1-2. (a) Baphostoli baJesu labatsatfu bayalwa kutsi benteni, futsi benta njani? (b) Sitawucoca ngani kulesihloko?

NGEMUVA kweLiphasika langa-32 C.E., umphostoli Phetro, Jakobe naJohane babona umbono lomangalisako. Kungenteka bekusetulu eNtsabeni iHemoni, ngesikhatsi Jesu ashintja embikwabo. “Buso bakhe bakhanya njengelilanga, netingubo takhe tangetulu takhanya bha!” (Mat. 17:1-4) Ngasekugcineni kwalombono, labaphostoli beva Nkulunkulu atsi: “Lena yiNdvodzana yami letsandzekako nalengiyemukele. Yilaleleni.” (Mat. 17:5) Indlela labaphostoli labaphila ngayo yakhombisa kutsi bamlalela Jesu. Natsi sifuna kubalingisa.

² Esihlokweni lesendlulile, sifundzile kutsi kulalela livi laJesu kusho kuyekela kwenta letinye tintfo. Kulesihloko, sitawucoca ngetintfo letimbili Jesu latsi kufanele sitente.

3. Ngekusho kwaMatewu 7:13, 14, yini lokufanele siyente?

³ Fundza Matewu 7:13, 14. Naka kutsi Jesu ukhuluma ngemasango lamabili laholela etindleleni letingafani, yinye “ivulekile”, lelenye “yincane.” Kute indlela yesitsatfu. Kufanele sitikhetsele kutsi sifuna kuhamba ngayiphi indlela. Lesi sincumo lesibalulekile lokufanele sisente, ngobe kutsi siyakutfola yini kuphila lokuphakadze kutawuya ngesincumo lesisentile.

4. Ungayichaza njani indlela ‘levulekile’?

 ⁴ Kufanele sihlale siwukhumbula umehluko waletindlela letimbili. Bantfu labanyenti bahamba ngalendlela ‘levulekile’ ngobe kulula kuhamba kuyo. Lokubuhlungu kutsi labanyenti bakhetsa kuchubeka bahamba ngalendlela futsi bente njengalabanye labahamba kuyo. Abacondzi kutsi Develi wetama kwenta bantfu bahambe ngalendlela, nekutsi lendlela yakhe iholela ekufeni.—1 Khor. 6:9, 10; 1 Joh. 5:19.

5. Yini labanye labayentile kuze batfole lendlela ‘lencane’ futsi bachubeke bahamba ngayo?

⁵ Ngalokungafani nalendlela ‘levulekile,’ lelenye indlela “yincane,” futsi Jesu watsi bambalwa labayitfolako. Kungani? Lesikunakako kutsi evesini lelilandzelako, Jesu wecwayisa balandzeli bakhe ngebaphrofethi bemanga. (Mat. 7:15) Labanye bantfu batsi kunetinkhulungwane tetinkholo, futsi letinyenti tato titsi tifundzisa liciniso. Ngenca yekutsi kunetinkholo letinyenti, bantfu labanyenti badvumatekile nobe badidekile futsi abetami nekufuna indlela leya ekuphileni. Kodvwa lendlela iyatfolakala. Jesu watsi: “Nanigcina emavi ami, nisuke nibafundzi bami sibili. Nitawulati liciniso, futsi liciniso litanikhulula.” (Joh. 8:31, 32) Wente kahle ngekungalandzeli bantfu labanyenti; kunaloko wafuna liciniso. Ucale kudadisha liVi laNkulunkulu kuze utfole loko lakulindzele kuwe, futsi walalela loko lokufundziswa nguJesu. Emkhatsini waletinye tintfo lewutifundzile, kutsi Jehova ufuna ungakwemukeli loko lokufundziswa yinkholo yemanga, futsi ungahlanganyeli emikhosini lesuselwe enkholweni yemanga. Uphindze wafundza kutsi kwenta loko Jehova lakulindzele nekuyekela imikhuba langayitsandzi kungaba matima. (Mat. 10:34-36) Kungenteka akukabi melula kwenta lolushintjo. Kodvwa wetamile kulwenta ngobe uyamtsandza Babe wakho wasezulwini futsi ufuna kumjabulisa. Naye ujabula kakhulu ngawe!—Taga 27:11.

6. Ngekusho kweTihlabelelo 119:9, 10, 45, na-133, yini lengasisita kutsi sichubeke sihamba ngalendlela lencane?

⁶ Nasesicale kuhamba ngendlela lencane, yini lengasisita kutsi sichubeke sihamba ngayo? Cabanga nganasi sibonelo. Tinsimbi (guardrail) letiba seceleni kwemgwaco lomncane tivikela umshayeli nemoto yakhe. Letinsimbi tisita bashayeli kutsi bangaphumi emgwacweni. Bashayeli labanyenti angeke bakhale ngekutsi letinsimbi tibenta bangahambi ngekukhululeka kulomgwaco. Timiso taJehova letiseBhayibhelini tifana naletinsimbi. Tentelwe kusisita sichubeke sihamba kulendlela lencane.—Fundza Tihlabelelo 119:9, 10, 45, 133.

7. Labasebasha kufanele bayitsatse njani lendlela lencane?

⁷ Nine labasha, nihle niva shengatsi timiso taJehova tinivimbela kutsi nente tintfo lenitifunako yini? Sathane ufuna nicabange kanjalo. Ufuna ninake loko lokwentiwa ngulabo labahamba endleleni levulekile, nibone shengatsi bayakujabulela kuphila. Angahle asebentise loko lokubona kwentiwa ngulofundza nabo esikolweni, nobe loko lokubona ku-Internet kuze akwente uve shengatsi uyashiyeka. Sathane ufuna ucabange kutsi timiso taJehova tikuvimbela kutsi ukujabulele kuphila. * Kodvwa khumbula naku: Sathane  akafuni kutsi labo labahamba endleleni yakhe babone kutsi lendlela ibaholela kuphi. Kodvwa Jehova ukwente kwacaca kutsi yini letawutfolwa ngulabo labahamba ngalendlela leya ekuphileni.—Hla. 37:29; Isa. 35:5, 6; 65:21-23.

8. Yini labasha labangayifundza esibonelweni sa-Olaf?

⁸ Cabanga ngalongakufundza kulokwenteka kumzalwane losemusha lokutsiwa ngu-Olaf. * Lafundza nabo betama kumcindzetela kutsi atiphatse kabi ngekwelicansi. Ngesikhatsi abachazela kutsi BoFakazi BaJehova baphila ngetimiso letiseBhayibhelini tekutiphatsa, lamanye emantfombatane eklasini lakhe atsatsa loko njengelitfuba lekumcindzetela kakhulu kutsi alale nawo. Kodvwa Olaf wachubeka atiphatsa kahle. Kunalenye inkinga laphindze wabhekana nayo. Olaf utsi: “Bothishela bami bebatsi angiye enyuvesi kuze labanye bantfu batongihlonipha. Bebangitjela kutsi nangingayi angeke ngize ngiphumelele ekuphileni.” Olaf wasitwa  yini kutsi ancobe lenkinga? Utsi: “Ngasondzelana kakhulu nalabo bebasebandleni. Baba njengemndeni kimi. Ngabese ngitinika sikhatsi lesinyenti sekudadisha liBhayibheli. Njengobe bengitinika sikhatsi sekulidadisha, ngaciniseka kakhulu kutsi leli liciniso. Ngako ngatimisela kuchubeka ngikhonta Jehova.”

9. Yini lokufanele yentiwe ngulabo labafuna kuchubeka bahamba kulendlela lencane?

⁹ Sathane ufuna kutsi uphume kulendlela leya ekuphileni. Ufuna utihlanganise nebantfu labanyenti labahamba endleleni levulekile “leya ekubhujisweni.” (Mat. 7:13) Nanobe kunjalo, sitawuhlala endleleni lencane nasichubeka silalela Jesu futsi siciniseka kutsi iyasivikela. Nyalo asesicoce ngalokunye Jesu latsi kufanele sikwente.

10. Ngekusho kwaMatewu 5:23, 24, yini Jesu latsi kufanele siyente?

¹⁰ Fundza Matewu 5:23, 24. Jesu wakhuluma ngalebekubaluleke kakhulu kumaJuda lebekamlalele. Ase ucabange lotsite sekasethempelini futsi sekalungela kuniketa umphristi umhlatjelo wakhe. Nangabe ngaleso sikhatsi akhumbula kutsi kukhona lamphetse kabi, bekufanele awushiye lapho lomhlatjelo ‘ahambe’ aye kuye. Kungani? Kukhona yini lebekubaluke kakhulu kuye kwendlula kukhonta Jehova? Jesu watsi: “Cale wakhe kuthula naye.”

11. Chaza tintfo letentiwa nguJakobe kuze akhe kuthula na-Esawu.

¹¹ Singafundza tifundvo letibalulekile mayelana nekwakha kuthula, ngekubuka loko lokwenteka ekuphileni kwaJakobe. Ngemuva kwekutsi sekuphele iminyaka lengaba ngu-20 ashiya live latalelwa kulo, Nkulunkulu wasebentisa ingilosi, wamtjela kutsi abuyele emuva. (Gen. 31:11, 13, 38) Kodvwa bekunenkinga. Umnakabo lomdzala, lokungu-Esawu, bekafuna kumbulala. (Gen. 27:41) Jakobe “wesaba kakhulu futsi wakhatsateka” ngekutsi kungenteka umnakabo bekasolo ambambele ligcubu. (Gen. 32:7) Yini Jakobe layenta kuze akhe kuthula nemnakabo? Kwekucala, wathantaza kuJehova ngalendzaba. Wabese utfumela sipho ku-Esawu. (Gen. 32:9-15) Ekugcineni, ngesikhatsi bahlangana, Jakobe wakhombisa kutsi uyamhlonipha Esawu. Waguca embikwa-Esawu, hhayi kanye nobe kabili, kodvwa tikhatsi letingu-7! Ngenca yekutsi Jakobe bekatfobekile futsi amhlonipha umnakabo, wakha kuthula naye.—Gen. 33:3, 4.

12. Yini lesiyifundza esibonelweni saJakobe?

¹² Kukhona lesikufundzako endleleni Jakobe lalungiselela ngayo kuyohlangana nemnakabo, naloko lakwenta nabahlangana. Watfobeka, wacela Jehova kutsi amsite. Wabese wenta loko lebekakuthantazele ngekutsi ente konkhe lebekangakwenta kuze akhe kuthula nemnakabo. Ngesikhatsi bahlangana, Jakobe akazange aphikisane na-Esawu ngekutsi ngubani lobekente kahle nalobekente kabi. Umgomo waJakobe bekukwakha kuthula nemnakabo. Singasilingisa njani sibonelo saJakobe?

13-14. Yini lokufanele siyente nangabe simphetse kabi lesikholwa naye?

¹³ Tsine lesihamba endleleni leya ekuphileni, sifuna kuba nekuthula nebazalwane betfu. (Rom. 12:18) Yini lokufanele siyente nangabe sibona kutsi simphetse kabi lesikholwa naye? NjengaJakobe, kufanele sithantaze kuJehova. Singamcela kutsi asisite sakhe kuthula nemzalwane wetfu.

 ¹⁴ Kufanele sitinike sikhatsi sekucabanga ngaloko lesikwentako. Singatibuta imibuto lenjenganayi: ‘Ngitimisele yini kuvuma kutsi ngente liphutsa, ngicolise futsi ngakhe kuthula? Jehova naJesu batawutiva njani nakungimi lengiya kumzalwane wami nobe dzadze ngiyokwakha kuthula?’ Timphendvulo talemibuto tingasisita kutsi silalele Jesu futsi sititfobe siye kumzalwane wetfu nobe dzadze kuze sakhe kuthula naye. Nasenta njalo sitawube silandzela sibonelo saJakobe.

15. Kusebentisa simiso lesiKubase-Efesu 4:2, 3 kungasisita njani kutsi sakhe kuthula nemzalwane wetfu?

¹⁵ Cabanga kutsi bekungentekani kube Jakobe akatitfobanga nakahlangana nemnakabo. Kungenteka bekungeke kube nemiphumela lemihle. Nangabe siya kumzalwane wetfu kuze siyokwakha kuthula naye, kufanele sititfobe. (Fundza Kubase-Efesu 4:2, 3.) Taga 18:19 titsi: “Kubohlisa intfukutselo yemngani lowoniwe kumatima kakhulu kunekuncoba lidolobha lelivikelekile, futsi imibango ingehlukanisa bantfu njengemagede lanemishudo yensimbi.” Kucolisa kungasisita kutsi sikhone kungena ‘kulamagede lanemishudo yensimbi.’

16. Yini lokufanele sicabange ngayo, futsi kungani?

¹⁶ Kufanele sicabangisise ngaloko lesitawukusho kumzalwane wetfu nekutsi sitawukusho njani. Nasesilungele, kufanele siye kuye sinemgomo wekutsi sifuna kuphindze sibe nebuhlobo lobuhle naye. Ekucaleni, angahle asho tintfo letingasiphatsi kahle. Kungenteka sitfukutsele nobe setame kukhombisa kutsi kute lokubi lesikwentile, kodvwa kwenta loko kutasisita yini kutsi sakhe kuthula naye? Angeke. Khumbula kutsi kwakha kuthula nemzalwane wakho kubaluleke kakhulu kunekubona kutsi ngubani lowente kahle nalowente liphutsa.—1 Khor. 6:7.

17. Yini longayifundza esibonelweni saGilbert?

¹⁷ Umzalwane lokutsiwa nguGilbert wenta konkhe langakwenta kuze akhe kuthula. Utsi: “Benginetinkinga Ietinyenti nalelinye lilunga lemndeni. Kwaphela iminyaka lengetulu kwalemibili ngetama kukhuluma nalo kuze siphindze sibe nebuhlobo lobuhle.” Yini lenye leyentiwa nguGilbert? “Ngaphambi kwekutsi ngikhulume nalelilunga lemndeni, bengithantaza futsi ngilungise ingcondvo yami kuze ngingatfukutseli nalikhuluma kabi. Bekufanele ngikulungele  kucolela. Ngafundza kutsi bekungakafaneli ngetame kukhombisa kutsi akusimi lowente liphutsa, futsi ngacondza kutsi lokubalulekile kutsi ngakhe kuthula.” Waba yini umphumela? Gilbert utsi: “Lamuhla ngijabulile ngobe nginebuhlobo lobuhle nawo onkhe emalunga emndeni wami.”

18-19. Nakunalotsite lesimphetse kabi, yini lokufanele sitimisele kuyenta, futsi kungani?

¹⁸ Ngako yini lokufanele utimisele kuyenta nawubona kutsi umphetse kabi lokholwa naye? Lalela seluleko saJesu sekwakha kuthula. Khuluma naJehova ngalendzaba futsi wetsembele emoyeni longcwele kutsi utakusita wakhe kuthula. Nawenta njalo, utawujabula futsi utawube ukhombisa kutsi uyamlalela Jesu.—Mat. 5:9.

¹⁹ Siyajabula ngekutsi Jehova usicondzisa asebentisa Jesu Khristu ‘loyinhloko yelibandla.’ (Ef. 5:23) Shengatsi singatimisela ‘kumlalela,’ njengobe kwenta umphostoli Phetro, Jakobe naJohane. (Mat. 17:5) Sesicocile ngekutsi loko singakwenta ngekutsi sakhe kuthula nemKhristu lesimphetse kabi. Nasenta njalo, futsi sichubeka sihamba ngalendlela lencane leya ekuphileni, sitawutfola tibusiso letinyenti nyalo futsi sitawuchubeka sijabula nasesikhatsini lesitako.