Ku-2 Khorinte 12:2, 3, Pawula usitjela ngendvodza letsite ‘leyatsatfwa yayiswa ezulwini lesitsatfu.’ Bekungubani lendvodza? Abhalela libandla laseKhorinte, Pawula washo kutsi Nkulunkulu bekamsebentisa njengemphostoli. (2 Khor. 11:5, 23) Wabese ukhuluma “ngemibono nangetembulo teNkhosi.” KulomBhalo, Pawula akazange ababale labanye bazalwane. Loko bekusho kutsi bekatisho yena kutsi ungulendvodza lebeyibone imibono netembulo.—2 Khor. 12:1, 5.

Pawula nguye ‘lowatsatfwa wayiswa ezulwini lesitsatfu’ futsi ‘wayiswa epharadisi.’ (2 Khor. 12:2-4) Wasebentisa ligama lelitsi “tembulo,” kuze achaze loko lebebamtjele kona lebekutawenteka esikhatsini lesitako.

Yini Pawula layibona ‘njengelizulu lesitsatfu’?

EBhayibhelini “lizulu” lingasho lizulu lelibonakalako. (Gen. 11:4; 27:28; Mat. 6:26) Kepha “lizulu” lingasho tintfo letinyenti. Ngalesinye sikhatsi lingasho kubusa kwebantfu. (Dan. 4:20-22) Noma lingasho uMbuso waNkulunkulu longcwele futsi lophakeme kakhulu.—Semb. 21:1.

Pawula wabona ‘lizulu lesitsatfu.’ Bekasho kutsini? LiBhayibheli livamise kuphindza intfo letsite kuze ligcizelele liphuzu noma kukhombisa kubaluleka kwendzaba. (Isa. 6:3; Hez. 21:27; Semb. 4:8) Kubonakala ngatsi nakakhuluma ngelizulu lesitsatfu, Pawula bekagcizelela emandla lamakhulu nalaphakeme ekubusa kweMbuso waMesiya, lobuswa nguJesu Khristu kanye nalabangu-144 000. (Buka incwadzi letsi “Insight on the Scriptures,” Umculu. 1, emakh. 1059 na-1062.) Njengoba umphostoli Phetro abhala, silindzele “emazulu lamasha” njengobe Nkulunkulu asetsembisile.—2 Phet. 3:13.

Singatsini “ngelipharadisi” Pawula lakhuluma ngalo?

Ligama lelitsi “pharadisi” lingasho tintfo letinyenti: (1) Ngekubuka kwebantfu, lipharadisi lingasho lipharadisi lesililindzele lelatawuba lamhlabeni. (2) Lingasho indzawo lenekuthula Jehova latayiniketa bantfu bakhe eveni lelisha. (3) Ngalesinye sikhatsi lingaphindze lisho indzawo lenhle ezulwini, ‘lipharadisi laNkulunkulu’ lokukhulunywa ngalo kuSembulo 2:7.—Fundza Sicongosekulindza saJuly 15, 2015, likh. 8. sig. 8.

Kungenteka kutsi Pawula nakabala letindlela letintsatfu ku-2 Khorinte 12:4 bekakhuluma ngetimo labhekana nato.

Sesiphetsa:

‘Lizulu lesitsatfu’ lokukhulunywa ngalo ku-2 Khorinte 12:2 singasho kutsi limelela uMbuso waMesiya lobuswa nguJesu Khristu kanye nalabangu-144 000, ‘lokumazulu lamasha.’—2 Phet. 3:13.

Leli ‘lizulu lesitsatfu’ ngoba loMbuso uphakeme kakhulu futsi unemandla ekubusa.

Lipharadisi Pawula laliboniswa embonweni lingasho (1) lipharadisi lelitawuba khona emhlabeni esikhatsini lesitako, (2) lingaphindze lisho lipharadisi lelingokomoya lelitawuba khona esikhatsini lesitako futsi litawuba ngulelibanti kunalelo lesinalo esikhatsini salamuhla, futsi (3) “lipharadisi laNkulunkulu” ezulwini litawuba khona kanye naleli lasemhlabeni lomusha.

Ngako-ke umhlaba lomusha utabe uhlanganisa emazulu lamasha nemhlaba lomusha. Kutawube kulilungiselelo lelisha lelifaka ekhatsi uMbuso wasemazulwini kanye nebantfu labakhulekela Jehova emhlabeni lotawube ulipharadisi.