1. Yini leyentiwa bantfu labanyenti nabaniketwa seluleko lesihlakaniphile lesiseBhayibhelini? (Taga 1:20, 21)

 EMAVENI lamanyenti, bekuvamile kutsi bazalwane betfu nabodzadze labajabulile beme etindzaweni tawonkhe wonkhe futsi banikete bantfu tincwadzi tetfu tekufundza. Kungenteka nawe ukile wawenta lomsebenti. Nangabe kunjalo, kungenteka loko kwakukhumbuta umbhalo weTaga lokhuluma ngekutsi kuhlakanipha kumemeta etindzaweni tawonkhe wonkhe kuze bantfu bakuve. (Fundza Taga 1:20, 21.) LiBhayibheli kanye netincwadzi tetfu, kucukutse “kuhlakanipha lokungiko,” lokukuhlakanipha kwaJehova. Bantfu bayakudzinga lokuhlakanipha kuze batfole kuphila lokuphakadze. Siyajabula nangabe lotsite emukela incwadzi yetfu, kodvwa akusibo bonkhe labatemukelako. Labanye abafuni kukwati loko lokushiwo liBhayibheli. Kantsi labanye bayasihleka. Bacabanga kutsi liBhayibheli seliphelelwe sikhatsi. Labanye bayakusola loko lokufundziswa liBhayibheli endzabeni yekutiphatsa, batsi labo labalilalelako bete umusa futsi batibona balunge kakhulu kunalabanye. Nanobe kunjalo, ngelutsandvo Jehova uyachubeka anika bonkhe bantfu kuhlakanipha lokungiko. Kanjani?

2. Singakutfolaphi kuhlakanipha lokungiko lamuhla, kodvwa yini bantfu labanyenti labakhetsa kuyenta?

² Lenye indlela Jehova lasinika ngayo kuhlakanipha lokungiko kusebentisa liVi lakhe liBhayibheli. Bantfu labanyenti banalo. Kutsiwani ngetincwadzi tetfu letisekelwe eBhayibhelini? Sisitwa nguJehova, nato titfolakala ngetilwimi letingetulu kwa-1 000. Labo labalalelako, lokungulabo labakusebentisako loko labakufundzako, bayazuza. Nanobe kunjalo, bantfu labanyenti  abakufuni kuhlakanipha lokungiko. Nakufanele bente tincumo, batetsemba bona nobe balalele loko lokushiwo ngulabanye bantfu. Bangahle basibukele phansi ngenca yekutsi silalela loko lokushiwo liBhayibheli. Lesihloko sitawucoca ngekutsi yini leyenta bantfu bente kanjalo. Kodvwa asesicale sicoce ngekutsi singakutfola njani kuhlakanipha lokuvela kuJehova.

3. Yini lokufanele siyente kuze sihlakaniphe mbamba?

³ Kuhlakanipha likhono lekusebentisa loko lesikwatiko kuze sente tincumo letikahle. Nobe kunjalo, kuhlakanipha lokungiko kufaka ekhatsi lokungetulu kwaloku. LiBhayibheli litsi: “Kwesaba Jehova kusicalo sekuhlakanipha, futsi kwati Nkulunkulu Longcwele kwenta umuntfu abe nekucondza.” (Taga 9:10) Ngako nakufanele sente sincumo lesibalulekile kufanele sitfole loko Jehova lakucabangako ngaloko. Loko singakwenta ngekutsi sifundze liBhayibheli kanye netincwadzi letisekelwe eBhayibhelini. Nasenta njalo sitawukhombisa kutsi sihlakaniphe mbamba.—Taga 2:5-7.

4. Sisho ngani kutsi nguJehova kuphela longasinika kuhlakanipha lokungiko?

⁴ NguJehova kuphela longasinika kuhlakanipha lokungiko. (Rom. 16:27) Sisho ngani kutsi unguMtfombo wekuhlakanipha? Kwekucala, njengobe anguMdali, unelwati lolunyenti ngendalo yakhe futsi uyicondza kahle. (Hla. 104:24) Kwesibili, konkhe lakwentako kukhombisa kutsi uhlakaniphile. (Rom. 11:33) Kwesitsatfu, seluleko saJehova lesihlakaniphile sihlale sibasita labo labasisebentisako. (Taga 2:10-12) Nangabe sifuna kuhlakanipha lokungiko, kufanele siwemukele lamaciniso futsi siwavumele asicondzise nasenta tincumo nobe nasifuna kwenta lokutsite.

5. Uba yini umphumela nangabe bantfu bangavumi kutsi nguJehova uMtfombo wekuhlakanipha lokungiko?

⁵ Bantfu labanyenti lesibatfola emsebentini wekushumayela bayabubona buhle bendalo; kodvwa bayaphika kutsi kuneMdali, kunaloko batsi tintfo tativelela. Labanye labatsi bakholelwa kuNkulunkulu batsi timiso teliBhayibheli setiphelelwe sikhatsi futsi bakhetsa kuphila ngendlela labayifunako. Ube yini umphumela? Lomhlaba uyindzawo lencono yini ngenca yekutsi bantfu batsembele ekuhlakanipheni kwabo kunekuhlakanipha kwaNkulunkulu? Bayitfolile yini injabulo sibili nobe litsemba lelingilo ngelikusasa? Loko lesikubonako kusenta siciniseke nganali liciniso lelitsi: “Kute kuhlakanipha nobe kucondza nobe seluleko lesingamelana naJehova.” (Taga 21:30) Loko kusikhutsata kutsi sichubeke sicela Jehova kutsi asiphe kuhlakanipha lokungiko! Lokubuhlungu kutsi bantfu labanyenti abakwenti loko. Leni?

6. Ngekusho kwaTaga 1:22-25, bobani labangakufuni kuhlakanipha lokungiko?

⁶ Labanyenti abakunaki kuhlakanipha lokungiko ‘lokumemeta esitaladini.’ Ngekusho kweliBhayibheli, kunemacembu lamatsatfu ebantfu labangakufuni kuhlakanipha, ‘lokubantfu labete lwati,’ “labaphukutanako” kanye ‘netilima.’ (Fundza Taga 1:22-25.) Asesicoce ngekutsi yini leyenta labantfu bangakwemukeli kuhlakanipha kwaNkulunkulu nekutsi yini lesingayenta kuze singafanani nabo.

7. Yini leyenta labanye bakhetse ‘kubabete lwati’?

⁷ “Bantfu labete lwati” ngulabo labakukholelwa konkhe labakuvako futsi labasheshe badukiseke. (Taga 14:15) Sivame kuhlangana nabo nasenta umsebenti wekushumayela. Nasi sibonelo, cabanga ngetigidzi tebantfu letidukiswa baholi benkholo nobe  betepolitiki. Labanye bayamangala nababona kutsi labaholi babadukisile. Kodvwa labantfu lesikhuluma ngabo kuTaga 1:22 batikhetsele kuhlala bete lwati ngoba bayakutsandza loko. (Jer. 5:31) Benta labakufunako futsi abafuni kufundza loko lokushiwo liBhayibheli nobe kulalela imitsetfo yalo. Bantfu labanyenti bativa ngendlela lomunye make waseQuebec, eCanada, lativa ngayo nakatjela lomunye Fakazi atsi: “Nangabe umphristi wetfu asidukisa lelo liphutsa lakhe, akusilo letfu!” Asifuni kufanana nebantfu labakhetsa kubabete lwati!—Taga 1:32; 27:12.

8. Yini letasisita kutsi sihlakaniphe?

⁸ Ngako liBhayibheli lisikhutsata kufanele kutsi singabi bantfu labete lwati kodvwa ‘sicabangise kwebantfu labavutsiwe.’ (1 Khor. 14:20) Lolwati silutfola ngekusebentisa timiso teliBhayibheli ekuphileni kwetfu. Kancane kancane sibese siyabona kutsi letimiso tisisita njani kutsi sigweme tinkinga futsi sente tincumo letihlakaniphile. Ngako kungaba kuhle kutsi sicabange ngetincumo lesitentile. Nangabe sesinesikhatsi sidadisha liBhayibheli futsi siba khona emihlanganweni, singahle sitibute kutsi yini lesibambile kutsi sitinikele kuJehova futsi sibhajatiswe. Nangabe sibhajatisiwe, siyatfutfuka yini endleleni lesishumayela ngayo nalesifundzisa ngayo tindzaba letimnandzi? Tincumo lesitentako tiyakhombisa yini kutsi sicondziswa timiso teliBhayibheli? Siyabukhombisa yini buntfu bebuKhristu endleleni lesiphatsa ngayo labanye? Nangabe sibona kutsi kufanele sitfutfukise, singacabanga ngaloko lesikukhunjutwa nguJehova njengobe ‘kubahlakaniphisa labete lwati.’—Hla. 19:7.

9. Bantfu “labaphukutanako” bakhombise njani kutsi abakufuni kuhlakanipha?

⁹ Licembu lesibili lebantfu labangakufuni kuhlakanipha lokungiko ngulabo “labaphukutanako.” Sihle sihlangana nabo bantfu labanjalo nasenta umsebenti wekushumayela. Bayakutsandza kuhlekisa ngalabanye bantfu. (Hla. 123:4) LiBhayibheli litsi emalangeni ekugcina batawuba banyenti bantfu labaphukutanako. (2 Phet. 3:3, 4) Njengebakhwenyana baLoti, labanye bantfu lamuhla abatinaki tecwayiso letivela kuNkulunkulu. (Gen. 19:14) Bantfu labanyenti bayabahleka labo labaphila ngetimiso teliBhayibheli. Loko bakwenta ngenca yekutsi “balandzela tifiso tabo tetintfo letimbi.” (Juda 7, 17, 18) Indlela liBhayibheli lelibachaza ngayo bantfu labaphukutanako iyafana nendlela lelichaza ngayo tihlubuki nalabo labangenandzaba naJehova!

10. Njengobe kuvetiwe kuTihlabelelo 1:1, yini lesingayenta kuze singagcini sibaphukuti?

¹⁰ Yini lesingayenta kuze natsi singagcini sesibaphukuti? Lokunye lesingakwenta kutsi singatihlanganisi nebantfu labatsandza kukhonona. (Fundza Tihlabelelo 1:1.) Loku kusho kutsi angeke sitilalele tintfo letishiwo tihlubuki nobe sifundze tintfo letitibhalile. Siyati kutsi nangabe singakanaki, singatikhandza sesinemoya wekukhonona futsi sicale kungabata Jehova kanye neticondziso lasiniketa tona asebentisa inhlangano yakhe. Kuze loko kungenteki, kufanele sitibute: ‘Ngivame kukhonona yini nasitfola sicondziso lesisha nobe nasitfola inchazelo lensha? Ngivame kubona emaphutsa yini kulabo labaholako?’ Nangabe sisheshe sikuyekela kukwenta loko, Jehova utawujabula ngatsi.—Taga 3:34, 35.

11. “Tilima” titiva njani ngemitsetfo yaJehova yekutiphatsa?

¹¹ Licembu lesitsatfu lebantfu lelingakufuni kuhlakanipha ngulabo ‘labatilima.’ Batilima ngobe abafuni kuphila ngetimiso taNkulunkulu tekutiphatsa. Benta loko labakubona kukahle. (Taga 12:15) Bantfu labanjalo,  abamfuni Jehova longuMtfombo wekuhlakanipha. (Hla. 53:1) Nasihlangana nabo nasenta umsebenti wekushumayela, bavame kusisola kakhulu ngekutsi sihlonipha imitsetfo leseBhayibhelini. Kodvwa abakhoni kusitjela kutsi nguyiphi indlela lencono lesingaphila ngayo. LiBhayibheli litsi: “Silima ngeke size sikutfole kuhlakanipha lokungiko; kute lesingakhona kukusho esangweni lelidolobha.” (Taga 24:7) Umuntfu losilima angeke asinike seluleko lesihlakaniphile. Kungako Jehova asecwayisa kutsi ‘singatihlanganisi nesilima’!—Taga 14:7.

12. Yini letasisita kutsi singafanani netilima?

¹² Asifanani nalabo labatenyanyako timiso taNkulunkulu, kunaloko siyakutsandza kuphila ngetindlela taJehova letifaka ekhatsi timiso takhe tekutiphatsa. Singatitsandza kakhulu tindlela takhe nasicatsanisa umphumela wekulalela kanye nemphumela wekungalaleli. Naka tinkinga bantfu labatibangela tona ngenca yekungasemukeli seluleko saJehova lesihlakaniphile. Ngemuva kwaloko, naka kutsi kuphila kwakho kuncono kanjani ngenca yekutsi ulalela Nkulunkulu.—Hla. 32:8, 10.

13. Jehova uyasicindzetela yini kutsi silalele seluleko sakhe lesihlakaniphile?

¹³ Jehova unika bonkhe bantfu kuhlakanipha, kodvwa akaphoceleli muntfu kutsi akwemukele. Nanobe kunjalo, uyayisho imiphumela letfolwa ngulabo labangakulaleli kuhlakanipha. (Taga 1:29-32) Labo labakhetsa kungamlaleli Jehova “batawuvuna loko labakuhlanyele.” Ngekuhamba kwesikhatsi, indlela labaphila ngayo itawubenta bacindzeteleke, babe netinkinga futsi ekugcineni babhujiswe. Nanobe kunjalo, naku labetsenjiswa kona labo labalalela seluleko saJehova lesihlakaniphile futsi basisebentise: “Loyo longilalelako utawuhlala ngekuthula futsi angeke ayesabe inhlekelele.”—Taga 1:33.

14-15. Yini lesiyifundza kuTaga 4:23?

¹⁴ Kuhlale kusisita kusebentisa kuhlakanipha kwaNkulunkulu. Njengobe sesicocile, Jehova unika bonkhe bantfu seluleko lesihlakaniphile. Sibonelo nje, encwadzini yeTaga usinika teluleko letingeke tiphelelwe sikhatsi letingasisita nasitisebentisa. Ase sicoce ngaletine tato.

¹⁵ Vikela inhlitiyo yakho lengumfanekiso. LiBhayibheli litsi: “Londvolota inhlitiyo yakho kwendlula tonkhe letinye tintfo, ngobe kuyo kuchichima imitfombo yekuphila.” (Taga 4:23) Cabanga nje kutsi kungakanani lokufanele sikwente kuze sivikele inhlitiyo yetfu mbamba. Kufanele sidle kudla lokunemphilo, sishukumise umtimba futsi sigweme imikhuba lemibi. Kufanele sente lokufanako kuze sivikele inhlitiyo yetfu lengumfanekiso. Onkhe malanga sifundza liVi laNkulunkulu, silungiselela imihlangano, sibe khona kuyo futsi siphendvule. Sihlala simatasa ngekutsi sente umsebenti wekushumayela.  Sigwema imikhuba lemibi ngekutsi singatenti tintfo letingasenta sicabange tintfo letimbi, njengekwekutijabulisa lokunekutiphatsa lokubi kanye nekutihlanganisa nebantfu lababi.

16. Umbhalo weTaga 23:4, 5 usisita njani lamuhla?

¹⁶ Yenetiseka ngaloko lonako. LiBhayibheli lisiniketa nasi seluleko: “Ungatikhandli kakhulu kuze utfole umcebo. . . . Utawutsi uyawubuka, uwukhandze ungekho, ngobe lomcebo utawumila timphiko njengelusweti futsi undizele esibhakabhakeni.” (Taga 23:4, 5) Umuntfu angeke aciniseke kutsi imali kanye netintfo lanato kutawube kusekhona kusasa. Kodvwa bantfu labanjingile nalabeswele bakhatsateka kakhulu ngekwakha imali. Loku kuvame kwenta kutsi bente tintfo letilimata lidvumela labo, buhlobo babo nalabanye ngisho nemphilo yabo. (Taga 28:20; 1 Thim. 6:9, 10) Kodvwa kuhlakanipha kusenta sibe nembono lokahle ngemali. Lombono lesinawo usenta singabi ngemagovu kodvwa senetiseke futsi sijabule ngaloko lesinako.—Shu. 7:12.

17. Yini lesingayenta kuze sibe ‘nelulwimi lwemuntfu lohlakaniphile’ lokukhulunywa ngalo kuTaga 12:18?

¹⁷ Cabanga ngaphambi kwekutsi ukhulume. Nasingakanaki, loko lesikukhulumako kungabalimata labanye. LiBhayibheli litsi: “Emavi lakhulunywe angakacatjangwa ahlaba njengenkemba, kodvwa lulwimi lwemuntfu lohlakaniphile luyaphilisa.” (Taga 12:18) Sitawuba nebuhlobo lobuhle nalabanye nangabe sikubalekela kuhleba ngemaphutsa abo. (Taga 20:19) Kuze lulwimi lwetfu lwakhe kunekutsi lulimate, kufanele sihlale sifundza liVi laNkulunkulu futsi sicabangisise ngalo. (Luk. 6:45) Nasicabangisisa ngaloko lokushiwo liBhayibheli, emavi etfu atawufana “nemanti lashonako” futsi lacabula labanye.—Taga 18:4.

18. Kusebentisa seluleko lesikuTaga 24:6 kungasisita njani emsebentini wekushumayela?

¹⁸ Landzela sicondziso. LiBhayibheli lisinika nasi seluleko lesilusito, litsi: “Kuze ulwe imphi, udzinga sicondziso lesihlakaniphile, futsi uyancoba nangabe kunebeluleki labanyenti.” (Taga 24:6) Cabanga ngekutsi kusebentisa  lesimiso kungasisita njani nasenta umsebenti wekushumayela newekufundzisa. Kunekutsi lomsebenti siwente ngendlela yetfu, setama kusebentisa tindlela lesiniketwa tona. Sitfola sicondziso lesihlakaniphile emihlanganweni yetfu yebuKhristu, lapho khona sifundza kulabanye tindlela tekufundzisa basebentisa liBhayibheli. Ngetulu kwaloko, inhlangano yaJehova isinika emathulusi lalusito lafaka ekhatsi tincwadzi nema-video, langasita bantfu kutsi balicondze liBhayibheli. Uwasebentisa kahle yini lamathulusi?

19. Utiva njani ngekuhlakanipha lesikunikwa nguJehova? (Taga 3:13-18)

¹⁹ Fundza Taga 3:13-18. Sibonga kakhulu ngeseluleko lesihle lesitfolakala eVini laNkulunkulu! Besingaba yini nje ngaphandle kwaso! Kulesihloko, sicoce ngaletinye tibonelo teteluleko letilusito letitfolakala encwadzini yeTaga. Jehova usinika emavi lahlakaniphile latfolakala emiBhalweni. Shengatsi singatimisela kuhlale sisebentisa kuhlakanipha lesikunikwa nguJehova. Bantfu labanyenti abanendzaba nekuhlakanipha kwaNkulunkulu kodvwa tsine siyaciniseka kutsi “uyajabula loyo lokubambisisako” kuhlakanipha.