STEFANO abesembikwebantfu lababi labamenyanyako, futsi bebangemalunga enkantolo lephakeme yaka-Israyeli. I-Sanhedrin beyinemalunga langu-71 lebekubahluleli futsi bekungulamanye emadvodza laneligunya ka-Israyeli. Bebahlanganiswe nguKhayafase umPhristi Lophakeme, nguye lebekangamele inkantolo leyanika Jesu sigwebo sekufa etinyangeni letimbalwa lebetengcile. (Mat. 26:57, 59; Imis. 6:8-12) Njengobe bebasolo baletsa bofakazi bemanga balandzelana, kukhona lebakubona kuStefano lokwabamangalisa kakhulu—‘buso bakhe bebunjengebuso bengilosi.’​—Imis. 6:13-15.

Yini leyasita Stefano wakhona kubeketelela lesimo lebesimatima kangaka? Asengakatfunyelwa enkantolo ye-Sanhedrin, Stefano bekatinikele ekwenteni umsebenti wekushumayela futsi acondziswa ngumoya longcwele waNkulunkulu. (Imis. 6:3-7) Ngesikhatsi kutekwa licala lakhe, umoya longcwele bewumdvudvuta futsi umkhumbuta labekufundzile. (Joh. 14:16) Njengobe kuvetiwe encwadzini yeMisebenti sehluko 7, ngalesikhatsi Stefano atikhulumela ngesibindzi, umoya longcwele wamkhumbuta imibhalo lengaba ngu-20 noma ngetulu lesemiBhalweni yesiHebheru. (Joh. 14:26) Kukholwa kwaStefano kwacina kakhulu ngesikhatsi abona Jesu eme ngesekudla saNkulunkulu.​—Imis. 7:54-56, 59, 60.

Ngalelinye lilanga natsi singaphatfwa kabi noma sishushiswe. (Joh. 15:20) Umoya waJehova utasisita nangabe silifundza njalo liVi laNkulunkulu futsi sikhutsele emsebentini wekushumayela. Sitawutfola nemandla ekumelana nekuphikiswa futsi sibe nekuthula.​—1 Phet. 4:12-14.