1, 2. (a) Kungani sisikhutsata sibonelo sebazalwane labashumayela etindzaweni letinebantfu labangasilaleli? (Buka sitfombe lesisekucaleni kwalesihloko.) (b) Jesu watsini ngekushumayela “endzaweni yakubo”? (Buka umbhalo longentasi.)

SERGIO NA-OLINDA baseminyakeni yabo-80 futsi bangemahlahlandlela lashadile eMelika. Njengobe bakhula, bakutfola kumatima kuhamba ngenca yekutsi tinyawo tabo tibuhlungu. Noma kunjalo, njalo nga-7 ekuseni bayahamba baye endzaweni lephitsitelako lesedolobheni, futsi loko sebakwente iminyaka leminyenti. Bema edvutane nesiteshi semabhasi futsi baniketa bantfu labendlulako tincwadzi tetfu letisekelwe eBhayibhelini. Bantfu labanyenti ababanaki, kepha lomndeni uyachubeka uma endzaweni lefanako futsi umoyitela nangabe bantfu bawubuka. Emini bayatotoba babuyele ekhaya. Ngakusasa nga-7 ekuseni baphindze babuyele. Ecinisweni, umnyaka ngamunye lomndeni lowetsembekile ushumayela tindzaba letimnandzi teMbuso emalanga lasitfupha ngeliviki.

 ² NjengaSergio na-Olinda, sekuphele iminyaka leminyenti bazalwane kanye nabodzadze labetsembekile emhlabeni wonkhe bashumayela etindzaweni letinebantfu labangalaleli. Kungenteka nawe ubhekene nesimo lesifanako, nangabe kunjalo siyakubonga ngekubeketela kwakho. * Kuchubeka kwakho ukhonta Jehova ngekwetsembeka kuyabakhutsata labanye, ngisho nalabo lesebanesikhatsi lesidze bamkhonta. Naka nankha emavi lashiwo ngulabanye babonisi betigodzi: “Kuyangikhutsata kushumayela nebazalwane nabodzadze labatsembekile.” Lomunye utsi: “Kwetsembeka kwabo kungikhutsata kutsi ngibeketele futsi ngibe nesibindzi nangenta umsebenti wekushumayela.” Kantsi lomunye utsi: “Singijabulisa kakhulu sibonelo sabo.”

3. Ngumiphi imibuto lemitsatfu lesitawucoca ngayo, futsi kungani?

³ Kulesihloko sitawucoca ngetimphendvulo temibuto lemitsatfu letsi: Kungani ngaletinye tikhatsi singativa siphelelwa ngemandla? Yini lesingayenta kuze sitsele titselo? Yini letasisita sichubeke sitsela titselo ngekucinisela? Kwati timphendvulo talemibuto kutasisita sitfole emandla ekuchubeka nekwenta umsebenti Jesu lasinike wona.

4. (a) Pawula wativa njani ngenca yaloko lokwentiwa ngemaJuda lamanyenti? (b) Kungani Pawula ativa ngalendlela?

⁴ Kwake kwenteka yini wativa uphelelwa ngemandla ngenca yekutsi bantfu lobashumayelako abakulaleli? Nangabe kunjalo utayicondza indlela umphostoli Pawula labetiva ngayo. Washumayela cishe iminyaka lengu-30 futsi wasita bantfu labanyenti kutsi babe bafundzi baJesu. (Imis. 14:21; 2 Khor. 3:2, 3) Noma kunjalo, akazange akhone kushintja bantfu labanyenti labebangemaJuda kutsi babe ngemaKhristu eliciniso. Labanyenti bebamedzelela futsi baze bamhlupha. (Imis. 14:19; 17:1, 4, 5, 13) Wativa njani Pawula ngalesento semaJuda? Watsi: “Ngikhuluma liciniso ngenca yaKhristu . . . nginelusizi lolukhulu nebuhlungu lobungapheli enhlitiyweni yami.” (Rom. 9:1-3) Kungani Pawula ativa ngalendlela? Kungobe abewutsandza kakhulu umsebenti wekushumayela. Bekashumayela emaJuda ngenca yekutsi bekawakhatsalela. Ngako Pawula weva buhlungu nakawabona angawemukeli umusa waNkulunkulu.

5. (a) Yini lesikhutsata kutsi sishumayele bomakhelwane betfu? (b) Kungani kungasimangalisi kutsi ngaletinye tikhatsi sitive sidvumatekile?

⁵ NjengaPawula, natsi sishumayela bantfu ngenca yekutsi sibakhatsalela ngalokusuka enhlitiyweni. (Mat. 22:39; 1 Khor. 11:1) Kungani? Kungobe sitibonile tibusiso letinyenti letitfolakala ngekukhonta Jehova, futsi nabo sifisa kutsi batitfole. Ngako siyachubeka sibakhutsata kutsi bafundze liciniso ngaJehova nangenjongo yakhe ngebantfu. Kufana nekutsi sibaphatsele sipho lesihle futsi siyabancenga sitsi: ‘Sicela nisemukele lesipho.’ Ngako akumangalisi kutsi sive ‘buhlungu lobungapheli etinhlitiyweni tetfu’ nangabe bantfu bangasemukeli lesipho lesihle. Kutiva ngalendlela akusho kutsi site kukholwa, kodvwa kukhombisa kutsi siwutsandza kakhulu umsebenti wekushumayela. Ngako siyakhutsateka ngisho noma sibhekana netimo letisidvumatako. Labanyenti betfu bayavumelana nalokushiwo ngu-Elena losabe lihlahlandlela iminyaka lengetulu kwa-25 nakatsi: “Kumatima kwenta umsebenti wekushumayela, kodvwa kute umsebenti lofanana nawo.”

6. Ngumuphi umbuto lesitawucoca ngawo, futsi sitawuphendvula njani?

⁶ Kungani singaciniseka kutsi singaphumelela emsebentini wekushumayela noma ngabe sishumayela kuyiphi indzawo? Kuze siphendvule lombuto lobalulekile, ase sicoce ngemifanekiso lemibili leyashiwo nguJesu lemayelana nekubaluleka ‘kwekutsela titselo.’ (Mat. 13:23) Umfanekiso wekucala umayelana nemvini.

7. (a) Ngubani lomelelwa “ngumlimi,” “umvini” kanye “nemagala”? (b) Ngumuphi umbuto lesifuna kutfola imphendvulo yawo?

⁷ Fundza Johane 15:1-5, 8. Naka kutsi Jesu watjela baphostoli bakhe kutsi: “Babe uyakhatinyuliswa ngekutsi nichubeke nitsela titselo letinyenti futsi nitivete nibafundzi bami.” Jesu watsi Babe wakhe “ungumlimi,” yena watsi ‘ungumvini sibili,’ futsi watsi bafundzi bakhe ‘bangemagala.’ * Balandzeli baKhristu kufanele batsele tiphi titselo? Kulomfanekiso Jesu akazange asho ngalokucondzile kutsi letitselo tiyini, kodvwa washo intfo lebalulekile lengasisita sibone kutsi letitselo tiyini.

8. (a) Kungani titselo lokukhulunywa ngato kulomfanekiso tingameleli kwenta bafundzi labasha? (b) Yini lesiciniseka ngayo ngetintfo Jehova lacela kutsi sitente?

⁸ Nakakhuluma ngaBabe wakhe, Jesu watsi: “Onkhe emagala lakimi langatseli uyawajuba.” Ngalamanye emavi Jehova usitsatsa njengetinceku takhe kuphela nangabe sitsela titselo. (Mat. 13:23; 21:43) Ngako kulomfanekiso waJesu, letitselo emaKhristu lokufanele atitsele atisho bantfu lesibe nelilungelo lekubenta bafundzi. (Mat. 28:19) Kube bewusho njalo, ngabe tinceku taNkulunkulu letetsembekile letingakhoni kwenta bafundzi ngesizatfu sekutsi tishumayela endzaweni lenebantfu labangalaleli, betitawufana nemagala langatseli. Kungaba kubi kuphetsa kanjalo. Kungani? Ngoba ngeke siphocelele bantfu kutsi babe bafundzi. Jehova uyasitsandza, ngeke asiphocelele kutsi sente intfo lengetulu kwemandla etfu. Ngaso sonkhe sikhatsi, Jehova usicela kutsi sente tintfo lesingakhona kutenta.​—Dut. 30:11-14.

9. (a) Sitsela titselo nasenta muphi umsebenti? (b) Ngumuphi umfanekiso lesitawucoca ngawo, futsi kungani?

⁹ Ngutiphi letitselo lokufanele sititsele? Kuyacaca kutsi letitselo tisho umsebenti sonkhe lesingakhona kuwenta. Ngako ‘kutsela titselo’ kumelela umsebenti wekushumayela tindzaba letimnandzi teMbuso waNkulunkulu. * (Mat. 24:14) Umfanekiso waJesu lomayelana nemhlanyeli uyakufakazela loko. Ase sicoce ngemfanekiso wesibili.

10. (a) Kulomfanekiso yini lemelelwa yinhlanyelo nemhlabatsi? (b) Kolo utsela ini?

¹⁰ Fundza Lukha 8:5-8, 11-15. Kulomfanekiso wemhlanyeli, inhlanyelo “livi laNkulunkulu,” noma umlayeto weMbuso. Umhlabatsi umelela inhlitiyo yemuntfu. Inhlanyelo leyawela emhlabatsini lovundzile, yamila, futsi yakhula. Yase “itsela titselo letiphindvwe kalikhulu.” Kolo utsela titselo letisinika inhlanyelo, nangabe siphindze sihlanyela lenhlanyelo kuphindze kumile lomunye kolo. Kulomfanekiso inhlanyelo yinye yakhicita tinhlanyelo letilikhulu. Lomfanekiso uwutsintsa njani umsebenti wetfu wekushumayela?

11. (a) Umfanekiso wemhlanyeli ungasebenta kanjani emsebentini wekushumayela? (b) Yini lokufanele siyente kuze sitsele titselo?

¹¹ Ngesikhatsi batali betfu labangemaKhristu noma lamanye emaKhristu asifundzisa  ngeMbuso waNkulunkulu bekufana nekutsi bahlanyela inhlanyelo emhlabatsini lomuhle. Bajabula kakhulu nababona kutsi siyawemukela lomlayeto weMbuso. Lenhlanyelo yachubeka ikhula yaze yatsela titselo. Kolo awutseli lomunye kolo kodvwa uveta inhlanyelo. Ngendlela lefanako titselo lesititselako atimeleli bafundzi labasha kepha timelela inhlanyelo lesiyihlanyelako. * Loku sikwenta ngekutsi nasicocela labanye ngeMbuso waNkulunkulu sisuke sisakata lenhlanyelo leyahlanyelwa etinhlitiyweni tetfu. (Luk. 6:45; 8:1) Ngako lomfanekiso usifundzisa kutsi nasishumayela ngeMbuso waNkulunkulu sisuke ‘sitsela titselo ngekucinisela.’

12. (a) Ngusiphi sifundvo lesingasitfola emfanekisweni waJesu wemvini kanye nemhlanyeli? (b) Utiva njani ngaloku?

¹² Ngusiphi sifundvo lesisitfola emfanekisweni waJesu wemvini kanye nemhlanyeli? Lemifanekiso isisita sibone kutsi kutsela titselo akukasekelwa endleleni bantfu labenta ngayo ensimini yetfu. Kodvwa kuya ngekutsi siyachubeka yini nekwenta umsebenti wekushumayela ngekwetsembeka. Pawula washo liphuzu lelifanako nakatsi: “Nguloyo naloyo utawutfola umvuzo ngekwemisebenti yakhe.” (1 Khor. 3:8) Umvuzo sitawutfola ngekwenta umsebenti, hhayi ngemiphumela yemsebenti lesiwentile. Matilda losabe lihlahlandlela iminyaka lengu-20 utsi: “Kungijabulisa kakhulu kwati kutsi Jehova utasiniketa umvuzo ngenca yemetamo lesiyentako.”

13, 14. Ngekusho kwaRoma 10:1, 2, ngutiphi tizatfu lebententa Pawula achubeke ashumayela bantfu lebebangawemukeli umlayeto weMbuso?

¹³ Yini letasisita sichubeke sitsela titselo ngekucinisela? Pawula wadvumala ngenca yekutsi emaJuda abengawemukeli umlayeto weMbuso. Kodvwa akazange ayekela kubashumayela. Naka loko lakusho encwadzini layibhalela emKhristu aseRoma mayelana nendlela labetiva ngayo ngalawo maJuda.  Watsi: “Lengikufisako enhlitiyweni yami nalengibancusela kona kuNkulunkulu kutsi basindziswe. Ngobe ngiyabafakazela kutsi banenshisekelo ngaNkulunkulu, kodvwa beswele lwati lolungulonalona.” (Rom. 10:1, 2) Pawula wagcizelela tiphi tizatfu tekuchubeka enta umsebenti wekushumayela?

¹⁴ Kwekucala, Pawula washo sizatfu lebesimenta achubeke ashumayela kumaJuda. Kungenca yaloko ‘bekakufisa enhlitiyweni yakhe.’ Enhlitiyweni yakhe bekafisa kutsi lamanye emaJuda asindziswe. (Rom. 11:13, 14) Kwesibili, Pawula watsi ‘bekabancusela kuNkulunkulu.’ Wathantaza wacela Nkulunkulu kutsi asite emaJuda kuze awemukele umlayeto weMbuso. Kwesitsatfu, Pawula watsi: “Banenshisekelo ngaNkulunkulu.” Wabona kutsi bantfu bangakhona kwenta lokuhle. Pawula bekati kutsi lamaJuda lanenshisekelo bekangaba balandzeli baKhristu labashisekako njengoba naye abenjalo.

15. Singamlingisa njani Pawula? Shano tibonelo.

¹⁵ Singamlingisa njani Pawula? Kwekucala, kufanele sitimisele kulondvolota sifiso lesisuka enhlitiyweni sekutfola bantfu ‘labatimisele kutfola kuphila lokuphakadze.’ Kwesibili, siyathantaza sicele Jehova avule tinhlitiyo tebantfu labacotfo. (Imis. 13:48; 16:14) Silvana lose abe lihlahlandlela cishe iminyaka lengu-30 utsi: “Ngaphambi kwekutsi ngicale kushumayela ensimini yetfu, ngiyathantaza kuJehova ngimcele kutsi angiphe simo sengcondvo lesihle.” Natsi siyathantaza kuNkulunkulu kuze tingilosi tisicondzise kubantfu labacotfo. (Mat. 10:11-13; Semb. 14:6) Robert lose abelihlahlandlela iminyaka lengetulu kwalengu-30 utsi: “Kuyangijabulisa kusebenta netingilosi letikwatiko loko lokwenteka ekuphileni kwebantfu lesibashumayelako.” Kwesitsatfu, sitama kubuka lokuhle kubantfu. Carl longulomdzala welibandla futsi lowabhajatiswa eminyakeni lengetulu kwalengu-50 leyengcile utsi: “Ngibuka timphawu letincane letikhombisa kutsi umuntfu ucotfo, kungaba kumoyitela, indlela lasibuka ngayo noma kubuta umbuto losuka enhlitiyweni.” NjengaPawula, singakhona kutsela titselo ngekucinisela.

16, 17. (a) Umshumayeli 11:6 usifundzisa siphi sifundvo? (b) Umsebenti wekushumayela ubatsintsa njani bantfu lebasibukako?

¹⁶ Akukafaneli siwubukele phasi umphumela wemsebenti wetfu wekuhlanyela, ngisho noma kubonakala ngatsi bantfu abawulaleli umlayeto weMbuso lesiwuhlanyelako. (Fundza Umshumayeli 11:6) Liciniso likutsi bantfu labanyenti bayasinaka ngisho noma bangasilaleli. Bayanaka kutsi sigcoka kahle, sitiphatsa kahle futsi sihlale simoyitela. Ngekuhamba kwesikhatsi, kutiphatsa kwetfu kungabasita babone kutsi imibono lekabi lebanayo ngatsi ayisilo liciniso. Sergio na-Olinda lokukhulunywe ngabo ekucaleni balubona lolushintjo.

¹⁷ Sergio utsi: “Kwaphela sikhatsi lesitsite singakhoni kuyoshumayela esiteshini semabhasi ngenca yekutsi besesigula. Nasiphindze sibuyela, bantfu lebendlulako batsi, ‘Besenikuphi? Besinikhumbulile.’” Olinda utsi: “Bashayeli bemabhasi bebasiphakamisela tandla, futsi bamemeta batsi, ‘Nenta umsebenti lomuhle!’ Baze bacela nekutsi sibaphe bomagazini.” Lomndeni wamangala nawubona lenye indvodza ibapha timbali futsi ibonga ngemsebenti lebawentako.

18. Yini lekwenta utimisele ‘kutsela titselo ngekucinisela’?

¹⁸ Ecinisweni nasichubeka sihlanyela umlayeto weMbuso “singayekeli,” siba nencenye lenkhulu ekuniketeni “bufakazi etiveni tonkhe.” (Mat. 24:14) Ngetulu kwako konkhe sijabula kakhulu ngekwati kutsi Jehova uyasemukela ngoba ubatsandza bonkhe ‘labatsela titselo ngekucinisela’!