1. Ngumuphi umtfwalo Jehova lawunikete batali?

JEHOVA wadala bantfu bekucala kutsi babe nesifiso sekuba nebantfwana. LiBhayibheli litsi: “Bantfwana balifa leliphuma [kuJehova].” (Hla. 127:3) Kusho kutsini loko? Cabanga nje umngani wakho akucela kutsi umgadzele imali yakhe lenyenti. Ungativa kanjani? Kungenteka kutsi utawujabula kakhulu ngoba uyakwetsemba. Kodvwa ungakhatsateka ngekutsi utayibeka kuphi lapho itawuphepha khona lemali. Jehova longumngani wetfu lomkhulu, unikete batali lilungelo lekunakekela lokutsite lokuligugu kakhulu kwendlula imali. Ubanikete umtfwalo wekutsi baciniseke kutsi bantfwana babo bayanakekeleka futsi bayajabula.

2. Ngumiphi imibuto lesitawucoca ngayo?

² Ngubani lokufanele ancume nangabe labashadene kufanele babe nebantfwana nekutsi batawuba nabo nini? Futsi yini batali labangayenta kuze basite bantfwana babo baphile kahle? Cabanga ngetimiso letitfolakala eVini laNkulunkulu letingasita batali labangemaKhristu kutsi bente tincumo letihlakaniphile.

3. (a) Ngubani lokufanele ancume nangabe labashadene kufanele babe nebantfwana? (b) Ngutiphi timiso letiseBhayibhelini lokufanele bangani balabashadene kanye nemndeni batikhumbule?

³ Kulamanye emasiko, ngekushesha nje bantfu labasandza kushada kulindzeleke kutsi bacale babe nebantfwana. Umndeni wabo nobe labanye bantfu bangetama kubacindzetela kutsi babe nebantfwana ngekushesha. Jethro, lokungumzalwane  wase-Asia utsi: “Ebandleni, labanye labanebantfwana baphocelela labashadene labete bantfwana kutsi babe nabo.” Jeffrey, naye longumzalwane e-Asia, utsi: “Labanye batjela labashadene labete bantfwana kutsi kufanele babe nebantfwana kuze labantfwana babanakekele nasebakhulile.” Noma kunjalo, labashadene kufanele batincumele bona kutsi bayafuna yini kuba nebantfwana. Kufanele batentele sincumo, ngobe kungumtfwalo wabo. (Gal. 6:5) Liciniso likutsi bangani kanye nemndeni bayafisa kutsi labasandza kushada bajabule. Kodvwa bonkhe kufanele bakhumbule kutsi sincumo sekutsi kufanele yini babe nebantfwana kufanele laba labashadene batentele.—1 Thes. 4:11.

4-5. Ngumiphi imibuto lemibili labashadene lokufanele bacoce ngayo, futsi kunini lapho kufanele bacoce ngalemibuto? Chaza.

⁴ Labashadene labafuna kuba nebantfwana benta kahle nabatibuta nayi imibuto lemibili lebalulekile: Wekucala, bafuna nini kuba nebantfwana? Wesibili, bafuna kuba nebantfwana labangakhi? Ngusiphi sikhatsi lesikahle labashadene labangacoca ngaso ngalendzaba? Kungani lemibuto lemibili ibalulekile?

⁵ Esikhatsini lesinyenti, kuba kahle ngalabafuna kushada kutsi bacoce ngekutsi bayafuna yini kuba nebantfwana. Kungani? Kungobe kubalulekile kutsi bobabili babe nembono lofanako endzabeni yekuba nebantfwana. Kufanele baphindze bacabange kutsi bakulungele yini kuba nebantfwana. Labanye labashadene bakhetsa kuhlala umnyaka munye nobe lemibili ngemuva kwemshado ngaphambi kwekutsi babe nebantfwana ngobe kuba batali kutawudla sikhatsi kanye nemandla abo. Bayakhulumisana ngekutsi kuhlala sikhashana kutawubanika litfuba lekutsi betayelane nemphilo yasemshadweni futsi basondzelane.—Ef. 5:33.

6. Yini labanye labashadene labakhetse kuyenta ngenca yetikhatsi letibucayi lesiphila kuto?

⁶ Lamanye emaKhristu akhetsa kulingisa sibonelo lesabekwa ngemadvodzana aNowa lamatsatfu kanye nebafati bawo. Lamadvodzana aNowa lamatsatfu kanye nebafati bawo abazange babe nebantfwana ngekushesha. (Gen. 6:18; 9:18, 19; 10:1; 2 Phet. 2:5) Jesu wafananisa sikhatsi lesiphila kuso ‘nesikhatsi saNowa,’ futsi kuliciniso kutsi siphila etikhatsini “letibucayi lokumatima kubhekana nato.” (Mat. 24:37; 2 Thim. 3:1) Ngenca yaloko, labanye labashadene bakhetsa kungabi nebantfwana ngekushesha  kuze babe nesikhatsi lesinyenti benta umsebenti wekushumayela.

7. Timiso letitfolakala embhalweni waLukha 14:28, 29 nakuTaga 21:5, tingabasita njani labashadene?

⁷ Labashadene labahlakaniphile nabancuma kutsi batawuba nabo yini bantfwana nekutsi batawuba nalabangakhi, ‘babala tindleko.’ (Fundza Lukha 14:28, 29.) Labashadene lasebanebantfwana bayati kutsi kukhulisa bantfwana kudzinga imali, sikhatsi kanye nemandla. Ngako kubalulekile ngalabashadene labafuna kuba nebantfwana kutsi batibute nayi imibuto: ‘Sobabili kutawufanele sisebente yini kuze sinakekele tidzingo temndeni wetfu? Siyavumelana yini ngetintfo lesitidzingako? Nangabe sobabili kufanele sisebente, ngubani lotawunakekela bantfwana betfu? Ngubani lotawubasita babe nembono lokahle ngetintfo labaticabangako nalabatentako? Nangabe labashadene bacoca ngalemibuto, basuke basebentisa seluleko lesisembhalweni weTaga 21:5.—Fundza.

8. Ngubuphi bumatima labashadene lokufanele babulindzele, futsi yini letawentiwa yindvodza lewutsandzako umndeni wayo?

⁸ Umntfwana udzinga kucitsa sikhatsi lesenele nemtali ngamunye. Nangabe labashadene baba nebantfwana labanyenti ngesikhashana nje, kungaba matima ngebatali kutsi banikete umntfwana ngamunye sikhatsi lasidzingako. Labanye labashadene labanebantfwana labanyenti batsi kuba matima. Make webantfwana angahlale akhatsele. Angakhatsala kangangekutsi kungabamatima kutsi abe nemandla ekudadisha, ekuthantaza, kanye newekuba khona njalo emsebentini wekushumayela. Kungaphindze kube matima kutsi alandzelele nakasemihlanganweni yelibandla kanye nekuzuza kuyo. Liciniso likutsi, indvodza lemtsandzako umfati wayo itawuchubeka imsekela nangabe bantfwana babo badzinga kunakwa, kungaba kusemihlanganweni yelibandla nobe ekhaya. Nasi sibonelo, ingamsita umfati wayo kuze ente imisebenti yasekhaya. Indvodza ingasebenta matima kuze iciniseke kutsi umndeni wayo uyazuza ekuKhonteni kweMndeni. Lendvodza itawuchubeka ihamba nemndeni wayo nabaya emsebentini wekushumayela.

9-10. Yini batali lokufanele bayente kuze basite bantfwana babo?

⁹ Ngutiphi letinye tetintfo batali labangatenta kuze basite bantfwana batsandze Jehova? Bangabavikela njani bantfwana babo emikhubeni leyingoti yalelive lelibi? Cabanga nganati tintfo batali labangatenta.

¹⁰ Thantaza ucele lusito lwaJehova. Cabanga ngesibonelo lesasibekelwa nguManowa kanye nemfati wakhe, lababa batali baSamsoni.  Ngesikhatsi Manowa eva kutsi yena nemfati wakhe batawuba nemntfwana, wacela sicondziso saJehova endleleni lebebatamkhulisa ngayo lomntfwana.

11. Batali bangasilingisa kanjani sibonelo saManowa, njengobe kuchazwe embhalweni weTikhulu 13:8?

¹¹ Nihad na-Alma, baseBosnia naseHerzegovina, bafundza esibonelweni saManowa. Batsi: “Salingisa Manowa, sacela sicondziso saJehova kuze sibe batali labakahle. Jehova wayiphendvula imithantazo yetfu ngetindlela letehlukahlukene asebentisa imibhalo, tincwadzi letisekelwe eBhayibhelini, imihlangano yelibandla, kanye nemihlangano lemikhulu.”—Fundza Tikhulu 13:8.

12. Ngusiphi sibonelo Josefa naMariya labasibekela bantfwana babo?

¹² Bafundzise ngekubabekela sibonelo. Tintfo lotishoko tibalulekile; noma kunjalo, lokwentako kubatsintsa kakhulu bantfwana bakho. Singaciniseka kutsi Josefa naMariya bababekela sibonelo lesihle bantfwana babo, lokufaka ekhatsi Jesu. Josefa wasebenta kamatima kuze anakekele umndeni wakhe. Ngetulu kwaloko, Josefa wabakhutsata umndeni wakubo kutsi utsandze kukhonta Jehova. (Dut. 4:9, 10) Josefa bekayisa umndeni wakhe emkhosini weliPhasika eJerusalema “minyaka yonkhe” ngisho nobe umtsetfo bewungamphoceleli kutsi ente njalo. (Luk. 2:41, 42) Kungenteka labanye bobabe bebacabanga kutsi kuyisa wonkhe umndeni emkhosini weliphasika bekumatima, bekudzinga sikhatsi lesinyenti, futsi bekudzinga imali lenyenti. Noma kunjalo, Josefa bekatitsandza tintfo letiphatselene nekukhonta Nkulunkulu futsi wafundzisa nebantfwana bakhe kutsi bente njalo. Mariya naye bekayati kahle imibhalo. Ngemavi akhe kanye nangetento takhe, wafundzisa bantfwana bakhe kutsi batsandze liVi laNkulunkulu.

13. Labanye labashadene basilandzela njani sibonelo saJosefa naMariya?

¹³ Nihad na-Alma, lesicoce ngabo ngenhla, bebafuna kulandzela sibonelo saJosefa naMariya. Loko kwabasita njani kutsi bakhulise indvodzana yabo kuze itsandze iphindze ikhonte Nkulunkulu? Batsi: “Endleleni lesiphila ngayo, besetama kukhombisa indvodzana yetfu kutsi kukahle kangakanani kuphila ngetimiso taJehova.” Nihad utsi: “Bani luhlobo lwemuntfu lofuna kutsi umntfwana wakho abe ngilo.”

14. Kungani batali kufanele bati kutsi bantfwana babo batihlanganisa nabobani?

¹⁴ Sita bantfwana bakho kutsi bakhetse bangani labakahle. Batali kufanele bati kutsi bantfwana babo batihlanganisa nabani nekutsi bentani. Loko kusho kutsi batali kufanele bati kutsi bantfwana babo bacoca nabani etintfweni tekuchumana kanye nase tincingweni tabo. Bantfu labatihlanganisa nebantfwana bangayitsintsa indlela bantfwana labacabanga baphindze bente ngayo.—1 Khor. 15:33.

15. Yini batali labangayifundza esibonelweni saJessie?

¹⁵ Yini batali labangayenta nangabe bangaketayelani nema-computer kanye netincingo? Lomunye babe wasePhilippines lokutsiwa nguJessie utsi: “Bekukuncane lebesikwati ngetebuchwephesha. Kodvwa loko akuzange kusivimbe kutsi secwayise bantfwana betfu ngetingoti letikhona kutebuchwephesha.” Jessie wabavumela bantfwana bakhe kutsi basebentise tebuchwephesha ngisho nobe yena bekangaketayelani nato. Utsi: “Ngakhutsata bantfwana bami kutsi basebentise tebuchwephesha kuze bafundze tilwimi, badadishe imihlangano yelibandla, futsi bafundze liBhayibheli onkhe malanga.” Nangabe nibatali, nifundzile naphindze nacoca yini nebantfwana benu ngeseluleko lesinengcondvo lesikhuluma ngekutfumelelana imilayeto kanye  nekutfumelelana titfombe kutebuchwephesha, lesitfolakala ku-jw.org^®, lesitfolakala ngaphansi kwencenye letsi “Teenagers”? Ukile yini wahlala phansi nebantfwana bakho nacoca ngema-video latsi Ngubani Lolawulako—Nguwe Nobe Tintfo Tebuchwephesha? Ne-video letsi Hlakanipha Nawusebentisa Tekuchumana? * Lama-video angaba lusito kakhulu nawufundzisa bantfwana bakho kutsi basebentise tintfo tebuchwephesha ngekuhlakanipha.—Taga 13:20.

16. Yini batali labanyenti labayentile, futsi ube yini umphumela?

¹⁶ Batali labanyenti bayaciniseka kutsi bantfwana babo bacitsa sikhatsi lesinyenti nebantfu labatababekela sibonelo lesihle ekukhonteni Nkulunkulu. Nasi sibonelo, N’Déni naBomine, labangulabashadene labaseCôte d’Ivoire, bavame kumema umbonisi wesigodzi kutsi atohlala nabo ekhaya labo. N’Déni utsi: “Loku kuyisite kakhulu indvodzana yetfu yekucala. Yacala kuba lihlahlandlela, futsi nyalo seyingumbambeli wembonisi wesigodzi.” Ungayisebentisa yini indlela lephose ifane kuze usite bantfwana bakho?

17-18. Batali kufanele bacale nini kucecesha bantfwana babo?

¹⁷ Baceceshe basebancane bantfwana bakho. Ibamihle kakhulu imiphumela nangabe batali basheshe bacale kucecesha bantfwana babo. (Taga 22:6) Cabanga ngesibonelo saThimothi, lobekahamba naPawula nakenta umsebenti wekushumayela. Make waThimothi, Yunisi, kanye nagogo wakhe Luwisi, bamcecesha ‘aseluswane.’—2 Thim. 1:5; 3:15.

¹⁸ Labanye labashadene baseCôte d’Ivoire, Jean-Claude naPeace, bakhona kukhulisa bantfwana babo labasitfupha, futsi bakhona kubasita kutsi batsandze baphindze bakhonte Jehova. Yini leyabasita baphumelela? Balandzela sibonelo saYunisi kanye naLuwisi. Batsi: “LiVi laNkulunkulu salinamatsisela kubantfwana betfu basetinswane, sacala kwenta njalo nabasandza kutalwa.”—Dut. 6:6, 7.

19. Yini ledzingekako kuze batali banamatsisele liVi laNkulunkulu kubantfwana babo?

¹⁹ Kusho kutsini kunamatsisela liVi laJehova kubantfwana bakho? ‘Kunamatsisela’  kusho “kufundzisa kanye nekukhumbuta njalo.” Kuze bente njalo, batali kufanele bacitse sikhatsi lesinyenti banebantfwana babo. Ngaletinye tikhatsi, batali bangadvumala ngenca yekutsi kufanele bahlale baphindzaphindza intfo yinye kubantfwana babo. Noma kunjalo, batali kufanele batsatse loku njengelitfuba lekusita bantfwana babo kutsi balicondze kahle liVi laNkulunkulu baphindze balisebentise ekuphileni kwabo.

20. Chaza kutsi umbhalo weTihlabelelo 127:4 ungasebenta njani ekukhuliseni bantfwana.

²⁰ Bati kahle bantfwana bakho. Tihlabelelo 127 tifananisa bantfwana nemicibisholo. (Fundza Tihlabelelo 127:4.) Njengobe imicibisholo yakhiwa ngetintfo letingafanani, futsi ingalingani ngebukhulu, kanjalo nebantfwana nabo abafani. Ngako batali kufanele bacabangisise ngendlela labatawucecesha ngayo umntfwana ngamunye. Labanye labashadene esikhatsini salamuhla eveni laka-Israyeli labaphumelele ekukhuliseni bantfwana babo lababili kutsi bakhonte Jehova batsi: “Besifundzela umntfwana ngamunye liBhayibheli.” Kuliciniso kutsi inhloko yemndeni ngamunye itawuncuma kutsi kusebentisa lendlela kuyalunga nobe kuyaphumelela yini emndenini wayo.

21. Yini batali lokufanele bayilindzele kuJehova?

²¹ Ngaletinye tikhatsi, batali bakutfola kumatima kufundzisa bantfwana babo, kodvwa bantfwana basipho lesivela kuJehova. Jehova uhlale akulungele kusita batali. Uhlale akulungele nekulalela imithantazo yebatali. Futsi uyayiphendvula lemithantazo asebentisa liBhayibheli, tincwadzi letisekelwe eBhayibhelini, tibonelo kanye neteluleko talabanye lesinabo emabandleni futsi lesebanesikhatsi babatali.

22. Nguyiphi intfo lencono kakhulu batali labangayiniketa bantfwana babo?

²² Bantfu labanyenti batsi kukhulisa umntfwana kutsatsa iminyaka lengaba ngu-20, kodvwa kuba ngumtali akupheli. Tintfo letibaluleke kakhulu batali labangatinika bantfwana babo lutsandvo, sikhatsi, kanye nekubafundzisa ngeliBhayibheli. Umntfwana ngamunye utawuba nendlela yakhe yekukwemukela loko lakufundzisiwe. Noma kunjalo, bantfwana labanyenti labakhuliswe batali labatsandza Jehova, bativa njengaJoanna Mae, longudzadze wase-Asia utsi: “Nangicabanga ngendlela batali bami labangicecesha ngayo, ngijabula kakhulu ngekutsi bangisita futsi bangifundzisa kutsi ngitsandze Jehova. Abazange banginike kuphila kuphela, kodvwa bangisita ngaba nekuphila lokujabulisako.” (Taga 23:24, 25) Tigidzi tebazalwane nabodzadze bativa ngendlela lefanako.