Nanobe emaKhristu kufanele ente lokutsite kute ativikele, kodvwa akwenta ngendlela levumelana naloko lokushiwo timiso letiseBhayibhelini. Letimiso tiseluleka kutsi singatisebentisi tikhali, letinjengemavolovolo, luhlwayi nome lolunye luhlobo lwetibhamu kute sitivikele kubantfu labafuna kusihlasela. Cabanga nganaku lokulandzelako:

Emehlweni aJehova, kuphila​—ikakhulukati kuphila kwebantfu—​kungcwele. Umhlabeleli Davide bekati kutsiJehova ‘ungumtfombo wekuphila.’ (Hla. 36:9) Nanobe kunjalo, nangabe umKhristu afuna kutivikela nobe avikele tintfo lanato, utawuciniseka kutsi wenta konkhe langakwenta kute angambulali umuntfu lokungamenta kutsi agcine sekanelicala lengati.​—Dut. 22:8; Hla. 51:14.

Nanobe kusebentisa tintfo letinyenti kute sitivikele, kungasibangela kutsi sibe nelicala lengati, kodvwa tibhamu tenta kube melula kutsi ubulale umuntfu, kungaba ngesiphosiso nobe ngenhloso. * Ngetulu kwaloko, nangabe loyo lohlaselako, lokungenteka sewetfukile​—mhlawumbe sekabona kutsi loyo lekamhlaselako uphetse sibhamu, loko kungenta simo sibe sibi kakhulu futsi kungenteka kube khona lobulawako.

Ngalesikhatsi Jesu atjela balandzeli bakhe kutsi bahlome ngetinkemba ngebusuku bakhe bekugcina alapha emhlabeni, bekangasho kutsi kufanele bativikele. (Luk. 22:36, 38) Kunaloko, Jesu bekatsi bete nenkemba ngenjongo yekubaniketa sifundvo sekutsi bangafuni kutivikela nabaphatfwa kabi, ngisho nalapho sebahlaselwa sicumbi lebesihlomile. (Luk. 22: 52) Nangalesikhatsi Petru asebentise inkemba encekwini yemphristi lomkhulu, Jesu wamyala watsi: “Buyisela inkemba yakho emgodleni wayo.” Ngemuva kwaloko, wase ubaniketa umtsetfo lobalulekile lobewutawucondzisa balandzeli bakhe kute kufike sikhatsi setfu, watsi: “Bonkhe labaphatsa inkemba bayawufa ngenkemba.”​—Mat. 26:51, 52.

Ngekuvumelana naloko lokwashiwo nguMikha 4:3, bantfu baNkulunkulu ‘batawukhandza tinkemba tabo, batente tibe ngemakhuba, tikhali tabo tibe tikelo tekutsena tihlahla.’ Lobu buntfu bebuKhristu lobuvumelana nemavi laphefumulelwe emphostoli Pawula latsi: “Ningaphindziseli lokubi ngalokubi kunobe ngubani. . . . Nakungenteka, yentani konkhe lokusemandleni enu kuze nibe nekuthula nabo bonkhe bantfu.” (Rom. 12:17, 18) Nanobe Pawula abhekana netinkinga letinyenti, letifaka ekhatsi ‘tingoti tetigelekece,’ wenta ngekuvumelana nemavi akhe, wangaphambani naloko lokushiwo yimiBhalo kute nje ativikele. (2 Khor. 11:26) Kunaloko, watsembela kuNkulunkulu nasekuhlakanipheni lokuseVini lakhe​—“kuhlakanipha kuncono kunetikhali temphi.”​—Shu. 9:18.

EmaKhristu atsatsa kuphila njengentfo lebaluleke kakhulu kwengca tintfo lanato. LiBhayibheli litsi: “Kuphila kwakhe [umuntfu] akuveli etintfweni lanato.” (Luk. 12:15) Ngako-ke, nangabe lulwimi lolumnene lwehluleka kuncoba sigelekece lesihlomile, emaKhristu lahlakaniphile alalela simiso lesitfolakala emavini aJesu latsi: “Ningalwisani nemuntfu lomubi.” Loku kungase kudzinge kutsi simnike ingubo yetfu lengumfanekiso, yangephansi neyangetulu. (Mat. 5:39, 40; Luk. 6:29) * Indlela lencono kakhulu yaloku, kutsi utivikele. Nangabe ‘singatigabatisi ngelite ngetintfo takulomhlaba’ futsi bomakhelwane betfu basati njengaBoFakazi baJehova labatsandza kuthula, sitawube siyativikela ekuhlaselweni tigebengu.​—1 Joh. 2:16; Taga 18:10.

EmaKhristu ayabahlonipha bonembeza balabanye. (Rom. 14:21) Nasekwatiwa kutsi lelinye lilunga lelibandla linesibhamu sekutivikela kulabanye bantfu, labo labakholwa nalo bangetfuka, futsi bakhubeke. Lutsandvo lusenta kutsi sibeke tidzingo talabanye kucala kunetetfu, ngisho nobe kubitela kutsi sitiyekele tintfo lesatiko kutsi sivunyelwe ngumtsetfo kutsi sibe nato.​—1 Khor. 10:32, 33; 13:4, 5.

Emakhristu ayatikhandla kute abe sibonelo lesihle. (2 Khor. 4:2; 1 Phet. 5:2, 3) Ngemuva kwekube loyo mKhristu sekaniketwe seluleko lesiseBhayibhelini, futsi achubeka nekuba naleso sibhamu kute ativikele kulabanye bantfu, ngeke atsatfwe njengemuntfu losibonelo. Ngako-ke ngeke akufaneleke kuphatsiswa imitfwalo ebandleni nobe aniketwe emalungelo lakhetsekile ebandleni. Loku kuyasebenta nakumKhristu losebentisa sibhamu emsebentini wekutiphilisa. Kungaba kuhle kakhulu kutsi ayofuna lomunye umsebenti! *

Indlela umKhristu langakhetsa ngayo kutivikela yena, kuvikela umndeni wakhe nobe tintfo takhe, kusincumo sakhe kutsi ukwenta njani loko, kanjalo nemsebenti wekutiphilisa nguye lokufanele atikhetsele. Loku kusho kutsi, timiso letiseBhayibhelini tisifundzisa ngekuhlakanipha kwaNkulunkulu kanye nelutsandvo lanalo ngatsi. Ngenca yaleto timiso, emaKhristu lanebuhlobo lobuhle naNkulunkulu akhetsa kungabi netibhamu kute ativikele kulabanye bantfu. Ayati kutsi kuvikelwa mbamba nalokuhlala phakadze, kwalabo labatsemba Nkulunkulu, bakukhombise ngendlela labaphila ngayo ngekuvumelana netimiso teliBhayibheli.​—Hla. 97:10; Taga 1:33; 2:6, 7.