1. Yini longayenta kuze ube ngumngani wemuntfu lotsite?

NGALOKUVAMILE, kuze ube ngumngani nemuntfu lotsite, kufanele ucitse sikhatsi naye. Nanicoca ngalenikucabangako nangendlela lenitiva ngayo, niba bangani. Ngaletinye tikhatsi, sibhekana netinkinga nasifuna kuba bangani baJesu. Kubangelwa yini loko?

2. Nguyiphi inkinga yekucala lesibhekana nayo?

² Inkinga yekucala kutsi asikase simbone Jesu. EmaKhristu lamanyenti angelikhulu lekucala bekangakase ambone. Nobe kunjalo, umphostoli Phetro watsi: “Nanobe ningakake nambona, niyamtsandza. Nanobe ningamboni kwanyalo, niyakholwa kuye.” (1 Phet. 1:8) Ngako-ke singaba bangani baJesu nanobe singakase simbone.

3. Nguyiphi inkinga yesibili lesibhekana nayo?

³ Inkinga yesibili lesibhekana nayo kutsi asikhoni kukhuluma naJesu. Nangabe sithantaza, imithantazo yetfu siyicondzisa kuJehova. Kuliciniso kutsi sithantaza egameni laJesu, kodvwa sisuke singakhulumi naye. Ecinisweni, Jesu akafuni sithantaze kuye. Leni? Ngobe umthantazo ungulenye indlela yekukhonta, futsi nguJehova kuphela lokufanele simkhonte. (Mat. 4:10) Nobe kunjalo, singakhombisa kutsi siyamtsandza Jesu.

4. Nguyiphi inkinga yesitsatfu, futsi yini lesitawucoca ngayo kulesihloko?

⁴ Inkinga yesitsatfu kutsi Jesu uhlala ezulwini, ngako  ngeke sikhone kucitsa sikhatsi naye. Kodvwa singakhona kwati lokunyenti ngaJesu nanobe singahlali naye. Sitawucoca ngetindlela letine lesingacinisa ngato bungani betfu naye. Kwekucala, asesicoce ngekutsi kubaluleke ngani kutsi sibe bangani naKhristu.

5. Kungani kufanele sibe bangani baJesu? (Buka Libhokisi lelitsi “ Kuba Ngumngani WaJesu Kwenta Ube Ngumngani WaJehova” nalelitsi “ Kuba Nembono Lokahle Ngemsebenti WaJesu.”)

⁵ Kufanele sibe bangani baJesu nangabe sifuna kuba nebuhlobo lobuhle naJehova. Leni? Cabanga nganati tizatfu letimbili. Sekucala, Jesu watjela bafundzi bakhe, watsi: “Babe uyanitsandza ngenca yekutsi nani ningitsandzile.” (Joh. 16:27) Waphindze watsi: “Kute umuntfu lota kuBabe ngaphandle kwekutsi ete ngami.” (Joh. 14:6) Kwetama kuba ngumngani waJehova ube ute buhlobo lobuhle naJesu, kufana nekwetama kungena endlini ungasebentisi umnyango. Jesu wasebentisa umfanekiso lofanako nakatichaza ngekutsi ‘ulisango letimvu.’ (Joh. 10:7) Sizatfu sesibili kutsi Jesu wabulingisa kahle buntfu baBabe wakhe. Watsi kubafundzi bakhe: “Loyo longibonile mine umbonile naBabe.” (Joh. 14:9) Ngako indlela lebalulekile yekutsi simati kahle Jehova, kutsi sifundze ngekuphila kwaJesu. Nasifundza ngaJesu, sitamtsandza kakhulu. Njengobe bungani betfu naJesu bucina, sitamtsandza kakhulu naBabe wakhe.

6. Chaza kutsi ngusiphi lesinye sizatfu sekuba nebuhlobo lobuhle naJesu.

⁶ Kufanele sibe nebuhlobo lobuhle naJesu kuze imithantazo yetfu  iphendvulwe. Loko kusho kutsi kufanele sente lokungetulu nje kunekumane sitsi “egameni laJesu” nasiphetsa imithantazo yetfu. Kufanele sati kutsi Jehova umsebentisa njani Jesu kuze aphendvule imithantazo yetfu. Jesu watjela baphostoli watsi: “Nobe yini leniyicela egameni lami ngitawuyenta.” (Joh. 14:13) Nanobe kunguJehova lolalela aphindze aphendvule imithantazo yetfu, unikete Jesu ligunya lekutsi afeze tinjongo takhe. (Mat. 28:18) Ngaphambi kwekutsi Jehova aphendvule imithantazo yetfu, uyanaka kutsi siyasisebentisa yini seluleko Jesu lasiniketa sona. Nasi sibonelo, Jesu watsi: “Nangabe nitsetselela labanye tono tabo, neYihlo losezulwini utanitsetselela; kodvwa nangabe ningabatsetseleli labanye tono tabo, neYihlo losezulwini ngeke anitsetselele tono tenu.” (Mat. 6:14, 15) Kubaluleke kakhulu kutsi siphatse labanye ngemusa silingise Jehova naJesu!

7. Bobani labazuzako emhlatjelweni wesihlengo saJesu?

⁷ Ngulabo labanebuhlobo lobuhle naJesu kuphela labatawuzuza emhlatjelweni wesihlengo. Sikwati njani loko? Jesu watsi ‘utawunikela ngemphefumulo wakhe ngenca yebangani bakhe.’ (Joh. 15:13) Bantfu labetsembekile labaphila ngaphambi kwekutsi Jesu ete emhlabeni kutawufanele bafundze ngaye futsi bamtsandze. Lamadvodza nebafati labetsembekile lafaka ekhatsi Abrahama, Sara, Mose naRahabi batawuvuswa, kodvwa nabo kutawudzingeka babe bangani baJesu kuze batfole kuphila lokuphakadze.—Joh. 17:3; Imis. 24:15; Heb. 11:8-12, 24-26, 31.

8-9. Njengobe kuchaziwe kuJohane 15:4, 5, yini lesingayenta nangabe sibangani baJesu, futsi kubaluleke ngani loko?

⁸ Siyakujabulela kusebenta naJesu nasishumayela futsi sifundzisa bantfu tindzaba letimnandzi teMbuso. Ngesikhatsi Jesu alamhlabeni, bekangumfundzisi. Kusukela abuyela ezulwini futsi aba yinhloko yelibandla, Jesu solo uyachubeka acondzisa umsebenti wekushumayela nekufundzisa. Jesu uyayibona futsi uyitsatsa njengaleligugu imetamo yetfu yekusita bantfu labanyenti kutsi bamati yena kanye naBabe wakhe. Lomsebenti singakhona kuwufeza kuphela nangabe sisitwa nguJehova naJesu.—Fundza Johane 15:4, 5.

⁹ LiVi laNkulunkulu lifundzisa kutsi kufanele sihlale simtsandza Jesu kuze sijabulise Jehova. Asesicoce ngetintfo letine lesingatenta kuze sibe bangani baJesu.

10. Nguyiphi intfo yekucala lokufanele siyente kuze sibe bangani baJesu?

¹⁰ (1) Mati Jesu. Jesu singamati ngekutsi sifundze tincwadzi letiseBhayibhelini, letifaka ekhatsi incwadzi yaMatewu, yaMakho, yaLukha neyaJohane. Nasizindla ngaloko lesikufundza eBhayibhelini ngekuphila kwaJesu, sitamtsandza futsi simhloniphe ngobe wabaphatsa ngemusa bantfu. Sibonelo saloko kutsi ngisho nobe bekayiNkhosi, akazange abaphatse njengetigcila bafundzi bakhe. Kunaloko, wabatjela tintfo lebekaticabanga nendlela lebekativa ngayo. (Joh. 15:15) Jesu bekabuva buhlungu lebebabuva futsi bekakhala kanye nabo. (Joh.  11:32-36) Ngisho netitsa takhe tabona kutsi bantfu lebebawemukela umlayeto wakhe bebaba bangani bakhe. (Mat. 11:19) Nangabe silingisa Jesu endleleni lebekaphatsa ngayo bafundzi bakhe, buhlobo betfu nalabanye butawucina, sitawenetiseka, sijabule futsi simtsandze kakhulu Khristu siphindze simhloniphe.

11. Nguyiphi intfo yesibili lokufanele siyente kuze sibe bangani baJesu, futsi ibaluleke ngani?

¹¹ (2) Cabanga futsi wente tintfo njengaJesu. Nangabe simati kahle Jesu futsi sicabanga njengaye, sitawuba bangani bakhe labakhulu. (1 Khor. 2:16) Singamlingisa njani Jesu? Cabanga nganasi sibonelo. Jesu bekahlale acabanga ngekusita labanye kunekutsi ente tintfo lebetitawujabulisa yena. (Mat. 20:28; Rom. 15:1-3) Ngenca yekutsi bekacabanga ngalendlela, bekatidzela futsi atsetselela. Bekangasheshi akhubeke ngenca yetintfo bantfu lebebatikhuluma ngaye. (Joh. 1:46, 47) Jesu bekangavumeli emaphutsa lebekentiwe bantfu esikhatsini lesendlulile kutsi amente ashintje indlela lebekabaphatsa ngayo. (1 Thim. 1:12-14) Jesu watsi: “Nangabe nitsandzana, bonkhe batawukwati kutsi nibafundzi bami.” (Joh. 13:35) Kuhle kutibuta kutsi, “Ngiyamlingisa yini Jesu ngekutsi ngitimisele kuhlale nginekuthula nebazalwane bami kanye nabodzadze?”

12. Nguyiphi intfo yesitsatfu lokufanele siyente kuze sibe bangani baJesu, futsi singayenta njani?

¹² (3) Sekela bomnakaboKhristu. Jesu uyakubona lesikwentela bazalwane labagcotjiwe, futsi kufana nekutsi sentela yena. (Mat. 25:34-40) Indlela leyinhloko yekusekela labagcotjiwe kutsi siwente ngekutimisela umsebenti wekushumayela ngeMbuso nekwenta bafundzi Jesu latjela balandzeli bakhe kutsi bawente. (Mat. 28:19, 20; Imis. 10:42) Ngekusitwa ‘nguletinye timvu,’ bomnakaboKhristu bangakhona kufeza umsebenti wekushumayela lowentiwa emhlabeni wonkhe. (Joh. 10:16) Nangabe ungulomunye waletinye timvu, ngaso sonkhe sikhatsi nawushumayela, usuke ukhombisa kutsi uyamtsandza Khristu nabomnakabo.

13. Singasisebentisa njani seluleko saJesu lesikuLukha 16:9?

¹³ Siphindze sibe bangani baJehova naJesu ngekutsi sinikele ngemali kuze sisekele umsebenti labawucondzisako. (Fundza Lukha 16:9.) Nasi sibonelo, singawunikelela umsebenti lowentiwa emhlabeni wonkhe, lofaka ekhatsi kushunyayelwa kwetindzaba letimnandzi etindzaweni letikhashane, kwakhiwa nekunakekelwa kwetakhiwo tenhlangano kanye nekusita nakuvele tehlakalo temvelo nobe letinye timo letimatima. Singaphindze sinikele kuze kubhadalwe tindleko teliHholwa letfu leMbuso siphindze sisite lesibatiko kutsi badzinga lusito. (Taga 19:17) Leti tindlela lesingasekela ngato bomnakaboKhristu.

14. Ngekusho kwa-Efesu 4:15, 16, nguyiphi intfo yesine lokufanele siyente kuze sibe bangani baJesu?

¹⁴ (4) Sekela emalungiselelo lentiwa yinhlangano yaJehova. Siba bangani labakhulu naJesu loyinhloko yelibandla nangabe sibambisana nalabo lababeke kutsi basinakekele. (Fundza Efesu 4:15, 16.) Sibonelo saloko kutsi nyalo siyaciniseka kutsi siwasebentisa kahle emaHholwa etfu eMbuso. Kungako lamanye emabandla ahlanganiswe nalamanye  futsi kwabuketwa nemincele yetindzawo lokushunyayelwa kuto. Ngalendlela, inhlangano ikhonile konga iminikelo yebazalwane. Nobe kunjalo, labanye bamemeteli kudzingeke kutsi bavumelanise timo tabo nalolushintjo. Kungenteka labamemeteli labetsembekile besebakhonte iminyaka leminyenti ebandleni lelitsite futsi besebabangani nebazalwane nabodzadze. Kodvwa manje sebacelwa kutsi batfutsele kulelinye libandla. Jesu ujabula kakhulu nakabona labafundzi labetsembekile bavumelana nalolushintjo!

15. Butawucina njani bungani betfu naJesu esikhatsini lesitako?

¹⁵ Labagcotjwe ngemoya longcwele banelitsemba lekuphila phakadze naJesu futsi babuse naye eMbusweni waNkulunkulu. Batawuba naKhristu, bambone, bakhulume naye futsi bacitse sikhatsi naye. (Joh. 14:2, 3) Labanelitsemba lekuphila emhlabeni nabo batawutsandvwa nguJesu futsi abanakekele. Ngisho nobe bangeke bambone, bungani babo butawucina njengobe batawube bajabulela kuphila labatawube bakulungiselelwe nguJehova naJesu.—Isa. 9:6, 7.

16. Ngutiphi tibusiso lesititfolako ngekuba bangani baJesu?

¹⁶ Sitfola tibusiso letinyenti nangabe semukela simemo saJesu sekutsi sibe bangani bakhe. Sibonelo saloko kutsi ngisho nanyalo siyazuza ngekutsi uyasitsandza futsi uyasinakekela. Sinelitfuba lekuphila phakadze. Lokubaluleke kakhulu kutsi bungani betfu naJesu butasenta sibe nebungani lobuligugu naBabe wakhe, Jehova. Kulilungelo lelikhulu kubitwa ngekutsi sibangani baJesu!