1-2. Yini lengenta Jehova ajabule ngendlela lesimkhonta ngayo?

 YINI lefika engcondvweni yakho nawuva ligama lelitsi “kukhonta”? Mhlawumbe ucabanga ngemzalwane logucile lothantaza ngalokusuka enhlitiyweni. Nobe ucabanga ngemndeni lojabulile lodadisha liBhayibheli.

² Kuto totimbili letimo, lomzalwane nalomndeni bakhonta Jehova. Jehova utakwemukela yini kukhonta kwabo? Utakwemukela nangabe kuhambisana nenjongo yakhe, nabamtsandza futsi bamhlonipha. Simtsandza kakhulu Jehova. Siyati kutsi kufanele akhontwe futsi sifuna kumkhonta ngendlela lencono kakhulu.

3. Sitawucoca ngani kulesihloko?

³ Kulesihloko, sitawucoca ngekukhonta lebekwemukelwa nguNkulunkulu esikhatsini lesendlulile. Sitawuphindze sicoce ngetindlela letingu-8 tekukhonta Nkulunkulu latemukelako lamuhla. Njengoba senta njalo, singacabanga ngekutsi singayitfutfukisa njani indlela lesimkhonta ngayo Jehova. Sitawuphindze sicoce ngetizatfu letisenta sijabule nasikhonta Jehova ngendlela lekahle.

4. Tikhonti taJehova tangesikhatsi lesendlulile takhombisa njani kutsi tiyamtsandza Jehova nekutsi tiyamhlonipha?

⁴ Emadvodza lafaka ekhatsi Abela, Nowa, Abrahama naJobe akhombisa kutsi ayamhlonipha Jehova nekutsi ayamtsandza. Akhombisa njani? Akhombisa ngekumlalela, ngekuba nekukholwa kuye nangekumentela iminikelo. LiBhayibheli alisitjeli konkhe lebekufanele akwente nawamkhonta. Kodvwa enta konkhe lokusemandleni awo kuze advumise Jehova futsi wayemukela indlela lebewamkhonta ngayo. Ngemuva kwesikhatsi Jehova wanika ema-Israyeli uMtsetfo waMosi. Lemitsetfo beyifaka ekhatsi ticondziso letimayelana nekutsi angamkhonta njani Jehova ngendlela layemukelako.

5. Nguluphi lushintjo lolwaba khona endleleni yekukhonta Jehova ngemuva kwekufa kwaJesu nekuvuswa kwakhe?

⁵ Ngemuva kwekufa kwaJesu nekuvuswa kwakhe, Jehova bekangakalindzeli kutsi bantfu balalele uMtsetfo waMosi. (Rom. 10:4) EmaKhristu bekufanele alalele umtsetfo lomusha, ‘lokungumtsetfo waKhristu.’ (Gal. 6:2) ‘Lomtsetfo’ bewangawulalela ngekutsi alingise sibonelo saJesu futsi ente loko lakufundzisa. Bekungakadzingeki kutsi ayibambe ngenhloko nobe agcine luhla lwetintfo lokufanele atente nalebekungakafaneli atente. Nalamuhla emaKhristu enta konkhe langakwenta kute alingise Khristu khona atawujabulisa Jehova futsi ‘aphumule.’—Mat. 11:29.

6. Singasisita njani lesihloko?

⁶ Njengobe sitawube sicoca ngendlela ngayinye yekukhonta Nkulunkulu, tibute, ‘Sengitfutfuke kanganani endleleni lengikhonta ngayo Nkulunkulu?’ Ungaphindze utibute, ‘Ngingayitfutfukisa yini indlela lengikhonta ngayo Nkulunkulu?’ Kufanele ujabule ngentfutfuko loyentile, kodvwa kufanele ucele Jehova akusite ubone lawungatfutfukisa khona.

7. Jehova utiva njani ngemithantazo yetfu lesuka enhlitiyweni?

⁷ Sisuke sikhonta Jehova nasithantaza. ImiBhalo ifananisa imithantazo yetfu nemphepho lelungiswe kahle lebeyinikelwa ethendeni lekukhontela futsi ngekuhamba kwesikhatsi yanikelwa ethempelini. (Hla. 141:2) Lemphepho beyineliphunga lelinukelela kahle lebelimjabulisa Nkulunkulu. Ngendlela lefanako, imithantazo yetfu lesuka enhlitiyweni ‘iyamjabulisa’ Jehova ngisho nobe sisebentisa emagama lamelula. (Taga 15:8; Dut. 33:10) Siyaciniseka kutsi Jehova uyajabula nakasiva simtjela kutsi siyamtsandza futsi sibonga. Ufuna simtjele tintfo letisikhatsatako, litsemba lesinalo netintfo lesitifisako. Ngaphambi kwekutsi uthantaze cabanga kutsi utawutsini. Nawenta njalo, utawukhona kunikela ‘ngemphepho’ lemnandzi kuBabe wakho wasezulwini.

8. Nguliphi litfuba lelihle lesinalo lekudvumisa Nkulunkulu?

⁸ Nasidvumisa Jehova sisuke simkhonta. (Hla. 34:1) Sisuke sidvumisa Jehova nasikhuluma kahle ngebuntfu bakhe lobuhle nangetintfo latentile. Sitawuba netizatfu letinyenti tekudvumisa Jehova nangabe sibonga ngetintfo lasentele tona. Nangabe sitinika sikhatsi sekuzindla ngato tonkhe tintfo lasentele tona, angeke siseswele sizatfu sekumdvumisa. Umsebenti wekushumayela usiniketa litfuba lelihle ‘lekunikela kuNkulunkulu umhlatjelo wekudvumisa,  lokusitselo setindzebe tetfu.’ (Heb. 13:15) Njengobe kufanele sicabangisise ngekutsi sitawutsini kuJehova ngaphambi kwekutsi sithantaze, kufanele sicabangisise ngekutsi sitawutsini kulabo lesibashumayelako. Sifuna ‘umhlatjelo wetfu wekudvumisa’ ube nguloncono kakhulu, kungako nasishumayela labanye sikhuluma ngalokusuka enhlitiyweni.

9. Kuba khona emihlanganweni kusisita njani njengoba bekusita ema-Israyeli nawahlangana ndzawonye kuze akhonte Jehova? Ikusite njani wena imihlangano?

⁹ Sisuke sikhonta Jehova nasiya emihlanganweni. Naku ema-Israyeli latjelwa kona: “Katsatfu ngemnyaka, bonkhe labadvuna kini kufanele baye embikwaJehova Nkulunkulu wenu endzaweni layikhetsile.” (Dut. 16:16) Bekufanele ashiye emasimu awo nemakhaya awo angakagadvwa. Kodvwa Jehova bekawetsembisile watsi: “Kute lotawufisa kutsatsa live lenu nanisahambile niyobona Jehova Nkulunkulu wenu.” (Eks. 34:24) Ngenca yekutsi ema-Israyeli bekametsemba kakhulu Jehova, bekaya kulemikhosi lebeyiba khona njalo ngeminyaka. Ngekwenta njalo bewatfola tibusiso letinyenti; bekawucondza kancono uMtsetfo waNkulunkulu, azindle ngebuhle bakhe futsi bekajabulela kuba naletinye tikhonti taJehova. (Dut. 16:15) Sitfola tibusiso letifanako nasenta konkhe lokusemandleni etfu kuze sibe khona emihlanganweni yebuKhristu. Jehova ujabula kakhulu nasita emihlanganweni silungiselele timphendvulo letimfishane futsi leticatjangwe kahle.

10. Kuhlabela kubaluleke ngani nasikhonta Nkulunkulu?

¹⁰ Sisuke sikhonta Jehova nasihlabela. (Hla. 28:7) Kuma-Israyeli, kuhlabela bekubaluleke kakhulu nawakhonta Nkulunkulu. INkhosi Davide yakhetsa emaLevi langu-288 kutsi ahlabele ethempelini. (1 Khr. 25:1, 6-8) Lamuhla, nasihlabela tingoma tekudvumisa sisuke sikhombisa Nkulunkulu kutsi siyamtsandza. Kutsi livi letfu linjani akusiyo intfo lebalulekile. Cabanga nganaku, nasikhuluma “sonkhe siyona tikhatsi letinyenti,” kepha loko akusivimbi kutsi sikhulume ebandleni nasemsebentini wetfu wekushamayela. (Jak. 3:2) Ngendlela lefanako, akukafaneli sivumele kukhatsateka ngemavi etfu kutsi kusente singasatihlabeli tingoma tekudvumisa Jehova.

11. Njengobe kusho Tihlabelelo 48:13, kubaluleke ngani kutsi umndeni udadishe liBhayibheli ndzawonye?

¹¹ Sisuke sikhonta Jehova nasitidadishela liBhayibheli futsi sifundzisa bantfwabetfu ngaye. NgeliSabatha, ema-Israyeli bekangasebenti futsi ngalelo langa bewacinisa buhlobo bawo naJehova. (Eks. 31:16, 17) Tikhonti taJehova letetsembekile betifundzisa bantfwabato ngaye nangebuhle bakhe. Natsi lamuhla kufanele sitinike sikhatsi sekufundza liVi lakhe futsi silidadishe. Lena ngulenye indlela lesikhonta ngayo Jehova futsi isisita sisondzelane naye. (Hla. 73:28) Nangabe umndeni udadisha liBhayibheli kanye kanye, loko kungabasita bantfwana kutsi babe nebuhlobo lobuhle naBabe wetfu wasezulwini lositsandzako.—Fundza Tihlabelelo 48:13.

12. Yini lesiyifundza endleleni Jehova bekatsatsa ngayo umsebenti walabo bebakha tintfo letisethendeni lekukhontela?

¹² Sisuke sikhonta Jehova nasakha tindzawo tekukhontela Nkulunkulu futsi sitinakekela. LiBhayibheli litsi umsebenti wekwakha lithende lekukhontela netintfo lebetingekhatsi kulo ‘bekungumsebenti longcwele.’ (Eks. 36:1, 4) Nalamuhla, umsebenti wekwakha emaHholwa eMbuso naletinye takhiwo tenhlangano ungcwele kuJehova. Labanye bazalwane nabodzadze bacitsa sikhatsi  lesinyenti benta lomsebenti. Sijabula kakhulu ngalomsebenti lobalulekile labawentako. Baphindze bente nemsebenti wekushumayela. Labanye babo bayafisa kuba ngemahlahlandlela. Labadzala belibandla bakhombisa kutsi bayawusekela umsebenti wekwakha ngekutsi bavumele labazalwane nabodzadze labasebenta kamatima kutsi babe ngemahlahlandlela nangabe bakufanela. Ngisho nobe sinelikhono lekwakha nobe site, sonkhe singatigcina letindzawo tihlobile futsi sitigcine tisesimeni lesikahle.

13. Kufanele sitive njani ngeminikelo lesiyentako kuze sisekele umsebenti weMbuso?

¹³ Sisuke sikhonta Jehova nasinikela kuze sisekele umsebenti weMbuso. Ema-Israyeli bekungakafaneli aye embikwaJehova alengisa tandla. (Dut. 16:16) Bekufanele aphatse lokutsite kuye ngetimo tawo. Nawenta njalo, bewakhombisa kutsi ayabonga ngako konkhe Jehova lawentela kona. Singakhombisa njani kutsi siyamtsandza Jehova nekutsi siyabonga ngako konkhe lasentela kona? Lenye indlela kutsi sinikele ngemali kuze sisekele libandla kanye nemsebenti wemhlaba wonkhe kuye ngetimo tetfu. Umphostoli Pawula watsi: “Kupha ngalokusuka enhlitiyweni kuyamjabulisa Nkulunkulu, ngobe ufuna umuntfu aphe ngaloko lanako, hhayi ngaloko lete kona.” (2 Khor. 8:4, 12) Jehova uyajabula ngeminikelo lesiyentako ngisho ingakanani.—Mak. 12:42-44; 2 Khor. 9:7.

14. Ngekusho kweTaga 19:17, Jehova utiva njani nasisita bazalwane betfu nabodzadze labadzinga lusito?

¹⁴ Sisuke sikhonta Jehova nasisita lamanye emaKhristu ladzinga lusito. Jehova wetsembisa kuwabusisa ema-Israyeli lebekapha labeswele. (Dut. 15:7, 10) Njalo nasisisita bazalwane betfu nabodzadze labeswele Jehova ukutsatsa njengekutsi sipha yena. (Fundza Taga 19:17.) Sibonelo nje, ngesikhatsi emaKhristu aseFiliphi atfumelela Pawula lebekaboshiwe sipho, watsi ‘singumhlatjelo lowemukelekako nalojabulisako kuNkulunkulu.’ (Fil. 4:18) Cabanga ngalabo labasebandleni lokulo futsi utibute, ‘Ukhona yini lengingamsita?’ Jehova uyajabula nakasibona sisebentisa sikhatsi setfu, emandla, emakhono kanye netintfo lesinato kuze sisite labo labadzinga lusito. Loko ukutsatsa njengalenye indlela lesimkhonta ngayo.—Jak. 1:27.

15. Yini leyenta kukhonta Nkulunkulu ngendlela lekahle kungabi ngumtfwalo ngisho nobe kudzinga sikhatsi nemandla?

¹⁵ Kukhonta Jehova ngendlela lekahle kudzinga sikhatsi nemandla, kodvwa akusiwo umtfwalo. (1 Joh. 5:3) Sisho ngani? Ngobe sikhonta Jehova ngenca yekutsi siyamtsandza. Cabanga ngemntfwana lofuna kupha babe wakhe intfo letsite. Kungenteka acitse ema-awa amdvwebela sitfombe. Lomntfwana akatisoli ngesikhatsi lasicitse advweba lesitfombe. Uyamtsandza babe wakhe futsi uyakujabulela kumupha lesipho. Ngendlela lefanako, ngenca yekutsi siyamtsandza Jehova siyajabula ngekucitsa sikhatsi setfu nemandla kuze simkhonte.

16. Ngekusho kwembhalo waKumaHebheru 6:10, Jehova utiva njani ngaloko ngamunye wetfu lakhona kumentela kona kuze simjabulise?

¹⁶ Batali lababatsandzako bantfwababo abalindzeli kutsi bonkhe bantfwababo babaphe tipho letifananako. Bayati kutsi labantfwana behlukene futsi netimo tabo atifani. Ngendlela lefanako, Babe wetfu wasezulwini uyakwati loko ngamunye wetfu langakhona kukwenta. Mhlawumbe wena ungakhona kwenta lokunyenti kunalabo lobatiko  futsi lobatsandzako. Nobe kungenteka ungakhoni kwenta lokunyenti njengalabanye mhlawumbe ngenca yekukhula, ngenca yemphilo nobe ngenca yekutsi kufanele unakekele umndeni wakho. Kungakudvumati loko. (Gal. 6:4) Jehova angeke awukhohlwe umsebenti wakho. Utawujabula nangabe wenta konkhe longakhona kukwenta futsi ukwenta ngetizatfu letinhle. (Fundza KumaHebheru 6:10.) Jehova uyakubona naloko lofisa kukwenta. Ufuna ujabule ngako konkhe lokhona kumentela kona.

17. (a) Yini lesingayenta nangabe kulukhuni kwenta lokunye kwaloku lesicoce ngako kuIesihloko? (b) Kukusite njani loku lokukulelibhokisi lelitsi “ Longakwenta Kuze Ujabule Kakhulu”?

¹⁷ Yini lesingayenta nangabe kumatima kwenta lokunye kwaloku lesesicoce ngako, njengekutidadishela liBhayibheli nobe kwenta umsebenti wekushumayela? Nasicitsa sikhatsi lesinyenti senta letintfo, sitawutfola kutsi siyatijabulela futsi siyazuza kuto. Kukhonta kwetfu Jehova singakufananisa nekwenta lokutsite, njengekujima nobe kudlala insimbi yemculo. Nangabe singakwenti njalo, angeke siwubone umphumela lomuhle. Kodvwa asesitsi sikhetsa kukwenta onkhe malanga, ekucaleni singakwenta sikhatsi lesincane kodvwa njengobe sichubeka singabese siyasengeta sikhatsi lesisicitsa sikwenta. Njengoba sibona imiphumela lemihle sitakulangatelela kukwenta futsi sikujabulele. Loku kuyafana nangekukhonta kwetfu Nkulunkulu.

18. Yini lebaluleke kakhulu kitsi, futsi ngumiphi imiphumela lesitayitfola nasikwenta?

¹⁸ Kukhonta Jehova ngenhlitiyo yetfu yonkhe kubaluleke kakhulu kitsi. Nasenta njalo siyajabula, sibe nenjongo ekuphileni futsi sibe nelitsemba lekukhonta Jehova kuze kube phakadze. (Taga 10:22) Kwanyalo sinekuthula ngobe siyati kutsi Jehova uyabasita bantfu bakhe nabanetinkinga. (Isa. 41:9, 10) Sinetizatfu letinhle tekujabula njengobe sikhonta Babe wetfu lositsandzako lokumfanele ‘kwemukela inkhatimulo neludvumo’ kuyo yonkhe indalo yakhe!—Semb. 4:11.