1-2. Sitawucoca ngani kulesihloko?

UTIVA njani nangabe umele liphasela lolidzinga kakhulu kodvwa lingefiki ngesikhatsi lebewulilindzele ngaso? Uyadvumateka yini? Kungenteka utive ngendlela lechazwe kuTaga 13:12 letitsi: “Nangabe solo kungenteki loko umuntfu lakulindzele, ubese ulahlekelwa litsemba.” Kodvwa utiva njani nawuva kutsi leliphasela alikefiki ngesikhatsi lobewulilindzele ngaso ngenca yetizatfu letivakalako? Kungenteka utawubeketela futsi ukulungele kulindza.

² Kulesihloko, sitawucoca ngaletinye timiso letiseBhayibhelini letingasisita kutsi sihlale ‘silindzile.’ (Mik. 7:7) Sitawubese sicoca ngetimo letimbili lapho kudzingeka khona kutsi silindzele Jehova kutsi atsatse sinyatselo. Ekugcineni, sitawucoca ngetibusiso letitawutfolwa ngulabo labakulungele kulindzela Jehova.

3. Umbhalo weTaga 13:11 usifundzisani?

³ Taga 13:11 tisifundzisa kutsi kungani kufanele sibeketele. Titsi: “Umcebo lotfolakele kamelula utawusheshe uphele, kodvwa umuntfu lotfola umcebo kancane kancane utawugcine sekanalokunyenti.” Yini lesiyifundza kulelivesi? Kukuhlakanipha kubeketela nawenta tintfo, utente kancane kancane.

4. Sisho kutsini simiso lesitfolakala kuTaga 4:18?

⁴ Taga 4:18 tisitjela kutsi “indlela yalabalungile ifana nekukhanya kwasentsatsakusa lokuya ngekuya kukhanye kakhulu kuze kube semini.” Kungenteka lamavi asho indlela Jehova lembula ngayo injongo yakhe kubantfu bakhe kancane kancane.  Nanobe kunjalo, kungenteka lelivesi lisho nendlela umKhristu latfutfuka ngayo ebuhlotjeni bakhe naJehova. Kutsatsa sikhatsi kutsi umuntfu asondzelane naJehova. Nangabe sidadisha liVi laNkulunkulu ngekutimisela, futsi sisebentise seluleko sakhe lesisitfola enhlanganweni yakhe, kancane kancane singaba nebuntfu bebuKhristu. Sitawuphindze simati kancono Nkulunkulu. Naka umfanekiso Jesu lawusho kuze achaze leliphuzu.

5. Jesu wasebentisa muphi umfanekiso kuze akhombise kutsi kutsatsa sikhatsi kutsi umuntfu ente lushintjo?

⁵ Jesu wasebentisa umfanekiso kuze achaze indlela umlayeto weMbuso lofana ngayo nenhlanyelo lencane lekhula kancane kancane etinhlitiyweni talabatsandza lokulungile. Watsi: “Lenhlanyelo iyamila futsi ikhule, kodvwa [lona lohlanyele] usuke angati kutsi kwenteka njani loko. Umhlabatsi utivetela wona titselo, kucale kube likhaba, bese kuyashakata, ekugcineni kube ngematimba.” (Mak. 4:27, 28) Bekasho kutsini Jesu? Bekachaza kutsi njengobe nalokuhlanyelwe kukhula kancane kancane, kanjalo-ke nemuntfu lowemukela umlayeto weMbuso kutsatsa sikhatsi kutsi ente lushintjo. Nasi sibonelo, njengobe umuntfu lesidadisha naye liBhayibheli asondzelana naJehova, sibese sicala kubona lushintjo lolunyenti loluhle lalwentile. (Ef. 4:22-24) Kodvwa kufanele sikhumbule kutsi nguJehova lowenta lenhlanyelo lencane kutsi ikhule.—1 Khor. 3:7.

6-7. Yini lesiyifundza endleleni Jehova ladala ngayo umhlaba?

⁶ Kuko konkhe Jehova lakwentako, utsatsa sikhatsi lasidzingako kutsi acedze umsebenti wakhe. Loko ukwenta kuze advumise libito lakhe futsi asite labanye. Nasi sibonelo, cabanga ngendlela Jehova lalungisa ngayo umhlaba kancane kancane kuze bantfu bahlale kuwo.

⁷ LiBhayibheli nalichaza indlela Jehova ladala ngayo umhlaba lisitjela ngendlela ‘lakala ngayo bukhulu bawo’ nalasimisa ngayo “tinsika” tawo, waphindze wabeka “litje lekuwusimisa.” (Jobe 38:5, 6) Watinika nesikhatsi  sekubukisisa umsebenti wakhe. (Gen. 1:10, 12) Cabanga ngendlela tingilosi letativa ngayo ngesikhatsi tibona tonkhe tintfo letinsha lebetidalwe nguJehova. Tajabula kakhulu! Ngenca yaloko, tacala “kumemeta tidvumisa.” (Jobe 38:7) Yini lesiyifundzako? Kwatsatsa tinkhulungwane teminyaka kutsi Jehova acedze kudala tonkhe tintfo, kodvwa watsi nasekabuka tonkhe tintfo lebekatentile watsi ‘tinhle kakhulu.’—Gen. 1:31.

8. Yini lesitawucoca ngayo nyalo?

⁸ Letibonelo tisikhombisa kutsi tinyenti timiso letiseVini laNkulunkulu letisifundzisa kutsi kufanele sibeketele. Nyalo sitawucoca ngetimo letimbili letidzinga kutsi silungele kulindza Jehova.

9. Kunini lapho kufanele silindzele khona Jehova?

⁹ Kungahle kudzingeke silindze kutsi imithantazo yetfu iphendvulwe. Nangabe sithantaza sicela emandla ekubeketelela inkinga lesibhekene nayo, nobe sicela lusito kuze siyekele kwenta intfo Jehova langayitsandzi, singahle sive shengatsi Jehova utsatsa sikhatsi lesidze kuphendvula imithantazo yetfu. Kungani Jehova angayiphendvuli ngaleso sikhatsi imithantazo yetfu?

10. Kungani kufanele sibeketele, silindzele Jehova kutsi aphendvule imithantazo yetfu?

¹⁰ Jehova uyayilalelisisa imithantazo yetfu. (Hla. 65:2) Nasithantaza, uyabona kutsi sinekukholwa kuye. (Heb. 11:6) Jehova ufuna kubona kutsi sitimisele kangakanani kuphila ngekuvumelana nemithantazo yetfu nekwenta intsandvo yakhe. (1 Joh. 3:22) Ngako, nasicela Jehova kutsi asisite siyekele kwenta intfo langayitsandzi, singahle sidzinge kubeketela futsi sente konkhe lokusemandleni etfu kuze sente lushintjo. Jesu wasenta sabona kutsi leminye imithantazo yetfu angeke iphendvulwe ngekushesha. Watsi: “Chubekani nicela, nitawuphiwa; chubekani nifuna, nitawutfola; chubekani ninconcotsa, nitawuvulelwa; ngobe wonkhe umuntfu locelako uyaphiwa, nawo wonkhe umuntfu lofunako uyatfola, futsi wonkhe umuntfu lonconcotsako utawuvulelwa.” (Mat. 7:7, 8) Nasilalela leseluleko futsi ‘siphikelela emthantazweni,’ singaciniseka kutsi Babe wetfu wasezulwini uyasiva futsi utayiphendvula imithantazo yetfu.—Khol. 4:2.

11. Umbhalo waKumaHebheru 4:16, usisita njani nangabe sibona shengatsi umthantazo wetfu awuphendvulwa ngekushesha?

¹¹ Nanobe kungahle kubonakale shengatsi kutsatsa sikhatsi kutsi imithantazo yetfu iphendvulwe, Jehova usetsembisa kutsi utayiphendvula “ngesikhatsi lesifanele.” (Fundza KumaHebheru 4:16.) Kungako kungakafaneli sisole Jehova nangabe intfo letsite ingenteki ngesikhatsi lesiyilindzele ngaso. Nasi sibonelo, sekuphele iminyaka bantfu labanyenti bathantazela uMbuso waNkulunkulu kutsi ubhubhise lelive lelibi. NaJesu washo kutsi sibokuthantazela loko. (Mat. 6:10) Kodvwa kungaba bulima nangabe umuntfu angaphelelwa kukholwa kuNkulunkulu ngenca yekutsi kuphela akukefiki ngesikhatsi lebesikulindzele ngaso! (Hab. 2:3; Mat. 24:44) Sikhombisa kutsi sihlakaniphile nangabe sichubeka silindzele Jehova futsi sithantaza kuye sinelitsemba lekutsi utayiphendvula imithantazo yetfu. Kuphela kutawufika ngesikhatsi lesifanele, ngobe Jehova sewuvele ulikhetsile ‘lilanga neli-awa’ lokutawufika ngalo. Leso kutawube kusikhatsi lesikahle kitsi sonkhe.—Mat. 24:36; 2 Phet. 3:15.

12. Kunini lapho kungaba matima khona kutsi sibeketele?

¹² Kungahle kudzingeke sibeketele futsi sicinisele  nasiphatfwa kabi. Bantfu labakulelive bavame kubaphatsa kabi labo labanebulili lobehlukile, labanelibala lesikhumba lelingafani nelabo, labanemasiko lehlukile nalabanebuve lobungafani nebabo. Labanye baphatfwa kabi ngenca yekutsi bakhubatekile emtimbeni nobe engcondvweni. Bantfu baJehova labanyenti babeketelele kuphatfwa kabi ngenca yetinkholelo tabo letisekelwe eBhayibhelini. Nangabe siphatfwa kabi, kufanele sikhumbule emavi aJesu latsi: “Loyo lotawucinisela kuze kube sekugcineni utawusindziswa.” (Mat. 24:13) Kodvwa yini lokufanele uyente nangabe wati kutsi lotsite ebandleni wente sono lesikhulu? Nangabe labadzala belibandla sebatisiwe ngalendzaba, utayishiyela yini etandleni tabo unelitsemba lekutsi batayilungisa ngendlela Jehova lafuna ngayo? Yini labadzala belibandla labangayenta nangabe lotsite ente sono lesikhulu?

13. Yini Jehova lafuna labadzala belibandla bayente nangabe lotsite ente sono lesikhulu?

¹³ Nangabe labadzala belibandla beva kutsi lotsite ebandleni wente sono lesikhulu, bayathantaza bacele “kuhlakanipha lokuvela ezulwini,” kuze babe nembono waJehova ngalendzaba. (Jak. 3:17) Umgomo wabo ‘kubuyisa lesoni ekoneni’ kwaso nabangakhona. (Jak. 5:19, 20) Bafuna nekwenta konkhe labangakwenta kuze bavikele libandla futsi badvudvute labo labeve buhlungu. (2 Khor. 1:3, 4) Nangabe labadzala belibandla beva kutsi lotsite wente sono lesikhulu, kufanele bacale bafune onkhe emaciniso endzaba, futsi loko kungatsatsa sikhatsi. Babese bayathantaza, bamnike seluleko lesivela emiBhalweni futsi bamcondzise “ngendlela lefanele.” (Jer. 30:11) Nanobe labadzala belibandla bangalindzi sikhatsi lesidze ngaphambi kwekutsi bakhiphe sehlulelo, kodvwa abasikhiphi ngekushesha. Nangabe balandzela sicondziso lesivela kuJehova, libandla lonkhe litawujabula. Kodvwa nanobe labadzala belibandla benta tintfo ngendlela lekahle, lona longenacala kungenteka achubeke eva buhlungu. Nangabe nawe utiva kanjalo, yini longayenta kuze ube ncono?

14. Ngusiphi sibonelo lesiseBhayibhelini lesingakusita nangabe uphetfwe kabi ngulomunye umKhristu?

¹⁴ Ukile yini waphatfwa kabi, mhlawumbe ngumzalwane nobe dzadze? Ungatfola tibonelo letinhle eVini laNkulunkulu letisifundzisa indlela yekulindzela Jehova kutsi alungise tintfo. Nasi sibonelo, nanobe Josefa  aphatfwa kabi bomnakabo, kodvwa akazange avumele tono tabo kutsi timente ahlale atfukutsele. Esikhundleni saloko, wachubeka enta konkhe lokusemandleni akhe kuze akhonte Jehova, futsi Jehova wambusisa ngenca yekubeketela nekucinisela kwakhe. (Gen. 39:21) Ngekuhamba kwesikhatsi, Josefa wabacolela labo labamphatsa kabi futsi wayibona indlela Jehova labekambusise ngayo. (Gen. 45:5) NjengaJosefa, siyadvudvuteka nasisondzelana naJehova futsi silindzele yena kutsi alungise tintfo ngesikhatsi lesifanele.—Hla. 7:17; 73:28.

15. Yini leyasita lomunye dzadze kutsi abeketelele kuphatfwa kabi futsi abe nekuthula?

¹⁵ Kuliciniso kutsi akusiko konkhe kuphatfwa kabi lokumatima njengaloko Josefa labhekana nako, kodvwa nobe ngukuphi kuphatfwa kabi kungasivisa buhlungu. Nangabe sinenkinga nalotsite, lokufaka ekhatsi umuntfu longamkhonti Jehova, singazuza nangabe sisebentisa timiso letiseBhayibhelini. (Fil. 2:3, 4) Cabanga nganaku lokwenteka. Lomunye dzadze weva buhlungu kakhulu nakeva kutsi lomunye lasebenta naye bekakhuluma kabi ngaye kulabanye. Kunekutsi lodzadze asheshe atsatse sinyatselo, watinika sikhatsi wacabanga ngesibonelo saJesu. Ngesikhatsi Jesu etfukwa, akazange aphindzisele ngekwetfuka. (1 Phet. 2:21, 23) Analoko engcondvweni, lodzadze wancuma kungenti lutfo ngalendzaba. Ngekuhamba kwesikhatsi, weva kutsi lona lasebenta naye bekagula kakhulu futsi akhatsateke kakhulu. Lodzadze wabona kutsi kungenteka bekangakacondzi kukhuluma loko lakusho. Ngako wajabula ngekutsi wakubeketelela lokuphatfwa kabi futsi waba nekuthula.

16. Yini lengakudvudvuta nangabe ubeketelela kuphatfwa kabi? (1 Phetro 3:12)

¹⁶ Nangabe ubeketelela kuphatfwa kabi nobe lokunye nje, khumbula kutsi Jehova usedvute nalabo “labephuke tinhlitiyo.” (Hla. 34:18) Uyakutsandza ngenca yekutsi uyabeketela futsi ulahlela konkhe kukhatsateka kwakho kuye. (Hla. 55:22) UnguMehluleli wemhlaba wonkhe. Ubona konkhe lokwentekako. (Fundza 1 Phetro 3:12.) Nangabe unetinkinga letimatima longakhoni kuticatulula, khumbula kutsi kubalulekile kulindzela Jehova.

17. Njengobe kubhalwe ku-Isaya 30:18, yini Jehova lasetsembisa yona?

¹⁷ Ngekushesha, Babe wetfu wasezulwini utasibusisa kakhulu asebentisa uMbuso wakhe. Isaya 30:18 utsi: “Jehova ulindze ngesineke kuze anentele umusa, futsi utawusukuma kuze anikhombise sihawu. Ngobe Jehova unguNkulunkulu lowehlulela ngekulunga. Bayajabula bonkhe labo labahlale balindzele yena.” Labo labachubeka balindzele Jehova batawutfola tibusiso letinyenti nyalo nasemhlabeni lomusha.

18. Ngutiphi tibusiso lesitilindzele?

¹⁸ Nasebaseveni lelisha, bantfu baNkulunkulu angeke kudzingeke kutsi babeketelele kukhatsateka kanye netinkinga lababhekana nato nyalo. Kutawube sekute kuphatfwa kabi kanye nebuhlungu. (Semb. 21:4) Angeke kudzingeke kutsi silindze tintfo lesitidzingako ngobe sitawube sinalokunyenti kakhulu. (Hla. 72:16; Isa. 54:13) Loko kutawujabulisa kakhulu!

19. Yini Jehova lasilungiselela yona nyalo?

¹⁹ Nyalo, Jehova usilungiselela kuphila ngephansi kweMbuso wakhe ngekusisita kutsi sincobe imikhuba yetfu lemibi futsi sibe nebuntfu lobumjabulisako. Ungapheli emandla bese uyekela kukhonta Jehova. Imphilo lenhle kakhulu isemnyango! Njengobe sisalindzele lelikusasa lelihle, shengatsi singachubeka silindzele Jehova njengobe acedzela umsebenti wakhe!