1, 2. (a) Bantfu labanyenti bativa njani ngekuba nebuhlobo lobuhle naNkulunkulu? (b) Ngumiphi imibuto lebalulekile lesitawucoca ngayo kulesihloko?

LOMUNYE dzadze waseCanada watsi: “Kuba nebuhlobo lobuhle naJehova kungenta ngijabule futsi kungisitile ngakhona kubhekana netinkinga tekuphila ngalokuphumelelako.” Lomunye umzalwane waseBrazil losaneminyaka lengu-23 ashadile utsi: “Kucabanga ngendlela Nkulunkulu lacabanga ngayo kungisitile kutsi ngitfole injabulo emshadweni wami.” Lomunye umzalwane wasePhilippines watsi: “Kuba nebuhlobo lobuhle naJehova kungisitile ngaba nekuthula kwengcondvo futsi ngakhona kutfutfukisa indlela lengiphatsa ngayo bazalwane labehlukahlukene.”

² Lamavi aveta kutsi kuba nebuhlobo lobuhle naJehova kusizuzisa ngetindlela letinyenti. Loko kungasenta sitibute kutsi: ‘Yini lengingayenta kuze ngitfutfukise buhlobo bami naJehova futsi ngitijabulele ngalokugcwele tinzuzo lesesicoce ngato?’ Kuze sikhone kuphendvula lombuto, kufanele sicondze kahle kutsi litsini liBhayibheli ngekuba nebuhlobo lobuhle naNkulunkulu noma kucabanga ngendlela Nkulunkulu lacabanga ngayo. Kulesihloko sitawuphendvula imibuto lemitsatfu lebalulekile. (1) Kusho kutsini kuba nebuhlobo lobuhle naJehova? (2) Ngutiphi tibonelo letitasisita sitfutfukise buhlobo betfu naJehova? (3) Imetamo yetfu yekuba ‘nemicabango  yaKhristu’ itasisita njani kutsi sibe nebuhlobo lobuhle naJehova?

3. LiBhayibheli litsi ngumuphi umehluko lokhona emkhatsini webantfu labacondziswa yinyama nalabo labacondziswa ngumoya?

³ Umphostoli Pawula wasichazela kutsi singambona njani umuntfu lonebuhlobo lobuhle naNkulunkulu. Loku wakwenta ngekutsi asho umehluko emkhatsini ‘wemuntfu locondziswa ngumoya’ kanye ‘nemuntfu locondziswa yinyama.’ (Fundza 1 Khorinte 2:14-16.) Uyini vele umehluko? Umuntfu “locondziswa yinyama akatemukeli tintfo temoya waNkulunkulu, ngobe tibulima kuye; futsi ngeke atati.” Kantsi “umuntfu locondziswa ngumoya uhlola tonkhe tintfo” futsi ‘uyayati imicabango yaKhristu.’ Pawula usikhutsata kutsi sibe nebuhlobo lobuhle naJehova. Ngutiphi letinye tindlela bantfu labacondziswa ngumoya labehluke ngato kubantfu labacondziswa yinyama?

4, 5. Ubonakala ngani umuntfu locondziswa yinyama?

⁴ Asesicale sibone indlela umuntfu locondziswa yinyama lacabanga ngayo. Wemukela indlela bantfu balelive labacabanga ngayo lesekelwe etifisweni tabo tebugovu. Umphostoli Pawula wayichaza ngekutsi ‘ngumoya losebenta emadvodzaneni ekungalaleli.’ (Ef. 2:2) Lomoya wenta bantfu labanyenti kutsi bemukele umkhuba wekulandzela linyenti lovamile kulelive. Banaka kakhulu tifiso tabo tenyama. Umphumela uba kutsi labanyenti babo benta loko labakubona kulungile futsi abanendzaba nekuphila ngetimiso taNkulunkulu. Umuntfu locabanga ngetintfo tenyama ukhatsateka kakhulu ngesikhundla sakhe, umcebo kanye nekuvikela emalungelo akhe.

⁵ Singaphindze simbone ngani umuntfu locondziswa yinyama? Singambona ngekutsi ente “imisebenti yenyama.” (Gal. 5:19-21) Encwadzini yekucala layibhalela emaKhristu aseKhorinte, umphostoli Pawula wachaza letinye tintfo letentiwa bantfu labacondziswa yinyama. Loku kufaka ekhatsi kukhutsata kwehlukana, kukhetsa, kubanga, kumangalelana, kungatfobeli bunhloko kanye nekudla nekunatsa ngalokwecile. Nakabhekene nekulingwa, umuntfu wenyama uba butsakatsaka futsi uvele ancotjwe silingo. (Taga 7:21, 22) Juda watsi bantfu labanjalo “bete nemoya waNkulunkulu.”​—Juda 18, 19.

6. Ubonakala ngani umuntfu lonebuhlobo lobuhle naNkulunkulu?

⁶ Kusho kutsini kucondziswa ngumoya? Umuntfu locondziswa ngumoya unebuhlobo lobuhle naNkulunkulu futsi wehlukile kumuntfu locondziswa yinyama. Bantfu labacondziswa ngumoya balwela ‘kulingisa Nkulunkulu.’ (Ef. 5:1) Loku kusho kutsi bayetama kucabanga ngendlela Nkulunkulu lacabanga ngayo futsi babuka tintfo ngendlela yena latibuka ngayo. Nkulunkulu ungumuntfu mbamba kubo. Ngalokwehlukile kubantfu labacondziswa tifiso tabo, benta konkhe labangakwenta kute baphile ngekuvumelana netimiso taNkulunkulu. (Hla. 119:33; 143:10) Esikhundleni sekutsi banake imisebenti yenyama, bantfu labanebuhlobo lobuhle naNkulunkulu, batsela “titselo temoya.” (Gal. 5:22, 23) Cabanga ngaloku: Umuntfu lonelikhono ebhizinisini uhlale acabanga ngalo. Ngendlela lefanako, umuntfu lonebuhlobo lobuhle naNkulunkulu uhlale acabanga ngekumkhonta.

7. Litsini liBhayibheli ngebantfu labanebuhlobo lobuhle naNkulunkulu?

⁷ LiBhayibheli likhuluma kakhulu ngebantfu labanebuhlobo lobuhle naNkulunkulu. Matewu 5:3 utsi: “Bayajabula labo labanakisisa tintfo letiphatselene naNkulunkulu, ngobe uMbuso welizulu ngewabo.” Roma 8:6 ukhombisa tinzuzo tekucabanga ngendlela Nkulunkulu lacabanga ngayo. Utsi: “Kunaka tintfo tenyama kuletsa kufa, kodvwa kunaka tintfo temoya kuletsa kuphila nekuthula.” Nasinaka  tintfo letiphatselene naNkulunkulu, siba nekuthula naye, sibe nekuthula kwengcondvo siphindze sibe nelitsemba lekuphila phakadze esikhatsini lesitako.

8. Kungani kufanele sitimisele kute sibe nebuhlobo lobuhle naJehova futsi sibulondvolote?

⁸ Noma kunjalo, live lesiphila kulo liyingoti. Njengoba siphila nebantfu labanake kakhulu tifiso tenyama, kufanele sitimisele kuba nebuhlobo lobuhle naNkulunkulu futsi sibulondvolote. Nangabe singatinaki tintfo letiphatselene naNkulunkulu, lelive litawusenta sinake kakhulu tifiso talo tenyama. Yini lengasisita sigweme kutsi loko kwenteke? Yini lesingayenta kuze sikhulise buhlobo betfu naNkulunkulu?

9. (a) Yini lengasisita sikhulise buhlobo betfu naNkulunkulu? (b) Ngutiphi tibonelo tebantfu labebanebuhlobo lobuhle naNkulunkulu lesitawucoca ngato?

⁹ Umntfwana angaba ngumuntfu lovutsiwe nangabe abuka sibonelo lesihle sebatali bakhe bese uyasilingisa. Ngalokufanako, natsi singakhulisa buhlobo betfu naNkulunkulu ngekutsi silingise kukholwa kwebantfu labavutsiwe. Ngalokwehlukile, bantfu lababuswa tifiso tenyama batibonelo letisecwayiso kitsi. (1 Khor. 3:1-4) LiBhayibheli linetibonelo lokufanele sitilingise nalokungakafaneli sitilingise. Njengoba umgomo wetfu ukutsi sibe nebuhlobo lobuhle naNkulunkulu, asesicoce ngetibonelo letinhle tebantfu lesingabalingisa. Sitawucoca ngaJakobe, Mariya naJesu.

10. Jakobe wakhombisa njani kutsi unebuhlobo lobuhle naJehova?

¹⁰ Kwekucala, asesicoce ngesibonelo saJakobe. Kuphila bekungasimelula kuJakobe njengobe kumatima nakitsi lamuhla. Esawu umnakabo lobekacondziswa tifiso tenyama bekafuna kumbulala. Ngetulu kwaloko babetala wakhe lokhohlakele bekafuna amsebentele sikhatsi lesidze. Nobe kunjalo, Jakobe waba nebuhlobo lobuhle naNkulunkulu ngisho noma abehlala nebantfu labalawulwa tifiso tabo. Bekanekukholwa esetsembisweni lesentiwa ku-Abrahama futsi watinikela kute anakekele umndeni wakhe lobewunendzima lebalulekile  ekugcwalisekeni kwenjongo yaNkulunkulu. (Gen. 28:10-15) Emavi lakhulunywa nguJakobe kanye netento takhe tikhombisa kutsi bekahlale acabanga ngetimiso taNkulunkulu kanye nentsandvo yakhe. Nasi sibonelo, ngesikhatsi asongelwa ngu-Esawu, Jakobe watsi kuNkulunkulu: “Ngicela kutsi umane ungephule . . . Wakhuluma kimi watsi: ‘Ngiyawukwentela lokuhle, ngandzise nentalo yakho ibe ngangesihlabatsi sangaselwandle.’” (Gen. 32:6-12) Siyaciniseka kutsi bekatetsemba tetsembiso taJehova futsi nabokhokho bakhe bebafuna kuphila ngekuvumelana nentsandvo yaNkulunkulu kanye nenjongo yakhe.

11. Yini lekhombisa kutsi Mariya abenebuhlobo lobuhle naNkulunkulu?

¹¹ Nyalo asesicoce ngesibonelo saMariya. Kungani Jehova akhetsa Mariya kutsi abe ngumake waJesu? Siyaciniseka kutsi kungobe bekacabanga ngendlela Jehova lacabanga ngayo. Sikwati njani loko? Wakhombisa ngalokucacile kutsi unebuhlobo lobuhle naNkulunkulu ngesikhatsi asho emavi lamnandzi ekudvumisa nakavakashele tihlobo takhe boZakhariya na-Elizabethe. (Fundza Lukha 1:46-55.) Emavi aMariya akhombisa kutsi bekalitsandza ngalokujulile liVi laNkulunkulu nekutsi beketayelene kakhulu nemiBhalo yesiHebheru. (Gen. 30:13; 1 Sam. 2:1-10; Mal. 3:12) Naka kutsi ngisho noma sebashadile, boMariya naJosefa abazange baye ecasini ngesikhatsi Jesu asengakatalwa. Loko kusitjela kutsi bobabili bebanake kakhulu intsandvo yaNkulunkulu kunekutsi benetise tifiso tabo. (Mat. 1:25) Njengobe sikhatsi sichubeka, ngekucophelela Mariya bekakunaka lobekwenteka emphilweni yaJesu kanye nemavi akhe lahlakaniphile, futsi konkhe loku ‘wakugcina enhlitiyweni’ yakhe. (Luk. 2:51) Ngalokucacile bekayinaka injongo yaNkulunkulu lemayelana naMesiya. Sibonelo saMariya asisisiti yini kutsi sicabange ngekutsi singayenta njani intsandvo yaNkulunkulu ite kucala ekuphileni kwetfu?

12. (a) Jesu wamlingisa njani Babe wakhe? (b) Singasilingisa njani sibonelo saJesu? (Buka sitfombe lesisekucaleni kwalesihloko.)

¹² Kubo bonkhe bantfu labake baphila, Jesu bekasibonelo lesihle kakhulu semuntfu lobekanebuhlobo lobuhle naNkulunkulu. Kuko konkhe kuphila kwakhe kanye nasemsebentini wekushumayela, wakhombisa kutsi ufuna kulingisa Babe wakhe Jehova. Bekacabanga, enta tintfo futsi ativa ngendlela Jehova lativa ngayo. Abephila ngekuvumelana nentsandvo yaNkulunkulu kanye netimiso takhe. (Joh. 8:29; 14:9; 15:10) Nasi sibonelo, naka indlela Jehova lakhombisa ngayo luvelo njengobe ichazwa ngumphrofethi Isaya, bese uyicatsanisa nendlela liVangeli laMakho lelichaza ngayo imiva yaJesu. (Fundza Isaya 63:9; Makho 6:34.) Siyamlingisa yini Jesu ngekutsi sihlale sikulungele kukhombisa luvelo nasihlangana nebantfu labadzinga lusito? Ngetulu kwaloko, Jesu watinikela kute ente umsebenti wekushumayela nekufundzisa tindzaba letimnandzi. (Luk. 4:43) Indlela Jesu labetiva ngayo kanye netintfo labekatenta tikhombisa kutsi bekanebuhlobo lobuhle naJehova.

13, 14. (a) Yini lesingayifundza etibonelweni talamuhla tebantfu labanebuhlobo lobuhle naNkulunkulu? (b) Shano sibonelo.

¹³ Ngaphandle kwetibonelo letiseBhayibhelini, kunemaKhristu lamanyenti lamuhla lanebuhlobo lobuhle naNkulunkulu futsi lalwela kuba nebuntfu lobufana nebaKhristu. LamaKhristu ayatimisela emsebentini wekushumayela, emukela tihambi, futsi aneluvelo kanye nalobunye buntfu lobuhle. Anesono njengatsi futsi alwisana nebutsakatsaka lobutsite njengobe etama kukhombisa buntfu baNkulunkulu. Rachel longudzadze waseBrazil utsi: “Bengikutsandza kulandzela ifashini yalelive. Umphumela waloko waba kutsi indlela lebengigcoka ngayo beyite sizotsa. Kodvwa kufundza liciniso kwangikhutsata kutsi ngente imetamo kute ngibe nebuhlobo lobuhle naNkulunkulu. Kwenta letingucuko bekungasimelula,  kodvwa nyalo sengiyajabula futsi kuphila kwami sekunenjongo.”

¹⁴ Reylene wasePhilippines bekanenkinga leyehlukile. Bekanake kakhulu kutfola imfundvo lephakeme kanye nemsebenti loholela kahle kute aphumelele ekuphileni. Utsi: “Besengite imigomo yekukhonta Nkulunkulu. Kodvwa ngabona kutsi kukhona lebekushoda ekuphileni kwami futsi bekubaluleke kakhulu kwendlula umsebenti wami. Umphumela waloko waba kutsi ngaphindze nganaka kakhulu kukhonta Jehova.” Kusukela ngaleso sikhatsi Reylene waba sibonelo lesihle sekuba nekukholwa esetsembisweni saJehova lesikuMatewu 6:33, 34. Utsi: “Ngiciniseka ngalokuphelele kutsi Jehova utanginakekela!” Mhlawumbe bakhona bazalwane nabodzadze labenta lokufanako ebandleni lokulo. Loko akusikhutsati yini kutsi silandzele sibonelo sabo sekwetsembeka njengobe balingisa Khristu?​—1 Khor. 11:1; 2 Thes. 3:7.

15, 16. (a) Yini lokufanele siyente kute silingise Khristu? (b) Singayati njani “imicabango yaKhristu”?

¹⁵ Singamlingisa njani Khristu? UmBhalo wa-1 Khorinte 2:16 ukhuluma ngekuba ‘nemicabango yaKhristu.’ Roma 15:5 ukhuluma ngekutsi sente “indlela lesicabanga ngayo ibe njengeyaKhristu Jesu.” Ngako kuze silingise Jesu, kufanele siyati indlela lacabanga ngayo futsi sibucondze kahle buntfu bakhe. Kufanele bese silandzela tinyatselo takhe. Jesu uhlale acabanga ngebuhlobo bakhe naNkulunkulu. Ngako nasilingisa Jesu sisuke silingisa Jehova. Letizatfu tenta kucace kutsi kubaluleke kangakanani kutsi sifundze kucabanga ngendlela Jesu lacabanga ngayo.

¹⁶ Singakwenta njani loko? Bafundzi baJesu bambona nakenta timangaliso, beva tinshumayelo takhe, babona indlela laphatsa ngayo bantfu labehlukahlukene kanye nendlela labetisebentisa ngayo timiso taNkulunkulu. Batsi: “Tsine sibofakazi bato tonkhe tintfo latenta.” (Imis. 10:39) Noma kunjalo, tsine asikhoni kumbona Jesu. Kodvwa ngenca yelutsandvo lwakhe, Jehova wenta kutsi kubhalwe emaVangeli lasichazela kahle ngebuntfu baJesu. Ngako nasifundza incwadzi yaMathewu, Makho, Lukha kanye naJohane futsi sizindla ngato, sitawuyati imicabango yaKhristu. Sitawukhona ‘kulandzela tinyatselo takhe edvute’ futsi ‘sitawuhloma ngesimo sengcondvo’ lesifana nesaKhristu.​—1 Phet. 2:21; 4:1.

17. Kutasisita njani kufundza kucabanga ngendlela Khristu lacabanga ngayo?

¹⁷ Kutasisita njani kufundza kucabanga ngendlela Khristu lacabanga ngayo? Njengobe kudla lokunemphilo kwenta umtimba ucine, buhlobo betfu naNkulunkulu butawucina nangabe tingcondvo tetfu sitondla ngemicabango yaKhristu. Kancane, kancane sitakwati loko Jesu labengakwenta etimeni letehlukahlukene. Loko kutawusisita sikhone kwenta tincumo letitawusenta semukelwe nguNkulunkulu futsi sibe nanembeza lomsulwa. Letinzuzo lesesicoce ngato tisiniketa sizatfu lesihle ‘sekugcoka iNkhosi Jesu Khristu.’​—Rom. 13:14.

18. Kulesihloko yini loyifundzile mayelana nekuba nebuhlobo lobuhle naJehova?

¹⁸ Sesibonile kutsi kusho kutsini kuba nebuhlobo lobuhle naNkulunkulu. Sesibonile nekutsi kukhona lesingakufundza etibonelweni letinhle tebantfu labanebuhlobo lobuhle naNkulunkulu. Sesicocile nangekutsi kuba ‘nemicabango yaKhristu’ kusisita njani kutsi sikhulise buhlobo betfu naNkulunkulu. Noma kunjalo, kukhona lokunye lokufanele sikunake mayelana nebuhlobo betfu naNkulunkulu. Nasi sibonelo, yini lengasisita kutsi sibone kutsi bucine kangakanani buhlobo betfu naNkulunkulu? Yini lenye lesingayenta kute sibucinise? Kuba nebuhlobo lobuhle naNkulunkulu kukutsintsa njani kuphila kwetfu kwamalanga onkhe? Sihloko lesilandzelako sitasisita sitfole timphendvulo talemibuto.