1. Yini sonkhe lesiyifisako ngetihlobo tetfu?

LOMUNYE dzadze lokutsiwa nguPauline * utsi: “Kusukela ngacala kufundza liciniso, bengifisa kutsi onkhe emalunga emndeni wami abe nami ePharadisi. Bengifisa kakhulu kutsi umyeni wami Wayne nendvodzana yetfu lencane bakhonte Jehova kanye nami.” Unato yini tihlobo letisengakamati Jehova futsi letingamtsandzi? NjengaPauline, kungenteka kutsi nawe ufisa kukhonta Jehova ukanye nemalunga emndeni wakho.

2. Ngumiphi imibuto lesitawucoca ngayo kulesihloko?

² Ngeke sitiphocelele tihlobo tetfu kutsi temukele tindzaba letimnandzi kodvwa singatikhutsata kutsi ticabangisise ngemlayeto loseBhayibhelini futsi tiwemukele. (2 Thim. 3:14, 15) Kungani kufanele sitishumayele tihlobo tetfu? Kungani kufanele sibe neluvelo ngetihlobo tetfu? Yini lokufanele siyente kuze sisite tihlobo tetfu titsandze Jehova njengobe natsi simtsandza? Libandla lesikulo lingasisita njani?

3. Ngekusho kwemBhalo wa-2 Phetro 3:9, kungani kufanele sishumayele tihlobo tetfu?

³ Ngekushesha, Jehova utalibhubhisa lelive lelibi. Kutawusindza kuphela labo ‘labatimisele kutfola kuphila lokuphakadze.’ (Imis. 13:48) Nangabe sicitsa sikhatsi lesinyenti nemandla etfu sishumayela bantfu lesingabati labahlala endzaweni yangakitsi, netihlobo tetfu siyatishumayela ngobe sifuna tikhonte Jehova kanye natsi. Jehova longuBabe wetfu lositsandzako “akafisi kutsi kubhubhe ngisho namunye, kepha ufisa kutsi bonkhe bantfu baphendvuke.”—Fundza 2 Phetro 3:9.

4. Nguliphi liphutsa lesingalenta nasishumayela tihlobo tetfu?

 ⁴ Kufanele sihlale sikhumbula kutsi kunendlela lekahle nalekabi yekushumayela. Kungenteka sikhuluma kahle nasishumayela umuntfu lesingamati, kodvwa nasishumayela sihlobo setfu kungenteka singakusebentisi kuhlakanipha.

5. Yini lokufanele siyikhumbule ngaphambi kwekutsi sishumayele tihlobo tetfu?

⁵ Labanyenti betfu beva buhlungu nabakhumbula indlela labayisebentisa nabashumayela tihlobo tabo kwekucala, futsi bafisa shengatsi ngabe basebentisa indlela lencono. Umphostoli Pawula weluleka emaKhristu watsi: “Ngaso sonkhe sikhatsi, emavi enu akabe nemusa, futsi avangwe ngeluswayi, kuze niyati indlela yekuphendvula umuntfu ngamunye.” (Khol. 4:5, 6) Kuhle kusikhumbula leseluleko nasikhuluma netihlobo tetfu. Ngale kwaloko singatikhandza sesitikhuba tihlobo tetfu esikhundleni sekutsi sitisite.

6-7. Niketa sibonelo lesichaza indlela lesingakhombisa ngayo luvelo kulesishade naye longasuye Fakazi.

⁶ Bani neluvelo. Pauline lokucocwe ngaye ekucaleni utsi: “Nangisacala kufundza, bengifuna kucoca nemyeni wami Wayne ngaNkulunkulu nangeliBhayibheli nje kuphela. Besingakhulumi ngetintfo letivamile.” Indvodza yaPauline beyinelwati loluncane ngeliBhayibheli, futsi beyingakucondzi loko Pauline bekakhuluma ngako. KuWayne, bekubonakala shengatsi intfo Pauline labehlale acabanga ngayo bekuyinkholo yakhe nje. Besekakhatsateka ngekutsi lenkholo Pauline lebekatihlanganisa nayo iyingoti futsi iyamdukisa.

⁷ Pauline uyavuma kutsi kusihlwa nangetimphelasontfo bekasicitsa sikhatsi lesidze anebazalwane kanye nabodzadze, futsi bekaba  nabo emihlanganweni, emsebentini wekushumayela kanye nasemicimbini. Utsi: “Wayne bekahle atfola kungenamuntfu nakefika ekhaya futsi bekaba nesitunge.” Wayne bekamkhumbula umfati wakhe nendvodzana yakhe. Bekangabati labantfu umndeni wakhe lobewucitsa sikhatsi nabo, futsi bekubonakala shengatsi bangani bemfati wakhe labasha bese babaluleke kakhulu kwendlula yena. Wayne wabese usongela Pauline ngekutsi utamdivosa. Tikhona yini tindlela Pauline lebekangakhombisa ngato luvelo kulesimo?

8. Ngekusho kwemBhalo wa-1 Phetro 3:1, 2, yini levame kunakwa tihlobo tetfu?

⁸ Bani sibonelo lesihle endleleni lotiphatsa ngayo. Esikhatsini lesinyenti, tihlobo tetfu tinaka kakhulu tintfo lesitentako kunaloko lesikushoko. (Fundza 1 Phetro 3:1, 2.) Pauline wagcine akubonile loko. Utsi: “Bengati kutsi Wayne uyasitsandza futsi akafuni kungidivosa. Kodvwa lamavi lawasho ekungidivosa angenta ngabona kutsi kufanele ngente tintfo ngendlela Jehova lafuna ngayo. Kunekutsi ngikhulume kakhulu, ngabona kutsi kufanele ngibeke sibonelo lesihle ngekutiphatsa kwami.” Pauline wabese uyayekela kuphocelela Wayne kutsi bacoce ngeliBhayibheli, ngako wabese ucala kucoca naye ngetintfo letivamile. Wayne wabona kutsi Pauline sewutsandza kuba nekuthula, wabona nekutsi indvodzana yabo seyiyahlonipha. (Taga 31:18, 27, 28) Ngesikhatsi Wayne abona lushintjo lobelwentiwa ngumndeni wakhe ngenca yekufundza liBhayibheli, naye wase ucala kucabanga ngemlayeto loseVini laNkulunkulu futsi wawemukela.—1 Khor. 7:12-14, 16.

9. Kungani kufanele sichubeke setama kusita tihlobo tetfu?

⁹ Chubeka wetama kusita tihlobo takho. Jehova  usibekela sibonelo lesihle. Uhlale aniketa bantfu litfuba lekwemukela tindzaba letimnandzi kuze batfole kuphila. (Jer. 44:4) Umphostoli Pawula wakhutsata Thimothi kutsi achubeke etama kusita labanye. Leni? Ngobe nakenta njalo, bekatatisindzisa yena kanye nalabo lebebatamlalela. (1 Thim. 4:16) Siyatitsandza tihlobo tetfu, kungako sifuna tilati liciniso leliseVini laNkulunkulu. Ngekuhamba kwesikhatsi, emavi aPauline kanye netento takhe kwaba nemphumela lomuhle emndenini wakhe. Nyalo uyajabula ngobe ukhonta Jehova kanye nendvodza yakhe. Bobabili bangemahlahlandlela, Wayne uphindze abe ngulomdzala welibandla.

10. Kungani kufanele sibeketele?

¹⁰ Beketela. Nasivumelanisa kuphila kwetfu netimiso taNkulunkulu, kungaba matima ngetihlobo tetfu kutsi tetayelane naloko lesikukholelwako nendlela lesiphila ngayo. Intfo yekucala letivame kuyinaka kutsi asisahlanganyeli nato ekugubheni imikhosi yenkholo, nekutsi asisahlanganyeli etindzabeni tepolitiki. Ekucaleni, letinye tihlobo tingasikwatela. (Mat. 10:35, 36) Kodvwa akukafaneli siphele emandla ekutisita. Nasiyekela kwetama kutisita kutsi ticondze loko lesikukholelwako, sitawube sikhombisa kutsi sesivele sitehlulele ngekutsi ngeke tikutfole kuphila lokuphakadze. Jehova akawuniketi tsine umsebenti wekwehlulela, kodvwa uwunikete Jesu. (Joh. 5:22) Nangabe sibeketela, kungenteka tihlobo tetfu tigcine setisilalela nasitishumayela.—Buka libhokisi lelitsi, “ Sebentisa i-Website Yetfu Nawufundzisa.”

11-13. Yini lesiyifundzako endleleni Alice laphatsa ngayo batali bakhe?

¹¹ Cina futsi uhlakaniphe. (Taga 15:2) Cabanga ngesibonelo sa-Alice. Wafundza ngaJehova ngesikhatsi ahlala khashane nebatali bakhe lebebangakholelwa kuNkulunkulu futsi lebebangene shi etindzabeni tepolitiki. Wabona kutsi bekufanele asheshe abatjele ngetintfo letinhle lebekatifundza. Alice utsi: “Nawutawuhlala sikhatsi lesidze ngaphambi kwekutsi utjele tihlobo takho ngaloko lokukholelwako nalokwentako, titawuva buhlungu kakhulu.” Wabhalela batali bakhe tincwadzi wababuta loko lebebakucabanga mayelana netihloko, futsi wakhetsa tihloko labona kutsi batatijabulela, njengalesikhuluma ngelutsandvo. (1 Khor. 13:1-13) Wabonga batali bakhe ngekumkhulisa nangekumnakekela, futsi wabatfumelela netipho. Nakavakashe ekhaya, bekenta konkhe langakwenta kuze asite make wakhe nakenta imisebenti yasekhaya. Ekucaleni, batali bakhe abazange bajabule ngesikhatsi Alice abatjela ngaloko lebesekakukholelwa.

¹² Alice bekatsi nakavakashele batali bakhe achubeke alifundza onkhe malanga liBhayibheli. Utsi: “Kwenta loku kwasita make wabona kutsi liBhayibheli libaluleke kangakanani kimi.” Babe wa-Alice naye wancuma kufundza lokutsite eBhayibhelini kuze acondze kutsi yini lena lebeyishintje ingcondvo yemntfwana wakhe, futsi bekafuna kutfola lokutsite kuze amphikise. Alice utsi: “Ngamniketa liBhayibheli futsi ngafaka kulo lipheshana lelinemlayeto lomfishane lebengimbhalele wona.” Waba yini umphumela? Kunekutsi babe wakhe atfole liphutsa, kwamtsintsa kakhulu loko lakufundza eVini laNkulunkulu.

¹³ Kufanele sicine futsi sihlakaniphe, ngisho nobe singabhekana netinkinga. (1 Khor. 4:12b) Sibonelo saloko kutsi Alice kwadzingeka abeketelele kuphikiswa ngumake wakhe. Utsi: “Ngesikhatsi ngibhajatiswa, make watsi ‘ngilihlongandlebe.’” Alice wenta njani? Utsi: “Angizange ngiyekele kukhuluma ngaloko lebesengikukholelwa, kodvwa ngachaza ngenhlonipho kutsi besengikhetse kuba nguFakazi WaJehova nekutsi bengingeke ngisishintje  sincumo sami. Ngabese ngetama kucinisekisa make ngekutsi ngiyamtsandza. Sobabili sakhala futsi ngabese ngimphekela kudla lokumnandzi. Kusukela lapho, make wase uyabona kutsi liBhayibheli belingisita kutsi ngibe ngumuntfu lokahle.”

14. Kungani kungakafaneli sivumele tihlobo tetfu kutsi tisente sishintje sincumo setfu sekukhonta Jehova?

¹⁴ Kungatsatsa sikhatsi kutsi tihlobo tetfu ticondze kutsi kubaluleke kakhulu kitsi kukhonta Jehova. Nasi sibonelo, ngesikhatsi Alice ancuma kuba lihlahlandlela kunekutsi achubeke nekwenta umsebenti batali bakhe lebebamkhetsele wona, make wakhe waphindze wakhala. Kodvwa Alice wachubeka acinile. Alice utsi: “Nangabe uvumela tihlobo takho kutsi tikushintjise sincumo losentile kulokutsite, loko kusho kutsi tingakhona kukwenta ushintje naletinye tincumo lotentile. Kodvwa nangabe unemusa futsi ume wacina, letinye tihlobo takho tingakulalela.” Nguloko kanye lokwenteka ku-Alice. Nyalo, batali bakhe bobabili bangemahlahlandlela futsi babe wakhe ungulomdzala ebandleni.

15. Ngekusho kwemBhalo waMatewu 5:14-16 na-1 Phetro 2:12, ‘lokuhle lokwentiwa’ ngulabanye kungatisita njani tihlobo tetfu?

¹⁵ Jehova udvonsa bantfu kutsi bete kuye asebentisa ‘lokuhle lokwentiwa’ tikhonti takhe. (Fundza Matewu 5:14-16; 1 Phetro 2:12.) Nangabe loshade naye angasuye Fakazi WaJehova, sewuke wahlangana yini nemalunga elibandla lokulo? Pauline lesicoce ngaye ekucaleni wamema labanye bazalwane nabodzadze kutsi bete ekhaya lakhe kuze indvodza yakhe Wayne ibati. Wayne ukhumbula indlela lomunye umzalwane lamsita ngayo kuze acondze  kutsi BoFakazi babantfu labanjani, utsi: “Lomzalwane wafaka lilanga emsebentini kuze atobukela nami ibhola. Ngacabanga ngatsi: ‘Lomuntfu ufana natsi sonkhe!’”

16. Kungani kufanele simeme tihlobo tetfu tite emihlanganweni yetfu?

¹⁶ Lenye indlela lekahle kakhulu yekusita tihlobo tetfu kutsi sitimemele emihlanganweni yelibandla. (1 Khor. 14:24, 25) Umhlangano wekucala Wayne laya kuwo bekuSikhumbuto, ngobe besicala nasekaphumile emsebentini futsi neluhlelo lwawo belulufishane. Wayne utsi: “Angikhumbuli kutsi inkhulumo beyikhuluma ngani, kodvwa lengikukhumbulako ngulabantfu. Beta kimi futsi bangemukela kahle baphindze bangichawula. Ngavele ngatibonela kutsi babantfu labakahle kakhulu.” Lomunye umzalwane nemfati wakhe baba nemusa kakhulu kuPauline, bebamsita akanye nendvodzana yakhe emihlanganweni yebuKhristu kanye nasemsebentini wekushumayela. Ngako ngesikhatsi Wayne ancuma kutsi ufuna kukwati kancono loko Pauline bese kakukholelwa, wacela lomzalwane kutsi afundze naye liBhayibheli.

17. Yini lokungakafaneli sitisole ngayo, futsi kungani kungakafaneli siphele emandla ekusita tihlobo tetfu?

¹⁷ Siyetsemba kutsi tonkhe tihlobo tetfu titawukhonta Jehova kanye natsi. Ngisho nobe singetama kamatima kusita tihlobo tetfu kutsi tikhonte Nkulunkulu, kungenteka tingalemukeli liciniso. Nangabe kunjalo, akukafaneli sitisole ngesincumo sato. Ngetulu kwako konkhe, ngeke sibaphocelele bantfu kutsi bemukele loko lesikukholelwako. Nobe kunjalo, nangabe tihlobo takho tibona indlela lojabule ngayo ngenca yekukhonta Jehova, loko kungatenta tishintje indlela leticabanga ngayo. Tithantazele. Khuluma nato ngekuhlakanipha. Ungayekeli kwetama kutisita. (Imis. 20:20) Ciniseka kutsi Jehova utayibusisa imetamo yakho. Nangabe tihlobo takho tikhetsa kukulalela, titawusindziswa.