1-2. Iyini inhlawulo, futsi kungani siyidzinga?

NGESIKHATSI Adamu lobekete sono ona, walahlekelwa litfuba lekuphila phakadze, hhayi yena kuphela, kodvwa nabo bonkhe bantfwabakhe. Kute sizatfu lesivakalako lesamenta kutsi one. Wona ngemabomu. Kodvwa kutsiwani ngebantfwana bakhe? Kute labakwenta kuze Adamu one. (Rom. 5:12, 14) Kukhona yini lebekungentiwa kuze basindze kulesigwebo sekufa lebesifanele Adamu? Yebo! Ngekushesha nje ngemuva kwekona kwa-Adamu, Jehova wacala kukhombisa kutsi bekatawutikhulula njani tigidzi tebantfwana ba-Adamu esonweni nasekufeni. (Gen. 3:15) Ngesikhatsi sakhe lesibekiwe, Jehova bekatawutfumela iNdvodzana yakhe isuka ezulwini kutsi itonikela “ngekuphila kwayo kuze kube yinhlawulo yalabanyenti.”—Mak. 10:45; Joh. 6:51.

² Iyini inhlawulo? Nakukhulunywa ngayo emiBhalweni yemaKhristu yesiGriki, inhlawulo linani Jesu lalibhadala kuze atsenge loko Adamu lakulahla. (1 Khor. 15:22) Kungani siyidzinga inhlawulo? Kungobe timiso taJehova letilungile letitfolakala eMtsetfweni betitsi kuphila kufanele kwenanwe ngekuphila. (Eks. 21:23, 24) Adamu walahlekelwa kuphila lokute sono. Jesu wanikela ngekuphila kwakhe lokute sono kuze kuhlonishwe tindlela taNkulunkulu letilungile. (Rom. 5:17) Ngako, waba ‘nguBabe Waphakadze’ kubo bonkhe labakhombisa kukholwa enhlawulweni.—Isa. 9:6; Rom. 3:23, 24.

3. Ngekusho kwaJohane 14:31 na-15:13, yini leyenta Jesu wanikela ngekuphila kwakhe lokute sono?

³ Jesu wanikela ngekuphila kwakhe ngobe bekamtsandza kakhulu Babe wakhe wasezulwini futsi abatsandza kakhulu nebantfu.  (Fundza Johane 14:31; 15:13.) Ngako bekatimisele kuhlala etsembekile kuphila kwakhe konkhe futsi afeze intsandvo yaBabe wakhe. Jesu wahlala etsembekile kwaze kwaba sekufeni. Ngenca yaloko injongo yaJehova ngebantfu nangemhlaba itawugcwaliseka. Kulesihloko sitawucoca ngekutsi kungani Nkulunkulu avumela Jesu kutsi ahlupheke ngaphambi kwekutsi afe. Sitawuphindze sicoce ngalomunye umbhali weliBhayibheli lobekabonga kakhulu ngenhlawulo. Kwekugcina, sitawucoca ngekutsi singakukhombisa njani kubonga ngenhlawulo, nekutsi singachubeka njani sibonga ngaloko Jehova naJesu labasentela kona.

4. Chaza indlela Jesu lafa ngayo.

⁴ Cabanga ngaloko lokwentekako ngelilanga lekugcina ngaphambi kwekutsi Jesu afe. Nanobe angacela tingilosi letinyenti kutsi timsite, kodvwa uvumela emasotja langemaRoma kutsi amshaye kabuhlungu. (Mat. 26:52-54; Joh. 18:3; 19:1) Amshaya ngesiswebhu lesisuka nenyama. Ngemuva kwaloko ametfwalisa lugodvo lolusindzako emhlane lovova ingati. Jesu wetama kuluhudvula lolugodvo, uya nalo lapho atawubulawelwa khona, kodvwa ngekushesha emasotja emaRoma atjela lenye indvodza kutsi iletfwale. (Mat. 27:32) Nakefika lapho atawubulawelwa khona, lamasotja ashayela tipikili etandleni takhe nasetinyaweni takhe atihlanganisa nalolugodvo. Umtimba wakhe losindzako wenta letipikili tidzabule inyama yakhe. Bangani bakhe baselusizini futsi make wakhe uyakhala, kodvwa baholi bemaJuda bahlekisa ngaye. (Luk. 23:32-38; Joh. 19:25) Li-awa ngeli-awa uselusizini. Ngenca yekutsi uyalenga, inhlitiyo yakhe nemaphaphu kusebenta kamatima, futsi akasakhoni nekuphefumula kahle. Ngaphambi nje kwekutsi afe, usho umthantazo wekugcina. Ngemuva kwaloko, ugobisa inhloko futsi unikela ngekuphila kwakhe. (Mak. 15:37; Luk. 23:46; Joh. 10:17, 18; 19:30) Wafa kabuhlungu nangendlela lelihlazo!

5. KuJesu yini leyaba buhlungu kwendlula indlela lafa ngayo?

⁵ KuJesu kukhona lebekubuhlungu kakhulu kwendlula indlela labulawa ngayo. Bekakhatsateke kakhulu ngalelicala lebekabekwe lona. Bebamcambele emanga batsi ungumhlambalati, lokungumuntfu longamhloniphi Nkulunkulu nobe libito lakhe. (Mat. 26:64-66) Kucabanga ngalelicala lebekabekwe lona kwamvisa buhlungu kakhulu kangangekutsi waze wafisa ngatsi Babe wakhe angamenta angabhekani nalelihlazo. (Mat. 26:38, 39, 42) Kungani Jehova avumela kutsi iNdvodzana yakhe layitsandzako ihlupheke futsi ife? Asesicoce ngetizatfu letintsatfu.

6. Kungani kwadzingeka kutsi Jesu alengiswe elugodvweni?

⁶ Kwekucala, kwadzingeka kutsi Jesu alengiswe elugodvweni kuze akhulule emaJuda esicalekisweni. (Gal. 3:10, 13) Atfola lesicalekiso ngobe awazange awulalele uMtsetfo waNkulunkulu lebeketsembise kuwulalela. Ngako lesi bese kungulesinye sicalekiso lebekasitfole ngetulu kwalesi sekuba bantfwana ba-Adamu. (Rom. 5:12) UMtsetfo waNkulunkulu lebewuya kuma-Israyeli bewutsi umuntfu lowente sono lesimenta afanelwe kutsi afe kufanele abulawe, ngemuva kwaloko sidvumbu sakhe besingalengiswa elugodvweni. * (Dut. 21:22, 23; 27:26) Ngenca yekutsi Jesu walengiswa elugodvweni, emaJuda besekangakhululeka  kulesicalekiso futsi umhlatjelo wakhe bese ungawasita ngisho nobe amalile.

7. Ngusiphi sizatfu sesibili lesenta Nkulunkulu kutsi avumele iNdvodzana yakhe ihlupheke?

⁷ Nasi sizatfu sesibili lesenta Nkulunkulu wavumela iNdvodzana yakhe kutsi ihlupheke. Bekayiceceshela umsebenti lebeyitawenta esikhatsini lesitako wekuba nguMpristi wetfu Lophakeme. Jesu wabona kutsi kulukhuni kangakanani kulalela Nkulunkulu nawuvivinywa kamatima. Bekacindzeteleke kakhulu kangangekutsi wathantaza acela lusito “ngekukhala lokukhulu nangetinyembeti.” Ngenca yekutsi wacindzeteleka kakhulu, uyaticondza tidzingo tetfu futsi ‘uyakwati kusisita nasilingwa.’ Siyajabula ngekutsi Jehova usinike uMphristi Lophakeme lonemusa, ‘lovelana natsi ebutsakatsakeni betfu’!—Heb. 2:17, 18; 4:14-16; 5:7-10.

8. Ngusiphi sizatfu sesitsatfu lesenta Nkulunkulu wavumela Jesu kutsi avivinywe kamatima?

⁸ Kwesitsatfu, Jehova wavumela Jesu kutsi avivinywe kamatima kuze aphendvule umbuto lobalulekile lotsi: Bantfu bangahlala yini betsembekile kuJehova ngisho nobe bavivinywa kamatima? Sathane utsi kute! Utsi bantfu bakhonta Nkulunkulu ngobe bafuna abanike lokutsite. Ukholelwa kutsi njenga-Adamu abamtsandzi Jehova. (Jobe 1:9-11; 2:4, 5) Ngenca yekutsi Jehova bekaciniseka ngekutsi iNdvodzana yakhe itawuhlala yetsembekile kuye, wavumela kutsi ivivinywe kamatima. Jesu wahlala etsembekile futsi wakhombisa kutsi Sathane ungumcambimanga.

9. Umphostoli Johane wasibekela siphi sibonelo?

⁹ Kukholwa kwemaKhristu lamanyenti kuciniswe yimfundziso lemayelana nenhlawulo. LamaKhristu achubeke ashumayela ngisho nobe aphikiswa futsi abeketelela kuvivinywa lokwehlukahlukene kuphila kwawo konkhe. Cabanga ngesibonelo semphostoli Johane, walishumayela ngekwetsembeka liciniso lelimayelana naKhristu nenhlawulo iminyaka lecishe ibe ngetulu kwalengu-60. Ngesikhatsi aneminyaka lecishe ibengu-100, uMbuso waseRoma bewucabanga kutsi lomphostoli uyingoti kangangekutsi waze wamvalela ejele lebelisesihlengeni sasePhatmose. Beliyini licala lakhe? ‘Kukhuluma ngaNkulunkulu nangekufakaza ngaJesu.’ (Semb. 1:9) Johane wasibekela sibonelo lesihle kakhulu sekukholwa nekucinisela!

10. Imibhalo yaJohane ikhombisa njani kutsi bekabonga ngenhlawulo?

¹⁰ Etincwadzini teliBhayibheli letabhalwa nguJohane, waveta indlela bekamtsandza ngayo Jesu nendlela bekabonga ngayo ngemhlatjelo wakhe. Wakhuluma ngenhlawulo nobe tintfo letinhle lesititfola ngenca yayo tikhatsi letingetulu kwa-100. Nasi sibonelo, Johane wabhala watsi: “Nangabe lotsite ona, sinemsiti kuBabe, lokunguJesu Khristu lolungile.” (1 Joh. 2:1, 2) Tincwadzi taJohane tiphindze tigcizelele ngekubaluleka ‘kwekufakaza ngaJesu.’ (Semb. 19:10) Kuyabonakala kutsi Johane bekabonga kakhulu ngenhlawulo. Singakhombisa njani kutsi natsi siyabonga ngayo?

11. Yini lengasisita simelane netilingo?

¹¹ Melana nesilingo sekona. Nangabe sibonga mbamba ngenhlawulo sitakubalekela kucabanga ngalendlela: ‘Nangabe ngilingeka, kute sidzingo sekutsi ngetame kamatima kungoni. Ngingachubeka ngente sono, ngemuva kwaloko ngitawucela intsetselelo.’ Esikhundleni saloko, nangabe silingeka kutsi sente  lokubi, sitawutsi: ‘Ngingayenta kanjani lentfo lembi ngemuva kwako konkhe loko Jehova naJesu labangentela kona?’ Singacela Jehova kutsi asiphe emandla, simncenge sitsi: ‘Ngicela ungangivumeli ngincotjwe ngulesilingo.’—Mat. 6:13.

12. Singasisebentisa njani seluleko lesiku-1 Johane 3:16-18?

¹² Batsandze bazalwane bakho nabodzadze. Nasibatsandza, loko kusuke kukhombisa kutsi siyabonga ngenhlawulo. Kungani? Ngobe Jesu akazange afele tsine kuphela kodvwa wafela nebazalwane betfu nabodzadze. Jesu bekakulungele kubafela, loko kukhombisa kutsi ubatsandza kakhulu. (Fundza 1 Johane 3:16-18.) Sikhombisa kutsi siyabatsandza bazalwane betfu nabodzadze ngendlela lesibaphatsa ngayo. (Ef. 4:29, 31–5:2) Sibonelo saloko kutsi siyabasita nabagula nobe nababeketelela kuvivinywa lokumatima lokufaka ekhatsi nabehlelwe tehlakalo temvelo. Kodvwa yini lokufanele siyente nangabe lesikholwa naye enta nobe asho intfo lengasiphatsi kahle?

13. Kungani kufanele sibacolele labanye?

¹³ Ukutfola kumatima yini ngaletinye tikhatsi kucolela umzalwane nobe dzadze? (Lev. 19:18) Nangabe kunjalo, lalela leseluleko lesitsi: “Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona ngalomunye, njengobe nje Jehova anitsetselele ngekukhululeka, nani yentani kanjalo.” (Khol. 3:13) Ngaso sonkhe sikhatsi nasicolela umzalwane nobe dzadze sisuke sikhombisa Babe wetfu wasezulwini kutsi sibonga kakhulu ngenhlawulo. Singachubeka njani sikhombisa kutsi siyabonga ngalesipho lesivela kuNkulunkulu?

14. Nguyiphi lenye indlela lesingakhombisa ngayo kutsi sibonga kakhulu ngenhlawulo?

¹⁴ Bonga Jehova ngenhlawulo. Joanna, longudzadze loneminyaka lengu-83, lohlala e-India utsi: “Ngicabanga kutsi kubalulekile kubonga Jehova onkhe malanga emthantazweni wami ngenhlawulo.” Onkhe malanga nawutithantazela cabanga ngemaphutsa lowentile bese ucela Jehova kutsi akutsetselele. Kuliciniso kutsi nangabe wente sono lesikhulu utawudzinga kusitwa ngulabadzala belibandla. Batakulalela futsi bakunike seluleko lesinelutsandvo lesivela eVini laNkulunkulu. Batawuthantaza nawe bacele Jehova akutsetselele ‘kuze uphiliswe.’—Jak. 5:14-16.

15. Kungani kufanele sitinikete sikhatsi sekufundza ngenhlawulo nesekuzindla ngayo?

 ¹⁵ Zindla ngenhlawulo. Rajamani, longudzadze loneminyaka lengu-73 utsi, “Nangifundza ngendlela Jesu lahlupheka ngayo, emehlo ami avele agcwale tinyembeti.” Kungenteka nawe uva buhlungu nawucabanga ngendlela iNdvodzana yaNkulunkulu leyahlupheka ngayo. Kodvwa nawuchubeka uzindla ngemhlatjelo waJesu, utamtsandza kakhulu yena naBabe wakhe. Kuze uzindle ngenhlawulo kungaba njani utinike sikhatsi sekucwaninga ngayo?

16. Kungasizuzisa njani kufundzisa labanye ngenhlawulo? (Buka sitfombe lesisekhasini lekucala.)

¹⁶ Fundzisa labanye ngenhlawulo. Ngaso sonkhe sikhatsi nasicocela labanye ngenhlawulo iyakhula indlela lesibonga ngayo. Sinemathulusi lamahle lesingawasebentisa nasifundzisa labanye ngekutsi kungani Jesu asifela. Sibonelo saloko kutsi singasebentisa sifundvo 4 lesitfolakala encwajaneni letsi, Tindzaba letimnandzi letivela kuNkulunkulu! Lesifundvo sinesihloko lesitsi, “Ungubani Jesu Khristu?” Nobe singasebentisa sehluko 5 sencwadzi letsi, Lingasifundzisani LiBhayibheli? Lesehluko sinesihloko lesitsi, “Inhlawulo—Isipho Lesitendlula Tonkhe Lesivela KuNkulunkulu.” Njalo ngemnyaka sikhombisa kubonga kwetfu ngenhlawulo ngekutsi sibe khona eSikhumbutweni sekufa kwaJesu futsi simeme labanye kutsi babekhona. Jehova usinikete lilungelo lelikhulu lekufundzisa labanye ngeNdvodzana yakhe!

17. Kungani inhlawulo isipho lesikhulu kakhulu Nkulunkulu lasiphe bantfu?

¹⁷ Kusebaleni kutsi sinesizatfu lesihle sekuhlale sibonga kakhulu ngenhlawulo. Ngenca yenhlawulo, singaba nebuhlobo lobuhle naJehova ngisho nobe sinesono, futsi imisebenti yaDeveli itawubhidlitwa ngalokuphelele. (1 Joh. 3:8) Ngenca yenhlawulo, injongo yaJehova ngemhlaba itawugcwaliseka. Umhlaba wonkhe utawuba liPharadisi. Wonkhe muntfu loyawuhlangana naye uyawube atsandza Jehova futsi amkhonta. Shengatsi lilanga ngalinye singafuna tindlela tekukhombisa kubonga kwetfu ngenhlawulo, lesipho lesikhulu kakhulu Nkulunkulu lasiphe bantfu!