1. Ngutiphi letinye tipho Jesu lasiphe tona?

 KUTE umuntfu lowake wephana njengaJesu. Ngesikhatsi alamhlabeni, bekavame kusita bantfu ngekutsi ente timangaliso. (Luk. 9:12-17) Wasipha sipho lesikhulu kakhulu kutendlula tonkhe ngekutsi anikele ngekuphila kwakhe ngenca yetfu. (Joh. 15:13) Kusukela avuswa ekufeni, Jesu uchubekile nekwephana. Njengobe asetsembisa, wasicelela kuJehova umoya longcwele kuze usifundzise futsi usidvudvute. (Joh. 14:16, 17, umbhalo longentasi; 16:13) Asebentisa imihlangano yelibandla, Jesu uyachubeka nekusinika loko lesikudzingako kuze sente bafundzi emhlabeni wonkhe.​—Mat. 28:18-20.

2. Bobani ‘letipho letibantfu’ lokukhulunywa ngato Kubase-Efesu 4:7, 8?

² Cabanga ngalesinye sipho Jesu lasiphe sona. Umphostoli Pawula wabhala kutsi ngemuva kwekutsi Jesu enyukele ezulwini, “wasipha tipho letibantfu.” (Fundza Kubase-Efesu 4:7, 8.) Pawula wachaza kutsi Jesu wasipha letipho kuze tisekele libandla ngetindlela letehlukahlukene. (Ef. 1:22, 23; 4:11-13) Lamuhla, ‘letipho letibantfu’ tifaka ekhatsi tinceku letisebentako, labadzala belibandla nebabonisi betigodzi. a Kuliciniso kutsi lamadvodza anesono, ngako ayawenta emaphutsa. (Jak. 3:2) Kodvwa iNkhosi yetfu Jesu Khristu iyawasebentisa kuze asisite; atipho lesiphe tona.

3. Fanekisa kutsi sonkhe singatisita njani ‘letipho letibantfu.’

³ Jesu unikete ‘letipho letibantfu’ umsebenti wekwakha libandla. (Ef. 4:12) Kodvwa sonkhe singasita kuze lamadvodza akhone kuwenta lomsebenti lobalulekile. Asesifanekise: Labanye  betfu bakha emaHholwa eMbuso. Labanye basita laba labakha lamaHholwa ngekubaphekela kudla, ngekwekuhamba nangaletinye tindlela. Ngendlela lefanako, sonkhe singatisita tinceku letisebentako, labadzala belibandla kanye nebabonisi betigodzi ngaloko lesikushoko nalesikwentako. Asesicoce ngekutsi sisitakala njani ngemsebenti wabo lomatima nekutsi singabakhombisa njani bona naJesu losiphe ‘letipho letibantfu’ kutsi siyabonga.

TINCEKU LETISEBENTAKO ‘TENTA IMISEBENTI LELUSITO’

4. Ngumiphi leminye “imisebenti lelusito” tinceku letisebentako lebetiyenta ngesikhatsi semaKhristu ekucala?

⁴ Ngesikhatsi semaKhristu ekucala, labanye bazalwane bebaba tinceku letisebentako. (1 Thim. 3:8) Kubonakala ngatsi bekungibo lebebenta “imisebenti lelusito” Pawula lakhuluma ngayo. (1 Khor. 12:28) Ngako kubonakala ngatsi tinceku letisebentako betenta imisebenti leminyenti lebalulekile kuze labadzala belibandla bakhone kunaka umsebenti wekufundzisa nekuvakashela labanye kuze babakhutsate. Sibonelo nje, kungenteka tinceku letisebentako betisita kuze tente emakhophi emiBhalo nobe titsenge tintfo letidzingekako kuze kwentiwe lamakhophi.

5. Ngumiphi leminye imisebenti lelusito leyentiwa tinceku letisebentako lamuhla?

⁵ Cabanga ngaleminye imisebenti lelusito tinceku letisebentako letiyentako ebandleni lokulo. (1 Phet. 4:10) Kungenteka tinakekela timali telibandla nobe emasimu elibandla, ti-oda tincwadzi futsi ticiniseke kutsi bamemeteli bayatitfola, tisita ka-sound, tibe balindzi nobe tisite ekunakekeleni liHholwa leMbuso. Yonkhe lemisebenti ibalulekile kuze libandla lisebente kahle. (1 Khor. 14:40) Ngetulu kwaloko, letinye tinceku letisebentako tiba netincenye eMhlanganweni Wekuphila KwemaKhristu Nemsebenti Wawo futsi tibeke netinkhulumo telinyenti. Inceku lesebentako ingaphindze isite umbonisi welicembu. Ngaletinye tikhatsi, tinceku letisebentako letifanelekako tingahamba nalabadzala belibandla nabayovakashela bamemeteli kuze babakhutsate.

6. Ngutiphi letinye tizatfu letisenta sibonge tinceku letisebentako letisebenta kamatima?

⁶ Ilisita njani libandla imisebenti leyentiwa tinceku letisebentako? Lomunye dzadze waseBolivia lokutsiwa nguBeberly b utsi: “Ngiyijabulela kakhulu imihlangano ngenca yetinceku letisebentako. Ngiyakhona kuhlabela, ngiphendvule, ngilalele tinkhulumo futsi ngifundze kuma-video nasetitfombeni ngenca yemisebenti yato. Tinakekela tekuphepha kanye nalabo labangena emihlanganweni yelibandla nge-videoconference. Ngemuva kwemihlangano, tihamba embili ekuhlanteni liHholwa leMbuso, kusita etimalini futsi ticiniseke kutsi sinetincwadzi lesitidzingako. Ngibonga kakhulu ngemsebenti wato!” Leslie lohlala eColombia futsi indvodza yakhe lengulomdzala welibandla, utsi: “Indvodza yami yetsembele etincekwini letisebentako kuze tente leminye imisebenti ebandleni. Ngaphandle kwato, ngabe ihlale imatasa kakhulu, ngako ngibonga kakhulu ngemdlandla wato nangelusito lwato.” Siyaciniseka kutsi nawe utiva ngendlela lefanako.​—1 Thim. 3:13.

7. Singakhombisa njani kutsi siyabonga ngekuba netinceku letisebentako? (Buka nesitfombe.)

⁷ Ngisho nobe sibonga ngemsebenti lowentiwa tinceku letisebentako, liBhayibheli lisikhutsata kutsi sikhombise kutsi siyabonga. (Khol. 3:15) Nayi indlela lomunye lomdzala welibandla waseFinland lokutsiwa nguKristofer lakhombisa ngayo kutsi uyabonga, utsi: “Ngitfumela inceku lesebentako likhadi nobe umlayeto, ngibhale livesi futsi ngisho  kutsi ingikhutsate njani nobe ngisho sizatfu lesingenta ngibonge ngemsebenti wayo.” Pascal naJael labahlala eNew Caledonia, bathantazela tinceku letisebentako. Pascal utsi: “Kulamalanga besitithantazela tikhatsi letinyenti tinceku letisebentako, sibonga Jehova ngato, simcela kutsi abe nato futsi achubeke atisita.” Jehova uyayiva imithantazo lenjengalena, futsi lonkhe libandla liyasitakala.​—2 Khor. 1:11.

LABADZALA BELIBANDLA ‘BASEBENTA KAMATIMA EMKHATSINI WENU’

8. Yini leyenta Pawula watsi labadzala belibandla bangesikhatsi semaKhristu ekucala ‘bebasebenta kamatima’? (1 KubaseThesalonika 5:12, 13)

⁸ Labadzala belibandla bangesikhatsi semaKhristu ekucala bebasebenta kamatima ebandleni. (Fundza 1 KubaseThesalonika 5:12, 13; 1 Thim. 5:17) ‘Bebangamele’ libandla, bachuba imihlangano futsi benta tincumo njengesigungu salabadzala. ‘Bebayala’ bazalwane babo nabodzadze, babanika seluleko labasidzingako kodvwa ngendlela lenemusa kuze bavikele libandla. (1 Thes. 2:11, 12; 2 Thim. 4:2) Kuliciniso kutsi lamadvodza bekaphindze asebente kamatima kuze anakekele imindeni yawo futsi agcine nebuhlobo bawo naJehova bucinile.​—1 Thim. 3:2, 4; Thit. 1:6-9.

9. Ngumiphi leminye imisebenti leyentiwa ngulabadzala belibandla?

⁹ Labadzala belibandla bamatasatasa. Bashumayela tindzaba letimnandzi. (2 Thim. 4:5) Bahamba embili emsebentini wekushumayela, bahlela umsebenti wekushumayela ensimini labakuyo futsi basiceceshe kuze sishumayele kahle futsi sifundzise kahle. Baphindze babe behluleli labanemusa futsi labangakhetsi. Nangabe umKhristu ente sono lesikhulu, labadzala belibandla benta konkhe labangakwenta kuze bamsite alungise buhlobo bakhe naJehova. Ngesikhatsi lesifanako, benta konkhe labangakwenta kuze bagcine libandla lihlobile. (1 Khor. 5:12, 13; Gal. 6:1) Labadzala belibandla batiwa ngekutsi babelusi. (1 Phet. 5:1-3) Baniketa tinkhulumo letilungiselelwe kahle letisekelwe eBhayibhelini, batimisele kwati wonkhe muntfu ebandleni nekuvakashela labanye kuze babakhutsate. Labanye labadzala belibandla bayasita ekwakheni emaHholwa eMbuso nekuwanakekela, ekuhleleni imihlangano yesifundza futsi babe ngemalunga eKomidi Yekubonisana Netibhedlela neweLicembu Lalabo Labavakashela Tigulane, baphindze bente naleminye imisebenti. Labadzala belibandla basebenta kamatima ngenca yetfu!

10. Ngutiphi letinye tizatfu letisenta sibonge ngalabadzala belibandla labasebenta kamatima?

¹⁰ Jehova washo kutsi labadzala belibandla bebatasinakekela kahle futsi besingeke ‘siphindze sesabe nobe setfuke.’ (Jer. 23:4) Lomunye dzadze waseFinland lokutsiwa nguJohanna, wakubona kuba liciniso kwalamavi ngesikhatsi make wakhe agula kakhulu. Utsi: “Nanobe ngikutfola kumatima kuveta indlela lengitiva ngayo, lomunye lomdzala welibandla lebengingamati kahle wangibeketelela, wathantaza nami futsi wangicinisekisa kutsi Jehova uyangitsandza. Angisakhumbuli kahle kutsi watsini, kodvwa ngiyakhumbula kutsi ngativa ngivikelekile. Ngikholelwa kutsi Jehova wamtfumela kimi kuze angisite ngesikhatsi lesifanele.” Bakusite njani labadzala belibandla lokulo?

11. Singakhombisa njani kutsi siyabonga ngalabadzala belibandla? (Buka nesitfombe.)

¹¹ Jehova ufuna sikhombise kutsi siyabonga ngalabadzala belibandla “ngenca yemsebenti labawentako.” (1 Thes. 5:12, 13) Henrietta, naye lohlala eFinland, utsi: “Labadzala belibandla basita labanye ngekutitsandzela, kodvwa loko akusho kutsi banesikhatsi lesinyenti nemandla lamanyenti kunatsi, nobe kutsi bete tinkinga ekuphileni. Ngalesinye sikhatsi ngitsi  kubo: ‘Uyati kutsini, ungulomdzala welibandla lokahle. Ngifuna ukwati loko.’” Lomunye dzadze waseTürkiye c lokutsiwa nguSera utsi: “Labadzala belibandla badzinga lokutabanika emandla kuze bachubeke benta umsebenti wabo. Ngako singababhalela likhadi, sibameme kutsi batodla natsi nobe sihambe nabo emsebentini wekushumayela.” Ukhona yini lomdzala welibandla lomatiko lokujabulelako loko lakwentako? Funa tindlela tekukhombisa kutsi uyabonga.​—1 Khor. 16:18.

BABONISI BETIGODZI BAKHA LABANYE

12. Ngesikhatsi semaKhristu ekucala, nguyiphi indlela leyasetjentiswa kuze kwakhiwe emabandla? (1 KubaseThesalonika 2:7, 8)

¹² Khristu Jesu unikete libandla “tipho letibantfu” letisita nangalenye indlela. Ngesicondziso sakhe, labadzala baseJerusalema batfuma Pawula, Bhanabasi kanye nalabanye kutsi babe babonisi labajikeletako. (Imis. 11:22) Ngasiphi sizatfu? Ngesizatfu lesifanako naleso lesenta kube netinceku letisebentako nalabadzala belibandla: kuze kwakhiwe emabandla. (Imis. 15:40, 41) Lamadvodza adzele tintfo letinyenti futsi aze afaka nekuphila kwawo engotini kuze afundzise futsi akhutsate labanye.​—Fundza 1 KubaseThesalonika 2:7, 8.

13. Ngumiphi leminye imisebenti leyentiwa ngumbonisi wesigodzi?

¹³ Babonisi betigodzi bahlala basemgwacweni. Labanye bahamba emabanga lamadze nabavakashela emabandla. Njalo ngeliviki, umbonisi wesigodzi ubeka tinkhulumo, avakashele labanye kuze abakhutsate, achube umhlangano wemahlahlandlela, walabadzala belibandla kanye nemhlangano longaphambi kwekuyoshumayela. Uphindze alungiselele tinkhulumo futsi ahlele imihlangano yesigodzi  neyesifundza. Ufundzisa nasetikolweni temahlahlandlela, ahlele umhlangano lokhetsekile nemahlahlandlela kulesigodzi futsi ente naleminye imisebenti, lefaka ekhatsi lephutfumako layinikwe lihhovisi leligatja.

14. Ngutiphi letinye tizatfu letisenta sibonge ngebabonisi betfu betigodzi labasebenta kamatima?

¹⁴ Emabandla asitakala njani ngekuba nebabonisi betigodzi? Lomunye umzalwane waseTürkiye nakakhuluma ngekuvakashelwa babonisi betigodzi utsi: “Kuvakasha kwabo kuyangikhutsata kutsi ngicitse sikhatsi lesinyenti ngisita bazalwane bami nabodzadze. Sengike ngaba nebabonisi betigodzi labanyenti; kodvwa kute ngisho namunye kubo lebekabonakala angangeneki nobe kubonakale ngatsi umatasa kakhulu kutsi ngingakhuluma naye.” Johanna, lesike sakhuluma ngaye, wake washumayela nembonisi wesigodzi, kodvwa bebangabatfoli bantfu emakhaya. Utsi: “Ngihlale ngilikhumbula lelo langa. Bosisi bami lababili bebasandza nje kutfutsa futsi bengibakhumbula kakhulu. Lombonisi wesigodzi wangikhutsata futsi wangisita ngabona kutsi kungenteka nyalo singakhoni kuhlala nemindeni yetfu nobe nebangani, kodvwa emhlabeni lomusha sitawuba nematfuba lamanyenti ekucitsa sikhatsi ndzawonye.” Linyenti letfu linako lelikukhumbulako lokujabulisako ngebabonisi betfu betigodzi.​—Imis. 20:37–21:1.

15. (a) Ngekuvumelana na-3 Johane 5-8, singakhombisa njani kutsi siyabonga ngebabonisi betigodzi? (Buka nesitfombe.) (b) Kubaluleke ngani kutsi sibabonge bafati bebazalwane labasebenta kamatima ebandleni, futsi loko singakwenta njani? (Buka libhokisi lelitsi “ Khumbula Bafati Babo.”)

¹⁵ Umphostoli Johane wakhutsata Gayusi kutsi anake bazalwane labatokhutsata emabandla futsi wamcela kutsi ‘nasebahamba abasite futsi loko akwente ngendlela letawujabulisa Nkulunkulu.’ (Fundza 3 Johane 5-8.) Lenye indlela lesingakwenta ngayo loku kutsi  simeme umbonisi wesigodzi kutsi atowudla natsi. Lenye indlela kutsi sibe khona emsebentini wekushumayela nakasivakashele. Leslie, lesike sakhuluma ngaye, ukhombisa nangaletinye tindlela kutsi uyabonga, utsi: “Ngithantaza kuJehova ngimcele kutsi anakekele tidzingo tabo. Mine nemyeni wami siphindze sibhale tincwadzi, sibatjele kutsi kuvakasha kwabo kusisite kangakanani.” Khumbula, babonisi betigodzi babantfu labafana natsi. Ngalesinye sikhatsi bayagula, bakhatsateke futsi badvumateke. Mhlawumbe emavi akho lanemusa nobe sipho lesincane kungaba yimphendvulo yemithantazo yabo yekucela lusito!​—Taga 12:25.

SIDZINGA “TIPHO LETIBANTFU”

16. Ngekuvumelana neTaga 3:27, ngumiphi imibuto umzalwane lokufanele atibute yona?

¹⁶ Emhlabeni wonkhe sidzinga bazalwane labanyenti labatawuba “tipho letibantfu.” Nangabe ungumzalwane lobhajatisiwe, ‘ungakhona yini kusita’? (Fundza Taga 3:27.) Uyafuna yini kufaneleka kutsi ube yinceku lesebentako? Nangabe sewuvele uyinceku lesebentako, uyafuna yini kutibekela umgomo wekuba ngulomdzala welibandla? d Ungakhona yini kuhlela timo takho kuze ufake sicelo sekuya eSikolweni Sebavangeli BeMbuso? Lesikolwa sitakusita kutsi usetjentiswe kakhulu nguJesu. Nangabe uva shengatsi awufaneleki kwenta lemisebenti, thantaza kuJehova. Mcele akusite ngemoya wakhe longcwele kutsi ukhone kwenta nobe ngabe ngumuphi umsebenti loniketwa wona.​—Luk. 11:13; Imis. 20:28.

17. “Tipho letibantfu” tisikhombisani ngeNkhosi yetfu Khristu Jesu?

¹⁷ Labazalwane labakhetfwe nguJesu kutsi babe “tipho letibantfu” babufakazi bekutsi bekasolo asihola kulamalanga ekugcina. (Mat. 28:20) Awujabuli yini ngekutsi sineNkhosi lesitsandzako, lephanako nalesinakako futsi lesiphe bazalwane labafanelekako kutsi banakekele tidzingo tetfu? Ngako funa ematfuba ekukhombisa kutsi uyabonga ngalamadvodza lasebenta kamatima. Ungakhohlwa kubonga Jehova, longuMtfombo wato “tonkhe tipho letinhle naletiphelele.”​—Jak. 1:17.