Umphostoli Pawula wayibona lengoti yekukhohliswa ngemanga aSathane, kodvwa lamanye emaKhristu lebekakanye naye ebandleni abengayiboni. Cabanga nje nganaku, lamanye emaKhristu aseKhorinte bekabonakala atetsemba kakhulu—acabanga kutsi bese acine kakhulu ebuhlotjeni bawo naNkulunkulu kangangekutsi bekute lebukungawancoba. (1 Khor. 10:12) Kungaleso sizatfu-ke Pawula awecwayisa watsi: “Ngiyesaba kutsi njengobe inyoka yayenga Eva ngebucili bayo, ngandlela tsite tingcondvo tenu titawudukiswa ebucotfweni nasebumsulweni lobufanele Khristu.”​—2 Khor. 11:3.

Kukhatsateka kwaPawula kwakhombisa kutsi bekute sidzingo sekutsatsa tintfo melula. Nangabe ufuna kuncoba lemphi lehlasela ingcondvo, kufanele uyibone ingoti yekukhohliswa futsi utivikele.

Kuyini kukhohliswa? Kulendzaba, kukhohlisa kukusebentisa inkhulumo lengemanga naledukisako kute kushintjwe indlela bantfu labacanga ngayo nalabenta ngayo. Lokukhohliswa kuhlotjaniswa “nemanga, konakalisa intfo, kuyenga, kushintja indlela locabanga ngayo, kulawula ingcondvo kanye nekusanganisa ingcondvo” kuphindze kuhlotjaniswe “nekungalungi, intfo leyingoti nemachinga lamabi.”​—Propaganda and Persuasion.

Kuyingoti kangakanani kukhohliswa? Kuyingoti kakhulu, akubonakali kufana nemoya lomubi loyingoti nobe gesi longabonakali longena ujule kubonembeza betfu. Ngenca yekutsi kukhohliswa akubonakali kalula, lomunye umcwaningi locwaninga indlela bantfu labenta ngayo, longuVance Packard watsi: “Lengikubonile kutsi bantfu labanyenti badukisekile futsi abasacabangi ngendlela lekahle  kangangekutsi sekulukhuni kukubona loko.” Lomunye umfundzi watsi emadvodza nebafati labakhohlisiwe kugcine “sekulula ngabo kutsi bente tintfo letiyingoti”​—‘letinjengekubulala, kuya emphini, kubandlulula labanye, kungavumelani ngekwenkholo kanye naletinye tento letingakalungi.’​—Easily Led—​A History of Propaganda.

Ngako-ke nangabe umuntfu angakhona kukhohlisa bantfu, kangakanani-ke ngaSathane? Uyifundze wayicedza indlela bantfu labenta ngayo tintfo, kusukela kumuntfu wekucala lowadalwa nguNkulunkulu. “Lonkhe live” lisemandleni akhe. Angasebentisa nobe ngabe yini lela kulelive kute akhohlise bantfu. (1 Joh. 5:19; Joh. 8:44) Kubonakala shengatsi Sathane ukhonile ‘kuvala tingcondvo tebantfu’, kangangekutsi nyalo ‘sewudukisa umhlaba wonkhe.’ (2 Khor. 4:4; Semb. 12:9) Yini lengakusita kute ukhone kumelana nalokukhohlisa kwakhe?

Jesu wasiniketa indlela lelula yekumelana nekukhohliswa, watsi: “Nitawulati liciniso, futsi liciniso litawunikhulula.” (Joh. 8:31, 32) Ngesizatfu sekutsi liciniso lahlaselwa ekucaleni, ngako-ke wena, njengelisotja lelisekhatsi nekhatsi nemphi udzinga umtfombo loliciniso, kwatiswa lokutakusita kutsi utivikele etintfweni letihlasela ingcondvo ngebuciko. Jehova usinikile letivikelo. EBhayibhelini ungatfola konkhe lokungakusita kutsi umelane nekukhohliswa nguSathane.​—2 Thim. 3:16, 17.

Kuliciniso kutsi lomkhohlisi lomkhulu longuSathane uyakwati loku. Ngako usebentisa lelive lelibi kute asicedze emandla ekufundza liBhayibheli kanye nekutadisha. Ungabanjwa nguletindlela takhe! (Ef. 6:11) ‘Wati ngalokuphelele’ emaciniso futsi uwacondzisise. (Ef. 3:18) Kodvwa loku kudzinga kutimisela. Khumbula kutsi leliciniso lelibalulekile lashiwo ngumbhali longuNoam Chomsky lowatsi: “Kute umuntfu lotakufakela emaciniso engcondvweni yakho. Kufanele utifunele wena.” Ngako, “tifunele wena” ngekutsi ‘uhlolisise imiBhalo malanga onkhe.’​—Imis. 17:11.

Akuhlale kusengcondvweni yakho kwati kutsi Sathane akafuni kutsi ucabange ngendlela lekahle nobe ucondze kahle tintfo. Kungani? Ngekusho kwalomunye umtfombo, “kukhohliswa kusebenta kahle nangabe bantfu bangakhutsatwa kutsi bacabangisise ngentfo.”  (Media and Society in the Twentieth Century) Ngako-ke, kunake loko lokuvako futsi ungemukeli nobe ngabe yini loyivako. (Taga 14:15) Lisebentise likhono lekucabanga lowalinikwa nguNkulunkulu kute uwabone emaciniso futsi uwasebentise nasekuphileni kwakho.​—Taga 2:10-15; Rom. 12:1, 2.

Libutfo lemphi lingahle likhohlise lelinye libutfo kute lilicedze emandla ekulwa. Lingahle lente titsa talo kutsi tilwe todvwana nobe litente tehlukane ekhatsi. Lomunye umholi welibutfo laseJalimane wavuma kutsi libutfo lakhe leMphi Yelive Yekucala lancotjwa ngesizatfu sekutsi belikhohlisiwe. NaSathane usebentisa indlela lefanako kute ahlukanise aphindze ancobe bazalwane nabodzadze labangemaKhristu, ngekutsi ahlanyele umoya wekungevani nobe abente bangasatihlanganisi nenhlangano yaJehova ngenca yekutsi bacabanga kutsi baphetfwe kabi ngulabanye.

Ungadukiswa! Vumela liVi laNkulunkulu kutsi likucondzise. Nasi sibonelo, endzabeni yekuba nebunye emkhatsini webazalwane nabodzadze, liBhayibheli lisikhutsata kutsi sichubeke ‘sitsetselelana ngekukhululeka’ futsi sisheshe sikulungise kungevani. (Khol. 3:13, 14; Mat. 5:23, 24) Lisicwayisa ngekutsi singatehlukanisi nelibandla. (Taga 18:1) Tihlole kutsi usevikelekile yini ekukhohlisweni nguSathane. Tibute: ‘Yini lebeyilawula ingcondvo yami ngalesikhatsi ngisenkingeni? Bengilawulwa ngumoya walelive yini nobe bengilawulwa ngumoya waNkulunkulu?’​—Gal. 5:16-26; Ef. 2:2, 3.

Lisotja lelingasametsembi umholi walo alikhoni kulwa kahle. Ngako, bakhohlisi bafuna tindlela tekwenta kutsi lisotja lingasametsembi umholi walo. Bangahle balikhohlise ngekutsi batsi: “Ngeke ubetsembe baholi bakho!” futsi “Ungabavumeli kutsi bakufake engotini!” Kute bakwente kube nesisindvo loku, ngekuhlakanipha bangahle bavete ebaleni emaphutsa lentiwe ngulabaholi. NaSathane wenta kanjalo. Akaphelelwa ngemandla ekukwenta kutsi ungametsembi umholi wakho longuJehova.

Ungativikela njani? Chubeka usenhlanganweni yaJehova futsi usekele labo labaholako, ngisho nobe bangenta emaphutsa.  (1 Thes. 5:12, 13) ‘Ungasheshi uyekele kucabanga’ nangabe uhlaselwa tihlubuki nobe labanye bantfu labetama kukudukisa, ngisho nobe tintfo labatishoko tibonakala tinengcondvo kwani. (2 Thes. 2:2; Thit. 1:10) Lalela seluleko lesaniketwa Thimothewu lobekasemncane. Namatsela kuloko lokufundzile, futsi uwakhumbule kutsi uwafundzephi lawomaciniso. (2 Thim. 3:14, 15) Kunebufakazi lobunyenti lobungakusita kutsi uyetsembe indlela Jehova layisebentisako kute asifundzise liciniso, lese kuphele cishe iminyaka lelikhulu solo ayisebentisa.​—Mat. 24:45-47; Heb. 13:7, 17.

Khumbula kutsi letinye tindlela taSathane tekukhohlisa.kumelula kutibona. Ngaletinye tikhatsi, usebentisa tindlela letesabisako, “lokuyindlela yakhe lendzala lebekayisebentisa kute akhohlise bantfu.” (Easily Led​—A History of Propaganda) Nasi sibonelo, ema-Asiriya abecindzetela titsa tawo ngekutsi “atishayele imitsetfo lesabisako lebeyihambisana nekubakhohlisa,” ngekusho kwaProfesa Philip M. Taylor waseNgilandi. Sathane utawusebentisa kwesaba bantfu, kwesaba lushushiso, kwesaba kufa, kanye nalolunye luhlobo lolubangela kwesaba kute asicindzetele futsi asente siyekele kukhonta Jehova.​—Isa. 8:12; Jer. 42:11; Heb. 2:15.

Ungamvumeli Sathane kutsi akwesabise ngenjongo yekukucedza emandla ekulwa naye futsi akwente ungasetsembeki. Jesu watsi: “Ningabesabi labo lababulala umtimba, babe bangeke bente lokunye etikwaloko.” (Luk. 12:4) Tetsembe ngalokuphelele tetsembiso taJehova tekutsi utawuhlale asigadzile kute asinikete “emandla lamakhulu kakhulu” nekutsi asisite sikhone kumelana netintfo letisesabisako.​—2 Khor. 4:7-9; 1 Phet. 3:14.

Kuliciniso kutsi ngaletinye tikhatsi singahle sibhekane netimo letesabisako naletingasicedza emandla ekulwa. Hlale uwakhumbula emavi Jehova lawaniketa Joshuwa ngenjongo yekumcinisa latsi: “Cina ube nesibindzi. Ungetfuki, futsi ungaphelelwa ngemandla, ngobe Simakadze Nkulunkulu wakho uyakuba nawe nome ngukuphi lapho uya khona.” (Josh. 1:9) Nangabe kukhona lokukukhatsatako, ngekushesha tjela Jehova ngemthantazo konkhe lokukukhatsatako. Ungaciniseka kutsi “Kuthula kwaNkulunkulu .  . . kutawulondvolota tinhlitiyo tenu nemicabango yenu” futsi kukunikete emandla ekukhona kumelana nekukhohliswa nguSathane.​—Fil. 4:6, 7, 13.

Uyawakhumbula yini emanga lasetjentiswa lincusa lema-Asiriya, Rabishake, kute amelane nebantfu baNkulunkulu? Rabishake watsi ‘kute lokutanivikela kuma-Asiriya. Ngisho naloNkulunkulu wenu longuJehova kute latawukwenta.’ Waphindze watsi: ‘Jehova usitjele kutsi silibhubhise lelive.’ Wabese utsini ke Jehova? Watsi: “Ningesatjiswa nguloko lenikuvile, . . . lawo mavi ledzelelako etinceku tenkhosi yase-Asiriya letingihlambalate ngawo.” (2 Khos. 18:22-25; 19:6) Wabese utfumela ingelosi yakhe kutsi ibulale ema-Asiriya langu-185,000 ngebusuku bunye nje kuphela!​—2 Khos. 19:35.

Wake walibukela yini lifilimu, lapho ukhona kubona kahle konkhe lokwentekako futsi ubone lomunye kulelifilimu kutsi udukisekile nekutsi akasacabangi ngendlela lekahle? Mhlawumbe watikhandza sewucabanga utsi: ‘Ungakukholelwa loko! Banemanga!’ Ngako, cabanga ngetingelosi timemeta tisho intfo lefanako nakuwe titsi: “Ungadukiswa ngemanga aSathane!”

Ungawalaleli emanga aSathane. (Taga 26:24, 25) Lalela Jehova futsi wetsembele kuye kuko konkhe lokwentako. (Taga 3:5-7) Mlalele nakakucela ngelutsandvo atsi: “Ndvodzana yami, hlakanipha, khona ngitewujabula.” (Taga 27:11) Nawenta kanjalo, utayincoba lemphi lesengcondvweni yakho!