1, 2. (a) Yini leyenta lelive lingabi nebunye? (b) Ngumiphi imibuto lesitawucoca ngayo kulesihloko?

NAKACABANGA ngalokwenteka esikhatsini lesendlulile, lomunye dzadze wase-Europe watsi: “Kusukela ngisemncane bengibona bantfu baphatfwa kabi. Bengingawasekeli emacembu etepolitiki eveni lakitsi, kodvwa bengisekela loko bantfu labanyenti lebebacabanga kutsi kukahle. Kwaphela iminyaka leminyenti ngitsandzana nemuntfu lobekaneludlame.” Lomunye umzalwane wase-Africa uchaza sizatfu lebesimenta abe nebudlova. Utsi: “Bengikholelwa kutsi sive sakitsi ngiso lebesincono kwendlula leletinye futsi ngase ngingenela licembu lelitsite lepolitiki. Besifundziswa kutsi bantfu labasiphikisako sibabulale ngesikhali. Besibulala ngisho nebantfu besive sakitsi nangabe basekela lamanye emacembu etepolitiki.” Lomunye dzadze lohlala e-Europe utsi: “Bengibabandlulula labanye futsi bengibenyanya bantfu balesinye sive noma labebanenkholo leyehlukile kuyami.”

² Bantfu labanyenti lamuhla bacabanga ngendlela lefanako. Emacembu lamanyenti etepolitiki aba nebudlova kuze atfole  inkhululeko. Bantfu bayawalwela emacembu abo etepolitiki. Bantfu lababuya kulamanye emave bacabanga kutsi bantfu labanyenti bayabenyanya. LiBhayibheli lasho kutsi ngemalanga ekugcina bantfu bebangeke ‘bavume kwenta tivumelwane.’ (2 Thim. 3:1, 3) Njengoba lelive lite bunye, yini emaKhristu langayenta kuze abulondvolote? Kunyenti lesingakufundza esibonelweni saJesu. Bantfu bangesikhatsi sakhe bebehlukaniswe tindzaba tepolitiki. Kulesihloko sitawucoca ngetimphendvulo tanayi imibuto lemitsatfu: Yini leyenta Jesu wangatingeneli tindzaba tepolitiki? Wakhombisa njani kutsi tinceku taNkulunkulu akukafaneli tingenele tindzaba tepolitiki? Jesu wasifundzisa njani kutsi akukafaneli sibe nebudlova ngisho noma siphatfwa kabi?

3, 4. (a) Ngesikhatsi Jesu asemhlabeni nguliphi litsemba emaJuda lebekanalo? (b) Loko kwabatsintsa njani bafundzi baJesu?

³ EmaJuda lamanyenti Jesu labewashumayela bekalangatelela kukhululeka ekugcilatweni ngemaRoma. Inhlangano yemaJuda yetepolitiki lebitwa ngekutsi ngemaZelothi beyikhutsata bantfu kutsi bafune inkhululeko. Emalunga lamanyenti alenhlangano bekasekela imibono yaJudasi waseGalile. Judasi bekatenta Mesiya ngelikhulu lekucala futsi wadukisa bantfu labanyenti. Josephus losati lesingumJuda watsi Judasi abekhutsata bantfu baseveni lakubo kutsi bavukele emaRoma futsi watsi bantfu lebebakhokha umtselo bebangemagwala. EmaRoma agcine ambulele Judasi. (Imis. 5:37) Lamanye emalunga alenhlangano bekatimisele kulwela inkhululeko.

⁴ EmaJuda lamanyenti bekalangatelela kufika kwaMesiya. Bekacabanga kutsi Mesiya bekatawakhulula ekugcilatweni ngemaRoma futsi bekatawenta ema-Israyeli abe sive lesikhulu. (Luk. 2:38; 3:15) Labanyenti bebacabanga kutsi umbuso waMesiya bewutawuba ka-Israyeli. Ngako tigidzi temaJuda lebetikulamanye emave betingabuyela eveni lawo. Khumbula kutsi Johane umbhabhatisi wabuta Jesu watsi: “Unguye yini Loyo Lotako, nobe kusafanele silindzele lomunye?” (Mat. 11:2, 3) Johane bekafuna kwati kutsi kukhona yini lomunye lebekatawufeza lobekufunwa ngemaJuda. Bafundzi lababili bahlangana naJesu ngesikhatsi sekavusiwe emgwacweni loya e-Emawusi. Bebacabanga kutsi nguJesu lobekatawukhulula ema-Israyeli. (Fundza Lukha 24:21.) Ngekushesha ngemuva kwaloko baphostoli baJesu bambuta batsi: “Nkhosi, sengiso yini lesi sikhatsi lotawubuyisela ngaso uMbuso ku-Israyeli?”​—Imis. 1:6.

5. (a) Kungani bantfu baseGalile bebafuna kutsi Jesu abe yinkhosi yabo? (b) Jesu wakulungisa njani kucabanga kwabo?

⁵ Bantfu baseGalile bebafuna kutsi Jesu abe yinkhosi yabo ngenca yaloko lebebakulindzele kuMesiya. Kungenteka bebacabanga kutsi Jesu bekatawuba ngumholi lokahle ngobe bekasikhulumi lesihle, elapha labagulako futsi bekondla ngisho nebantfu labalambile. Ngemuva kwekutsi Jesu ondle bantfu labangetulu kwa-5 000, bantfu bamangala futsi Jesu bekakwati loko bebakucabanga. “Jesu ati kutsi besebeta batewumbamba kuze bambeke abe yinkhosi, wesuka waya entsabeni ayedvwa.” (Joh. 6:10-15) Ngelilanga lelilandzelako simo besesincono, ngako Jesu wabese uyabachazela kutsi bekangaketeli kutobanika tintfo lebebatidzinga kepha beketele kutobafundzisa ngeMbuso waNkulunkulu. Watsi kubo: “Ningabosebentela kudla lokuphelako, kodvwa sebentelani kudla lokuhlala kuze kube phakadze.”​—Joh. 6:25-27.

6. Jesu wakwenta njani kwacaca kutsi akatingeneli tindzaba tepolitiki? (Buka sitfombe lesisekucaleni kwalesihloko.)

 ⁶ Nasekatawufa, Jesu wabona kutsi labanye balandzeli bakhe bebalindzele kutsi acale kubusa eJerusalema. Kute alungise indlela lebebacabanga ngayo, wabatjela umfanekiso wemamina. Lomfanekiso wakhombisa kutsi Jesu, ‘loyindvodza yasebukhosini’ bekufanele ahambe futsi loku bekutawutsatsa sikhatsi lesidze. (Luk. 19:11-13, 15) Jesu watjela umbusi waseRoma Phontiyuse Pilatu kutsi abengatsatsi luhlangotsi etindzabeni tepolitiki. Phontiyuse Pilatu wabuta Jesu watsi: “Uyinkhosi yemaJuda yini?” (Joh. 18:33) Kungenteka Pilatu bekesaba kutsi Jesu utawenta bantfu bavukele umbuso waseRoma. Kodvwa Jesu waphendvula watsi: “Umbuso wami awusiyo incenye yalelive.” (Joh. 18:36) Jesu bekangeke atingenele tindzaba tepolitiki ngobe uMbuso wakhe bewuwasezulwini. Watjela Pilatu kutsi emhlabeni ‘beketele kutofakazela liciniso.’​—Fundza Johane 18:37.

7. Yini lengasenta sitikhandze sesitsandza licembu lelitsite letepolitiki?

⁷ Jesu bekawati kahle umsebenti wakhe. Nangabe natsi siwati kahle umsebenti wetfu sitawugwema kutsandza kanye nekutihlanganisa nanome ngabe nguliphi licembu letepolitiki. Loku kungahle kube matima. Lomunye umbonisi wesigodzi watsi: “Bantfu basendzaweni yakitsi bayitsandza kakhulu ipolitiki. Babutsandza kakhulu buve babo futsi bakholelwa kutsi imphilo ingaba ncono nabangabuswa ngumuntfu wesive sakubo. Siyajabula kutsi bazalwane bachubeka banake kakhulu kushumayela tindzaba letimnandzi teMbuso kunekungenela tepolitiki futsi loku kubenta bahlale banebunye. Bayati kutsi nguNkulunkulu kuphela lotawucedza kungalungi kanye naletinye tinkinga lesingabhekana nato.”

8. Ngubuphi bumatima emaJuda angelikhulu lekucala lahlangabetana nabo?

⁸ Nangabe bantfu babona kungalungi, bavamisa kungenela tepolitiki. Ngesikhatsi Jesu asemhlabeni, kukhokha umtselo kwenta bantfu labanyenti bangenela tepolitiki. Ecinisweni Juda waseGalile wavukela iRoma ngenca yekutsi beyibhalisa bantfu kute iciniseke kutsi batawukhokha imitselo. Bantfu labebabuswa ngemaRoma bekufanele  babhadale imitselo leminyenti lefaka ekhatsi yetintfo letiligugu labanato, yemhlaba, kanye neyetindlu. Batselisi bebakhohlakele kakhulu futsi loko bekwenta kuphila kube matima. Bebaphindze badizele babusi kute batfole tikhundla futsi ngato bebakha imali lenyenti. Zakewu lebekayindvuna yebatselisi yaseJerikho, bekanjingile ngobe bekatselisa bantfu imali lenyenti.​—Luk. 19:2, 8.

9, 10. (a) Yini titsa taJesu letetama kuyenta kuze timente angenele tepolitiki? (b) Indlela Jesu laphendvula ngayo isifundzisani? (Buka sitfombe lesisekucaleni kwalesihloko.)

⁹ Titsa taJesu tetama kumgila ngekutsi timente atsatse luhlangotsi endzabeni yemtselo. Tambuta kutsi kuvumelekile yini kukhipha “umtselo” wadenariyo lobewubhadalwa ngiwo onkhe emaJuda. (Fundza Matewu 22:16-18.) EmaJuda bekakwenyanya kukhipha umtselo ngoba bekuwakhumbuta kutsi abebuswa ngemaRoma. “Emalunga elicembu laHerodi” bekanelitsemba lekutsi Jesu utawutsi angawubhadali umtselo bese ambeka licala lekuvukela uMbuso wemaRoma. Kani kube watsi kufanele bawubhadale, balandzeli bakhe bebatamshiya.

¹⁰ Jesu bekatimisele kutsi angalutsatsi luhlangotsi etindzabeni temtselo. Watsi: “Nikani Khesari lokukwakhe, kodvwa ninike Nkulunkulu lokukwakhe.” (Mat. 22:21) Kuliciniso kutsi Jesu bekati kutsi batselisi bebakhohlakele kodvwa akazange akunake loko. Esikhundleni saloko wanaka kakhulu uMbuso waNkulunkulu lokungiwo lotawulungisa tinkinga tebantfu. Wabekela bonkhe balandzeli bakhe sibonelo sekutsi bangatingeneli tindzaba tepolitiki ngisho noma licembu lelitsite lingabonakala lenta tintfo letilungile. EmaKhristu abeka kucala uMbuso waNkulunkulu kanye nekulunga kwakhe. Ngesizatfu saloko, asitingeneli tepolitiki noma sikhulume kabi ngato.​—Mat. 6:33.

11. Nguyiphi indlela lekahle yekulwela kulunga?

¹¹ BoFakazi BaJehova labanyenti lebebangenele tepolitiki bakhonile kushintja. Lomunye dzadze waseGreat Britain utsi: “Ngemuva kwekufundza ngetenhlalo enyuvesi ngabese ngingenela tepolitiki. Bengifuna kulwela emalungelo ebantfu labamnyama ngoba besihlushwa kakhulu. Ngisho noma benginelikhono lekuncoba timphikiswano, bengingajabuli. Bengingati kutsi kuphatfwa kabi kwebantfu bekufanele kususwe etinhlitiyweni. Kepha nangicala kudadisha liBhayibheli ngabona kutsi kufanele ngicale ngeyami inhlitiyo. Dzadze lomhlophe wangisita kuze ngikhone kwenta njalo. Nyalo sengilihlahlandlela lelivamile ebandleni lelulwimi lwetandla futsi ngetama kusita tonkhe tinhlobo tebantfu.”

12. Nguluphi luhlobo lwemvubelo Jesu latsi bafundzi bakhe balugweme?

¹² Ngesikhatsi Jesu asemhlabeni, baholi benkholo bebangenela tepolitiki. Incwadzi letsi “Daily Life in Palestine at the Time of Christ” itsi emacembu latsite etinkholo temaJuda abefana nemaphathi epolitiki. Jesu wecwayisa bafundzi bakhe watsi: “Caphelani imvubelo yebaFarisi neyaHerodi.” (Mak. 8:15) Nakakhuluma ngaHerodi, bekakhuluma ngebalandzeli baHerodi. Licembu lebaFarisi belifuna kutsi emaJuda akhululeke eMbusweni waseRoma. LiVangeli laMatewu litsi Jesu wecwayisa balandzeli bakhe ngebaSadusi. BaSadusi bebafuna kutsi iRoma ichubeke ibusa emaJuda ngoba loko bekubenta babe netikhundla letiphakeme. Jesu wecwayisa balandzeli bakhe kutsi bagweme “imvubelo” noma timfundziso talamacembu lamatsatfu. (Mat. 16:6, 12) Jesu wakhipha lesecwayiso ngemuva kwesikhashana nje bafune kumbeka abe yinkhosi.

13, 14. (a) Tindzaba tepolitiki netenkholo tikubangela njani kuphatfwa kabi? (b) Kungani kungakalungi kuba nebudlova ngisho noma uphatfwa kabi? (Buka sitfombe lesisekucaleni kwalesihloko.)

 ¹³ Kuvame kuba nebudlova nangabe tinkholo tingenela tindzaba tepolitiki. Jesu wafundzisa bafundzi bakhe kutsi kufanele bangatingeneli tindzaba tepolitiki. Kungako baPhristi labaphakeme kanye nebaFarisi bebafuna kubulala Jesu. Bebesaba kutsi bantfu batawulalela Jesu bese bayayekela kuba balandzeli babo. Batsi: “Nasimyekela achubeke, bonkhe bantfu batawukholwa kuye, nemaRoma atawukuta atsatse lendzawo kanye nalesive setfu.” (Joh. 11:48) Ngako umPhristi loPhakeme Khayafase wahlela kubulala Jesu.—Joh. 11:49-53; 18:14.

¹⁴ Khayafase watfumela emasotja kutsi abophe Jesu nasekumnyama. Jesu bekati ngalelisu lekumbulala, ngako ngelilanga lekugcina ngesikhatsi adla nebaphostoli bakhe wabatjela kutsi bafune tinkemba. Tinkemba letimbili betingabafundzisa sifundvo lesibalulekile. (Luk. 22:36-38) Ngalobo busuku, Phetro wasebentisa lenkemba kuze ahlasele munye wabo. Asingabati kutsi Phetro watfukutsela kakhulu ngenca yekuphatfwa kabi kwaJesu. (Joh. 18:10) Kodvwa Jesu watsi kuPhetro: “Buyisela inkemba yakho endzaweni yayo, ngobe labo labasebentisa inkemba bayawubhujiswa ngenkemba.” (Mat. 26:52, 53) Lesifundvo lesibalulekile besivumelana naloko Jesu labekuthantazele ngalobo busuku nakatsi balandzeli bakhe kufanele bangabi yincenye yelive. (Fundza Johane 17:16.) NguNkulunkulu kuphela lonelilungelo lekucedza kuphatfwa kabi.

15, 16. (a) LiVi laNkulunkulu liwasite njani emaKhristu kutsi agweme kungevani? (b) Ngumuphi umehluko Jehova lawubonako emhlabeni?

¹⁵ Lomunye dzadze waseningizimu ye-Europe lokukhulunywe ngaye ekucaleni wafundza sifundvo lesifanako. Utsi: “Sengiyati kutsi kuba nebudlova akwenti kutsi bantfu baphatsane kahle. Ngibonile nekutsi bantfu labanebudlova bagcina sebafile futsi loko kwenta labanyenti baphile imphilo lebuhlungu. Ngajabula kakhulu nangifundza eBhayibhelini kutsi nguNkulunkulu kuphela lotawenta kutsi kube nekulunga emhlabeni. Sekuphele iminyaka lengu-25 solo ngishumayela ngalomlayeto.” Umzalwane waseningizimu ye-Africa usebentisa inkemba yemoya lokuliVi laNkulunkulu nakashumayela umlayeto wekuthula kubomakhelwane bakhe, ngisho noma bavela kusiphi sive. (Ef. 6:17) NasekanguFakazi WaJehova, lodzadze wase-Europe washada nalomunye umzalwane wesive labengasitsandzi. Bobatsatfu benta letingucuko ngesizatfu sekutsi bebafuna kuba njengaKhristu.

¹⁶ Kubaluleke kakhulu kutsi sente letingucuko! LiBhayibheli lifananisa bantfu nemagagasi aselwandle lete kuthula. (Isa. 17:12; 57:20, 21; Semb. 13:1) Tindzaba tepolitiki tenta bantfu batfukutsele, babe neludlame futsi tiyabehlukanisa. Kodvwa tsine sinekuthula nebunye. Jehova ujabula kakhulu nakabona kutsi bantfu bakhe banebunye ngisho noma bantfu balelive bangevani.​—Fundza Zefaniya 3:17.

17. (a) Ngutiphi tindlela letintsatfu lesingatfutfukisa ngato bunye? (b) Sitawucoca ngani esihlokweni lesilandzelako?

¹⁷ Sesifundzile kutsi singatfutfukisa bunye betfu ngetindlela letintsatfu: (1) Setsembela eMbusweni waNkulunkulu kutsi ngiwo lotawucedza kuphatfwa kabi, (2) asitsatsi luhlangotsi etindzabeni tepolitiki futsi (3) site budlova. Noma kunjalo, ngaletinye tikhatsi, lubandlululo lungasenta singabi nebunye. Esihlokweni lesilandzelako sitawucoca ngekutsi singayincoba njani lenkinga njengobe emaKhristu angelikhulu lekucala enta.