1. Kufanele sitive njani ngekutsi Jehova uyasivumela sithantaze kuye?

 UMDALI welizulu nemhlaba usiphe sipho lesiligugu—uyasivumela kutsi sithantaze kuye. Cabanga nje: Singatfulula tinhlitiyo tetfu kuJehova nganobe ngusiphi sikhatsi, sisebentisa nobe nguluphi lulwimi futsi akudzingeki size sisho kutsi sitawuthantaza nini kuye. Singathantaza kuye sisesibhedlela nobe sivalelwe ejele, sibe siciniseka kutsi Babe wetfu lonelutsandvo utasilalela. Asisitsatseli phansi lesipho lesiligugu.

2. INkhosi Davide yakhombisa njani kutsi umthantazo bewuligugu kuyo?

² Umthantazo bewuligugu eNkhosini Davide. Yahlabela, idvumisa Jehova yatsi: “Shengatsi umthantazo wami ungafana nemphepho lelungiswe kahle leletfwa embikwakho.” (Hla. 141:1, 2) Ngesikhatsi saDavide, imphepho lengcwele lebeyisetjentiswa ngumphristi ekukhonteni kweliciniso beyilungiswa ngekucophelela. (Eks. 30:34, 35) Lokutsi Davide akhulume ngemphepho bekukhombisa kutsi bekafuna kucabangisisa ngaloko latawukusho kuBabe wakhe wasezulwini. Natsi nguloko lesifuna kukwenta. Sifuna imithantazo yetfu imjabulise Jehova.

3. Ngusiphi simo sengcondvo lokufanele sibe naso nasithantaza kuJehova, futsi leni?

³ Nasithantaza kuJehova, sifuna kumhlonipha kakhulu. Cabanga ngemibono leyabonwa ngu-Isaya, nguHezekeli, nguDanyela naJohane. Lemibono beyingafani, kodvwa bekunalokutsite lebeyifana ngako. Yonkhe beyiveta Jehova njengeNkhosi lenkhulu. Isaya wabona “Jehova ahleti esihlalweni sebukhosi  lesisetulu nalesiphakanyisiwe.” (Isa. 6:1-3) Hezekeli wabona Jehova ahleti esihlalweni sakhe sebukhosi atungeletwe “kukhanya . . . lokufana nemushi wenkosazana.” (Hez. 1:26-28) Danyela wabona “Loyo Lobekaphila Kusukela Endvulo” agcoke tembatfo letimhlophe, sihlalo sakhe sebukhosi sivutsa emalangabi. (Dan. 7:9, 10) Johane wabona Jehova ahleti esihlalweni sebukhosi lesitungeletwe ngumushi wenkosazana lonjengesimaragidu. (Semb. 4:2-4) Kucabanga ngebukhulu baJehova kufanele kusikhumbute ngelilungelo lelihle lesiphiwe lona lekuthantaza kuye, nekutsi kufanele simhloniphe nasithantaza. Kodvwa singakwenta njani loko?

4. Yini lesiyifundzako ngemthantazo kuloko Jesu lakusho ekucaleni kwemthantazo losibonelo kuMatewu 6:9, 10?

⁴ Fundza Matewu 6:9, 10. ENshumayelweni yaseNtsabeni, Jesu wafundzisa bafundzi bakhe kutsi bangathantaza njani ngendlela letawujabulisa Nkulunkulu. Ngemuva kwekusho emavi latsi: “Kufanele nithantaze ngalendlela,” Jesu wacale wabatjela tintfo letibalulekile letihambisana nenjongo yaJehova: lokukungcweliswa kwelibito laJehova; kuta kweMbuso, lotawubhubhisa bonkhe labamelene naNkulunkulu; kanye netintfo letinhle Jehova latawutentela umhlaba nebantfu esikhatsini lesitako. Nasitisho letintfo emithantazweni yetfu, sisuke sikhombisa kutsi intsandvo yaNkulunkulu ibalulekile kitsi.

5. Singatithantazela yini tintfo lesitidzingako?

⁵ Nawuchubeka lomthantazo, Jesu waveta kutsi singatithantazela netintfo lesitidzingako. Singamcela Jehova kutsi asiphe kudla kwangalelo langa, asitsetselele tono tetfu, asisite singalingeki futsi asikhulule kulomubi. (Mat. 6:11-13) Nasithantazela letintfo kuJehova, sisuke sikhombisa kutsi siyati kutsi siyaludzinga lusito lwakhe nekutsi sifuna kumjabulisa.

6. Kufanele sithantazele tintfo letisemthantazweni losibonelo kuphela yini? Chaza.

⁶ Jesu bekangakalindzeli kutsi balandzeli bakhe basebentise emagama lafana ncamashi nalawo lasemthantazweni losibonelo. Kuleminye imithantazo yakhe, Jesu bekakhuluma  ngetintfo lebetimkhatsata ngaleso sikhatsi. (Mat. 26:39, 42; Joh. 17:1-26) Ngendlela lefanako, natsi singatithantazela tintfo letisikhatsatako. Nakufanele sente sincumo, singathantaza sicele kuhlakanipha. (Hla. 119:33, 34) Nakufanele sente sabelo lesimatima, singathantaza sicele kucondza. (Taga 2:6) Batali bangabathantazela bantfwana babo, bantfwana bangathantazela batali babo, futsi sonkhe singabathantazela labo lesidadisha nabo liBhayibheli nalabo lesibashumayelako. Kodvwa nasithantaza akukafaneli sigcine nje ngekucela.

7. Ngusiphi sizatfu lesinaso sekudvumisa Jehova emithantazweni yetfu?

⁷ Kufanele sikhumbule kudvumisa Jehova nasithantaza. Kute lomunye lofanelwe kudvunyiswa kakhulu kwendlula Nkulunkulu wetfu. Jehova ‘muhle futsi uhlale akulungele kutsetselela.’ Ngetulu kwaloko, ‘unesihawu neluvelo, uyephuta kutfukutsela, uchichima lutsandvo lolucotfo futsi wetsembekile.’ (Hla. 86:5, 15) Sinesizatfu lesihle sekudvumisa Jehova ngenca yebuntfu bakhe nangenca yaloko lakwentako.

8. Ngutiphi letinye tintfo lesingambonga ngato Jehova? (Tihlabelelo 104:12-15, 24)

⁸ Ngetulu kwekudvumisa Jehova nasithantaza, kufanele simbonge ngetintfo letinhle lasipha tona. Sibonelo nje, singambonga ngemibalabala lesiyibonako etimbalini, ngekudla lokwehlukahlukene lokumnandzi nangenjabulo lesiyitfolako ngekuba nebangani. Babe wetfu lositsandzako usiphe letintfo kanye naletinye letinyenti kuze nje asente sijabule. (Fundza Tihlabelelo 104:12-15, 24.) Ngetulu kwako konkhe, siyambonga Jehova ngekutsi usiphe imfundvo lesisita sihlale sinekukholwa lokucinile, nangelitsemba lelihle lesinalo ngelikusasa.

9. Yini lengasisita kutsi singakhohlwa kubonga Jehova? (1 KubaseThesalonika 5:17, 18)

⁹ Kungahle kube melula kukhohlwa kubonga Jehova ngato tonkhe tintfo lasentele tona. Yini lengakusita kutsi ungakhohlwa? Ungabhala luhla lwetintfo loticelile kuJehova futsi uhle uluhlola kuze ubone kutsi ngutiphi lasakwentele tona. Ngemuva kwaloko ungabese uyathantaza umbonge ngaloko lakwentele kona. (Fundza 1 KubaseThesalonika  5:17, 18.) Cabanga nganaku: Siyajabula nangabe labanye basibonga. Ngendlela lefanako, Jehova uyajabula nangabe singakhohlwa kumbonga ngekuphendvula imithantazo yetfu. (Khol. 3:15) Kodvwa ngusiphi lesinye sizatfu lesibalulekile sekubonga Nkulunkulu?

10. Ngekusho kwa-1 Phetro 2:21, ngusiphi sizatfu lesinaso sekubonga Jehova ngekutfumela Jesu kutsi ete lamhlabeni?

¹⁰ Fundza 1 Phetro 2:21. Kufanele simbonge Jehova ngekutfumela iNdvodzana yakhe layitsandzako kutsi itosifundzisa. Nasifundza ngekuphila kwaJesu, singafundza lokunyenti ngaJehova nangekutsi singamjabulisa njani. Nangabe sikhombisa kukholwa emhlatjelweni waKhristu, sitawuba nebuhlobo lobuhle naJehova Nkulunkulu futsi sibe nekuthula naye.​—Rom. 5:1.

11. Nguyiphi indzima ledlalwa nguJesu nasithantaza kuJehova?

¹¹ Siyambonga Jehova ngekutsi singathantaza kuye ngeNdvodzana yakhe. Jehova usebentisa Jesu kuze asinike loko lesikucelako. Jehova uyayilalela imithantazo yetfu nasithantaza kuye ngeligama laJesu futsi ayiphendvule. Jesu watsi: “Nobe yini leniyicela egameni lami ngitayenta, kuze Babe akhatinyuliswe ngeNdvodzana.”​—Joh. 14:13, 14.

12. Ngusiphi lesinye sizatfu lesinaso sekubonga Jehova ngeNdvodzana yakhe?

¹² Jehova ucolela tono tetfu asebentisa umhlatjelo waJesu loyinhlawulo. ImiBhalo nayichaza Jesu, itsi ‘ungumphristi wetfu lophakeme lohleti ngesekudla sesihlalo sebukhosi saNkulunkulu emazulwini.’ (Heb. 8:1) Jesu ‘ungumsiti wetfu kuBabe.’ (1 Joh. 2:1) Simbonga kakhulu Jehova ngekutsi usiphe uMphristi Lophakeme lovelana natsi, lobatiko butsakatsaka betfu “nalosincengelako”! (Rom. 8:34; Heb. 4:15) Sinesono, ngako ngaphandle kwemhlatjelo waJesu, besingeke sikhone kusondzela kuJehova sithantaze kuye. Kusebaleni kutsi angeke sikhone kumbonga ngalokwenele Jehova ngesipho lesiligugu lasiphe sona, lokuyiNdvodzana yakhe!

13. Ngebusuku lebebungaphambi kwekufa kwakhe, Jesu wakhombisa njani kutsi uyabatsandza bafundzi bakhe?

¹³ Ngebusuku lobungaphambi kwekufa kwakhe, Jesu wathantaza sikhatsi lesidze athantazela bafundzi bakhe, acela Babe wakhe kutsi ‘abavikele ngenca yalomubi.’ (Joh. 17:15) Loku bekukhombisa kutsi Jesu bekabatsandza kakhulu! Nanobe besekusele kancane kutsi avivinywe kamatima, kodvwa bekakhatsateke ngebaphostoli bakhe.

14. Singakhombisa njani kutsi siyabatsandza bazalwane betfu nabodzadze?

¹⁴ Sisuke silingisa Jesu nasingacabangi nje kuphela ngaloko lokudzingwa ngitsi, futsi sihlale sibathantazela bazalwane betfu nabodzadze. Nasenta njalo, sisuke silalela umyalo waJesu wekutsi sitsandzane, futsi sisuke sikhombisa Jehova kutsi sibatsandza kakhulu bazalwane betfu nabodzadze. (Joh. 13:34) Sisuke singadlali ngesikhatsi nasithantazela bazalwane betfu nabodzadze. LiVi laNkulunkulu litsi “kuncusa kwemuntfu lolungile kunemandla kakhulu.”​—Jak. 5:16.

15. Kubaluleke ngani kutsi sibathantazele bazalwane betfu nabodzadze?

¹⁵ Kufanele sibathantazele bazalwane betfu nabodzadze ngobe babhekana netimo letinyenti letimatima. Singamcela Jehova kutsi abasite bakhone kubeketelela kugula, tehlakalo temvelo, kuphatfwa kabi nobe letinye timo letimatima. Singaphindze sibathantazele bazalwane betfu nabodzadze labasebenta  kamatima kuze basite labo labadzinga lusito. Kungenteka kukhona lobatiko lababhekene naletimo. Kungaba njani ubasho ngemagama nawuthantaza? Sisuke sikhombisa kutsi sibatsandza mbamba nasicela Jehova kutsi abasite bacinisele.

16. Ngusiphi sizatfu lesenta kudzingeke kutsi sibathantazele labo labaholako emkhatsini wetfu?

¹⁶ Labo labaholako ebandleni bajabula kakhulu nasibathantazela futsi lemithantazo iyabasita. Umphostoli Pawula bekati kutsi uyayidzinga imithantazo yalabanye. Wabhala watsi: “Nami nibongithantazela, kuze kutsi nangivula umlomo wami ngikhulume ngesibindzi mayelana nemfihlo lengcwele yetindzaba letimnandzi.” (Ef. 6:19) Nalamuhla sinebazalwane labanyenti labaholako emkhatsini wetfu futsi labasebenta kamatima. Sisuke sikhombisa kutsi siyabatsandza nasicela Jehova kutsi abasekele emsebentini wabo.

17-18. Kunini lapho singacelwa khona kutsi simelele labanye ngemthantazo, futsi yini lokufanele siyikhumbule?

¹⁷ Ngaletinye tikhatsi sihle sicelwa kutsi simelele labanye ngemthantazo. Sibonelo nje, dzadze lodadisha liBhayibheli nalotsite angahle acele lomunye dzadze lahamba naye kutsi athantaze. Ngenca yekutsi lodzadze akamati kahle lomfundzi, mhlawumbe angatsandza kuthantaza ekupheleni kwalesifundvo, ngaleyo ndlela utawube sekati kutsi yini langayisho emthantazweni mayelana nemfundzi.

¹⁸ Umzalwane angahle acelwe kutsi athantaze emhlanganweni longaphambi kwekuyoshumayela nobe emhlanganweni welibandla. Bazalwane labanikwa lesabelo kufanele bakhumbule injongo yalomhlangano. Umthantazo akukafaneli usetjentiselwe kweluleka libandla nobe kusho timemetelo. Emihlanganweni yelibandla leminyenti, ingoma nemthantazo kufanele kutsatse imizuzu lesihlanu, ngako umzalwane lothantazako kufanele ‘angakhulumi tintfo letinyenti,’ ikakhulukati ekucaleni kwemhlangano.​—Mat. 6:7.

19. Yini letasisita kutsi sililungele lilanga laJehova lekwehlulela?

¹⁹ Kufanele sente umthantazo ubaluleke kakhulu ekuphileni kwetfu njengobe lisondzela  lilanga laJehova lekwehlulela. Akhuluma ngaloku, Jesu watsi: “Ngako-ke, hlalani niphapheme, nincuse ngaso sonkhe sikhatsi kuze nikhone kubalekela tonkhe letintfo lokufanele tenteke.” (Luk. 21:36) Nangabe sihlale sithantaza, kukholwa kwetfu kutawucina futsi sitawube sikulungele kufika kwelilanga laNkulunkulu lekwehlulela.

20. Imithantazo yetfu ingafana njani nemphepho lenukelela kamnandzi?

²⁰ Yini lesicoce ngayo? Umthantazo uligugu kitsi. Tintfo letibaluleke kakhulu lokufanele sitithantazele nguleto letihlobene nenjongo yaJehova. Kufanele sibonge nangeNdvodzana yaNkulunkulu nangekubusa kwayo, futsi sithantazele bazalwane betfu nabodzadze. Singatithantazela tintfo lesitidzingako futsi sicele Jehova kutsi asisite sibe nekukholwa lokucinile. Nasicabangisisa ngaphambi kwekutsi sithantaze, sisuke sikhombisa kutsi umthantazo uligugu kitsi. Emavi etfu ‘atamjabulisa’ Jehova, afanane nemphepho lenukelela kamnandzi.—Taga 15:8.