1922—Iminyaka Lelikhulu Leyendlulile
‘NKULUNKULU . . . usinika . . . kuncoba . . . ngaJesu Khristu.’ (1 Khor. 15:57, King James Version) Lamavi akhetfwa kutsi abe sihloko semnyaka nga-1922, futsi acinisekisa Bafundzi BeliBhayibheli kutsi batawubusiswa ngekwetsembeka kwabo. Kulowo mnyaka, Jehova wababusisa. Wababusisa ngesikhatsi bacala kutikhicitela bona tincwadzi tabo nangesikhatsi bacala kusebentisa iwayilesi kuze basakate emaciniso eMbuso. Ngasekupheleni kwa-1922, kwabacacela kutsi Jehova bekababusisa bantfu bakhe. LaBafundzi BeliBhayibheli bahlangana emhlanganweni wesifundza lobalulekile lebewuseCedar Point, e-Ohio, eMelika. Loko lokwenteka kulomhlangano kuyitsintsile indlela inhlangano yaJehova lesebenta ngayo kuze kube ngulamuhla.
“UMBONO LOMUHLE”
Kwaba nesidzingo lesikhulu setincwadzi njengobe umsebenti wekushumayela bewutfutfuka. Bazalwane baseBethel leseBrooklyn bebakhicita bomagazini, kodvwa bebasebentisa letinye tinkampane kuze tibakhicitele tincwadzi. Kwaphela tinyanga lenye inkampane lebeyibakhicitela tincwadzi ingasabakhiciteli tincwadzi letenele letitawusetjentiswa emsebentini wekushumayela. Ngako uMzalwane Rutherford wabuta umzalwane Robert Martin, lobekacondzisa etikweni letekushicilela kutsi bangakhona yini kutishicilela bona tincwadzi.
Indzawo yekushicilela lebeyiseConcord Street, eBrooklyn, eNew York
UMzalwane Martin watsi: “Lombono bewumuhle kakhulu ngobe bekusho kutsi sesitawutikhicitela tsine tincwadzi.” Bazalwane bacasha indzawo e-18 Concord Street, eBrooklyn futsi batfola netintfo lebetitawudzingeka.
Akusibo bonkhe labajabula ngaloko. Umcondzisi walenkampane lebeyishicilela tincwadzi tetfu weta watobona lendzawo lebesisebentela kuyo. Watsi: “Ninemishini lesezingeni lelisetulu kakhulu, kodvwa kute ngisho namunye lakini lokwati kuyisebentisa. Etinyangeni letisitfupha nje nitawube seniyibulele.”
UMzalwane Martin watsi: “Loko lakusho bekubonakala kuliciniso, kodvwa besati kutsi Jehova unatsi, futsi wasisita.” UMzalwane Martin bekacinisile. Ngekushesha nje lemishini beseyikhicita tincwadzi letingu-2 000 ngelilanga.
Labo labasebenta lakushicilelwa khona beme eceleni kwemishini lokutsiwa yi-linotype
KUFINYELELA TINKHULUNGWANE TEBANTFU NGEWAYILESI
Ngetulu kwekutikhicitela bona tincwadzi, bantfu baJehova bacala kusebentisa lenye indlela kuze basakate tindzaba letimnandzi, basebentisa iwayilesi. NgeLisontfo ntsambama, ngaFebruary 26, 1922, uMzalwane Rutherford wabeka inkhulumo kwekucala emsakatweni. Sihloko salenkhulumo besitsi: “Tigidzi Letiphilako Nyalo Angeke Tife” esiteshini semsakato i-KOG, e-Los Angeles, eCalifornia, eMelika.
Bantfu labangaba ngu-25 000 bayiva lenkhulumo. Labanye babhala tincwadzi babonga. Lenye incwadzi beyibhalwe nguWillard Ashford, lobekahlala eSanta Ana, eCalifornia. Wabonga uMzalwane Rutherford ngalenkhulumo “lemnandzi.” Wengeta watsi: “Landlini kunebantfu labatsatfu labagulako, ngako besingeke sikhone kuyilalela lenkhulumo noma ngabe beyibekwa dvutane nalapho sihlala khona.”
Emavikini lalandzela, kwachubeka kusakatwa. Ngasekupheleni kwemnyaka, Sicongosekulindza satsi “cishe bantfu labangu-300 000 sebawuvile lomlayeto emsakatweni.”
Bakhutsatwa nguloko, Bafundzi BeliBhayibheli bancuma kwakha siteshi semsakato eStaten Island, dvutane naseBethel leseBrooklyn. Eminyakeni leyalandzela, Bafundzi BeliBhayibheli bebatawusebentisa lesiteshi lokutsiwa yi-WBBR, kuze basakate umlayeto weMbuso kubantfu labanyenti nasetindzaweni letinyenti.
“ADV”
NgaJune 15, 1922, Sicongosekulindza satsi bekutawuba nemhlangano wesifundza eCedar Point, e-Ohio, kusukela ngaSeptember 5 kuya kumhlaka-13, 1922. Bafundzi BeliBhayibheli bajabula kakhulu nabefika eCedar Point.
Enkhulumeni yakhe yekuvula lomhlangano, uMzalwane Rutherford watsi: “Ngiyaciniseka kutsi iNkhosi . . . itawubusisa lomhlangano futsi lomhlangano utawuniketa bufakazi emhlabeni wonkhe.” Lebebabeka tinkhulumo kulomhlangano bebakhutsata bazalwane nabodzadze ngalokuphindzaphindziwe kutsi bashumayele.
Sicumbi sebantfu lebesisemhlanganweni wesifundza nga-1922 eCedar Point, e-Ohio
NgaLesihlanu, September 8, kwaba nebantfu labangaba ngu-8 000 kulelihhola, futsi bebayibuke ngalabovu inkhulumo yeMzalwane Rutherford. Bebanelitsemba lekutsi utawuchaza kutsi usho kutsini “ADV,” lebewubhalwe kuletimemo tabo. Nabahleti, labanyenti babona indvwangu ngetulu kwendzawo yesikhulumi. Arthur Claus, lebekete kulomhlangano esuka eTulsa, e-Oklahoma, eMelika, wahlala lapho bekatawuva kahle khona tinkhulumo ngobe ngaleso sikhatsi bekusete tikhulisamavi.
“Besilalele konkhe lebekukhulunywa”
Kuze kucinisekiswe kutsi kute lophazamisa loluhlelo, sihlalo wamemetela kutsi labaphute kufika angeke bavunyelwe kutsi bangene kulelihhola nasekucale inkhulumo yeMzalwane Rutherford. Nga-9:30 ekuseni, uMzalwane Rutherford wacala ngekucaphuma emavi aJesu lakuMatewu 4:17 latsi: ‘Umbuso welizulu sewusondzele.’ (King James Version) Ngesikhatsi achaza kutsi bantfu batawuva njani ngaloMbuso, watsi: “Jesu watsi ngesikhatsi sekuba khona kwakhe utawenta umsebenti wekuvuna bantfu futsi ahlanganise ndzawonye labo labetsembekile.”
UMzalwane Claus, lebekahleti kulelihhola watsi: “Besilalele konkhe lebekukhulunywa.” Kodvwa wacalwa kugula angakalindzeli futsi kwadzingeka kutsi aphume kulelihhola. Arthur waphuma nanobe bekangafuni ngobe bekati kutsi bekangeke avunyelwe kutsi aphindze angene.
Ngemuva nje kwesikhashana, wativa sekancono. Utsi nakabuyela emuva, weva kushaywa tandla. Loko kwamfaka umfutfo! Wancuma kutsi nangabe kudzingeka kutsi agibele eluphahleni lwalesakhiwo utawenta njalo kuze eve lenkhulumo lemnandzi kangaka. UMzalwane Claus, bekaneminyaka lengu-23 ngaleso sikhatsi, futsi wacanca waya eluphahleni. Bekunendzawo levulekile eluphahleni, futsi njengobe asondzela wanaka kutsi “bekuvakala kahle kakhulu.”
Kodvwa Arthur bekangasiyedvwa. Labanye bangani bakhe bebakuleliphahla. Lomunye wabo bekunguFrank Johnson, weta kuye wafike wambuta watsi: “Unawo yini umukhwa lomncane?”
Arthur watsi: “Yebo.”
Frank watsi: “Yaze yaphendvuleka imithantazo yetfu. Uyakubona loku? Kunalokubhaliwe kuko futsi kuboshelwe kuletipikili. Ubolalelisisa liJaji. * Nalitsi, ‘memetelani, memetelani,’ ubojuba letintsambo letine.”
Ngako njengobe Arthur bekaphetse lomukhwa, bemela uMzalwane Rutherford kutsi asho lamavi. Ngekushesha, wefika kulencenye lebalulekile yalenkhulumo yakhe. Ngemdlandla lomkhulu, uMzalwane Rutherford washo ngelivi lelikhulu watsi: “Tsembekani futsi nibe bofakazi beliciniso beNkhosi. Timiseleni kuyilwa lemphi kuze kube ngulapho iBhabhulona ibhujiswa ngalokuphelele. Shumayelani lomlayeto yonkhe indzawo. Umhlaba kufanele wati kutsi Jehova unguNkulunkulu nekutsi Jesu Khristu uyiNkhosi yemakhosi. Leli lilanga lelibaluleke kakhulu. Bukani, iNkhosi iyabusa! Ninikwe umsebenti wekutsi nitjele labanye ngaloku. Ngako memetelani, memetelani, memetelani, iNkhosi neMbuso wayo!”
Arthur watsi yena nalabazalwane bajuba letintsambo futsi lamagama abonakala kahle. Bekatsi: “Memetelani iNkhosi neMbuso,” futsi bekamelelwa ngulo “ADV.”
UMSEBENTI LOBALULEKILE
Lomhlangano wesifundza lebewuseCedar Point wasita bazalwane nabodzadze kutsi banake kakhulu umsebenti wekushumayela ngeMbuso futsi labo bebanasifiso sekuwenta bawenta. Lelinye lihlahlandlela lase-Oklahoma, eMelika labhala latsi: “Besishumayela etindzaweni lapho khona bantfu labanyenti bebasebenta etimayini temalahle, futsi bebaphuye kakhulu.” Latsi ngalokuvamile bantfu nabeva umlayeto lokumagazini i-Golden Age, “bebakhala tinyembeti.” Laphindze latsi: “Siyajabula ngekutsi siyakhona kubadvudvuta.”
LaBafundzi BeliBhayibheli bebakwati kubaluleka kwemavi aJesu latfolakala kuLukha 10:2 latsi: “Umsebenti wekuvuna mkhulu, kodvwa tisebenti timbalwa.” Njengobe umnyaka uphela, bebatimisele kakhulu kumemetela umlayeto weMbuso kuyo yonkhe indzawo.
^ UMzalwane Rutherford bekahle abitwa ngekutsi “liJaji” ngobe bekake waba lijaji eMissouri, eMelika.
