SIHLOKO LESIFUNDVWAKO 5
Sitawuhamba Nani
“Asihambisane nani, ngobe sivile kutsi Nkulunkulu unani.”—ZAK. 8:23.
INGOMA 26 “Nikwenzile Kimi”
LOKUTAWUCOCWA NGAKO KULESIHLOKO *
Letinye timvu (“emadvodza lalishumi”) tiyajabula kukhonta Jehova kanye nalabagcotjiwe (“umJuda”) (Buka tigaba 1-2)
1. Jehova watsi kutawentekani esikhatsini setfu?
JEHOVA wabiketela ngesikhatsi setfu kutsi “Emadvodza lalishumi lasuka kuto tonkhe tilwimi netive ayawunkonkoshela umJuda munye ngemphetfo wesembatfo sakhe, atsi: ‘Asihambisane nani, ngobe sivile kutsi Nkulunkulu unani.” (Zak. 8:23) “UmJuda” umelela labo Nkulunkulu labagcobe ngemoya longcwele. Babitwa nangekutsi ‘ngu-Israyeli waNkulunkulu.’ (Gal. 6:16) “Emadvodza lalishumi” amelela labo labanelitsemba lekuphila phakadze emhlabeni. Bayati kutsi Jehova ukhetse lelicembu lalabagcotjiwe futsi bakutsatsa njengelilungelo lelikhulu kukhonta Nkulunkulu kanye nabo.
2. “Emadvodza lalishumi” ‘ahambisana’ njani nalabagcotjiwe?
2 Ngisho nobe singeke sibati bonkhe ngemagama abo labagcotjiwe labasemhlabeni lamuhla, * labo labanelitsemba lekuphila emhlabeni ‘bangahambisana’ nalabagcotjiwe. Kanjani? LiBhayibheli litsi “emadvodza lalishumi” “ayawunkonkoshela umJuda munye ngemphetfo wesembatfo sakhe, atsi: ‘Asihambisane nani, ngobe sivile kutsi Nkulunkulu unani.’” Lelivesi likhuluma ngemJuda munye. Kodvwa ligama lelitsi “nani” lisho bantfu labanyenti. Loku kusho kutsi lomJuda akusuye umuntfu munye kodvwa umelela lonkhe licembu lalabagcotjiwe. Labangakagcotjwa bakhonta Jehova kanye nalabagcotjiwe. Noma kunjalo, ababatsatsi njengebaholi babo labo labagcotjiwe ngobe bayati kutsi nguJesu uMholi wabo.—Mat. 23:10.
3. Ngumiphi imibuto letawuphendvulwa kulesihloko?
3 Njengobe asekhona emaKhristu lagcotjiwe emkhatsini webatfu baNkulunkulu lamuhla, labanye bangase batibute kutsi: (1) Labagcotjiwe kufanele batitsatse njani? (2) Kufanele sibatsatse njani labo labadla tifanekiselo esikhumbutweni? (3) Kufanele sikhatsateke yini nangabe linani lalabo labadla tifanekiselo likhula? Lesihloko sitayiphendvula lemibuto.
LABAGCOTJIWE KUFANELE BATITSATSE NJANI
4. Ngusiphi secwayiso lesitfolakala ku-1 Khorinte 11:27-29 labagcotjiwe lokufanele bacabange ngaso, futsi leni?
4 Labagcotjiwe kufanele bacabangisise ngesecwayiso lesitfolakala ku-1 Khorinte 11:27-29. (Fundza.) Umuntfu logcotjiwe angadla njani “kungakafaneli” eSikhumbutweni? Angadla tifanekiselo kungakafaneli nangabe angaphili ngekuvumelana netimiso taJehova. (Heb. 6:4-6; 10:26-29) Labagcotjiwe bayati kutsi kufanele bahlale betsembekile nangabe bafuna kutfola “umvuzo welubito lwasezulwini loluvela kuNkulunkulu ngaKhristu Jesu.”—Fil. 3:13-16.
5. EmaKhristu lagcotjiwe kufanele atitsatse njani?
5 Umoya longcwele waJehova usita tikhonti takhe kutsi titfobeke, tingatikhukhumeti. (Ef. 4:1-3; Khol. 3:10, 12) Ngako-ke labagcotjiwe abatikhandzi bancono kunalabanye. Bayati kutsi Jehova akaniketi bona kuphela umoya longcwele lomnyenti kunalowo lawuniketa letinye tikhonti takhe. Abativa shengatsi bawacondza kancono emaciniso laseBhayibhelini kunalabanye. Angeke batjele lomunye umuntfu kutsi naye ugcotjiwe futsi kufanele acale kudla tifanekiselo eSikhumbutweni. Esikhundleni saloko, bakwemukela ngemusa kutsi nguJehova kuphela lomema bantfu kutsi baye ezulwini.
6. Ngekusho kwa-1 Khorinte 4:7, 8, emaKhristu lagcotjiwe kufanele atiphatse njani?
6 Ngisho nobe emaKhristu lagcotjiwe akutsatsa njengelilungelo lelikhulu kumenywa kutsi ayophila ezulwini, akalindzeli kutsi labanye bawaphatse ngendlela lekhetsekile. (Fil. 2:2, 3) Ayati nekutsi ngesikhatsi Jehova awagcoba ngemoya wakhe, akazange atjele labanye ngaloko. Umuntfu logcotjiwe akamangali nangabe labanye bangakholwa kutsi ugcotjiwe. Uyati kutsi liBhayibheli liyasitjela kutsi singasheshi simkholwe umuntfu lotsi Nkulunkulu umnikete umsebenti lokhetsekile. (Semb. 2:2) Umuntfu logcotjiwe akatidvonseli emehlo ebantfu. Ngako angeke atjele bantfu lahlangana nabo kutsi ugcotjiwe, futsi angeke atigabatise ngaloko kulabanye.—Fundza 1 Khorinte 4:7, 8.
7. Yini labagcotjiwe labatawugwema kuyenta futsi leni?
7 EmaKhristu lagcotjiwe akeva sengatsi angacitsa sikhatsi kuphela nalamanye emaKhristu lagcotjiwe kube shengatsi angemalunga elicembu lelitsite. Aketami kutfola lamanye emaKhristu lagcotjiwe kuze akhulume ngekugcotjwa kwawo nobe ahlangane emacenjini latsite kuze adadishe liBhayibheli. (Gal. 1:15-17) Libandla angeke libe nebunye nangabe labagcotjiwe bangenta letintfo. Loko kungasho kutsi asebenta ngalokuphambene nemoya longcwele, losita bantfu baNkulunkulu kutsi babe nekuthula nebunye.—Rom. 16:17, 18.
KUFANELE SIBAPHATSE NJANI LABAGCOTJIWE?
Akukafaneli sitsatse labagcotjiwe nobe labanye labaholako njengabosaziwayo (Buka sigaba 8) *
8. Kungani kufanele uyicaphele indlela lobaphatsa ngayo labo labadla tifanekiselo eSikhumbutweni? (Buka umbhalo longentasi.)
8 Kufanele sibaphatse njani bazalwane nabodzadze labagcotjiwe? Akusiko kahle kumnaka kakhulu umuntfu, ngisho nobe angumnakaboKhristu logcotjiwe. (Mat. 23:8-12) Nalikhuluma ngalabadzala, liBhayibheli lisikhutsata kutsi ‘silingise kukholwa kwabo,’ kodvwa alisitjeli kutsi sente umuntfu lotsite abengumholi wetfu. (Heb. 13:7) Kuliciniso kutsi liBhayibheli litsi labanye ‘bafanelwe ludvumo lolukhulu.’ Kodvwa loku kungenca yekutsi ‘basebenta kamatima ekukhulumeni nasekufundziseni’ hhayi ngenca yekutsi bagcotjiwe. (1 Thim. 5:17) Nangabe sibadvumisa ngalokwecile labagcotjiwe nobe sibanaka kakhulu, singabenta bative banemahloni. * Lokubi nakakhulu kutsi singabenta batikhukhumete. (Rom. 12:3) Kute emkhatsini wetfu lofuna kwenta intfo lengenta bomnakaboKhristu labagcotjiwe kutsi bente liphutsa lelifana naleli!—Luk. 17:2.
9. Singakhombisa njani kutsi siyawahlonipha emaKhristu lagcotjiwe?
9 Singakhombisa njani kutsi siyabahlonipha labo labagcotjwe nguJehova? Angeke sibabute kutsi bagcotjwa njani. Lena yindzaba letsintsa umuntfu ngamunye, ngako site lilungelo lekwati ngayo. (1 Thes. 4:11; 2 Thes. 3:11) Akukafaneli sicabange kutsi labashade nabo, batali babo, nobe lamanye emalunga abo emindeni nawo agcotjiwe. Umuntfu akakutfoli kugcotjwa njengelifa emndenini, kodvwa ukutfola kuNkulunkulu. (1 Thes. 2:12) Kufanele sigweme kubuta imibuto lengavisa labanye buhlungu. Nasi sibonelo, angeke sibute umfati wemzalwane logcotjiwe kutsi utiva njani ngekutsi utawuphila phakadze emhlabeni ingekho indvodza yakhe. Kufanele siciniseke kutsi emhlabeni lomusha Jehova ‘utawesutsisa tonkhe tifiso talokuphilako.’—Hla. 145:16.
10. Sitivikela njani nangabe sigwema ‘kutsenga emehlo alabanye’?
10 Nangabe labagcotjiwe singabaphatsi njengalababaluleke kakhulu kunalabanye, sisuke sitivikela tsine. Kanjani? LiBhayibheli liyasitjela kutsi labanye labagcotjiwe kungenteka bangahlali betsembekile kuNkulunkulu. (Mat. 25:10-12; 2 Phet. 2:20, 21) Nangabe sigwema ‘kutsenga emehlo alabanye,’ angeke silandzele labanye bantfu ngisho nalabo labagcotjiwe nobe labatiwako nobe lesebakhonte Jehova sikhatsi lesidze. (Juda 16) Ngako-ke nangabe bacala kungetsembeki nobe bashiye libandla, angeke siyekele kukholwa kuJehova nobe siyekele kumkhonta.
KUFANELE SIKHATSATEKE YINI NGELINANI LALABADLA TIFANEKISELO?
11. Yini lebeyisolo yenteka ngelinani lalabo labadla tifanekiselo eSikhumbutweni?
11 Kuphele iminyaka leminyenti linani lalabo labadla tifanekiselo eSikhumbutweni lehla. Kodvwa eminyakeni lesandza kwendlula, lelinani libese licala kukhula njalo ngemnyaka. Kufanele sikhatsateke yini ngaloko? Cha. Asesifundze ngetintfo lokufanele sihlale sitikhumbula.
12. Kungani kungakafaneli sikhatsateke ngelinani lalabo labadla tifanekiselo eSikhumbutweni?
12 “Jehova uyabati labo lababakhe.” (2 Thim. 2:19) Bazalwane lababala labo labadla tifanekiselo eSikhumbutweni abafani naJehova ngobe bona abati kutsi ngubani mbambambamba logcotjiwe. Ngako lelinani lifaka ekhatsi labo labacabanga kutsi bagcotjiwe babe bangakagcotjwa. Nasi sibonelo, labanye labake badla babase bayayekela. Labanye kungenteka baphatamisekile engcondvweni futsi bakholelwa kutsi batawubusa naKhristu ezulwini. Kuyacaca-ke kutsi asilati ngalokucondzile linani lalabo labagcotjiwe labasele emhlabeni.
13. LiBhayibheli liyalisho yini linani lalabagcotjiwe labatawube balamhlabeni nakucala kuhlupheka lokukhulu?
13 Kutawube kunalabagcotjiwe etindzaweni letinyenti emhlabeni ngesikhatsi Jesu efika atobatsatsa baye ezulwini. (Mat. 24:31) LiBhayibheli liyasho kutsi emalangeni ekugcina kutawuba nelinani lelincane lalabagcotjiwe labasele emhlabeni. (Semb. 12:17) Kodvwa alisho kutsi bangakhi labatawube basele nakucala kuhlupheka lokukhulu.
Kufanele sente njani nangabe sibona lotsite adla tifanekiselo teSikhumbuto? (Buka sigaba 14)
14. Njengobe kuvetiwe emBhalweni waRoma 9:11, 16, yini lokufanele siyifundze ngekukhetfwa kwalabagcotjiwe?
14 NguJehova loncumako kutsi ubakhetsa nini labagcotjiwe. (Rom. 8:28-30) Jehova wacala kukhetsa labagcotjiwe ngemuva kwekuvuswa kwaJesu. Kubonakala shengatsi ngelikhulu lekucala leminyaka, onkhe emaKhristu eliciniso bekagcotjiwe. Emakhulwini eminyaka leyalandzela, labanyenti balabo lebebatsi bangemaKhristu bebangasibo balandzeli baKhristu mbamba. Nobe kunjalo, kuleyo minyaka, Jehova wagcoba labo labambalwa lebebangemaKhristu eliciniso. Bebafana nakolo latsi Jesu utawukhula emkhatsini welukhula. (Mat. 13:24-30) Kulamalanga ekugcina, Jehova bekasolo achubeka nekukhetsa bantfu kutsi babe yincenye yalabangu-144 000. * Ngako nangabe Nkulunkulu ancuma kukhetsa labanye balaba ngaphambi nje kwekuphela, akukafaneli singabate kutsi wenta intfo lekahle. (Fundza Roma 9:11, 16.) * Kufanele sicaphele kutsi singenti njengaletisebenti Jesu lakhuluma ngato emfanekisweni wakhe. Takhonona ngendlela inkhosi yato leyasebentelana ngayo netisebenti letacala kusebenta ngeli-awa lekugcina.—Mat. 20:8-15.
15. Bonkhe labagcotjiwe lokukhulunywa ngabo kuMatewu 24:45-47, bayincenye ‘yesisebenti lesetsembekile nalesihlakaniphile’ yini? Chaza.
15 Akusibo bonkhe labanelitsemba lekuyophila ezulwini labayincenye ‘yesisebenti lesetsembekile nalesihlakaniphile.’ (Fundza Matewu 24:45-47.) Njengasekhulwini lekucala leminyaka, lamuhla Jehova naJesu basebentisa bazalwane labambalwa kuze bondle nobe bafundzise bantfu labanyenti. Ngelikhulu lekucala, ambalwa emaKhristu lagcotjiwe lasetjentiswa kuze abhale ImiBhalo YemaKhristu YesiGriki. Nalamuhla, emaKhristu lagcotjiwe lambalwa anemsebenti wekuniketa bantfu baNkulunkulu “kudla ngesikhatsi lesifanele.”
16. Yini loyifundzile kulesihloko?
16 Lesihloko sisifundziseni? Jehova ukhetse kuniketa linyenti lebantfu bakhe kuphila lokuphakadze emhlabeni, nekuphila ezulwini kulabo labatawubusa naJesu. Jehova utinika umvuzo tonkhe tinceku takhe, “umJuda” ‘nemadvodza lalishumi,’ ufuna tilalele imitsetfo lefanako futsi tihlale tetsembekile. Tonkhe kufanele tihlale titfobekile, futsi timkhonte ndzawonye ngebunye. Kufanele tilwele kugcina kuthula ebandleni. Njengobe sisondzela ekupheleni, shengatsi sonkhe singachubeka sikhonta Jehova futsi silandzela Khristu ‘singumhlambi munye.’—Joh. 10:16.
^ sig. 5 Kulomnyaka, Sikhumbuto sekufa kwaKhristu sitawuba ngaLesibili mhlaka April 7. Kufanele sibatsatse njani labo labadla tifanekiselo ngelilanga leSikhumbuto? Kufanele sikhatsateke yini nangabe linani lalabo labadla tifanekiselo lichubeka likhula? Timphendvulo talemibuto sitatitfola kulesihloko lesitsatselwe esihlokweni lesavela ku-Sicongosekulindza saJanuary 2016.
^ sig. 2 Ngekusho kweTihlabelelo 87:5, 6, esikhatsini lesitako kungenteka kutsi Nkulunkulu awavete emagama alabo lababusa naJesu ezulwini.—Rom. 8:19.
^ sig. 8 Buka libhokisi lelitsi “Lutsandvo Alutiphatsi Ngendlela Lehlazisako” lelitfolakala ku-Sicongosekulindza saJanuary 2016.
^ sig. 14 Ngisho nobe Imisebenti 2:33 ikhombisa kutsi umoya longcwele utfululwa ngaJesu, nguJehova lomema umuntfu ngamunye.
^ sig. 14 Kuze utfole kwatiswa lokwengetiwe, buka “Imibuto Levela Kubafundzi” letfolakala ku-Sicongosekulindza saMay 1, 2007 lesitfolakala ngesiZulu.
INGOMA 34 “Ukuhamba Ngobuqotho”
^ sig. 56 KUCHAZWA KWESITFOMBE: Cabanga ngesimo lapho umzalwane lomelele indlunkhulu akanye nemfati wakhe bavinjwa sicumbi sebantfu lesifuna kushutha nabo titfombe emhlanganweni. Loko kungaba kungakhombisi inhlonipho!
