1, 2. (a) Yini leyentiwa ngulabanye batali labangemaKhristu nangabe bantfwana babo bacela kubhajatiswa? (b) Kungani labafuna kubhajatiswa babutwa kutsi sebatinikele yini kuJehova? (Buka sitfombe lesisekucaleni kwalesihloko.)

BATALI labangemaKhristu bayabukela njengoba intfombatanyana yabo lesitayibita ngekutsi nguMaria isukuma kanye nalabatawubhajatiswa. Ngelivi lelicacile nalelivakalako iphendvula imibuto lemibili lebutwe sikhulumi. Ngemva kwaloko iyabhajatiswa.

² Batali baMaria bajabula ngekutsi indvodzakati yabo yenta sincumo sekutinikela kuJehova futsi yabhajatiswa. Ngaphambi kwaloko make wayo bekakhatsatekile. Bekatibuta kutsi: ‘Maria usemncane yini kutsi angabhajatiswa? Uyati yini kutsi sibaluleke kangakanani lesincumo lasentako? Ngeke kube ncono yini kutsi alindze sikhashana ngaphambi kwekutsi abhajatiswe?’ Lena yimibuto batali labanyenti labanelutsandvo labatibuta yona nangabe bantfwana babo bafuna kubhajatiswa. (Shu. 5:5) Kutinikela nekubhajatiswa kutinyatselo letibaluleke kakhulu emaKhristu langatitsatsa.​—Fundza libhokisi lelitsi “ Sewutinikele Yini KuJehova?”

3, 4. (a) Umphostoli Phetro wakufanekisa njani kubaluleka kwekubhajatiswa? (b) Kungani kubhajatiswa kufananiswa nekwakhiwa kwemkhumbi waNowa?

 ³ Nakachaza lubhabhatiso, umphostoli Phetro wakhuluma ngekwakhiwa kwemkhumbi waNowa, watsi: “Lubhabhatiso loluhlobene naloku seluyanisindzisa.” (Fundza 1 Phetro 3:20, 21.) Umkhumbi bewusakhiwo lesibonakalako lesakufakazela ngalokucacile kutsi Nowa bekatinikele kuNkulunkulu kuze ente intsandvo yakhe. Nowa wawenta ngekwetsembeka umsebenti labewunikwe nguJehova. Tento lebetikhombisa kukholwa tenta Nowa kanye nemndeni wakhe basindza kuZamcolo. Nguliphi liphuzu lesilitfola kulomfanekiso waPhetro?

⁴ Njengobe umkhumbi bewubufakazi bekutsi Nowa bekanekukholwa, kubhajatiswa embikwebantfu kubufakazi bekutsi umfundzi utinikele kuJehova futsi uyakholelwa kutsi Khristu wavuswa. NjengaNowa, bafundzi labatinikele bawenta ngekwetsembeka umsebenti Nkulunkulu labanikete wona. Njengoba Nowa asindza kuZamcolo bantfu lababhajatisiwe labetsembekile batawusindza nakubhujiswa lelive lelibi. (Mak. 13:10; Semb. 7:9, 10) Loku ngiko lokwenta kutinikela kanye nekubhajatiswa kubaluleke kakhulu. Umuntfu lohlehlisa kubhajatiswa utibeka engotini yekulahlekelwa kuphila lokuphakadze.

5. Yini lesitawucoca ngayo kulesihloko?

⁵ Njengobe kubhajatiswa kubaluleke kangaka, kunemibuto lemitsatfu lokufanele siyinake. Litsini liBhayibheli ngekubhajatiswa? Ngutiphi tinyatselo umuntfu lokufanele atitsatse ngaphambi kwekutsi abhajatiswe? Kungani umfundzisi longumKhristu kufanele akunake kubaluleka kwekubhajatiswa nakafundzisa umntfwanakhe noma achubela lomunye sifundvo seliBhayibheli?

6, 7. (a) Chaza kutsi lubhabhatiso lwaJohane belubaluleke ngani. (b) Nguluphi lubhabhatiso lolwehlukile lolwentiwa nguJohane?

⁶ EBhayibhelini sifundza kutsi umuntfu wekucala lowabhabhatisa labanye bekunguJohane umbhabhatisi. (Mat. 3:1-6) Bantfu bebeta kutobhajatiswa nguJohane kuze bakhombise kutsi baphendvukile etonweni tabo labatenta ngekwephula uMtsetfo waMosi. Noma kunjalo lubhabhatiso lolubaluleke kakhulu belungakahlobani nekuphendvuka. Johane waba nelilungelo lelikhetsekile lekubhabhatisa Jesu, loyiNdvodzana yaNkulunkulu lete sono. (Mat. 3:13-17) Jesu bekungadzingeki kutsi aphendvuke ngoba bekete sono. (1 Phet. 2:22) Kubhajatiswa kwakhe bekukhombisa kutsi utinikele kuze ente intsandvo yaNkulunkulu.​—Heb. 10:7.

⁷ Ngesikhatsi Jesu asemhlabeni, bafundzi bakhe bacala kubhabhatisa labanye. (Joh. 3:22; 4:1, 2) Lokubhajatiswa bekukhombisa kutsi labantfu besebaphendvukile etonweni lebatenta ngekwephula uMtsetfo waMosi. Ngemuva kwekufa kanye nekuvuka kwaJesu, kubhajatiswa bekutawusho lokwehlukile kubalandzeli bakhe.

8. (a) Ngemuva kwekuvuswa kwakhe, ngumuphi umyalo Jesu lawunika balandzeli bakhe? (b) Chaza kutsi kubaluleke ngani kutsi emaKhristu abhajatiswe.

⁸ Ngemnyaka wa-33 C.E., Jesu lobesavusiwe wabonakala esicukwini sebantfu lesingetulu kwa-500, lebesihlanganisa emadvodza, bafati, mhlawumbe nebantfwana. Kungenteka wawasho ngaleso sikhatsi lamavi latsi: “Ngako-ke hambani nente bantfu bato tonkhe tive babe bafundzi bami, nibabhabhatise egameni leYise, neleNdvodzana, nelemoya longcwele, nibafundzise kugcina konkhe lenginitjele kona.” (Mat. 28:19, 20; 1 Khor. 15:6) Kungenteka emakhulu ebalandzeli baJesu bekalalele ngesikhatsi Jesu atsi abahambe bayowenta bantfu babe bafundzi. Wabese utsi bonkhe labemukela lijoko lekuba bafundzi bakhe kufanele babhajatiswe. (Mat. 11:29, 30) Wonkhe umuntfu lofuna kwemukelwa nguNkulunkulu kufanele emukele futsi avume kutsi Jesu unendzima lebalulekile ekufezeni injongo yaJehova, bese uyabhajatiswa. Ngulolo kuphela luhlobo lwelubhabhatiso lwemanti Nkulunkulu lalwemukelako. LiBhayibheli lisiniketa bufakazi lobenele bekutsi ngelikhulu lekucala, bafundzi baKhristu labasha bebakucondza kubaluleka kwekubhajatiswa. Abazange bakuhlehlise ngalokungenasidzingo kubhajatiswa.​—Imis. 2:41; 9:18; 16:14, 15, 32, 33.

9, 10. Indzaba yeMtopiya lowagucukela enkholweni yebuKhristu kanye neyemphostoli Pawula isifundzisani ngekubhajatiswa?

⁹ Fundza Imisebenti 8:35, 36. Cabanga ngesibonelo sendvodza lenguMtopiya lebeyibuya kuyokhonta eJerusalema leyagucukela enkholweni yebuKhristu. Acondziswa yingilosi yaJehova, Filiphi “wamemetela kuyo tindzaba letimnandzi letimayelana naJesu.” Yenta njani lendvodza? Loko leyakwenta kamuva kwaniketa bufakazi lobucacile bendlela lebeyitiva ngayo ngemaciniso lebeyiwafundzile. Beyifisa kwenta intsandvo yaJehova, futsi yabhajatiswa ngekushesha.

¹⁰ Sibonelo sesibili sendvodza lengumJuda lebeyishushisa emaKhristu. Yatalelwa esiveni saNkulunkulu lebesikhetsekile. Noma kunjalo, emaJuda alahlekelwa buhlobo bawo lobukhetsekile naJehova. Lendvodza beyishisekela emasiko ebuJuda, kodvwa yabese itfola liciniso kuJesu Khristu lebesekavusiwe. Yenta njani lendvodza?  Yalwemukela lusito leyalutfola ku-Ananiyase umfundzi longumKhristu. LiBhayibheli litsi: Lendvodza ‘yasukuma yabhajatiswa.’ (Imis. 9:17, 18; Gal. 1:14) Lendvodza lengumJuda yatiwa ngekutsi ngumphostoli Pawula. Pawula watsatsa sinyatselo ngemuva kwekutfola emaciniso ngaJesu Khristu kanye nangendzima yakhe ekufezeni injongo yaJehova. Wabhajatiswa ngekushesha.​—Fundza Imisebenti 22:12-16.

11. (a) Yini lekhutsata bafundzi beliBhayibheli lamuhla kutsi babhajatiswe? (b) Sitiva kanjani nasibona bantfu labatinikele kuJehova babhajatiswa?

¹¹ Nalamuhla kwenteka lokufanako kubafundzi beliBhayibheli labasha nalabadzala. Labo labanekukholwa futsi labawatsandza ngalokusuka enhlitiyweni emaciniso eliBhayibheli, bayatinikela kuNkulunkulu futsi babhajatiswe. Inkhulumo yelubhabhatiso iba khona njalo emihlanganweni yesifundza neyesigodzi. BoFakazi BaJehova bayajabula nangabe umfundzi emukela emaciniso futsi atfutfuka aze abhajatiswe emantini. Batali labangemaKhristu bayajabula nangabe babona bantfwana babo bakanye nebafundzi labasha futsi babhajatiswa. Ngemnyaka wemsebenti wa-2017, bantfu labangetulu kwa-284 000 “labatimisele kutfola kuphila lokuphakadze” bakhombisa kutinikela kwabo kuJehova ngekutsi babhajatiswe emantini. (Imis. 13:48) Kuyacaca kutsi labafundzi labasha bakucondza kahle kutsi kubhajatiswa kubalulekile kute ube ngumKhristu. Ngutiphi tinyatselo labatitsatsa kute babhajatiswe?

12. Ngutiphi tinyatselo umfundzi weliBhayibheli lokufanele atitsatse ngaphambi kwekutsi abhajatiswe?

¹² Ngaphambi kwekutsi umfundzi abhajatiswe, kufanele abe nekukholwa lokucinile lokusekwelwe elwatini lolungulonalona ngaNkulunkulu, injongo yakhe, kanye nendlela yakhe yekusindzisa bantfu. (1 Thim. 2:3-6) Lwati ngaNkulunkulu lwenta bafundzi bagweme imikhuba lengamjabulisi futsi baphile ngetindlela takhe tekulunga. (Imis. 3:19) Kuyacaca kutsi umuntfu ngeke atinikele ngalokuphelele kuNkulunkulu nangabe enta noma ngumuphi umkhuba lotamenta angalidli lifa leMbuso waNkulunkulu. (1 Khor. 6:9, 10) Ngetulu kwekumane aphile ngetimiso taJehova tekutiphatsa, umuntfu lofuna kulunga kufanele aphindze abe khona emihlanganweni yelibandla futsi ahlanganyele ngalokugcwele emsebentini wekushumayela losindzisa kuphila kanye nekwenta bafundzi. Jesu watsi emaKhristu eliciniso bekufanele awente lomsebenti. (Imis. 1:8) Nasekatsetse letinyatselo, lomfundzi sekangatinikela kuJehova ngemthantazo bese ukukhombisa loko ngekutsi abhajatiswe embikwebantfu.

13. Kungani bafundzisi beliBhayibheli kufanele bakhumbule kutsi kubhajatiswa kubaluleke kakhulu kumaKhristu?

¹³ Nasisita bantfwana betfu kanye nebantfu lesifundza nabo liBhayibheli kutsi batsatse tinyatselo letibalulekile, kumele sikhumbule kutsi umuntfu kufanele abhajatiswe kuze abe ngumfundzi waJesu. Nangabe sihlale sikukhumbula loko, sitawukhona kucoca ngekukhululeka nebantfu lesibafundzelako. Kufanele sisebentise ematfuba lakahle kute sicoce nabo ngekubaluleka kwekutinikela nekubhajatiswa. Sifuna kutsi bantfwana betfu nebantfu lesifundza nabo liBhayibheli batfutfuke baze babhajatiswe.

14. Kungani singabacindzeteli bantfu kutsi babhajatiswe?

¹⁴ Kuyacaca kutsi kute lokufanele ative aphocelelwe ngumtali, lafundza naye liBhayibheli noma lomunye umuntfu ebandleni kutsi abhajatiswe. Leyo akusiyo indlela yaJehova. (1 Joh. 4:8) Kunaloko, nasibafundzisa  sigcizelela kubaluleka kwekwakha buhlobo lobuhle naJehova. Kuwatsandza ngalokusuka enhlitiyweni emaciniso laseBhayibhelini kanye nekuba nesifiso sekuba ngumfundzi waKhristu ngiko lokutawenta umfundzi abhajatiswe.​—2 Khor. 5:14, 15.

15, 16. (a) Ikhona yini iminyaka lebekiwe bantfu lokufanele babhajatiswe ngayo? Chaza. (b) Kungani umfundzi weliBhayibheli kufanele abhajatiswe kute abe ngulomunye waBoFakazi BaJehova ngisho noma abhajatiswa kulenye inkholo?

¹⁵ Kute umnyaka lobekiwe wekutsi umuntfu abhajatiswe. Bafundzi bakhula baphindze bakhombise kuvutfwa ngemazinga lehlukehlukene. Labanyenti babhajatiswa basebancane futsi bachubeke batikhonti taJehova letetsembekile. Labanye bafundzi babona kubaluleka kwekubhajatiswa ngemuva kwekufundza emaciniso laseBhayibhelini nasebakhulile​—labanye basuke sebangetulu kweminyaka lengu-100!

¹⁶ Lomunye umfundzi weliBhayibheli losakhulile wabuta lamfundzisa liBhayibheli kutsi kubalulekile yini kutsi aphindze abhajatiswe ngoba bekabhajatiswe etinkholweni letehlukene eminyakeni leyengcile. Bafundza imiBhalo lekhuluma ngalendzaba. Lomfundzi wakucondza loko lokushiwo liBhayibheli futsi wabhajatiswa ngekushesha. Ngisho noma besekayofika eminyakeni lengu-80, akazange acabange kutsi kubhajatiswa akukabaluleki kuye. Kubhajatiswa kusekelwe elwatini lweliciniso ngentsandvo yaJehova. Kungako bafundzi labasha kufanele babhajatiswe ngisho nobe bebabhajatisiwe kulenye inkholo.​—Fundza Imisebenti 19:3-5.

17. Yini umuntfu lotawubhajatiswa lokufanele acabange ngayo ngelilanga lekubhajatiswa?

¹⁷ Lilanga umuntfu labhajatiswa ngalo kusuke kulilanga lenjabulo sibili. Kuphindze kube sikhatsi sekucabangisisa ngekutsi kuhlanganisani kubhajatiswa. Kufanele sitimisele kute siphile ngekuvumelana nekutinikela kwetfu. Kungako Jesu acatsanisa kuba ngumfundzi kanye nelijoka. Balandzeli baJesu kufanele “bangasatiphileli bona, kodvwa baphilele loyo lowabafela waphindze wavuswa.”​—2 Khor. 5:15; Mat. 16:24.

18. Ngumiphi imibuto lesitawucoca ngayo esihlokweni lesilandzelako?

¹⁸ Make waMaria bekacabanga ngalokufanako nakabuta lemibuto lesicoce ngayo ekucaleni kwalesihloko. Nangabe ungumtali kungenteka utibute kutsi: ‘Umntfwana wami ukulungele mbamba yini kubhajatiswa? Unelwati lolwenele yini kuze atinikele kuJehova? Kutsiwani ngemigomo yakhe lefaka ekhatsi imfundvo kanye nemsebenti? Kutsiwani nangabe umtfwana wami abhajatiswa bese wenta sono lesikhulu?’ Esihlokweni lesilandzelako, sitawucoca ngalemibuto kanye nekutsi batali labangemaKhristu bangawulondvolota njani umbono lokahle ngekubhajatiswa.