1. Ungaba yini umphumela nangabe sinemoya walelive webugovu?

KUNGANI kulukhuni kusebentisa lesikufundza eBhayibhelini? Lesinye sizatfu kutsi kufanele sitfobeke kuze sente lokulungile. Kulamalanga ekugcina kumatima kuhlala sitfobekile ngobe siphila nebantfu ‘labatitsandza bona, labatsandza imali, labatigabatisako, labatigcabhako nalabangatibambi.’ (2 Thim. 3:1-3) Njengoba sitinceku taNkulunkulu siyati kutsi kutiphatsa lokunjena kubi, kodvwa ngaletinye tikhatsi bantfu labenta letintfo bangabonakala baphumelela futsi bakujabulela kuphila. (Hla. 37:1; 73:3) Labanye bangatibuta kutsi: ‘Kufanele yini ngibeke tidzingo talabanye kucala kunetami? Nangabe ngitiphatsa “njengalomncane,” bantfu batawuyekela yini kungihlonipha?’ (Luk. 9:48) Nangabe sinemoya webugovu, buhlobo betfu nebazalwane betfu bungalimala futsi labanye ngeke babone kutsi singemaKhristu. Kodvwa sitfola imiphumela  lemihle nangabe sifundza ngetinceku taNkulunkulu futsi sitilingisa.

2. Yini lesingayifundza etincekwini taJehova lebetetsembekile?

² Yini leyasita tinceku taJehova lebetetsembekile kutsi tibe bangani bakhe? Tamjabulisa njani Jehova? Tawatfolaphi emandla ekwenta lokulungile? Kukholwa kwetfu kutawucina nangabe sifundza ngetibonelo tato futsi sizindla ngalesikufundzako.

3, 4. (a) Jehova usifundzisa njani? (b) Kungani singadzingi lwati kuphela kute sibe nekukholwa lokucinile?

³ Jehova usiniketa lesikudzingako kute sihlale sinekukholwa lokucinile. Usebentisa liBhayibheli, tincwadzi tetfu tebuKhristu, i-website yetfu, i-JW Broadcasting kanye nemihlangano yelibandla nalemikhulu kute asikhutsate futsi asiceceshe. Kodvwa Jesu wachaza kutsi asidzingi lwati kuphela. Watsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.”​—Joh. 4:34.

⁴ KuJesu, kwenta intsandvo yaNkulunkulu bekufanana nekudla. Njengoba kudla kudla lokunemphilo kusenta senetiseke futsi sihlale siphilile, kwenta intsandvo yaNkulunkulu kusenta sibe nekukholwa lokucinile. Wake waya yini emhlanganweni wangaphambi kwekuya ensimini udziniwe kodvwa wabuya ensimini ujabulile

5. Yini lesingayitfola nangabe sihlakaniphile?

⁵ Sitawuhlakanipha nangabe sitfobekile futsi senta loko Jehova lacela kutsi sikwente. (Hla. 107:43) Bantfu labahlakaniphile batfola tibusiso letinyenti. “Kute lokufisako longakulinganisa nako. . . . Kusihlahla sekuphila kulabakuphutfumako; labo labakubamba bakunkonkoshele ngulabo labajabulako.” (Taga 3:13-18) Jesu watsi: “Niyajabula nanitati letintfo futsi nitenta.” (Joh. 13:17) Bafundzi bebatawuhlala bajabulile nangabe benta loko Jesu labayala kutsi bakwente. Ngaso sonkhe sikhatsi bekufanele balalele timfundziso takhe futsi balingise sibonelo sakhe.

6. Kungani kufanele sichubeke sikusebentisa loko lesikufundzako?

⁶ Nalamuhla kufanele sichubeke sikusebentisa loko lesikufundzako. Cabanga ngamakhenikha lonawo onkhe emathuluzi nelwati lwekukhenikha. Loko kungamsita kutsi abe ngumakhenikha lokahle nangabe akusebentisa kahle. Kungenteka sewusebente iminyaka leminyenti, kodvwa kufanele achubeke akusebentisa loko lakufundzile nangabe afuna kuchubeka angumakhenikha lonelikhono. Ngendlela lefanako, ngesikhatsi sitfola emaciniso besijabula ngoba besikusebentisa loko lebesikufundza eBhayibhelini. Ngako kuze sichubeke sijabula, kufanele sihlale sikusebentisa loko lesikufundziswa nguJehova onkhe malanga.

7. Yini lesingayifundza etibonelweni lesititfola eBhayibhelini?

⁷ Ase sicoce ngetimo letingenta kube matima kutsi sihlale sitfobekile. Sitawuphindze sifundze nekutsi yini leyasita tinceku taNkulunkulu lebetetsembekile kutsi tihlale titfobekile natibhekene netimo letifanako. Akukafaneli sigcine ngekufundza, kodvwa kufanele sizindle ngalesikufundzako siphindze sikusebentise ekuphileni kwetfu.

8, 9. Imisebenti 14:8-15 isifundzisani ngekutfobeka kwaPawula? (Buka sitfombe lesisekucaleni kwalesihloko.)

⁸ Nkulunkulu ufuna “kutsi tonkhe tinhlobo tebantfu tisindziswe, titfole nelwati lolungulonalona lweliciniso.” (1 Thim. 2:4) Ucabangani ngebantfu labasengakawati emaciniso?  Umphostoli Pawula washumayela emaJuda labenelwati ngaJehova. Kodvwa waphindze washumayela nebantfu labebakhonta bonkulunkulu bemanga, futsi kwenta njalo kwakuvivinya kutfobeka kwakhe. Kanjani?

⁹ Ngesikhatsi Pawula acala kuvakashela emabandla, wahamba naBhanabasi baya ebandleni laseListra. Bantfu bakuleyo ndzawo baphatsa Pawula naBhanabasi njengamachawe futsi bababita ngemagama abonkulunkulu babo boZeyusi naHemesi. Pawula naBhanabasi bajabula yini ngaloludvumo lebebaniketwa lona? Bakujabulela yini kuphatfwa ngendlela leyehlukile njengoba emadolobheni lamanye bebaya kuwo bebashushiswa? Bacabanga kutsi lokwatiwa kutawenta bantfu labanyenti batemukele yini tindzaba letimnandzi? Cha! Batfukutsela futsi batsi: “Madvodza, nikwentelani loku? Natsi simane nje sibantfu njengani futsi sinebutsakatsaka lobufana nebenu.”​—Imis. 14:8-15.

10. Kungani Pawula naBhanabasi bangazange batibone babakhulu kunebantfu baseListra?

¹⁰ Ngesikhatsi Pawula naBhanabasi batsi nabo babantfu labanesono, bebangasho kutsi nabo bakhonta bonkulunkulu bemanga. Pawula naBhanabasi bebatfunywe nguNkulunkulu njengobe bebatitfunywa telivangeli. (Imis. 13:2) Bebagcotjwe ngemoya longcwele futsi bebanelitsemba lelihle, kodvwa loko bekungabenti bative babakhulu kunalabanye. Pawula naBhanabasi bebati kutsi nalabantfu bangatfola umvuzo wekuyophila ezulwini nangabe bemukela tindzaba letimnandzi.

11. Singamlingisa njani Pawula nasishumayela?

¹¹ Singasilingisa njani sibonelo saPawula sekutfobeka? Kwekucala, akukafaneli sicabange kutsi sibalulekile kunalabanye ngobe sinelilungelo lekushumayela noma kunetintfo Jehova lasisita kutsi sitente. Kufanele sitibute: ‘Ngitiva njani ngebantfu labasensimini yetfu? Ngiyababandlulula yini bantfu balesinye sive?’ BoFakazi BaJehova betama kushumayela bonke bantfu labangatsandza kuva tindzaba letimnandzi emhlabeni wonkhe. Labaye betama nekufundza lolunye lulwimi noma emasiko labanye bantfu labawabukela phasi. Kodvwa akwenteki bative bancono kunebantfu lababashumayelako, kunaloko betama kucondza umuntfu ngamunye kute bakhone kumsita emukele umlayeto weMbuso.

12. Ephafrasi wakhombisa njani kutsi ubakhatsalela mbamba labanye?

¹² Lenye indlela lesingakhombisa ngayo kutsi sitfobekile kutsi sibathantazele bazalwane nabodzadze lesebavele “banekukholwa lokuligugu njengekwetfu.” (2 Phet. 1:1) Ephafrasi wenta njalo. LiBhayibheli likhuluma ngaye tikhatsi letintsatfu kuphela. Ngesikhatsi Pawula aboshwe eRoma, wabhalela emaKhristu aseKholose nga-Ephafrasi watsi: “Uhlale anithantazela ngekutimisela.” (Khol. 4: 12) Ephafrasi bekabati kahle bazalwane bakhe futsi bekabakhatsalela kakhulu. Pawula watsi Ephafrasi “siboshwa lesikanye” naye, ngako naye bekahlangabetana netinkinga. (Flm. 23) Kodvwa bekakhatsateka ngalabanye futsi kukhona bekakwenta kute abasite. Ephafrasi wabathantazela bazalwane bakhe nabodzadze, futsi bekaze ababite nangemagama. Nawe ungenta lokufanako. Kubathantazela kungaba nemiphumela lemihle.​—2 Khor. 1:11; Jak. 5:16.

13. Ungasilingisa njani sibonelo sa-Ephafrasi nawuthantaza?

¹³ Cabanga ngebantfu longabasho ngemagama nawubathantazela. Ungacabanga ngebazalwane nabodzadze noma labanye bantfu lababhekene netinkinga. Kungenteka kufanele bente tincumo letimatima noma babhekene netilingo. Ungaphindze uthantazele nebazalwane longabati lokukhulunywa ngabo ku-jw.org, esihlokweni lesitsi “OFakazi BakaJehova Baboshelwe Ukholo Lwabo.” (Chafata IZINDABA> IZINDABA ZOMTHETHO.) Ungaphindze uthantazele labashonelwe bantfu lababatsandzako, labo labasindze etinhlekeleleni nasetimphini kanye nalabo labanetinkinga tetimali. Bazalwane labanyenti nabodzadze bayayidzinga imithantazo yetfu futsi bangazuza kuyo. Nangabe sibathantazela, sikhombisa kutsi asiticabangeli tsine kuphela, kodvwa siyabacabangela labanye. (Fil. 2:4) Jehova uyayilalela imithantazo lenjalo.

14. Jehova usibekela njani sibonelo lesihle sekulalela labanye?

¹⁴ Lenye indlela lesingakhombisa ngayo kutsi sitfobekile kutsi sibalalele labanye. Jakobe 1:19 utsi: ‘Kufanele usheshe kulalela.’ Jehova usibonelo lesihle kakhulu kuloku. (Gen. 18:32; Josh. 10:14) Cabanga ngencociswano leku-Eksodusi 32:11-14 (Fundza.) Jehova wavumela Mosi kutsi asho indlela lativa ngayo ngisho noma bekangawudzingi umbono wakhe. Ungamlalela yini umuntfu lovame kwenta emaphutsa futsi ukusebentise loko lakushoko? Jehova ulalela bonkhe bantfu labathantaza kuye banekukholwa.

15. Singamlingisa njani Jehova?

¹⁵ Tibute: ‘Nangabe Jehova atfobekile futsi abalalela bantfu lokufaka ekhatsi Abrahama, Rakheli, Mosi, Joshuwa, Manowa, Elija naHezekeli, akukafaneli yini kutsi nami ngiyilalele imibono yalabanye? Ngingabahlonipha yini bazalwane bami ngekutsi ngilalele imibono yabo futsi ngiyisebentise nangabe ngingakhona? Yini lengitayenta nangabe kunalotsite ebandleni noma emndenini wami lodzinga kutsi ngimlalele?’​—Gen. 30:6; Khu. 13:9; 1 Khos. 17:22; 2 Khr. 30:20.

16. Yini Davide layenta ngesikhatsi aphatfwa kabi nguShimeyi?

¹⁶ Indlela yesine lesingakhombisa ngayo kutsi sitfobekile kutsi sitibambe nangabe labanye basiphatsa kabi. (Ef. 4:2) Sitfola sibonelo lesihle kakhulu embhalweni wa-2 Samuweli 16:5-13. (Fundza.) Shimeyi sihlobo seNkhosi Sawula watfuka Davide netinceku takhe waphindze wabahlasela. Esikhundleni sekutsi alwe naye, Davide watibamba. Yini leyamsita kutsi atibambe? Imphendvulo yalombuto singayitfola kuTihlabelelo 3.

17. Yini leyasita Davide wakhona kutibamba, futsi singamlingisa njani?

 ¹⁷ Davide wabhala Tihlabelelo 3 ngesikhatsi indvodzana yakhe Absalomu ifuna kumbulala. Kuleso sikhatsi lesimatima, Shimeyi wahlasela Davide, kodvwa Davide wakhona kutibamba. Yini leyamsita? KuTihlabelelo 3:4 Davide wabhala kutsi: “Ngelivi lami ngikhala kuSimakadze, uyangiphendvula asentsabeni yakhe lengcwele.” Nangabe natsi siphatfwa kabi, kufanele sithantaze njengobe kwenta Davide. Nasenta njalo, Jehova utasinika umoya wakhe longcwele. Ungakhona yini kutibamba noma ubacolele labanye nangabe bakuphatsa kabi? Uyetsemba yini kutsi Jehova uyakukhatsalela futsi utakusita aphindze akubusise?

18. Kutasisita ngani kuchubeka sisebentisa seluleko saJehova?

¹⁸ Nangabe senta tintfo lesatiko kutsi tilungile, sitawuhlakanipha futsi Jehova utasibusisa. Taga 4:7 titsi: “Kuhlakanipha [kubaluleke kakhulu, NW.]” Kuhlakanipha kufaka ekhatsi kuba nelwati, kodvwa kusho lokungetulu kwekumane wati intfo letsite. Ngisho netintfutfwane tiyakhombisa kutsi tihlakaniphile ngekutsi tilungise kudla kwato ehlobo. (Taga 30:24, 25) Khristu lobitwa ngekutsi “ukuhlakanipha kwaNkulunkulu,” uhlale enta tintfo letijabulisa Babe wakhe. (1 Khor. 1:24; Joh. 8:29) Nkulunkulu utasiniketa umvuzo nangabe sihlale sitfobekile futsi sikhombisa kutsi sihlakaniphile ngekutsi sikhetse kwenta lokulungile. (Fundza Matewu 7:21-23.) Ngako chubeka usita ekwenteni libandla libe yindzawo lapho khona bonkhe bantfu bangakhonta Jehova ngekutfobeka. Sidzinga sikhatsi kanye nekubeketela kuze sente lokulungile. Loko kutawukhombisa kutsi sitfobekile, futsi nangabe sitfobekile sitawujabula nyalo kuze kube phakadze.