1-2. (a) Kungani singalindzela kutsi Jesu asibekele sibonelo lesimelula sekukhumbula kufa kwakhe? (b) Ngubuphi buntfu baJesu lesitawucoca ngabo?

UNGAKHONA yini kuchaza lokwenteka minyaka yonkhe ngeSikhumbuto sekufa kwaJesu? Asingabati kutsi labanyenti betfu bayakukhumbula lokwenteka ngeSidlo SeNkhosi Sakusihlwa. Kungani? Kungobe lomkhosi awusiyo inkimbinkimbi. Nanobe kunjalo, ubaluleke kakhulu. Ngako singatibuta: ‘Kungani lomkhosi ungasiyo inkimbinkimbi?’

² Ngesikhatsi ashumayela emhlabeni, Jesu bekatiwa kakhulu ngekutsi ufundzisa emaciniso labalulekile ngendlela lemelula, lecacile futsi lesheshe icondzakale. (Mat. 7:28, 29) Ngendlela lefanako wasiniketa sibonelo sendlela lemelula nalebalulekile yekukhumbula * kufa kwakhe. Asesicabangisise ngemkhosi weSikhumbuto kanye naletinye tintfo Jesu latisho nalatenta. Sitawubona nekutsi Jesu bekatfobekile, anesibindzi, futsi abatsandza bantfu. Sitawuphindze sifundze nangekutsi singamlingisa kanjani.

3. Ngekusho kwaMatewu 26:26-28, besimelula ngayiphi indlela sidlo seSikhumbuto Jesu lasicalisa, futsi sinkhwa neliwayini lalisebentisa kumelelani?

³ Jesu wasungula Sikhumbuto sekufa kwakhe anebaphostoli bakhe labatsembekile labalishumi nakunye. Watsatsa kudla lobekusele ngeliPhasika futsi wenta lesikhumbuto saba melula. (Fundza Matewu 26:26-28.) Wasebentisa sinkhwa  lebesite imvubelo kanye neliwayini lebelivele likhona kuphela. Jesu watjela baphostoli bakhe kutsi letintfo letimbili letisisekelo tisho umtimba wakhe lote sono kanye nengati yakhe futsi bekatawunikela ngako ngenca yabo. Kungenteka baphostoli bakhe abazange bamangale kutsi lomkhosi lobalulekile bewungasiyo inkimbinkimbi. Kungani?

4. Seluleko Jesu lasiniketa Mata sisisita njani sicondze kutsi kungani Jesu enta umkhosi weSikhumbuto waba melula?

⁴ Cabanga ngalokwenteka kusesele tinyanga letimbalwa. Ngemnyaka wesitsatfu Jesu enta umsebenti wekushumayela waya ekhaya lebangani bakhe labakhulu—boLazaro, Mata, kanye naMariya. Basehleti Jesu wacala kushumayela. Mata bekakhona kodvwa bekamatasa alungiselela sivakashi sabo lesibalulekile siphihli sekudla. Nakabona loko, ngemusa Jesu walungisa indlela Mata bekacabanga ngayo, futsi wamsita wabona kutsi kudla lokunyenti akukabaluleki ngaso sonkhe sikhatsi. (Luk. 10:40-42) Ngekuhamba kwesikhatsi, futsi sekusele ema-awa lambalwa kutsi abetselwe, Jesu wasisebentisa seluleko labesinikete Mata. Waciniseka kutsi sidlo seSikhumbuto besimelula. Loko kusitjelani ngaJesu?

5. Umkhosi weSikhumbuto lomelula usikhombisa kutsi Jesu ungumuntfu lonjani, futsi loko kuvumelana njani naFiliphi 2:5-8?

⁵ Jesu bekatfobekile kuko konkhe labekwenta nalabekusho. Ngako akumangalisi kutsi wakhombisa kutfobeka lokukhulu ngebusuku bakhe bekugcina asemhlabeni. (Mat. 11:29) Bekati kutsi madvutane bekatawukhokha inhlawulo lebaluleke kakhulu emlandvweni webantfu, nekutsi Jehova bekatamvusa amnikete sikhundla sekuba yinkhosi ezulwini. Ngisho noma bekati kutsi utawuba yinkhosi, akazange afune kunakwa ngalokungenasidzingo ngekutsi afune kutsi kwentiwe umkhosi loyinkimbinkimbi wekukhumbula kufa kwakhe. Esikhundleni saloko, watjela bafundzi bakhe kutsi kufanele bamkhumbule kanye ngemnyaka ngekwenta sidlo lesimelula. (Joh. 13:15; 1 Khor. 11:23-25) Loko bekufaneleka futsi kukhombisa kutsi Jesu utfobekile. Kuyasijabulisa kutsi kutfobeka kubuntfu lobuhamba embili beNkhosi yetfu yasezulwini.—Fundza Filiphi 2:5-8.

6. Singakhombisa njani kutsi sitfobeke njengaJesu nangabe silingwa?

⁶ Singakulingisa njani kutfobeka kwaJesu? Ngekutsi sinake kakhulu tidzingo talabanye kunetetfu. (Fil. 2:3, 4) Cabanga ngebusuku bekugcina Jesu alapha emhlabeni. Jesu bekati kutsi masinyane bekatakufa kabuhlungu; nanobe kunjalo, bekakhatsateke kakhulu ngebaphostoli bakhe  labatsembekile, lebebatawulila ngekufa kwakhe. Ngako ngebusuku bekugcina wabayala, wabakhutsata futsi wabacinisekisa. (Joh. 14:25-31) Ngekutfobeka, Jesu wakhombisa kutsi uyikhatsalela kakhulu inhlalakahle yalabanye kuneyakhe. Leso sibonelo lesihle kakhulu lasibekela sona.

7. Ngemuva kwekucalisa Sidlo SeNkhosi Sakusihlwa, Jesu wakhombisa njani kutsi unesibindzi?

⁷ Ngemuva kwekutsi Jesu acalise Sidlo SeNkhosi Sakusihlwa, wakhombisa kuba nesibindzi mbamba. Kanjani? Jesu wemukela kutsi kwenteke intsandvo yaBabe wakhe ngisho noma bekati kutsi batambeka licala lekuhlambalata futsi bambulale. (Mat. 26:65, 66; Luk. 22:41, 42) Jesu wachubeka etsembekile kute angcwelise ligama laJehova, amelele bukhosi baNkulunkulu, aphindze avulele bantfu labaphendvukako indlela yekutfola kuphila lokuphakadze. Ngesikhatsi lesifanako, Jesu wenta balandzeli bakhe bakulungela loko lebebatawuhlangabetana nako masinyane.

8. (a) Yini Jesu layitjela baphostoli bakhe labetsembekile? (b) Nasekuphele iminyaka leminyenti Jesu afile, balandzeli bakhe basilandzela njani sibonelo sakhe sekuba nesibindzi?

⁸ Jesu wakhombisa kuba nesibindzi ngekutsi anganaki tintfo lebetingamkhatsata, kunaloko wanaka kakhulu tidzingo tebaphostoli bakhe labetsembekile. Lesidlo lesimelula lasicalisa ngemuva kwekucosha Judasi besitawukhumbuta bantfu lebebatawuba balandzeli bakhe labagcotjiwe ngetintfo labatizuza ngenca yengati yaJesu leyacitseka kanye nekuba nencenye esivumelwaneni lesisha. (1 Khor. 10:16, 17) Kute abasite bakhombise kutsi bayakufanelekela kubusa naye ezulwini, wabatjela loko yena naBabe wakhe bebakulindzele kubo. (Joh. 15:12-15) Waphindze watjela baphostoli bakhe ngetilingo lebebatawuhlangabetana  nato. Wabakhutsata kutsi balandzele sibonelo sakhe, wabancenga kutsi ‘babe nesibindzi!’ (Joh. 16:1-4a, 33) Ngisho nangemuva kweminyaka leminyenti, balandzeli baJesu bachubeka balingisa sibonelo sakhe sekutidzela kanye nekuba nesibindzi. Bachubeka basekelana nababhekana netinkinga letehlukahlukene ngisho noma loko bekumatima.—Heb. 10:33, 34.

9. Singamlingisa njani Jesu ngekuba nesibindzi?

⁹ Ngalokufanako lamuhla, silandzela sibonelo saJesu sekuba nesibindzi. Nasi sibonelo, siyasidzinga sibindzi nasisita bazalwane lababoshiwe ngenca yekukholwa kwabo. Ngaletinye tikhatsi, bazalwane bangaboshelwa intfo labangakayenti. Etimeni letinjalo, kudzingeka sente konkhe lesingakwenta kuze sibasite futsi loko kufaka ekhatsi kubakhulumela. (Fil. 1:14; Heb. 13:19) Lenye indlela lesingakhombisa ngayo sibindzi kutsi sichubeke sishumayela ‘ngesibindzi.’ (Imis. 14:3) NjengaJesu, sitimisele kuchubeka sishumayela umlayeto weMbuso ngisho nobe bantfu basihlupha futsi basiphikisa. Ngaletinye tikhatsi singahle sibe bete sibindzi. Yini lesingayenta?

10. Emavikini angaphambi kweSikhumbuto, yini lokufanele siyente, futsi leni?

¹⁰ Singaba nesibindzi nangabe sicabanga ngematsemba lesinawo ngenca yenhlawulo yaJesu. (Joh. 3:16; Ef. 1:7) Nasekusele emaviki lambalwa kufike Sikhumbuto, siba nelitfuba lelikhetsekile lekukhombisa kubonga ngenhlawulo yaJesu. Ngako hambisana nekufundvwa kweliBhayibheli kwemalanga eSikhumbuto, thantaza futsi uzindle ngalokwenteka ngaphambi kwekufa kwaJesu nangemuva kwako. Nasesisemkhosini weSidlo SeNkhosi Sakusihlwa, sitawucabangisisa ngekubaluleka kwesinkhwa neliwayini nekutsi kuwumelela njani umhlatjelo waJesu loligugu. Nasikucondza loko  Jehova naJesu labasentele kona nendlela tsine kanye nebantfu lesibatsandzako lesizuza ngayo, kukholwa kwetfu kuyacina futsi loko kusenta sichubeke sicinisela kuze kube sekupheleni.—Heb. 12:3.

11-12. Kuze kube ngunyalo, yini lesiyifundzile kulesihloko?

¹¹ Sesifundzile kutsi Sidlo SeNkhosi Sakusihlwa asisikhumbuti nje kuphela ngenhlawulo yaJesu leligugu, kepha siphindze sisikhumbute nangebuntfu bakhe lobubalulekile lokukutfobeka nesibindzi. Sijabula kakhulu ngekutsi Jesu uyachubeka analobuntfu njengobe angumPhristi wetfu Lophakeme losincengelako kuNkulunkulu. (Heb. 7:24, 25) Kute sikhombise kubonga kwetfu lokusuka enhlitiyweni, kufanele sikukhumbule ngekwetsembeka kufa kwaJesu njengoba asiyala. (Luk. 22:19, 20) Sikwenta loko ngaNisan 14, lokulilanga lelibaluleke kakhulu emnyakeni.

¹² Tintfo letenteka kulomkhosi tisifundzisa ngalobunye buntfu lobenta Jesu wafa ngenca yetfu. Bekatiwa ngalobuntfu nakasemhlabeni. Ngubuphi lobuntfu?

13. Umbhalo waJohane 15:9 na-1 Johane 4:8-10 uluchaza njani lutsandvo Jehova naJesu labasikhombisa lona, futsi bobani labazuzako ngalolutsandvo lwabo?

¹³ Kuko konkhe labekwenta, Jesu wakhombisa indlela Jehova lasitsandza ngayo. (Fundza Johane 15:9; 1 Johane 4:8-10.) Ngetulu kwako konkhe, Jesu wanikela ngekuphila kwakhe ngekutitsandzela ngenca yetfu. Siyazuza kulolutsandvo Jehova naJesu labasikhombisa lona ngenhlawulo ngisho nome sigcotjiwe noma singuletinye timvu. (Joh. 10:16; 1 Joh. 2:2) Cabanga nangesinkhwa kanye neliwayini lelisetjentiswako kulomkhosi, kokubili kukhombisa lutsandvo nekucabangela Jesu labenako ngebafundzi bakhe. Kanjani?

14. Jesu wakhombisa njani kutsi bekabatsandza bafundzi bakhe?

¹⁴ Jesu wakhombisa kutsi bekabatsandza balandzeli bakhe labagcotjwe ngemoya longcwele ngekutsi acalise umkhosi longasiyo inkimbinkimbi lobekufanele bachubeke bawugubha. Njengobe sikhatsi sichubeka, labafundzi labagcotjiwe bekufanele bagubhe Sikhumbuto, ngisho noma babhekene netimo letimatima letifaka ekhatsi kuboshwa. (Semb. 2:10) Bakhona yini kulalela umyalo waJesu? Yebo bakhona!

15-16. Labanye bakhone njani kugubha Sidlo SeNkhosi Sakusihlwa ngisho noma babhekene netimo letimatima?

¹⁵ Kusukela ekhulwini lekucala kuze kube ngumanje, emaKhristu eliciniso bekasolo enta konkhe langakwenta kute akhumbule kufa kwaJesu. Enta konkhe lokusemandleni awo kute etame kugubha lomkhosi ngendlela Jesu latsi awugubhe ngayo, futsi loko bekakwenta ngisho nobe asetimeni letimatima. Cabanga nganati tibonelo letilandzelako. Ngesikhatsi umzalwane Harold King avalelwe yedvwa ejele laseChina, bekufanele afune indlela latawugubha ngayo Sikhumbuto. Ngekuhlakanipha, wasebentisa tintfo labenato kute timelele sinkhwa neliwayini. Ngekucophelela, waphindze wabala kahle emalanga kute abone kutsi nguliphi lilanga leSikhumbuto lelifanele. Nakufika lelo langa bekayedvwa esitokisini futsi wahlabela, wathantaza, wase utibekela inkhulumo lesekelwe eBhayibhelini.

¹⁶ Nasi lesinye sibonelo. Nakuliwa iMphi Yelive Yesibili, licembu labodzadze lebebaboshiwe labeka kuphila kwalo engotini kuze likhumbule kufa kwaJesu. Nobe kunjalo, bakhona kuwugubha kahle lomkhosi ngoba awusiyo inkimbinkimbi. Batsi: “Sabutsana ndzawonye futsi sabeka sinkhwa neliwayini esitulweni lebesimbonywe ngendvwangu lemhlophe. Sakhanyisa likhandlela esikhundleni selilambu lagesi ngobe besingafuni  bantfu basibone. . . . Saphindze safunga kutsi sitimisele kwenta konkhe lokusemandleni etfu kute singcwelise libito laJehova lelingcwele.” Labodzadze bakhombisa kutsi bebanekukholwa lokucinile! Jesu ukhombisa kutsi usitsandza kakhulu ngekusenta sikhone kugubha Sikhumbuto ngisho noma sibhekene netinkinga letimatima.

17. Ngumiphi imibuto lesingatibuta yona?

¹⁷ Njengobe lilanga leSikhumbuto lisondzela, senta kahle ngekutibuta lemibuto lelandzelako: ‘Yini lengingayenta kute ngimlingise kakhulu Jesu ekukhombiseni labanye kutsi ngiyabatsandza? Ngitinaka kakhulu yini tidzingo tebazalwane bami kwendlula tidzingo tami? Ngilindzele kutsi bazalwane nabodzadze bente lokungetulu kwemandla abo yini noma ngiyakhumbula kutsi nabo banesono?’ Shengatsi singahlale silingisa Jesu futsi sibavele labanye.—1 Phet. 3:8.

18-19. (a) Yini lesingaciniseka ngayo? (b) Yini lotimisele kuyenta?

¹⁸ Ngemuva kwesikhashana angeke kusadzingeka kusi sikhumbule kufa kwaKhristu. Ngesikhatsi sekuhlupheka lokukhulu, Jesu utawufika futsi agcogcele ndzawonye labo “labakhetsiwe” kutsi baye ezulwini, ngemuva kwaloko Sikhumbuto angeke sisaba khona.—1 Khor. 11:26; Mat. 24:31.

¹⁹ Ngisho noma bantfu baNkulunkulu bangasasigubhi Sikhumbuto, siyaciniseka kutsi batawuhlale bawukhumbula lomkhosi loluphawu lwekutfobeka, sibindzi, kanye nelutsandvo lolukhulu lolwakhonjiswa nguJesu. Asingabati kutsi ngaleso sikhatsi labo labake baba khona kulomkhosi lobalulekile batawukhuluma ngawo kubantfu labatawube baphila ngaleso sikhatsi kute nabo bazuze. Kodvwa kute sizuze nyalo kulomkhosi, kufanele sitimisele kulingisa Jesu ngekutsi sitfobeke, sibe nesibindzi futsi sibatsandze labanye. Nasenta njalo, singaciniseka kutsi Jehova utasinika umvuzo.—2 Phet. 1:10, 11.