1. Ngumiphi imiva levamile etincekwini taNkulunkulu letetsembekile ngesizatfu sekuba nesono?

“MAYE mine muntfu lohluphekako!” (Rom. 7:24) Tinceku taNkulunkulu letinyenti lamuhla tiyavumelana nalamavi emphostoli Pawula. Sonkhe siyahlupheka ngenca yesono lesasitfola njengelifa kanye nangenca yekwehluleka kujabulisa Jehova. Lamanye emaKhristu lente sono lesikhulu acabanga kutsi Nkulunkulu ngeke aze awatsetselele.

2. (a) UmBhalo weTihlabelelo 34:22 usikhombisa njani kutsi tinceku taNkulunkulu akukafaneli tincotjwe yimiva yelicala? (b) Sitawucoca ngani kulesihloko? (Fundza libhokisi lelinesihloko lesitsi “ Kufanele Sinake Tifundvo Yini Nome Lokumelelwa Yindzaba Letsite?”)

² Noma kunjalo, imiBhalo isicinisekisa ngekutsi bantfu labenta Jehova abe siphephelo sabo ngeke bancotjwe yimiva yelicala. (Fundza Tihlabelelo 34:22.) Kuhlanganisani kwenta Jehova abe siphephelo sakho? Ngutiphi tinyatselo lokufanele sititsatse nasifuna Jehova asitsetselele futsi asikhombise umusa? Timphendvulo talemibuto sitatitfola nasicabanga ngelilungiselelo letindzawo tekukhosela lebetikhona ka-Israyeli wasendvulo. Kuliciniso kutsi lelilungiselelo belingephasi kwesivumelwano seMtsetfo  lesaphela ngeliPhentecoste la-33 C.E. Noma kunjalo kufanele sikhumbule kutsi loMtsetfo bewubuya kuJehova. Ngako lelilungiselelo letindzawo tekukhosela lisifundzisa ngembono waJehova ngesono, ngebantfu labonile kanye nangekuphendvuka. Kwekucala asesicoce ngenjongo yaletindzawo tekukhosela kanye nangendlela betisetjentiswa ngayo.

3. Ema-Israyeli bekawasingatsa njani emacala lamayelana nemuntfu lobulele lomunye ngenhloso?

³ Jehova bekakhatsateka ngawo onkhe emacala ekucitseka kwengati kuma-Israyeli asendvulo. Umuntfu lobulele lomunye ngenhloso bekufanele abulawe sihlobo sengati saloyo lofile futsi besibitwa ngekutsi ‘ngumphindziseli.’ (Num. 35:19) Loku bekwentelwe kubhadala kuphila kwemufi lote licala. Lomuntfu lobulele bekabulawa ngekushesha kute Live Lesetsembiso lingangcoliswa ngobe Jehova bekatjele ema-Israyeli kutsi: “Ningalingcolisi lelive lenikulo. Kucitsa ingati [yemuntfu] kuyalingcolisa live.”​—Num. 35:33, 34.

4. Ema-Israyeli abewasingatsa njani emacala ebantfu lababulele ngesiphosiso?

⁴ Ema-Israyeli abewasingatsa njani emacala lamayelana nemuntfu lobulele lomunye ngesiphosiso? Kubulala lomunye umuntfu bekulicala ngisho noma umbulele ngesiphosiso. (Gen. 9:5) Noma kunjalo, bekavumelekile kutsi abalekele kulelinye lemadolobha ekukhosela lasitfupha kute aphephe kumphindziseli wemufi. Nasekalapho besekavikelekile. Lomuntfu lobulele ngesiphosiso bekufanele ahlale kulelo dolobha lekukhosela, kuze kufe umphristi lomkhulu.​—Num. 35:15, 28.

5. Lilungiselelo lemadolobha ekukhosela lingasisita njani kutsi simcondze kahle Jehova?

⁵ Lelilungiselelo lemadolobha ekukhosela belivela kuJehova hhayi kubantfu. Jehova wayala Joshuwa watsi: “Tjela ema-Israyeli kutsi akakhetse lamanye emadolobha ekukhosela.” Lamadolobha bekatsatfwa njengalangcwele. (Josh. 20:1, 2, 7, 8) Njengobe bekunguJehova lowalungiselela emadolobha ekukhosela, singahle sitibute kutsi: Lelilungiselelo lisisita njani kutsi siwucondze kahle umusa waJehova? Lelilungiselelo lisifundzisani mayelana nekwenta Jehova abe siphephelo setfu lamuhla?

6, 7. (a) Chaza kutsi labadzala bebanayiphi indzima nakutekwa licala lemuntfu lobulele ngesiphosiso. (Buka sitfombe lesisekucaleni kwalesihloko.) (b) Kungani bekukuhlakanipha kutsi umbulali aye kulabadzala?

⁶ Ngemuva kwekubulala lomunye ngesiphosiso, lombulali bekufanele abalekele egedeni lelidolobha lekukhosela futsi alandzise indzaba yakhe kulabadzala. Labadzala bekufanele bamemukele ngemusa. (Josh. 20:4) Ngekuhamba kwesikhatsi, bekabese umikiswa kulabadzala bakulelidolobha lapho abulala khona, futsi bebabese bakhokha sehlulelo. (Fundza Numeri 35:24, 25.) Nangabe labadzala bavuma kutsi loku kwenteke ngesiphosiso, lombulali bekabuyiselwa kulelidolobha lekukhosela.

⁷ Kungani lombulali bekufanele aye kulabadzala? Bekufanele bagcine libandla lema-Israyeli lihlantekile futsi basite umbulali azuze emseni waJehova. Lesinye sati seliBhayibheli satsi umuntfu lobekangayi kulabadzala “bekatifaka engotini lenkhulu.” Sangeta satsi: “Licala lengati yakhe belikuye ngobe abengakalisebentisi lilungiselelo laJehova lekumvikela.” Lombulali abengasitakala ngekutsi afune lusito futsi alwemukele. Nangabe lombulali angayi kuletindzawo tekukhosela Jehova labetilungiselele, sihlobo sengati salomuntfu lofile besivumelekile kutsi simbulale.

8, 9. Kungani umKhristu lonemiva yelicala ngenca yekwenta sono lesikhulu kufanele ayofuna lusito kulabadzala?

 ⁸ Lamuhla, umKhristu lonemiva yelicala ngenca yekwenta sono lesikhulu kufanele aye kulabadzala belibandla kute atfole lusito. Kubaluleke ngani kutsi ente njalo? Kwekucala, liVi laNkulunkulu litsi Jehova wente lilungiselelo lalabadzala kute basingatse emacala etono letinkhulu. (Jak. 5:14-16) Kwesibili, lelilungiselelo lisita bantfu labente sono kutsi banakekelwe nguNkulunkulu futsi bakubalekele kwenta letinye tono. (Gal. 6:1; Heb. 12:11) Kwesitsatfu, labadzala baceceshiwe futsi baniketwe umsebenti wekusita toni letiphendvukako kutsi tincobe imiva yelicala. Jehova utsi lamadvodza ‘abakhoselisi nakunesivunguvungu.’ (Isa. 32:1, 2) Awuvumi yini kutsi lelilungiselelo liyindlela Nkulunkulu lasikhombisa ngayo umusa?

⁹ Tinceku taNkulunkulu letinyenti tisitakele ngekuyofuna lusito kulabadzala futsi tilwemukele. Nasi sibonelo, lomunye umzalwane lokutsiwa nguDaniel wenta sono lesikhulu kepha kwaphela tinyanga letinyenti solo angabata kuya kulabadzala. Daniel utsi: “Njengobe besekuphele sikhatsi lesidze, bengicabanga kutsi labadzala bebangeke bakhone kungisita. Noma kunjalo, bengesaba kutsi labanye bantfu batawati ngesono lebengisentile. Nangithantaza kuJehova bengiva ngatsi kufanele ngimtjele konkhe futsi ngicolise ngalengikwentile.” Ekugcineni Daniel waya kubadzala. Nakakhumbula emuva utsi: “Bengesaba kuya kubo. Kodvwa ngemuva kwekutsi ngiye kubo, bengiva ngatsi kunemtfwalo lomkhulu losuswe emahlombe ami. Nyalo sekute lokungivimbela kutsi ngisondzele kuJehova.” Lamuhla Daniel sewunanembeza lohlantekile futsi usandza kubekwa kutsi abe yinceku lesebentako.

10. Ngusiphi sinyatselo umuntfu lobekabulele lomunye ngesiphosiso lebekufanele asitsatse ngekushesha?

¹⁰ Umuntfu lobulele lomunye ngesiphosiso bekufanele atsatse sinyatselo kute atfole umusa. Bekufanele abalekele edolobheni lekukhosela  lelisedvute. (Fundza Joshuwa 20:4.) Kuze asindzise kuphila kwakhe, lombulali bekufanele abalekele kulelidolobha ngekushesha futsi ahlale kulo. Loko bekusho kutsi kufanele atidzele. Bekufanele ashiye umsebenti wakhe nelikhaya lakhe futsi besekete inkhululeko yekuya kuletinye tindzawo kuze kufe umphristi lophakeme. * (Num. 35:25) Bekufanele atidzele kuze ashiye konkhe loku. Nangabe lombulali abetawuphuma kulelidolobha loko bekutawukhombisa kutsi akanendzaba nalomuntfu lambulele futsi kuphila kwakhe bekutawuba sengotini.

11. Ngutiphi tinyatselo umKhristu lophendvukako lokufanele atitsatse kute akhombise kutsi akadlali ngemusa waNkulunkulu?

¹¹ Ngendlela lefanako, lamuhla bantfu labente tono kufanele batsatse tinyatselo kuze Nkulunkulu ababonise umusa. Kufanele sikuyekele ngalokuphelele kwenta sono, loko akusho nje tono letinkhulu kuphela kodvwa kusho nekwenta tono letivamise kuholela etonweni lenkhulu. Umphostoli Pawula waphefumulelwa kutsi achaze tento temaKhristu laphendvukile aseKhorinte. Wabhala watsi: “Kudzabuka kwenu ngekuvumelana nentsandvo yaNkulunkulu kuvete kutimisela lokungakanani kini, kutihlenga, intfukutselo, kwesaba, sifiso lesihle, kukhutsala, kanye nekulungisa lokubi.” (2 Khor. 7:10, 11) Nasenta imetamo yekuyekela sono, sisuke sifuna kukhombisa Jehova kutsi sinendzaba nalesikwentako futsi ngeke simane nje sitfole umusa wakhe.

12. Yini umKhristu lokungadzingeka ayiyekele kuze achubeke atfola umusa waNkulunkulu?

¹² Yini umKhristu lokungadzingeka ayiyekele kuze atfole umusa waNkulunkulu? Kufanele akulungele kuyekela tintfo latitsandzako nangabe tingamenta awele esonweni. (Mat. 18:8, 9) Nangabe bangani bakho bakwentisa tintfo Jehova langatitsandzi, utawuyekela yini kutihlanganisa nabo? Nangabe ulwa kamatima kute usebentise kahle tjwala, utimisele yini kungatifaki etimeni letingakulinga kutsi unatse kakhulu? Nangabe ufuna kuncoba imicabango yekutiphatsa kabi ngekwelicasi uyawabalekela yini ema-movie, ema-websites noma kwenta tintfo letingavusa imicabango lemibi? Khumbula kutsi kutidzela lesikwentako kuze setsembeke kuJehova akusilo lite. Kute lokubuhlungu kwendlula kutiva ulahlwe nguJehova futsi kute lokusiletsela kwenetiseka kwendlula ‘umusa wakhe waphakadze.’​—Isa. 54:7, 8.

13. Chaza kutsi kungani umbulali abengativa avikelekile futsi ajabula nakasedolobheni lekukhosela.

¹³ Lombulali besekaphephile nasekasedolobheni lekukhosela. Mayelana nalamadolobha Jehova watsi: “Ayawuba siphephelo kini.” (Josh. 20:2, 3, NW) Jehova bekangakasho kutsi lombulali bekufanele aphindze ehlulelwe ngenca yelicala lalentile futsi lomphindziseli bekangakavunyelwa kutsi angene kulelidolobha ambulale. Lombulali bekangeke esabe kutsi batawuphindzisela. Nakakulelidolobha bekaphephile ngobe Jehova abetamvikela. Nakalapho bekungafanani nekutsi usejele. Bekanelitfuba lekusebenta, lekusita labanye kanye nekukhonta Jehova ngekuthula. Ngako bekangajabula futsi atfole kwenetiseka!

14. Yini umKhristu lophendvukile langaciniseka ngayo?

¹⁴ Labanye bantfu baNkulunkulu labenta tono letinkhulu kodvwa baphendvuka bacindzetelwa yimiva yelicala, futsi baze bacabange kutsi Jehova utawuhlale abatsatsa njengebantfu lababi ngenca yetono letinkhulu labatenta. Nangabe utiva kanjalo, ciniseka kutsi nangabe Jehova akucolele  usuke akucolele ngalokuphelele. Daniel lesikhulume ngaye wabona kutsi loku kuliciniso. Ngemuva kwekutsi labadzala bamsite, waphindze waba nanembeza lomsulwa futsi watsi: “Ngativa ngikhululekile. Ngemuva kwekutsi indzaba yami ilungiswe, imiva yelicala lebenginayo yaphela. Nangabe sono sesitsetselelwe, sisuke sitsetselelwe ngalokuphelele. Njengobe Jehova asho, uyawususa umtfwalo lonawo futsi awulahle khashane nawe. Angeke uphindze uwetfwale.” Nangabe umbulali sekasedolobheni lekukhosela, bekute sidzingo sekutsi esabe umphindziseli. Ngendlela lefanako, nangabe Jehova asasicolele, kute sizatfu sekwesaba kutsi utawuphindze asijezisele tono lesantenta.​—Fundza Tihlabelelo 103:8-12.

15, 16. Inhlawulo yaJesu kanye nendzima lanayo njengeMphristi Lophakeme ikucinisa njani kwetsembela kwakho emseni waNkulunkulu?

¹⁵ Ecinisweni sinetizatfu letinyenti tekwetsembela emseni waJehova kunaleto ema-Israyeli labenato. Ngemuva kwekutsi Pawula avete kukhatsateka kwakhe ngenca yekwehluleka kulalela Jehova, watsi: “Akabongwe Nkulunkulu ngaJesu Khristu iNkhosi yetfu!” (Rom. 7:25) Ngisho noma umphostoli Pawula bekanesono futsi alwa kamatima naso, bekaciniseka kutsi Nkulunkulu umtsetselele. NjengeMhlengi wetfu, Jesu usiniketa bonembeza labamsulwa kanye nekuthula. (Heb. 9:13, 14) NjengeMphristi wetfu Lophakeme, “uyakwati nekubasindzisa ngalokuphelele labo labaya kuNkulunkulu ngaye, ngobe uhlale aphila khona atewubancusela.” (Heb. 7:24, 25) Njengobe umphristi lophakeme bekacinisekisa ema-Israyeli kutsi tono tawo titsetselelwe, loko lokwentiwa nguJesu Khristu njengeMphristi Lophakeme kuyasicinisekisa kutsi ‘singatfola sihawu nemusa wakhe lotasisita ngesikhatsi lesifanele.’​—Heb. 4:15, 16.

¹⁶ Kute sente Jehova abe siphephelo setfu, kufanele sibe nekukholwa emhlatjelweni waJesu. Akukafaneli ugcine ngekwati nje kutsi inhlawulo isita bantfu labanyenti, kodvwa kufanele ukholwe kutsi nawe iyakusita. (Gal. 2:20, 21) Bani nekukholwa kutsi tono takho titawutsetselelwa ngenhlawulo. Kufanele uphindze ukholwe kutsi inhlawulo ikuniketa litsemba lekuphila phakadze. Inhlawulo yaJesu isipho Jehova lakuphe sona.

17. Kungani kufanele wente Jehova abe siphephelo sakho?

¹⁷ Lilungiselelo lemadolobha ekukhosela likhombisa kutsi Jehova unemusa. Ngalelilungiselelo, Jehova bekangagcini nje ngekugcizelela kutsi kuphila kungcwele kodvwa uphindze asikhombise kutsi labadzala basisita njani, kutsi kusho kutsini kuphendvuka mbamba kanye nekutsi kungani singetsemba kutsi Jehova usitsetselela ngalokuphelele. Uyamenta yini Jehova kutsi abe siphephelo sakho? Nawuphephela kuye utawutfola kuvikeleka mbamba. (Hla. 91:1, 2) Esihlokweni lesilandzelako, sitawufundza kutsi lilungiselelo lemadolobha ekukhosela lingasisita njani kutsi silingise sibonelo lesihle saJehova sekukhombisa kulunga kanye nemusa.