1, 2. Kungani kubalulekile kutsi sicoce ngetindlela tekudvudvuta labo labafelwe? (Buka sitfombe lesisekucaleni kwalesihloko.)

SUSI watsi: “Nanobe besekuyophela umyaka wonkhe indvodzana yetfu ifile, kodvwa besisolo sibuva buhlungu bekufelwa ngiyo.” Lomunye umKhristu ngemuva kwekufelwa ngumfati wakhe angakagadzi, watsi “ngeva buhlungu lobungachazeki emtimbeni wami.” Lokubuhlungu kutsi, banyenti bantfu babhekana nesimo lesifana nalesi. EmaKhristu lamanyenti akacabangi kutsi tihlobo tabo labatitsandzako kungenteka tife isengakefiki i-Amagedoni. Ngisho nobe kunguwe lofelwe ngumuntfu lomtsandzako nobe kukhona umuntfu lomatiko lofelwe ngulamtsandzako, kungenteka utibuta nangu umbuto lotsi, ‘Labafelwe bangalutfolaphi lusito lwekubhekana nesimo sekufelwa?’

² Kungenteka wake weva bantfu batsi kutawubuye kulunge ngemuva kwesikhatsi. Nobe kunjalo, loku kusho kutsi kufanele singasenti lutfo yini tsine ngaloko lokusivise buhlungu? Lomunye umfelokati watsi: “Loko umuntfu lakwentako ngemuva kwekufelwa nguloyo lamtsandzako, ngiko lokwenta simo sibe ncono.” Njengesilondza lesibonakala ngephandle, nebuhlungu umuntfu labuvako nakafelwe, buphela kancane kancane nangabe abunakekela. Yini-ke lengasita umuntfu lofelwe nguloyo lamtsandzako kute buhlungu labuvako buphele?

3, 4. Yini lesenta siciniseke kutsi Jehova uyacondza kutsi umuntfu lofelwe uyayidzinga indvudvuto?

³ Asingabati kutsi umtfombo wendvudvuto nguBabe wetfu wasezulwini, Jehova. (Fundza 2 Khorinte 1:3, 4.) Jehova usibonelo lesihle sekuba neluvelo futsi ucinisekisa bantfu bakhe ngemavi latsi: “Mine, mine ngekwami, nginguye lonidvudvutako.”​—Isa. 51:12; Hla. 119:50, 52, 76.

⁴ Babe wetfu lonemusa naye wake wafelwa bantfu labatsandzako, labanjenga-Abrahama, Isaka, Jakobe, Mosi kanye neNkhosi Davide. (Num. 12:6-8; Mat. 22:31, 32; Imis. 13:22) LiVi laNkulunkulu lisicinisekisa ngekutsi Jehova uyakulangatelela futsi unesifiso lesikhulu sekubavusa. (Jobe 14:14, 15) Batawuvuka baphilile futsi baphile saka. Cabanga nangeNdvodzana yaNkulunkulu lebekayitsandza futsi ‘anentfokoto lenkhulu’ ngayo, kodvwa yafa kabuhlungu. (Taga 8:22, 30) Site emagama lesingawasebentisa kute sichaze indlela Jehova leva buhlungu ngayo nakafelwa nguleNdvodzana yakhe.​—Joh. 5:20; 10:17.

5, 6. Usidvudvuta njani Jehova?

⁵ Siyaciniseka kutsi Jehova ngeke asibukelele nje sicedvwa kufa. Ngako, asingalokotsi sibe matsintsanyawo ekumtjeleni loko lokusikhatsatako ikakhulukati nasifelwe bantfu lesibatsandzako. Kudvudvuta kakhulu kwati kutsi Jehova uyayicondza indlela lesitiva ngayo nasikhatsatelekile futsi ukulungele kusiniketa indvudvuto lesiyidzingako! Kodvwa ukwenta njani loko?

⁶ Lenye indlela Nkulunkulu lasidvudvuta ngayo, ‘kusisekela ngemoya longcwele.’ (Imis. 9:31) Lomoya longcwele waNkulunkulu ungumtfombo wemandla ekusidvudvuta. Jesu wetsembisa kutsi Babe losezulwini utawubapha “umoya longcwele labo labamcelako.” (Luk. 11:13) Susi, lesike sakhuluma ngaye, utsi: “Sathantaza kanyenti kuJehova simcela kutsi asidvudvute. Ngaso sonke sikhatsi kuthula kwaNkulunkulu bekuhlale kulondvolota tinhlitiyo netingcondvo tetfu.”​—Fundza Filiphi 4:6, 7.

7, 8. Yini lesenta siciniseke kutsi Jesu utasidvudvuta?

⁷ Kuba neluvelo kwaJehova kwabonakala endleleni iNdvodzana yakhe lenguJesu lebeyikhuluma ngayo, nasendleleni lebeyenta ngayo ngesikhatsi iselapha emhlabeni. (Joh. 5:19) Jesu bekatfunyelwe kutodvudvuta bantfu “labatinhlitiyo tabo tidzabukile” kanye nabo “bonkhe labalilako.” (Isa. 61:1, 2; Luk. 4:17-21) Ngako-ke, bekatiwa njengemuntfu lebekabakhatsalela kakhulu labanye​—aneluvelo ngebantfu labahluphekako futsi anesifiso lesikhulu sekubasita.​—Heb. 2:17.

⁸ Ngalesikhatsi Jesu asemncane, asingabati kutsi kwadzingeka abhekane nesimo lesimatima sekufelwa ngemalunga emndeni wakubo kanye nebantfu lebekabetayele. Kubonaka shengatsi Josefa, lobekangubabe wakhe wasemhlabeni, wafa ngesikhatsi Jesu aselibhungu. * Cabanga nje ngaJesu lobekanenhlitiyo lenhle, lokungenteka kutsi bekaseminyakeni yekutfomba nobe lobekasandza kwendlula eminyakeni lengu-20, besekufanele abhekane nesimo sekufelwa, nekubona make wakhe, bomnakabo kanye nabodzadzewakhe beva buhlungu.

9. Jesu wakhombisa njani kutsi uneluvelo ngesikhatsi kufe Lazaro?

⁹ Ngesikhatsi Jesu acalisa umsebenti wakhe  wekushumayela, wakhombisa kutsi uyayati indlela bantfu labativa ngayo nekutsi uyabavela. Cabanga nje ngaloko lokwenteka ngalesikhatsi kufe Lazaro, umngani wakhe lebekamtsandza. Nanobe Jesu bekati kutsi utamvusa Lazaro ekufeni, kodvwa wabuva buhlungu lobebuviwa boMariya naMata. Loko kwamenta wadzabuka kakhulu, wadzimate wakhala.​—Joh. 11:33-36.

10. Yini lengasenta siciniseke kutsi Jesu uyasivela natsi lamuhla?

¹⁰ Indlela Jesu lebekaneluvelo ngayo kanye nendlela lebekadvudvutana ngayo isisita ngani tsine lamuhla? ImiBhalo isenta sati kahle kutsi “Jesu Khristu uyafana, itolo, lamuhla naphakadze.” (Heb. 13:8) Njengobe “uMmeleli Loyinhloko wekuphila” ati kutsi kunjani kufelwa, “uyakwati kubasita labo labalingwako.” (Imis. 3:15; Heb. 2:10, 18) Ngako-ke, asiciniseke kutsi Khristu utawuchubeka abavela labo labakhatsatekile, uyasati nesimo labakuso futsi ukulungele kubadvudvuta “ngesikhatsi lesifanele.”​—Fundza Hebheru 4:15, 16.

11. Ngumiphi imiBhalo lekudvudvutako?

¹¹ Indzaba yaJesu lemayelana nendlela ladzabuka ngayo ngesikhatsi kufe Lazaro, ingulesinye setibonelo kuletinyenti lokukhulunywa ngato eVini laNkulunkulu lelisidvudvutako. Akumangalisi-ke kwati kutsi “tonkhe tintfo letabhalwa kadzeni tabhalelwa kufundzisa tsine, kuze kutsi ngekucinisela kwetfu nangendvudvuto lesiyitfola emiBhalweni sitewuba nelitsemba.” (Rom. 15:4) Ngako, nangabe ufelwe, nawe ungadvudvuteka kulemiBhalo lelandzelako:

• “Simakadze uhlala asedvute nabo labanetinhlitiyo letephukile uyabasindzisa labanemoya lowephukile.”​—Hla. 34:18, 19.

• “Ngesikhatsi inhlitiyo yami iphitsiteliswa ngimicabango, kudvudvuta kwakho [Jehova] kuyawutfokotisa umphefumulo wami.”​—Hla. 94:19.

• “Shengatsi iNkhosi yetfu Jesu Khristu naNkulunkulu longuBabe wetfu, lowasitsandza nalowasinika indvudvuto yaphakadze nelitsemba lelihle ngemusa wakhe, bangadvudvuta tinhlitiyo tenu futsi banicinise.”​—2 Thes. 2:16, 17. *

12. Nguyiphi indlela lebalulekile lokufanele siyente kute sikhone kudvudvuta labanye?

¹² Lomunye umtfombo wendvudvuto kulabo labafelwe, libandla lebuKhristu. (Fundza 1 Thesalonika 5:11.) Ungabacinisa njani uphindze ubadvudvute labo labanemoya lodzabukile? (Taga 17:22, NW) Kufanele kube sengcondvweni yakho kutsi kunesikhatsi “sekubindza nesikhatsi sekukhuluma.” (Shu. 3:7) Dalene, longumfelokati utsi: “Labo labafelwe kufanele bakuvete loko labakucabangako kanye nendlela labativa ngayo. Ngako ke, intfo lebalulekile lekufanele siyentele umuntfu lofelwe, kutsi simlalele futsi singamngeni emlonyeni nakasakhuluma.” Junia, lowafelwa ngumnakabo ngetibulala utsi: “Ngisho nobe ungeke ukhone kuyati kahle indlela umuntfu lofelwe leva ngayo buhlungu, kodvwa kumcoka kubucondza buhlungu labuvako.”

13. Yini lokufanele siyikhumbule ngalabo labaselusizini lwekufelwa?

¹³ Khumbula kutsi bantfu labafelwe abaluveti ngendlela lefanako lusizi labakulo. Ngaletinye tikhatsi kuba matima ngemuntfu lodzabukile kutsi atjele labanye ngebuhlungu labuvako. LiVi laNkulunkulu litsi: “Inhlitiyo yemuntfu buhlungu bayo itetfwalela yona yodvwa, futsi kute longase abe nesabelo ekujabuleni kwayo.” (Taga 14:10) Ngisho nobe lomunye angetama kuveta indlela lativa ngayo  kulabanye, kodvwa kuba matima ngalabanye kukucondza kahle loko lekatama kukusho.

14. Singabadvudvuta njani ngemavi labo labaselusizini lekufelwa?

¹⁴ Liciniso, ngaletinye tikhatsi ungase ungati kutsi utawutsini kuloyo lofelwe kute umdvudvute. Nobe kunjalo, liBhayibheli litsi: “emavi lakhulumeke ngekuhlakanipha ayaphilisa.” (Taga 12:18) Labanye bakutfole kulula kusebentisa incwajana letsi Lapho Ufelwa Othandekayo, (letfolakala ngesiZulu.) *, kute badvudvute labanye. Intfo lebaluleke kakhulu lokufanele sihlale siyenta, kutsi ‘sikhale nalabakhalako.’ (Rom. 12:15) Gaby, lowafelwa yindvodza yakhe utsi: “Kuhushula tinyembeti kuba yindlela lelula yekuveta loko lokusenhlitiyweni. Kungako ngidvudvuteka nangibona bangani bami bakhala kanye nami. Etimeni letinjalo, angitikhandzi ngiselusizini ngedvwana.”

15. Ngutiphi tindlela lesingabadvudvuta ngato labanye nangabe sikutfola kumatima kuya kubo kute sibadvudvute? (Buka nelibhokisi lelitsi “ Emagama Lakahle Ekudvudvuta Labacindzetelekile.”)

¹⁵ Nangabe ukutfola kumatima kuya kumuntfu lofelwe kute umdvudvute, mhlawumbe kungaba lula kumdvudvuta ngekumtfumelela likhadi, umlayeto nge-e-mail, umlayeto ngamakhalekhikhini nobe umbhalele incwadzi. Ungase usho emavi ladvudvutako laseBhayibhelini, mhlawumbe umkhumbute ngetento letinhle nobe buntfu lobuhle baloyo loshonile nobe umcocele ngetikhatsi letimnandzi lotijabulele naloyo loshonile. Junia, utsi: “Kutfola umlayeto lomfishane longikhutsatako nobe kumenywa ngumKhristu lengikanye naye ebandleni kutsi ngimvakashele, kungidvudvuta kakhulu. Emavi abo kanye netento tabo kungenta ngitive ngitsandvwa futsi ngikhatsalelwa.”

16. Nguyiphi lenye indlela lenhle lesingabadvudvuta ngayo labo labafelwe?

 ¹⁶ Ungakutsatsi melula kuthantaza nemKhristu loselusizini lekufelwa. Ngisho nobe kungaba matima kuthantaza uphumisele ngenca yekukhala, umthantazo wakho lowusho ngenhlitiyo, ungamsita kakhulu loyo lofelwe. Dalene utsi: “Ngaletinye tikhatsi nangabe bodzadze bete kutongidvudvuta, bengibacela kutsi bathantaze kanye nami. Bebabese bayathantaza, nanobe bekuba lukhuni ekucaleni kukhuluma, kodvwa nabachubeka nemthantazo wabo bebagcina sebanemandla futsi bathantaze ngendlela letsintsa inhlitiyo. Kukholwa kwabo lokucinile, nelutsandvo lwabo kanye nendlela lebebakhombisa ngayo kutsi bayangikhatsalela, kwakucinisa kukholwa kwami.”

17-19. Kubaluleke ngani kuchubeka sibadvudvuta labo labaselusizini?

¹⁷ Sikhatsi bantfu labasitsatsako kute balilele tihlobo tabo letifile, asifanani. Ngako ke, kungaba kuhle kutsi ucitse sikhatsi unaloyo lofelwe hhayi nje nakasenetihlobo takhe kanye nebangani bakhe, kodvwa ngisho nobe sekwendlule tinyanga afelwe futsi bonkhe bantfu sebabuyele etindzaweni tabo. LiBhayibheli litsi: “Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.” (Taga 17:17) EmaKhristu lesikanye nawo ebandleni angaba ngumtfombo wendvudvuto kuloyo loselusizini, kute kube ngulapho lesimo sesincono.​—Fundza 1 Thesalonika 3:7.

¹⁸ Khumbula kutsi labo labake baba selusizini lekufelwa, lusizi lebebakulo lungavuswa lilanga labashada ngalo naloyo lowafa, luhlobo lolutsite lwemculo, titfombe, tintfo lebebatenta ndzawonye, nobe liphunga lelitsite, umsindvo nobe sikhatsi lesitsite semnyaka. Loyo lofelwe ngulabekashade naye, kutawuba kwekucala kutsi ente tintfo letinyenti ayedvwana, lokunjengekuya emhlanganweni nobe kuya eSikhumbutweni futsi loku kungamvisa buhlungu. Lomunye umzalwane utsi: “Bengilindzele kutsi nakufika lilanga lesashada ngalo nemkami, kwekucala ngemuva kwekufa kwakhe, belutangivusela lusizi futsi kube lukhuni kusimelela leso simo. Kodvwa lokujabulisako kutsi bazalwane labambalwa nabodzadze bahlela umbutsano lomncane kute nje ngingabi ngedvwana ngalelo langa.”

¹⁹ Khumbula kutsi labafelwe badzinga kuciniswa ngaso sonkhe sikhatsi. Junia utsi: “Kuhlale ubasita uphindze ukhombise bungani ngisho nobe kute umcimbi lokhetsekile welilanga labashada ngalo, kungaba lusito lolukhulu. Leto tikhatsi letimnandzi leniticitsa ninabo, tibaluleke kakhulu futsi tibaniketa indvudvuto labayidzingako.” Kuliciniso kutsi ngeke sikhone kulususa ngalokuphelele lusizi labakulo, futsi ngeke size sikhone kusivala sikhala saloyo muntfu lamtsandzako lofile, kodvwa singabadvudvuta ngetento letinhle letingabasita kutsi lusizi labakulo lwehle. (1 Joh. 3:18) Gaby yena utsi: “Emadvodza lamadzala elibandla lanelutsandvo bekahlale angisekela kulo lonkhe lusizi lebengikulo, kungako ngimbonga kakhulu Jehova ngalamadvodza. Angenta ngeva kutsi Jehova uyangikhatsalela.”

20. Kungani tetsembiso taJehova tingumtfombo lomkhulu wendvudvuto?

²⁰ Kudvudvuta kakhulu kwati kutsi Jehova longuNkulunkulu wayo yonkhe indvudvuto utawutisusa tonkhe tinsizi futsi asidvudvute phakadze ngalesikhatsi ‘bonkhe labasemathuneni beva livi [laKhristu] futsi baphume.’! (Joh. 5:28, 29) Nkulunkulu wetsembisa kutsi uyawumita “kufa phakadze naphakadze. Somandla longuSimakadze uyawukwesula tinyembeti kubo bonkhe buso.” (Isa. 25:8) Ngako, kunekutsi bantfu ‘bakhale nalabakhalako,’ bonkhe bantfu labatawube baphila emhlabeni ngaleso sikhatsi ‘batawujabula nalabajabulako.’​—Rom. 12:15.