPHUMELA: KUKHULULWA NEKUTSI KUTSIWE SILUNGILE

14. Yini lesitawucoca ngayo nyalo, futsi ngasiphi sizatfu?

¹⁴ Iyini imiphumela yaloko lokwentiwa kuze sibuyisane naNkulunkulu? LiBhayibheli lisebentisa emagama lambalwa kuze livete indlela lesisitakala ngayo. Nanobe tinchazelo talamagama tiphose tifane, kepha ligama ngalinye liveta incenye letsite yaloko lokwentiwa kuze sibuyisane naNkulunkulu lokuvula indlela yekutsi Jehova asicolele. Njengobe sitawube sicoca ngalamagama, sitawuphindze sibone kutsi asitsintsa njani.

15-16. (a) EBhayibhelini, kusho kutsini “kukhululwa”? (b) Kusitsintsa njani tsine?

¹⁵ EBhayibhelini, kukhululwa kusho umphumela lesiwutfola ngenca yekubhadalwa kwenhlawulo. Umphostoli Phetro watsi: “Niyati kutsi ngesikhatsi nikhululwa [ngesiGriki kutsi, “nihlengwa; nihlawulelwa”] endleleni lelite yekuphila lenayinikwa bokhokho benu, anizange nikhululwe ngetintfo letonakalako, lokulisiliva neligolide. Kodvwa nakhululwa ngengati leligugu, lefana neyeliwundlu lelimsulwa nalelite sici, lokuyingati yaKhristu.”​—1 Phet. 1:18, 19; umbhalo longentasi.

¹⁶ Ngenca yenhlawulo, sesingakhululeka ekucindzetelweni sono nekufa. (Rom. 5:21) Kusebaleni kutsi sinesizatfu lesivakalako sekutiva simkweleta Jehova naJesu ngenca yekusikhulula ngengati leligugu nobe ngekuphila lokuligugu kwaJesu.​—1 Khor. 15:22.

17-18. (a) Kusho kutsini kutsi kutsiwe silungile? (b) Kusitsintsa njani tsine loko?

¹⁷ Kutsi kutsiwe silungile kusho kutsi tikweleti tetfu tesuliwe. Ngekwenta njalo, Jehova akaphambani netimiso takhe letilungile. Akasho kutsi silungile ngenca yaloko lesikwentile; futsi akavumelani netono tetfu. Kodvwa unetizatfu letivakalako tekwesula tikweleti tetfu ngenca yekutsi sinekukholwa kuloko lokwentiwa kuze sibuyisane naye kanye nekutsi kwabhadalwa inhlawulo.​—Rom. 3:24; Gal. 2:16.

 ¹⁸ Loku kusho kutsini kitsi? Labo labakhetfwe kutsi bayobusa naJesu ezulwini sekuvele kutsiwe balungile njengobe babantfwana baNkulunkulu. (Thit. 3:7; 1 Joh. 3:1) Tono tabo seticolelwe. Sekufana nekutsi abakake batenta letono futsi ngenca yaloko bayakulungela kuba seMbusweni. (Rom. 8:1, 2, 30) Labo labanelitsemba lekuphila emhlabeni sekutsiwe balungile njengobe babangani baNkulunkulu, futsi tono tabo ticolelwe. (Jak. 2:21-23) Sicumbi lesikhulu lesitawusindza nge-Amagedoni sinelitsemba lekungafi. (Joh. 11:26) “Labalungile nalabangakalungi” labasemathuneni batawuvuswa. (Imis. 24:15; Joh. 5:28, 29) Ekugcineni, bonkhe bantfu baJehova labalalelako labalamhlabeni batawutfola “inkhululeko lekhatimulako yebantfwana baNkulunkulu.” (Rom. 8:21) Leso sibusiso lesimangalisako lesitawuba khona ngenca yaloko lokwentiwe kuze sibuyisane naNkulunkulu, lokusho kubuyisana ngalokuphelele naBabe wetfu Jehova!

19. Simo setfu sishintje njani saba ncono kakhulu? (Buka nelibhokisi lelitsi “ Kusho Kutsini Kitsi?”)

¹⁹ Simo setfu besifana mbamba nesalelijaha lesikhulume ngalo ekucaleni, lelalahlekelwa ngiko konkhe futsi laba nesikweleti lesikhulu lebelingayuze likhone kusibhadala. Kodvwa siyambonga Jehova ngobe sitfole lusito. Simo setfu sesishintjile ngenca yaloko lokwentiwa kuze sibuyisane naNkulunkulu futsi kwabhadalwa inhlawulo. Kukholwa kwetfu kuJesu Khristu kwente kutsi sikhululwe esonweni nasekufeni. Tono tetfu tingesulwa kube ngatsi asikake satenta. Kodvwa lokubaluleke kakhulu kutsi nyalo sesingaba nebuhlobo lobuhle naBabe wetfu wasezulwini lositsandzako, lokunguJehova.

20. Sitawucoca ngani esihlokweni lesilandzelako?

²⁰ Nasicabangisisa ngaloko Jehova naJesu labasentele kona, tinhlitiyo tetfu tigcwala kubonga. (2 Khor. 5:15) Besingaba bete ngisho nalelincane litsemba ngaphandle kwelusito lwabo! Kodvwa kucolelwa nguJehova kusho kutsini kumuntfu ngamunye? Sitawucoca ngaloko esihlokweni lesilandzelako.