1-2. Ngekusho kwaMatewu 5:11, kufanele sititsatse njani tinkinga?

JESU wetsembisa balandzeli bakhe kutsi bebatawujabula sibili. Waphindze watjela labo labamtsandzako kutsi bebatawubhekana netinkinga. (Mat. 10:22, 23; Luk. 6:20-23) Siyajabula ngekuba balandzeli baKhristu. Kodvwa sitiva njani nangabe umndeni wetfu wetama kusiyekelisa kukhonta Jehova, nangabe hulumende asiphikisa, nobe nangabe lesisebenta nabo nobe lesifundza nabo betama kusentisa intfo lembi? Nasicabanga ngaletintfo singase sikhatsateke.

² Bantfu labanyenti abacabangi kutsi singajabula nasihlushwa. Kodvwa liVi laNkulunkulu lisitjela kutsi sente njalo. Nasi sibonelo, umfundzi Jakobe wabhala kutsi, esikhundleni sekutsi sidvumateke nasibhekene netinkinga, kufanele sijabule. (Jak. 1:2, 12) NaJesu watsi kufanele sijabule nangabe siphatfwa kabi. (Fundza Matewu 5:11.) Singachubeka njani sijabula ngisho nobe sinetinkinga? Singafundza lokunyenti ngekucabanga ngencwadzi Jakobe layibhalela emaKhristu ekucala. Asesicale sicoce ngebulukhuni lamaKhristu labhekana nabo.

3. Yini leyenteka ngekushesha nje ngemuva kwekutsi Jakobe abe ngumfundzi waJesu?

³ Ngekushesha nje ngemuva kwekutsi Jakobe abe ngumfundzi waJesu, emaKhristu aseJerusalema aphatfwa kabi. (Imis. 1:14; 5:17, 18) Ngemuva kwekubulawa kwemfundzi Stefano, emaKhristu lamanyenti alishiya lelidolobha futsi “asakateleka etifundzeni taseJudiya naseSamariya, ngemuva kwaloko abalekela naseSiphrosi nase-Antiyokhi.” (Imis. 7:58–8:1; 11:19) Labafundzi babhekana netinkinga letinyenti.  Kodvwa bachubeka bashumayela tindzaba letimnandzi ngekutimisela nobe ngukuphi lapho bebahamba khona, futsi kwasungulwa emabandla etindzaweni letinyenti. (1 Phet. 1:1) Kodvwa ngemuva kwaloko, kwaba netikhatsi letinyenti letimatima kakhulu.

4. Ngutiphi letinye tinkinga emaKhristu ekucala lokwadzingeka kutsi atibeketelele?

⁴ EmaKhristu ekucala kwadzingeka kutsi abeketelele tinkinga letinyenti. Nasi sibonelo, cishe ngemnyaka wa-50 C.E., umbusi waseRoma Klawudiyuse wakhipha umyalo wekutsi onkhe emaJuda aphume eRoma. Ngako emaJuda lebekangemaKhristu aphoceleleka kutsi ashiye emakhaya awo futsi aye kuletinye tindzawo. (Imis. 18:1-3) Cishe nga-61 C.E., umphostoli Pawula wabhala kutsi bantfu betfuka bazalwane bakhe labanyenti embikwalabanye bantfu, babafaka emajele futsi beba netintfo tabo. (Heb. 10:32-34) Njengalabanye bantfu, emaKhristu bekaphuyile futsi agula.—Rom. 15:26; Fil. 2:25-27.

5. Ngumiphi imibuto lesitayiphendvula?

⁵ Ngaphambi kwemnyaka wa-62 C.E., ngesikhatsi Jakobe abhala incwadzi yakhe, bekatati kahle tinkinga bazalwane bakhe nabodzadze lebebanato. Jehova wacondzisa Jakobe kutsi abhalele lamaKhristu awanike ticondziso lebetitawasita kutsi achubeke ajabula ngisho nobe anetinkinga. Asesicoce ngalencwadzi yaJakobe futsi siphendvule lemibuto lelandzelako: Nguyiphi lenjabulo Jakobe labhala ngayo? Yini lengenta umKhristu angasajabuli?  Kuhlakanipha, kukholwa nesibindzi kungasisita njani kutsi sihlale sijabula ngisho nobe sinetinkinga?

6. Ngekusho kwaLukha 6:22, 23, kungani umKhristu angajabula ngisho nobe anetinkinga?

⁶ Bantfu bangase bacabange kutsi bangajabula kuphela nangabe baphilile emtimbeni, banemali lenyenti futsi banemndeni lojabulako. Kodvwa injabulo Jakobe labhala ngayo isitselo semoya waNkulunkulu futsi isenta sijabule ngisho nobe kwentekani ekuphileni kwetfu. (Gal. 5:22) UmKhristu angajabula mbamba nangabe ati kutsi ujabulisa Jehova futsi ulandzela sibonelo saJesu. (Fundza Lukha 6:22, 23; Khol. 1:10, 11) Njengelilangabi lelivutsa esibaneni, nenjabulo ivutsa ngekhatsi enhlitiyweni yemKhristu. Lenjabulo ayipheli ngisho nobe sigula nobe sinemali lencane. Ayipheli ngisho nobe bantfu basiphikisa, lokufaka ekhatsi netihlobo tetfu. Sijabula kakhulu nangabe bantfu betama kusicedzela injabulo. Letinkinga lesibhekana nato ngenca yekukholwa kwetfu tiyasicinisekisa kutsi sibafundzi baKhristu beliciniso. (Mat. 10:22; 24:9; Joh. 15:20) Kungako Jakobe abhala watsi: “Bazalwane bami nibojabula nanehlelwa tilingo letahlukahlukene.”—Jak. 1:2.

7-8. Kungani kukholwa kwetfu kucina nangabe sivivinywa?

⁷ Jakobe uchaza lesinye sizatfu lesenta emaKhristu akhone kubeketelela tinkinga. Utsi: “Nangabe kukholwa kwenu kuvivinywa ngalendlela nitawubese nifundza kucinisela.” (Jak. 1:3) Tinkinga tingafananiswa nemlilo losetjentiswa kuze kwakhiwe intfo letsite ngensimbi. Naseyishisiwe lensimbi yaphola ibese iyacina. Ngendlela lefanako nasibeketelela tinkinga, kukholwa kwetfu kuyacina. Kungako Jakobe abhala watsi: “Vumelani kucinisela kucedzele umsebenti wako, kuze niphelele niphile kuto tonkhe tintfo.” (Jak. 1:4) Nasibona kutsi tinkinga tetfu tenta kukholwa kwetfu kucine, sitawutibeketelela futsi sijabule.

⁸ Encwadzini yakhe, Jakobe ukhuluma ngaletinye tinkinga letingasenta silahlekelwe yinjabulo. Ngutiphi letinkinga, futsi singatincoba kanjani?

9. Kungani sidzinga kuhlakanipha?

⁹ Lokungasenta silahlekelwe yinjabulo yetfu: Nangabe singakwati loko lokufanele sikwente. Nangabe sinetinkinga sifuna kucela lusito kuJehova kuze sikhone kwenta tincumo letitamjabulisa, letitawusita bazalwane nabodzadzewetfu futsi letitasisita kutsi sihlale sitsembekile kuJehova. (Jer. 10:23) Sidzinga kuhlakanipha kuze sikwati loko lokudzingeka sikwente naloko lokufanele sikusho kulabo labasiphikisako. Singase  sidvumateke nangabe singakwati loko lesingakwenta, futsi singasheshe silahlekelwe yinjabulo.

10. Yini Jakobe 1:5 lasitjela kutsi siyente kuze sihlakaniphe ?

¹⁰ Lesingakwenta kuze sihlale sijabula: Cela kuhlakanipha kuJehova. Nangabe sifuna kujabula ngisho nobe sibeketelela tinkinga, kufanele sicele kuJehova ngemthantazo kutsi asiphe kuhlakanipha lesikudzingako kuze sente tincumo letikahle. (Fundza Jakobe 1:5.) Yini lesingayenta nasiva shengatsi Jehova akayiphendvuli ngekushesha imithantazo yetfu? Jakobe utsi kufanele ‘sichubeke sikucela’ kuNkulunkulu. Jehova akacansuki nasichubeka sicela kuhlakanipha kuye. Angeke asitfukutselele. Nasithantaza, Babe wetfu losezulwini ‘usipha ngesandla lesivulekile’ kuhlakanipha kuze sibeketelele tinkinga tetfu. (Hla. 25:12, 13) Uyatibona tinkinga lesinato, futsi uva buhlungu nasihlupheka, uyafuna nekusisita. Loko kusenta sijabule! Kodvwa Jehova usipha njani kuhlakanipha?

11. Yini lenye lekufanele siyente kuze sitfole kuhlakanipha?

¹¹ Jehova usipha kuhlakanipha asebentisa liVi lakhe. (Taga 2:6) Kuze sitfole kuhlakanipha, kufanele sidadishe liVi laNkulunkulu netincwadzi tetfu. Kodvwa kufanele sente lokungetulu kwekumane nje sidadishe. Kufanele sikwente loko Nkulunkulu lasitjela kona. Jakobe wabhala watsi: “Banini benti belivi ningabi nje ngulabalivako kuphela.” (Jak. 1:22) Nasisebentisa seluleko saNkulunkulu, siba nekuthula, sicabangele futsi sibe nemusa. (Jak. 3:17) Lobuntfu busenta sibeketelele nobe ngabe ngutiphi tinkinga futsi singalahlekelwa yinjabulo yetfu.

12. Kubaluleke ngani kutsi silati kahle liBhayibheli?

¹² LiVi laNkulunkulu lifana nesibuko, lisisita sibone lapho kudzingeka silungise khona nekutsi singalungisa kanjani. (Jak. 1: 23-25) Nasi sibonelo, ngemuva kwekutsi sifundze liBhayibheli, singase sibone kutsi kudzingeka silawule intfukutselo yetfu. Ngekusitwa nguJehova sifundza kuba nemoya lophansi nangabe bantfu nobe tinkinga tisitfukutselisa. Ngesizatfu sekutsi sinemoya lophansi, siyakhona kutenta kahle tintfo ngisho nobe sinetinkinga. Siyakhona kucabanga kahle futsi sente tincumo letikahle. (Jak. 3:13) Kubaluleke kakhulu kutsi silati kahle liBhayibheli!

13. Kungani kufanele sifundze ngetibonelo tebantfu labaseBhayibhelini?

¹³ Ngaletinye tikhatsi senta liphutsa kucala ngaphambi kwekutsi sifundze ngaloko lokungakafaneli sikwente. Kodvwa lena yindlela lebuhlungu yekufundza. Indlela lencono yekutfola kuhlakanipha kufundza kulokuhle lokwentiwa ngulabanye futsi ufundze nasemaphutseni labawenta. Kungako Jakobe asikhutsata kutsi sifundze etibonelweni tebantfu labaseBhayibhelini njenga-Abrahama, Rahabi, Jobe, na-Elija. (Jak. 2:21-26; 5:10, 11, 17, 18) Letikhonti taJehova letetsembekile takhona kubeketelela tinkinga lebetingatenta kutsi tingajabuli. Tibonelo tato tekwetsembeka tikhombisa kutsi Jehova angasisita natsi kutsi sente lokufanako.

14-15. Kungani kufanele siciniseke ngaloko lesikukholelwako?

¹⁴ Lokungasenta silahlekelwe yinjabulo yetfu: Nangabe singaciniseki ngaloko lesikukholelwako. Ngaletinye tikhatsi singase singakucondzi loko lokuseVini laNkulunkulu. Kungenteka Jehova angayiphendvuli imithantazo yetfu ngendlela lebesifise ngayo. Loko kungasenta singabate kakhulu. Kungaciniseki kunganciphisa kukholwa kwetfu futsi kulimate nebuhlobo lobuhle lesinabo naJehova. (Jak. 1:7, 8) Kungaphindze kusente silahlekelwe litsemba lesinalo ngelikusasa.

¹⁵ Umphostoli Pawula wafananisa litsemba lesinalo ngelikusasa nelihhuka lemkhumbi. (Heb. 6:19) Lihhuka liyawusimisa umkhumbi nakunesiphepho futsi liwuvikele kutsi ungashayisi ematjeni. Kodvwa lelihhuka lisebenta kahle nangabe liketane lelihlangisa lelihhuka nalomkhumbi licinile. Njengobe kutfomba kuligugisa liketane, nekungaciniseki kuyakunciphisa kukholwa kwetfu. Nakanetinkinga, umuntfu longaciniseki angalahlekelwa kukholwa kutsi Jehova utatigcwalisa tetsembiso takhe. Nasite kukholwa, sibabete nelitsemba. Njengobe Jakobe asho, umuntfu longaciniseki “ufana neligagasi laselwandle lelipheshulwa ngumoya liyiswa lena nalena.” (Jak. 1:6) Umuntfu lonjalo angeke ajabule.

16. Yini lesingayenta nangabe singaciniseki?

¹⁶ Lesingakwenta kuze sihlale sijabula: Susa kungaciniseki lonako; cinisa kukholwa kwakho. Tsatsa sinyatselo ngekushesha. Ngesikhatsi kusaphila umphrofethi Elija bantfu baNkulunkulu bacala kungaciniseki ngaloko lebebakukholelwa. Elija wabatjela watsi: “Kuyawuze kube nini solo ningasitsatsi sincumo? Nangabe Jehova anguNkulunkulu weliciniso landzelani yena; kodvwa nangabe kunguBhali, landzelani yena!” (1 Khos. 18:21) Loku kuliciniso nalamuhla. Kudzingeka sicwaninge kuze siciniseke kutsi Jehova unguNkulunkulu, liBhayibheli liliVi lakhe nekutsi BoFakazi BaJehova babantfu bakhe. (1 Thes. 5:21) Loko kutawucedza kungaciniseki lesinako futsi kucinise kukholwa kwetfu. Nangabe sidzinga lusito kuze sicedze kungaciniseki lesinako, singacela labadzala belibandla kutsi basisite. Kufanele sitsatse sinyatselo ngekushesha nangabe sifuna kuhlala sijabulile ekukhonteni Jehova!

17. Yini letakwenteka nasite sibindzi?

¹⁷ Lokungasenta silahlekelwe yinjabulo yetfu: Kucindzeteleka. LiVi laNkulunkulu litsi:  “Nangabe ucindzetelekile ngesikhatsi sebumatima, emandla akho atawuba mancane.” (Taga 24:10) Ligama lesiHebheru lelihunyushwe ngekutsi “kucindzeteleka” lingasho “kubabete sibindzi.” Nawute sibindzi, utawusheshe ulahlekelwe yinjabulo yakho.

18. Kusho kutsini kucinisela?

¹⁸ Lesingakwenta kuze sihlale sijabula: Tsembela kuJehova kuze akuphe sibindzi sekucinisela. Sidzinga sibindzi kuze sikhone kubeketelela tinkinga. (Jak. 5:11) Leligama lelasetjentiswa nguJakobe lelitsi “kucinisela” lisenta sicabange ngemuntfu lochubeka eme ndzawonye endzaweni letsite. Singase sicabange ngelisotja lelinesibindzi lelime endzaweni yalo futsi lelingabaleki ngisho nobe sitsa salo silihlasela.

19. Yini lesingayifundza esibonelweni semphostoli Pawula?

¹⁹ Umphostoli Pawula usibekela sibonelo lesihle sekuba nesibindzi nesekucinisela. Ngaletinye tikhatsi bekaphelelwa ngemandla, kodvwa wakhona kucinisela ngobe beketsembele kuJehova kuze amnike emandla lawadzingako. (2 Khor. 12:8-10; Fil. 4:13) Natsi singaba nemandla nesibindzi lesifanako nangabe sititfoba futsi sivuma kutsi siyakudzinga kusitwa nguJehova.—Jak. 4:10.

20-21. Yini lesingaciniseka ngayo?

²⁰ Singaciniseka kutsi letinkinga lesinato atisito sijeziso lesivela kuJehova. Jakobe uyasicinisekisa: “Nangabe umuntfu alingwa, angabosho kutsi: ‘Ngilingwa nguNkulunkulu.’ Ngobe Nkulunkulu ngeke alingwe ngalokubi kantsi naye akalingi muntfu.” (Jak. 1:13) Nangabe siciniseka ngaloko, sisondzelana kakhulu naBabe wetfu lositsandzako.—Jak. 4:8.

²¹ Jehova “akagucuki nobe ashintje.” (Jak. 1:17) Wawasita emaKhristu ekucala nakanetinkinga, futsi natsi utasisita lamuhla. Cela Jehova akuphe kuhlakanipha, kukholwa, nesibindzi. Utayiphendvula imithantazo yakho. Ngako utawuciniseka kutsi utakusita ujabule ngisho unetinkinga!