Labanye bacabanga kutsi kuvumelekile kufaka tincwadzi tetfu letisekelwe eBhayibhelini etinhlelweni tekuchumana noma kuma-website abo ngoba titfolakala mahhala. Noma kunjalo loko kuphambene nemiBandzela Yekusebentisa * i-website yetfu futsi kubangele tinkinga letinyenti. Lemibandzela isho ngalokucacile kutsi akukavumeleki “kufaka ku-internet noma ngabe yini loyitsetse kulelikhasi langcondvomshini kuze kubonwe ngulabanye (kunoma ngabe nguliphi likhasi langcondvomshini, kukuhlanganyela nalabanye, noma etinhlelweni tekuchumana tawonkhe wonkhe).” Kungani loku kungakavumeleki?

Konkhe lokutfolakala kuma-website etfu akukafaneli kwendluliselwe kulabanye ngephandle kwemvume. Tihlubuki kanye nalabanye labasiphikisako betama kusebentisa tincwadzi tetfu kuma-website abo kuze badukise BoFakazi BaJehova nalabanye bantfu. Kulama-website kunetintfo letentelwe kwenta bantfu bangakukholelwa loko lesikushoko. (Hla. 26:4; Taga. 22:5) Labanye basebentise tincwadzi tetfu noma luphawu lwe-jw.org kuze bakhangise tintfo labatitsengisako futsi batentele abo ema-application. Imibandzela yekusebentisa i-website yetfu yenta bantfu bangayisebentisi kabi. (Taga. 27:12) Kodvwa nangabe sivumela bantfu lokufaka ekhatsi bazalwane betfu kutsi bafake tincwadzi tetfu kulamanye ema-website noma basebentise luphawu lwe-jw.org kuze bakhangise tintfo labatitsengisako, inkantolo ngeke isisekele nasetama kutivikela kubantfu labasiphikisako kanye nemabhizinisi.

 Kungaba yingoti kutitsatsela tincwadzi tetfu kulamanye ema-website ngephandle kwe-jw.org. Jehova unikete sisebenti lesetsembekile nalesihlakaniphile kuphela umsebenti wekondla bantfu bakhe. (Mat. 24:45) Lesisebenti sisebentisa emakheli lasemtsetfweni kuze sisifundzise ngaNkulunkulu, lamakheli afaka ekhatsi i-www.dan124.com, i-tv.dan124.com, kanye ne-wol.dan124.com. Kunema-application lamatsatfu kuphela lasemtsetfweni—i-JW Language^®, i-JW Library^®, kanye ne-JW Library Sign Language^® . Singaciniseka kutsi lama-application akonakaliswa ngulelive laSathane futsi kute lokhangisa kuwo. Nangabe imfundvo levela kuNkulunkulu siyitfola kuleminye imitfombo kute sicinisekiso sekutsi ayikashintjwa noma yonakaliswe.​—Hla. 18:26; 19:8.

Ngetulu kwaloko, kufaka tincwadzi tetfu kuma-website lavumela bantfu kutsi baphawule kuniketa tihlubuki kanye nalabanye labaphikisako litfuba lekwenta bantfu bangayetsembi inhlangano yaNkulunkulu. Labanye bazalwane bahlanganyele etimphikiswaneni letiku-internet futsi loko kulihlambalatile ligama laJehova. Tinhlelo tekuchumana nge-internet atisiyo indzawo lekahle ‘yekubayala ngemoya lomnene labo labamelene natsi.’ (2 Thim. 2:23-25; 1 Thim. 6:3-5) Kubonakele nekutsi labanye bakha ema-account etinhlelo tekuchumana kanye nema-website basebentisa ligama lenhlangano, leSigungu Lesibusako kanye nemalunga aso. Noma kanjalo, kute lilunga leSigungu Lesibusako leline-website noma lelisebentisa tinhlelo tekuchumana.

Kulayela bantfu i-jw.org kulusito ekusakateni “tindzaba letimnandzi.” (Mat. 24:14) Emathuluzi ebuchwephesha lesiwasebentisa nasishumayela ayachubeka atfutfukiswa. Sifisa kutsi bonkhe bantfu bazuze ngekuwasebentisa. Ngako njengoba imibandzela yekusebentisa i-website yetfu isho, ungamtfumelela lotsite tincwadzi letiku-jw.org nge-email noma umtfumelele i-link letamlayela ku-jw.org. Nangabe silayela bantfu labanesifiso sekufundza liBhayibheli ema-website etfu, sisuke sibalayela umtfombo longiwo wekudla lokuvela kuNkulunkulu njengobe asebentisa “sisebenti lesetsembekile nalesihlakaniphile.”