LIZINGA lekushisa beselicale kwenyuka ngaLesihlanu ekuseni ngaSeptember 1922 njengobe bantfu labangu-8 000 bebagcwele ehholweni. Sihlalo walomhlangano wamemetela kutsi bantfu bebakhululekile kuphumela ngephandle nakusachubeka loluhlelo kodvwa bebangeke bavumeleke kuphindze bangene.

Nakucalwa loluhlelo lwalomhlangano, kwahlatjelwa tingoma, ngemuva kwaloko umzalwane Joseph F. Rutherford wasukuma waya ngembili. Labanyenti kulesicumbi bebatibuta kutsi ngabe utawukhuluma ngani. Njengoba bekushisa, bantfu labambalwa bebangahlaliseki. Sikhulumi sabacela kutsi bahlale phansi futsi balalele. Njengobe inkhulumo beyicala, kute lebekanaka kutsi lapha etulu ngembili, bekunedvwangu lenkhulu lebeyilenga futsi igocotwe kahle.

Umzalwane Rutherford wabeka inkhulumo lebeyinesihloko lesitsi “Umbuso wasezulwini sewusondzele.” Kwaphela li-awa nehhafu livi lakhe lihokoma kulolonkhe lihholwa njengobe akhuluma ngendlela baphrofethi bakadzeni lebebamemetele ngayo kufika kweMbuso ngesibindzi. Nasekasekhatsi nenkhulumo yakhe, wabuta watsi: “Niyakholwa yini kutsi iNkhosi seyicalile kubusa?” Labo lebebalalele bamemeta batsi: “Yebo!”

Umzalwane Rutherford wase utsi: “Ngako buyelani ensimini nine bantfwana baNkulunkulu lophakeme kakhulu! Lamuhla ngilo lilanga, iNkhosi iyabusa! Nine nititfunywa tayo. Ngako-ke memetelani, memetelani, memetelani.”

Ngaleso sikhatsi, lendvwangu lebeyigociwe yavele yavuleka futsi kuyo bekubhalwe emagama latsi: “Memetelani iNkhosi neMbuso wayo.”

Ray Bopp utsi: “Sicumbi sajabula kakhulu.” Anna Gardner wakhuluma ngendlela “luphahla lebelunyakata ngayo ngesikhatsi labebakhona bashaya tandla.” Fred Twarosh utsi: “Bonkhe lebebakhona basukuma.” Evangelos Scouffas yena utsi: “Kwaba shengatsi kukhona lokusisukumisako futsi emehlo etfu avele agcwala tinyembeti.”

Labanyenti lebebakhona kulomhlangano besebavele bacalile kumemetela letindzaba letimnandzi teMbuso. Kodvwa manje, besebativa banemandla kakhulu. Ethel Bennecoff watsi Bafundzi beliBhayibheli bachubeka “bashiseka futsi tinhlitiyo [tabo] tagcwala lutsandvo ngendlela lebebangazange sebative ngayo.” Odessa Tuck, ngaleso sikhatsi lobekaneminyaka lengu-18, nakasuka emhlanganweni bekatimisele kwemukela simemo lesitsi: “Ngubani lotasiyela?” Utsi: “Bengingati kutsi yini lebengitayenta, ngiyente njani futsi kuphi. Yinye kuphela intfo lebengiyati, kutsi bengifuna kufana na-Isaya “lowatsi: ‘Nangu mine, tfuma mine!’” (Isa. 6:8) Ralph Leffler watsi: “Lelilanga leli lasho kucala kwekumenyetelwa kweMbuso losekwentiwa emhlabeni wonkhe lamuhla.”

Kungako lomhlangano wanga-1922 lobewuseCedar Point e-Ohio kukhulunywa ngawo kangaka nakukhulunywa ngemlandvo wenhlangano. George  Gangas watsi: “Lomhlangano loyo wenta kutsi ngitibekele umgomo wekungaphutselwa ngisho nangumunye nje umhlangano.” Ngekukhumbula kwakhe, vele kute lowamphutsela. Julia Wilcox wabhala watsi: “Ngite emavi ekuchaza injabulo lengiba nayo nangabe tincwadzi tetfu tikhuluma ngalomhlangano lobowuse Cedar Point nga-1922. Ngihlale ngiva shengatsi ngingatsi, ‘Ngiyabonga Jehova ngekungivumela kutsi ngibe kuloyo mhlangano.’”

Ngendlela lefanako, labanyenti betfu lamuhla bakhumbula umhlangano lotsite lebebakhona kuwo lowabajabulisa futsi wenta kutsi babe nenshiseko kanye nelutsandvo ngaNkulunkulu wetfu lomkhulu kanye nangaJesu. Njengobe natsi sikhumbula loko lokwentekile emihlanganweni lesiye kuyo, sishukumiseleka kutsi sitsi: “Siyabonga Jehova ngekusivumela kutsi sibe kuloyo mhlangano.”