1, 2. (a) Indlela Jehova laphatsa ngayo bantfu yehluke njani endleleni bantfu labanemagunya labaphatsa ngayo labanye? (b) Sitawucoca ngani kulesihloko?

BANTFU labanemagunya bavame kubusa labanye ‘ngekucindzetela.’ (Mat. 20:25; Shu. 8:9) Jehova wenta lokwehluke kakhulu kuloko. Ngisho nome anguSomandla, uyabacabangela bantfu labanesono futsi unemusa. Uyayinaka indlela lesitiva ngayo kanye netidzingo tetfu. Akaceli kutsi sente lesingeke sikhone kukwenta ngoba “uyakhumbula kutsi silutfuli nje.”​—Hla. 103:13, 14.

² LiBhayibheli linetibonelo letinyenti letikhombisa kutsi Jehova uyabacabangela bantfu bakhe. Ase sifundze ngaletintsatfu tato. Kwekucala, sitawucoca ngendlela Jehova lasita ngayo Samuweli losemncane kutsi atjele Eli umPhristi loPhakeme umlayeto wesehlulelo. Kwesibili, indlela Jehova laphatsa ngayo Mosi ngesikhatsi ala kuba ngumholi wema-Israyeli. Kwesitsatfu, indlela Jehova lasita ngayo ema-Israyeli nakaphuma eGibhithe. Ase sibone kutsi sibonelo ngasinye sisifundzisani ngaJehova  nekutsi singakusebentisa njani loko lesikufundzako.

3. Nguyiphi intfo lengakavami leyenteka ngesikhatsi Samuweli alele, futsi ngumuphi umbuto lesingatibuta wona? (Buka sitfombe lesisekucaleni kwalesihloko.)

³ Samuweli wacala ‘kukhonta Simakadze’ ethempelini asemncane kakhulu. (1 Sam. 3:1) Ngalobunye busuku, Samuweli bekalele futsi kwenteka intfo lengakavami. * (Fundza 1 Samuweli 3:2-10.) Weva livi limbita ngeligama lakhe. Wacabanga kutsi ubitwa ngumPhristi loPhakeme Eli lobesekakhulile. Wagijima waya ku-Eli wafike watsi: “Sengikhona, ngive ungibita.” Kodvwa Eli watsi akambiti. Kwaphindze kwenteka emahlandla lamabili, futsi Eli wase uyabona kutsi bekunguJehova lobekabite Samuweli. Ngako wamtjela kutsi aphendvule kanjani. Kungani Jehova angazange atjele Samuweli ekucaleni kutsi nguye lebekambita? LiBhayibheli alisho, kodvwa kungenteka Jehova wenta ngalendlela ngobe bekacabangela Samuweli lobekasemncane.

4, 5. (a) Yini Samuweli layenta ngesikhatsi Jehova amtjela umlayeto lobekufanele awutjele Eli? (b) Lendzaba isifundzisani ngaJehova?

⁴ Fundza 1 Samuweli 3:11-18. UMtsetfo waJehova bewuyala bantfwana kutsi bahloniphe bantfu lasebakhulile, ikakhulukati labanemagunya. (Eks. 22:28; Lev. 19:32) Ngako bekungeke kube melula kutsi Samuweli avuke ekuseni aye ku-Eli futsi ngesibindzi amtjele umlayeto wesehlulelo lesimatima. LiBhayibheli litsi Samuweli ‘bekesaba kutjela Eli lombono.’ Kodvwa Jehova wakwenta kwacaca ku-Eli kutsi nguye lobekabita Samuweli. Ngako Eli watjela Samuweli kutsi amchazele konkhe Jehova labekakushito. Eli watsi: “[Ungangifihleli] nome yini lakutjele kona.” Samuweli “wamtjela konkhe.”

⁵ Lomlayeto awuzange ummangalise Eli ngoba bekuke kwefika “umuntfu waNkulunkulu” kuye wamtjela umlayeto lofanako. (1 Sam. 2:27-36) Lendzaba isifundzisa kutsi Jehova uyasicabangela futsi uhlakaniphile.

6. Ngutiphi tifundvo lesingatifundza endleleni Nkulunkulu lasita ngayo Samuweli?

⁶ Nangabe usemusha, indzaba yaSamuweli lobekasemncane ikhombisa kutsi Jehova utati kahle tinkinga lohlangabetana nato kanye nendlela lotiva ngayo. Kungenteka unemahloni ekushumayela umlayeto weMbuso kubantfu labadzala noma kwehluka kubontsanga yakho. Ciniseka kutsi Jehova ufuna kukusita, ngako thantaza kuye, utfululele sifuba sakho kuye. (Hla. 62:8) Cabanga ngetibonelo letiseBhayibhelini tebantfu labasha labafana naSamuweli. Coca nebazalwane nabodzadze lababontsanga yakho noma labadzala kunawe labake babhekana netinkinga letifana nalobhekene nato. Batakutjela ngetikhatsi lapho Jehova abasita khona, mhlawumbe ngetindlela lebebangakatilindzeli.

7, 8. Jehova wakhombisa njani kutsi uyamkhatsalela Mosi?

⁷ Ngesikhatsi Mosi aneminyaka lengu-80, Jehova wamniketa umsebenti lomatima wekukhulula ema-Israyeli ekugcilatweni eGibhithe. (Eks. 3:10) Loku kwametfusa ngobe besekuphele iminyaka lengu-40 angumelusi eMidiyani. Watsi: “Ngingubani mine kutsi ngingaya kuFaro, ngiyewukhipha ema-Israyeli eGibhithe?” Jehova wacinisekisa Mosi watsi: “Mine, ngitawuba  nawe.” (Eks. 3:11, 12) Jehova waphindze wametsembisa kutsi baholi bema-Israyeli ‘bebatakulalela loko lakushoko.’ Nobe kunjalo, Mosi waphendvula watsi: ‘Ngitawutsini nabangangilaleli?’ (Eks. 3:18; 4:1) Kubonakala ngatsi Mosi bekatsi kuJehova ngeke kwenteke loko lakushoko. Kodvwa Jehova wambeketelela Mosi, waze wamniketa nemandla ekwenta timangaliso. Ecinisweni Mosi kwaba nguye umuntfu wekucala lobekanemandla ekwenta timangaliso.​—Eks. 4:2-9, 21.

⁸ Ngisho noma Jehova asamnike emandla, Mosi wachubeka wabeka taba. Watsi yena akakwati kukhuluma kahle. Jehova wamphendvula watsi: “Ngiyawukusita nase ukhuluma, ngikutjele kutsi utawukhuluma utsini.” Loko kwenta mosi wasemukela yini lesabelo? Cha. Wacela Jehova kutsi atfume lomunye umuntfu. Loko kwenta Jehova watfukutsela kodvwa bekasolo ayikhatsalela indlela Mosi labetiva ngayo, ngako watfuma Aroni kutsi abe ngumkhulumeli waMosi.—Eks. 4:10-16.

9. Kubeketela kwaJehova kanye nemusa kwamsita njani Mosi kutsi abe ngumholi lokahle?

⁹ Lendzaba isifundzisani ngaJehova? Njengoba anguSomandla, Jehova abengasebentisa emandla akhe kuze esabise Mosi. Esikhundleni saloko, Jehova wambeketelela, waba nemusa futsi wacinisekisa lenceku yakhe letfobekile kutsi utawuba nayo. Loku kwaba nemiphumela lemihle. Mosi waba ngumholi lokahle webantfu baNkulunkulu. Wetama kubalalela labanye futsi abacabangele njengoba naJehova enta kuye.—Num. 12:3.

10. Kusisita njani kulingisa Jehova ngekutsi sibacabangele labanye?

¹⁰ Yini tsine lesiyifundzako lamuhla? Nangabe uyindvodza, ungumtali noma ungulomdzala welibandla usuke uneligunya lelitsite. Ngako kubaluleke kakhulu kutsi ulingise Jehova ngekutsi ubacabangele labanye, ube nemusa futsi ubeketelele umkakho, bantfwana bakho kanye nalamanye emaKhristu lasebandleni. (Khol. 3:19-21;  1 Phet. 5:1-3) Nangabe ulingisa Jehova naJesu Khristu longuMosi Lomkhulu, kutawuba melula kutsi bantfu bakhulume nawe futsi ubakhutsate. (Mat. 11:28, 29) Utawuphindze ube sibonelo lesihle bantfu labangasilingisa.​—Heb. 13:7.

11, 12. Yini Jehova layenta kute ente ema-Israyeli ative avikelekile futsi alondzekile nakaphuma eGibhithe?

¹¹ Ngesikhatsi ema-Israyeli aphuma eGibithe nga-1513 B.C.E., abengetulu kwetigidzi letintsatfu. Kulesive bekunebantfwana, bantfu lesebakhulile, labagulako kanye nalabakhubatekile. Lesive lesingaka besidzinga umholi lonemusa kanye nelutsandvo. Jehova wakhombisa kutsi unemusa nelutsandvo ngekutsi asebentise Mosi. Umphumela waloko waba kutsi ema-Israyeli ativa avikelekile njengobe bekaya endzaweni langayati.​—Hla. 78:52, 53.

¹² Yini Jehova layenta kuze bantfu bakhe bative balondzekile futsi bavikelekile? Nakakhipha ema-Israyeli eGibhithe, Jehova wawahlela kahle njengelibutfo ‘lemphi.’ (Eks. 13:18) Lokuhleleka kwacinisekisa ema-Israyeli kutsi Nkulunkulu wawo bekatawasekela. Ngetulu kwaloko, Jehova bekatibonakalisa kuwo ngekutsi ‘emini abahole ngelifu, kutsi ebusuku abahole ngemlilo.’ (Hla. 78:14) Ecinisweni Jehova bekatsi kuwo: “Ningesabi ngobe mine nginani kuze nginivikele futsi nginicondzise.” Madvutane ema-Israyeli bekatasidzinga lesicinisekiso.

13, 14. (a) Ngutiphi tintfo Jehova latenta eLwandle Lolubovu letikhombisa kutsi bekawacabangela ema-Israyeli? (b) Jehova wakhombisa njani kutsi unemandla kunelibutfo laseGibhithe?

¹³ Fundza Eksodusi 14:19-22. Ticabange ulapho kanye nalamanye ema-Israyeli nivinjetelwe libutfo laFaro futsi embikwenu kuneLwandle Lolubovu. Kutsi kusenjalo Nkulunkulu atsatse sinyatselo, nibone lifu lebelivame kuba phambi kwenu selisemuva emkhatsini welibutfo lenu kanye nelibutfo laseGibhithe. Libutfo laseGibhithe lisebumnyameni, kodvwa inkambu yenu iyakhanya. Ngemuva kwaloko ubona Mosi elulela sandla sakhe elwandle, futsi umoya lomkhulu lovela eMphumalanga wehlukanisa lwandle ekhatsi. Ngako wena nemndeni wakho kanye nemfuyo yakho newela lwandle ngendlela lehlelekile nikanye nalabanye bantfu. Uyamangala njengobe ubona indzawo lohamba kuyo yomile futsi ekugcineni nonkhe niyakhona kwewela ngisho nalabo labahamba kancane kakhulu.

¹⁴ Fundza Eksodusi 14:23, 26-30. Kutsi kusenjalo, Faro lobekatigcabha futsi alibele ucala kunicosha, wena kanye nesive sema-Israyeli. Ngako Mosi waphindze welulela sandla sakhe futsi lamati aphindze abuyela endzaweni yawo. Lamanti akhukhula Faro kanye nelibutfo lakhe futsi kute ngisho namunye lowasindza!​—Eks. 15:8-10.

15. Lendzaba ikufundzisani ngaJehova?

¹⁵ Lendzaba isikhombisa kutsi Jehova unguNkulunkulu lohlelekile futsi loko kusenta sitive siphephile futsi silondzekile. (1 Khor. 14:33) Jehova uphindze asikhombise kutsi ungumelusi lonelutsandvo nalonakekela bantfu bakhe ngetindlela letinyenti. Unemusa futsi uyabavikela etitseni tabo. Lamaciniso ayasikhutsata njengobe sisondzela ekupheleni kwalelive.​—Taga 1:33.

16. Kutasisita ngani kuphindze sifundze ngendlela Jehova lawakhulula ngayo ema-Israyeli?

¹⁶ Nalamuhla, Jehova uyabanakekela bantfu bakhe. Ubasita kutsi bahlale banebuhlobo lobuhle naye aphindze abavikele nasetitseni  tabo. Utawuchubeka enta njalo ngisho nangesikhatsi sekuhlupheka lokukhulu lesisondzela ngekushesha. (Semb. 7:9, 10) Ngako noma babancane noma babadzala, baphilile noma bakhubatekile, bantfu baNkulunkulu angeke besabe ngesikhatsi sekuhlupheka lokukhulu. * Ecinisweni batawuba nesibindzi! Batawukhumbula emavi Jesu latsi: “Nibosukuma, niphakamise tinhloko tenu, ngobe kusindziswa kwenu kutawube sekusedvute.” (Luk. 21:28) Batawuchubeka bametsemba Jehova ngisho noma bahlaselwa nguGogi—lokulicembu letive letinemandla kwendlula Faro wasendvulo. (Hez. 38:2, 14-16) Yini letawenta bantfu baNkulunkulu bachubeke bametsemba? Bayati kutsi Jehova akashintji. Utawuchubeka ativeta kutsi unguMsindzisi lonelutsandvo nalocabangelako.​—Isa. 26:3, 20.

17. (a) Tingasisita njani tindzaba letiseBhayibhelini letimayelana nendlela Jehova lanakekela ngayo bantfu bakhe? (b) Sitawucoca ngani esihlokweni lesilandzelako?

¹⁷ Kulesihloko sicoce ngaletinye tibonelo letikhombisa kutsi Jehova unemusa, uyabanakekela, uyabacondzisa futsi uyabakhulula bantfu bakhe. Nawuzindla ngaletindzaba naka imininingwane letakusita ubone buntfu baJehova lobewungabati. Kwenta kanjalo kutawenta kutsi lobuntfu lobuhle buhlale engcondvweni nasenhlitiyweni yakho, kukwente umtsandze kakhulu Jehova futsi ube nekukholwa lokucinile. Esihlokweni lesilandzelako, sitawucoca ngetindlela lesingamlingisa ngato Jehova ngekutsi sicabangele labanye. Sitawucoca ngekutsi loko singakwenta njani emndenini, ebandleni lebuKhristu kanye nasemsebentini wekushumayela.