1. Jehova wabakhutsata njani bantfu ngemuva kwekuvukela kwase-Edeni?

JEHOVA nguNkulunkulu lobakhutsatako bantfu bakhe. Loko bekasolo akwenta kusukela bantfu baba nesono. Ngekushesha nje ngemuva kwekuvukela kwase-Edeni, Jehova washo siphrofetho lebesitawenta situkulwane sa-Adamu sibe nelitsemba kanye nesibindzi. Nangabe bantfu basicondza siphrofetho lesikuGenesisi 3:15 singanibanika litsemba lekutsi Sathane Develi ‘loyinyoka yekucala’ utawubhujiswa kanye nemisebenti yakhe lemibi.​—Semb. 12:9; 1 Joh. 3:8.

2. Jehova wamkhutsata njani Nowa?

² Nowa bekaphila eveni lebelinebantfu labangamesabi Nkulunkulu futsi nguye kanye nemndeni wakhe kuphela lebebakhonta  Jehova. Bekaphila nebantfu lebebanebudlova futsi batiphatsa kabi, loko bekungamcedza emandla. (Gen. 6:4, 5, 11; Juda 6) Kodvwa Jehova washo emavi labetamenta abe nesibindzi labesidzinga kuze achubeke “ahamba naNkulunkulu.” (Gen. 6:9) Jehova watsi utababhubhisa bantfu lababi futsi watjela Nowa ngaloko lobekufanele akwente kuze yena nemndeni wakhe basindze. (Gen. 6:13-18) Loko kwamkhutsata kakhulu Nowa!

3. Joshuwa watfola siphi sikhutsato? (Buka sitfombe lesisekucaleni kwalesihloko.)

³ Ngekuhamba kwesikhatsi, Joshuwa waniketwa umsebenti lomatima wekuhola bantfu baNkulunkulu abayise Eveni Lesetsembiso. Bekufanele alwe netive lebetihlala kulo. Jehova bekati kutsi Joshuwa bekatawesaba, ngako wakhuluma naMosi watsi: “Yala Joshuwa, umcinise umkhutsate, ngobe nguye lotakuhola lesive asewetele ngesheya kwemfula; nguye futsi lotabenta badle lelive lolibonako.” (Dut. 3:28) Ngaphambi kwekutsi Joshuwa aye emphini, Jehova wamkhutsata watsi: “Angikakuyali yini? Cina ube nesibindzi. Ungetfuki, futsi ungaphelelwa ngemandla, ngobe Simakadze Nkulunkulu wakho uyakuba nawe nome ngukuphi lapho uya khona.” (Josh. 1:1, 9) Lamavi amkhutsata kakhulu Joshuwa!

4, 5. (a) Ngusiphi sikhutsato Jehova lasiniketa bantfu bakhe basendvulo? (b) Jehova wayikhutsata njani iNdvodzana yakhe?

⁴ Jehova waphindze wakhutsata licembu lebantfu bakhe. Washo siphrofetho lebesitawudvudvuta emaJuda labetfunjwe eBhabhulona. Lesiphrofetho besitsi: “Ungesabi, ngobe mine nginawe; ungajabhi, ngobe mine nginguNkulunkulu wakho. Ngitakucinisa ngikusite, ngiyakukubamba ngesandla sami sekudla lesilungile.” (Isa. 41:10) Lamavi awakhutsata emaKhristu angelikhulu lekucala futsi ayabacinisa nebantfu baNkulunkulu lamuhla.​—Fundza 2 Khorinte 1:3, 4.

⁵ Jehova wayikhutsata neNdvodzana yakhe Jesu. Ngesikhatsi Jesu abhajatiswa, weva livi livela ezulwini litsi: “Lena yiNdvodzana yami letsandzekako, ngiyemukele.” (Mat. 3:17) Lamavi amkhutsata kakhulu Jesu nakenta umsebenti wekushumayela.

6. Umfanekiso wemathalenta usikhutsata njani?

⁶ Jesu wasilingisa sibonelo saBabe wakhe. Emfanekisweni wakhe wemathalenta, Jesu wakhutsata emaKhristu letsembekile ngekutsi akhulume ngesiphrofetho lesimayelana nekuphela kwalelive. Lenkhosi yancoma sisebenti ngasinye lesetsembekile yatsi: “Wente kahle sisebenti lesihle nalesetsembekile! Utivete wetsembekile etintfweni letincane. Ngako-ke ngitakubeka kutsi wengamele tintfo letinyenti. Jabula kanye nami.” (Mat. 25:21, 23) Lamavi asikhutsata kutsi sichubeke sikhonta Jehova ngekwetsembeka.

7. Jesu wabakhutsata njani baphostoli bakhe, ikakhulukati Phetro?

⁷ Baphostoli baJesu bebavame kuphikisana ngekutsi ngubani lomkhulu kunabo bonkhe, kepha Jesu wabakhutsata ngemusa kutsi bangatenti emakhosi, kunaloko batfobeke futsi basite labanye. (Luk. 22:24-26) Phetro wadvumata Jesu tikhatsi letinyenti. (Mat. 16:21-23; 26:31-35, 75) Jesu akazange amlahle Phetro, kunaloko wamkhutsata futsi waze wamnika umsebenti wekukhutsata bazalwane bakhe.​—Joh. 21:16.

8. Hezekiya wabakhutsata njani bantfu bakaJuda kanye netindvuna temphi?

⁸ Ngisho nangaphambi kwekutsi iNdvodzana yaNkulunkulu isibekele sibonelo lesihle sekukhutsata labanye, tinceku taJehova lebetetsembekile betati kutsi kunesidzingo sekukhutsatana. Hezekiya wahlanganisa tindvuna temphi kanye nebantfu bakaJuda kuze abakhutsate ngesikhatsi basongelwa libutfo lase-Asiriya. “Bantfu bema sibindzi ngaloko Hezekiya lakusho kubo.”​—Fundza 2 Tikhronike 32:6-8.

9. Incwadzi yaJobe isifundzisani ngekukhutsata labanye?

⁹ Nanobe naye abedzinga kukhutsatwa, Jobe wafundzisa “badvudvuti lababi” sifundvo lesibalulekile lesimayelana nekukhutsata labanye. Wabatjela kutsi kube bekunguye lobekufanele abadvudvute, bekatawukhuluma tintfo lebetitabakhutsata nalebetitabacinisa, hhayi lebetitabalimata. (Jobe 16:1-5) Ekugcineni Jobe watfola sikhutsato lebesivela ku-Elihu nakuJehova.​—Jobe 33:24, 25; 36:1, 11; 42:7, 10.

10, 11. (a) Kungani indvodzakati yaJeftha beyidzinga kukhutsatwa? (b) Lamuhla bobani labadzinga sikhutsato lesifanako?

¹⁰ Indvodzakati yaJeftha nayo beyikudzinga kukhutsatwa. Ngaphambi kwekutsi ayolwa nema-Amoni, Jeftha umehluleli wafunga kutsi nakatawuncoba, umuntfu wekucala lotomhlangabeta nakabuya emphini utawunikela ngaye kuze ente umsebenti waJehova ethempelini. Nakabuya emphini, umntfwana wakhe lokuphela kwakhe wamhlangabeta kuze ajabule kanye naye njengoba abencobile. Jeftha weva buhlungu kakhulu, kodvwa wasifeza sifungo sakhe, futsi watfumela indvodzakati yakhe kutsi iyokhonta ethempelini kuphila kwayo konkhe.​—Khu. 11:30-35.

¹¹ Loko bekumatima kuJeftha, futsi kungenteka kwaba matima kakhulu endvodzakatini yakhe. Kepha lendvodzakati yasisekela ngekutitsandzela sincumo sababe wayo. (Khu. 11:36, 37) Yalahlekelwa lilungelo lekushada, lekuba nebantfwana kanye nelekuchubekisela luhla lwekutalwa lwemndeni wakubo. Ngako beyikudzinga kakhulu kudvudvutwa kanye nekukhutsatwa. LiBhayibheli litsi: “Njalo nje ngemnyaka emantfombatana langema-Israyeli ahamba emalanga lamane ayekwenta umkhosi wekukhumbula indvodzakati yaJeftha wakaGileyadi.” (Khu. 11:39, 40) EmaKhristu langakashadi lanaka “tintfo teNkhosi” ayakudzinga kunconywa kanye nekukhutsatwa.​—1 Khor. 7:32-35.

12, 13. Phetro wabakhutsata njani bomnakabo?

¹² Ngebusuku bangephambi kwekufa kwakhe, Jesu watjela umphostoli Phetro watsi: “Simoni, Simoni, Sathane uyanifuna kuze atewunela njengakolo. Kodvwa ngikuncusele kutsi kukholwa kwakho kungapheli, ngako-ke nasewubuyile kimi, ubocinisa banakenu.”​—Luk. 22:31, 32.

¹³ Phetro bekangulomunye lobekahola libandla lemaKhristu angelikhulu lekucala. (Gal. 2:9) Sibonelo sakhe sekuba nesibindzi sabakhutsata bazalwane bakhe ngeliPhentekhoste nangemuva kwalo. Ngemuva kwekukhonta Jehova iminyaka leminyenti, wabhalela emaKhristu lakanye nawo watsi: “Nginibhalele incwadzi  ngemavi lambalwa kuze nginikhutsate futsi ngininike bufakazi lobuliciniso bekutsi lona ngiwo mbamba umusa waNkulunkulu. Ngako manini nicine kuwo.” (1 Phet. 5:12) Tincwadzi taPhetro letiphefumulelwe tawakhutsata kakhulu emaKhristu angelikhulu lekucala futsi tisasikhutsata natsi lamuhla. Sisidzinga kakhulu lesikhutsato njengoba silindzele kugcwaliseka kwetetsembiso taJehova.​—2 Phet. 3:13.

14, 15. Tincwadzi letiphefumulelwe letabhalwa ngumphostoli Johane tiwakhutsate njani emaKhristu?

¹⁴ Umphostoli Johane naye bekahola ebandleni lebuKhristu langelikhulu lekucala. Indzaba lemnandzi layibhala mayelana nemsebenti waJesu wekushumayela yawakhutsata kakhulu emaKhristu angelikhulu lekucala, futsi isasikhutsata nalamuhla. LiVangeli laJohane kuphela lelinemavi aJesu latsi lutsandvo luluphawu lwemaKhristu eliciniso.​—Fundza Johane 13:34, 35.

¹⁵ Tincwadzi taJohane letintsatfu tinalamanye emaciniso laligugu. Nangabe sidvumala ngenca yemaphutsa lesiwentile, asijabuli yini ngekwati kutsi “ingati yaJesu . . . isihlanta kuto tonkhe tono?” (1 Joh. 1:7) Nangabe bonembeza betfu basilahla, akusicinisi lidvolo yini kwati kutsi “Nkulunkulu mkhulu kakhulu kunetinhlitiyo tetfu”? (1 Joh. 3:20) NguJohane kuphela lowabhala kutsi “Nkulunkulu ulutsandvo.” (1 Joh. 4:8, 16) Encwadzini yakhe yesibili neyesitsatfu, Johane wancoma emaKhristu lachubeka “ahamba ecinisweni.”​—2 Joh. 4; 3 Joh. 3, 4.

16, 17. Umphostoli Pawula wawakhutsata njani emaKhristu angelikhulu lekucala?

¹⁶ Kungenteka ngumphostoli Pawula lowabakhutsata kakhulu bazalwane bangelikhulu  lekucala. Kubonakala ngatsi ngelikhulu lekucala labanye baphostoli bahlala eJerusalema njengoba sigungu lesibusako besilapho. (Imis. 8:14; 15:2) EmaKhristu aseJudiya abeshumayela ngaJesu kubantfu lebebakholelwa kuNkulunkulu. Kodvwa umoya longcwele watfumela umphostoli Pawula kutsi ayoshumayela kumaJuda, kumaRoma, kumaGriki kanye nakuletinye tive lebetikhonta bonkulunkulu labanyenti.​—Gal. 2:7-9; 1 Thim. 2:7.

¹⁷ Pawula waya endzaweni leseyibitwa ngekutsi yiTurkey, eGreece kanye nase-Italy kuze acalise emabandla ebuKhristu kubantfu lebebangasiwo emaJuda. LamaKhristu lasemasha bekadzinga kukhutsatwa ngobe ‘bekahlushwa bantfu belive lakubo.’ (1 Thes. 2:14) Umphostoli Pawula wabhalela libandla laseThesalonika cishe nga-50 C.E watsi: “Ngaso sonkhe sikhatsi siyambonga Nkulunkulu nasinibeka emithantazweni yetfu, ngobe asiwukhohlwa umsebenti wenu wekwetsembeka, kutikhandla kwenu ngelutsandvo, kanye nekucinisela kwenu.” (1 Thes. 1:2, 3) Waphindze watsi: “Chubekani nikhutsatana futsi nakhana.”​—1 Thes. 5:11.

18. Sigungu lesibusako sangelikhulu lekucala samkhutsata njani Filiphi?

¹⁸ Sigungu lesibusako sangelikhulu lekucala sawakhutsata kakhulu emaKhristu laholako kanye nemalunga elibandla. Samsekela kakhulu Filiphu lebekasitfunywa selivangeli ngesikhatsi ashumayela ngaKhristu kumaSamariya. Satfumela Phetro kanye naJohane kutsi bathantazele bantfu labebasandza kuba ngemakholwa kuze batfole umoya longcwele. (Imis. 8:5, 14-17) Cabanga ngendlela Filiphi kanye nalamanye emaKhristu labakhutsateka ngayo ngenca yekusekelwa sigungu lesibusako!

19. Incwadzi sigungu lesibusako leyasibhalela emaKhristu angelikhulu lekucala yaba namuphi umphumela?

¹⁹ Ngekuhamba kwesikhatsi, sigungu lesibusako sahlangana kuze sincume kutsi kufanele yini emaKhristu langasiwo emaJuda asoke njengobe bekusho uMtsetfo waMosi. (Imis. 15:1, 2) Ngemuva kwekuhlolisisa imiBhalo kanye nekucondziswa ngumoya longcwele, sigungu lesibusako sancuma kutsi bekungakadzingeki, futsi sase sibhala incwadzi leya emabandleni. Sigungu lesibusako satfumela bazalwane labatsite kutsi bamikise letincwadzi emabandleni. Loku kwaba namuphi umphumela? “Ngemuva kwekuyifundza, basijabulela lesikhutsato.”​—Imis. 15:27-32.

20. (a) Lamuhla Sigungu Lesibusako sibakhutsata njani bazalwane labasemhlabeni wonkhe? (b) Ngumuphi umbuto lesitawucoca ngawo esihlokweni lesilandzelako?

²⁰ Lamuhla, Sigungu Lesibusako sikhutsata emalunga emndeni wase-Bethel, tisebenti letenta umsebenti lokhetsekile wasikhatsi sonkhe ensimini kanye nawo onkhe emaKhristu eliciniso lasemhlabeni wonkhe. Umphumela waloku uba kutsi bonkhe bayajabula ngalesikhutsato, njengobe kwenteka ngelikhulu lekucala leminyaka. Nga-2015, Sigungu Lesibusako sashicilela incwajana letsi Buyela KuJehova, futsi ikhutsate bazalwane labanyenti emhlabeni wonkhe. Bazalwane labaholako kuphela yini lokufanele balingise Jehova ngekutsi bakhutsate labanye? Sihloko lesilandzelako sitawucoca ngemphendvulo yalombuto.