1. Yini umuntfu lokufanele ayente ngaphambi kwekutsi akhe indlu?

CABANGA ngemuntfu lofuna kwakha indlu. Uyati kutsi ufuna kwakha indlu lenjani. Kungaba kahle yini kutsi avele agijimele kuyotsenga tintfo tekwakha bese ucala lendlu? Cha. Ngaphambi kwekutsi ayakhe, kunalokubalulekile lokufanele akwente, kufanele abale kutsi kuyakha kutawubita malini. Leni? Ngobe kudzingeka ati kutsi unayo yini imali leyanele yekutsi ayicedze lendlu. Nakatibale kahle tindleko kusenesikhatsi, angakhona kuyakha iphele lendlu yakhe.

2. Ngekusho kwemBhalo waLukha 14:27-30, yini lokufanele ucabangisise ngayo ngaphambi kwekutsi ubhajatiswe?

² Kutsandza Jehova kanye nekubonga ngetintfo lakwentele tona, kukwenta ucabange kubhajatiswa yini? Nangabe kunjalo, kufanele wente ngendlela lefanako nalomuntfu lofuna kwakha indlu. Kungani sisho kanjalo? Cabanga ngemavi aJesu lasencwadzini yaLukha 14:27-30. (Fundza.) Jesu bekakhuluma ngekutsi kusho kutsini kuba ngumfundzi wakhe. Kuze ube ngumlandzeli wakhe, kufanele ukulungele kubeketelela bumatima nekulahlekelwa nguletinye tintfo. (Luk. 9:23-26; 12:51-53) Ngako, ngaphambi kwekutsi ubhajatiswe kudzingeka ucabangisise ngaloko lotawubhekana nako njengemlandzeli waKhristu. Nawenta kanjalo, utakulungela kuchubeka ukhonta Nkulunkulu ngekwetsembeka njengemKhristu lobhajatisiwe.

3. Sitawucoca ngani kulesihloko?

³ Kuba ngumfundzi waJesu lobhajatisiwe kubaluleke kakhulu yini kwendlula bumatima lokufanele sibubeketelele nekulahlekelwa nguletinye tintfo? Yebo kunjalo! Kubhajatiswa kutakuletsela tibusiso letinyenti nyalo nasesikhatsini lesitako. Asesicoce ngaleminye imibuto lebalulekile lemayelana nelubhabhatiso. Kwenta njalo kutakusita uphendvule lombuto lotsi, “Ngikulungele yini kubhajatiswa?”

4. (a) Kusho kutsini kutinikela? (b) Ngekusho kwaMatewu 16:24, kusho kutsini ‘kutidzela’?

⁴ Kuyini kutinikela? Ngaphambi kwekutsi ubhajatiswe, kufanele utinikele. Nawutinikela kuJehova, uthantaza kuye ngalokusuka enhlitiyweni futsi umtjele kutsi utamkhonta kuphila kwakho konkhe. Nawutinikela kuNkulunkulu ‘uyatidzela’ (Fundza Matewu 16:24.) Ubese uphilela Jehova futsi loko kulilungelo lelikhulu. (Rom. 14:8) Uyamtjela kutsi kusukela nyalo kuchubeke, intfo lebaluleke kakhulu kuwe kutawuba kumkhonta nekumjabulisa. Kutinikela kusifungo lesibalulekile losenta naNkulunkulu. Jehova akasicindzeteli kutsi sente lesifungo. Kodvwa nangabe sisenta, ulindzele kutsi sisifeze.—Hla. 116:12, 14.

5. Kutinikela kuhlobene kanjani nekubhajatiswa?

⁵ Kutinikela kuhlobana njani nekubhajatiswa? Kute umuntfu lowatiko nawunikela ngekuphila kwakho kuJehova. Kubhajatiswa kwenteka embikwebantfu, kungaba semhlanganweni wesigodzi nobe wesifundza. Nawubhajatiswa usuke ukhombisa labanye kutsi sewutinikele kuJehova. * Ngako, nawubhajatiswa usuke ukhombisa labanye kutsi uyamtsandza Jehova Nkulunkulu wakho ngenhlitiyo yakho yonkhe, ngemphefumulo wakho, ngengcondvo nangemandla akho nekutsi utimisele kumkhonta kuze kube phakadze.—Mak. 12:30.

6-7. Ngekusho kwemBhalo wa-1 Phetro 3:18-22, ngutiphi tizatfu letimbili letenta lubhabhatiso lubaluleke?

⁶ Kubalulekile yini vele kutsi ubhajatiswe? Cabanga ngemavi lasencwadzini ya-1 Phetro 3:18-22. (Fundza.) Njengobe nemkhumbi bewubufakazi kubantfu bekutsi Nowa unekukholwa kuNkulunkulu, ngendlela lefanako nawubhajatiswa usuke ukhombisa bantfu kutsi utinikele kuJehova. Kodvwa kubhajatiswa kubalulekile yini vele? Kubalulekile. Phetro wachaza kutsi kubaluleke ngani. Kwekucala, ‘kuyakusindzisa.’ Kubhajatiswa kuyakusindzisa nangabe ukhombisa ngetento kutsi uyakholwa kuJesu futsi uyakholwa kutsi wasifela, wavuselwa ezulwini nekutsi nyalo ‘ungesekudla saNkulunkulu.’

⁷ Kwesibili, nangabe sibhajatiswa siba ‘nanembeza lomuhle.’ Nangabe sitinikela kuNkulunkulu futsi sibhajatiswa, siba nebuhlobo lobusedvute naye. Ngesizatfu sekutsi siyaphendvuka futsi siyakholelwa enhlawulweni, Nkulunkulu uyasitsetselela tono tetfu. Ngako singaba nanembeza lomuhle emehlweni akhe.

8. Ngutiphi tizatfu lokufanele tikwente ufune kubhajatiswa?

⁸ Ngutiphi tizatfu lokufanele tikwente ufune kubhajatiswa? Njengobe bewufundza liBhayibheli, kunyenti lokufundzile ngaJehova, njengebuntfu bakhe nendlela lenta ngayo tintfo. Lokufundzile ngaye kwayitsintsa inhlitiyo yakho futsi kwakwenta wamtsandza kakhulu. Kutsandza Jehova kufanele kube sizatfu lesiyinhloko lesikwenta kutsi ubhajatiswe.

9. Kusho kutsini kubhajatiswa egameni leYise, neleNdvodzana, nelemoya longcwele, njengobe kusho umBhalo waMatewu 28:19, 20?

⁹ Lesinye sizatfu lesikwenta ufune kubhajatiswa kutsi ukujabulele loko lokufundziswa liBhayibheli futsi wakukholwa. Cabanga ngaloko Jesu lakusho nakasinika umyalo wekutsi sente bafundzi. (Fundza Matewu 28:19, 20.) Jesu watsi labo lababhajatiswako kufanele loko bakwente “egameni leYise, neleNdvodzana,  nelemoya longcwele.” Bekusho kutsini loku? Ngenhlitiyo yakho yonkhe, kufanele ukukholwe loko lokufundza eBhayibhelini ngaJehova, ngendvodzana yakhe Jesu nangemoya longcwele. Lamaciniso anemandla kakhulu futsi angayitsintsa ngalokujulile inhlitiyo yakho. (Heb. 4:12) Asesiphindze sicoce ngalamanye awo.

10-11. Ngumaphi emaciniso lowafundzile ngeYise futsi wawakholelwa?

¹⁰ Ake uphindze ucabange ngesikhatsi usandza kufundza ngalamaciniso ngeYise: ‘Libito lakhe linguJehova,’ nguye ‘Losetikwako Konkhe’ futsi nguye yedvwa ‘Nkulunkulu weliciniso.’ (Hla. 83:18) UnguMdali wetfu, futsi ‘Insindziso ivela kuYe.’ (Hla. 3:8; 36:9) Jehova wente emalungiselelo ekusisindzisa esonweni nasekufeni futsi wasinika nelitsemba lekuphila phakadze. (Joh. 17:3) Kutinikela kwakho nekubhajatiswa kutawukhombisa kutsi unguFakazi waJehova. (Isa. 43:10-12) Utawuba yincenye yemndeni webantfu labakhonta Jehova labasemhlabeni wonkhe futsi labakujabulelako kubitwa ngelibito laNkulunkulu nekulitjela labanye.—Hla. 86:12.

¹¹ Kulilungelo lelikhulu kwati loko lokufundziswa liBhayibheli ngeYise! Nawuwakholelwa lamaciniso laligugu, inhlitiyo yakho itawukwenta kutsi ufune kutinikela kuJehova futsi ubhajatiswe.

12-13. Ngumaphi emaciniso lowafundzile ngeNdvodzana futsi wawakholelwa?

¹² Wativa njani nawufundza lamaciniso lalandzelako ngeNdvodzana? Jesu ubaluleke kakhulu kwendlula yonkhe indalo. Wanikela ngekuphila kwakhe ngenca yetfu. Nasikhombisa ngetento kutsi sinekukholwa enhlawulweni, tono tetfu tingatsetselelwa, sibe bangani naNkunkulu futsi sitfole kuphila lokuphakadze. (Joh. 3:16) Jesu nguMphristi wetfu Lophakeme. Ufuna kusisita kutsi sizuze kulenhlawulo futsi sisondzelane naNkulunkulu. (Heb. 4:15; 7:24, 25) Njengobe ayiNkhosi yeMbuso waNkulunkulu, Jehova utamsebentisa kuze angcwelise libito lakhe, acedze bonkhe bubi futsi asiletsele tibusiso letingapheli ePharadisi lelitako. (Mat. 6:9, 10; Semb. 11:15) Jesu usibonelo lokufanele sisilandzele. (1 Phet. 2:21) Wasebentisa kuphila kwakhe kuze ente intsandvo yaNkulunkulu futsi ngaleyondlela wasishiyela sibonelo lesingasilingisa.—Joh. 4:34.

¹³ Nawukwemukela loko liBhayibheli lelikufundzisako ngaJesu, utamtsandza. Lolutsandvo lutawukwenta uphilele kwenta intsandvo yaNkulunkulu njengobe kwenta Jesu. Ngesizatfu saloko, utawukhutsateka kutsi unikele kuphila kwakho kuJehova futsi ubhajatiswe.

14-15. Ngumaphi emaciniso lowafundzile ngemoya longcwele futsi wawakholelwa?

¹⁴ Yini leyafika engcondvweni yakho nawufundza ngalamaciniso lalandzelako ngemoya longcwele? Awusiwo umuntfu, kodvwa ungemandla aNkulunkulu. Jehova wasebentisa umoya longcwele kuze ucondzise bantfu kutsi babhale liBhayibheli, futsi lomoya usisita kutsi sikucondze futsi sikusebentise lesikufundza kulo. (Joh. 14:26; 2 Phet. 1:21) Asebentisa lomoya wakhe, Jehova usinika “emandla lamakhulu kakhulu.” (2 Khor. 4:7) Lomoya usinika emandla ekushumayela, ekulwa netilingo, ekukhona kumelana nekudvumateka kanye nekubeketelela tinkinga. Usisita kutsi sibe nebuntfu lobuhle lobuveta “titselo temoya.” (Gal. 5:22) Nkulunkulu ubapha ngekukhululeka umoya wakhe labo labemetsembako futsi labamcela ngalokusuka enhlitiyweni.—Luk. 11:13.

 ¹⁵ Kuyasidvudvuta kwati kutsi tikhonti taJehova tingatsembela emoyeni wakhe longcwele kuze utisite timkhonte. Nawuwemukela emaciniso lowafundzile ngemoya longcwele, utawukhutsateka kutsi utinikele kuNkulunkulu futsi ubhajatiswe.

16. Yini lesiyifundzile kuloku lesesicoce ngako?

¹⁶ Usuke utsatsa sinyatselo lesibaluleke kakhulu nawuncuma kutinikela kuNkulunkulu futsi ubhajatiswa. Njengobe sifundzile, kufanele ukulungele kubeketelela bumatima nekulahlekelwa tintfo lonato. Kodvwa tibusiso lotatitfola tincono kakhulu kwendlula tintfo letitakulahlekela. Kubhajatiswa kungakusindzisa futsi kukwente ube nambeza lomuhle emehlweni aNkulunkulu. Kutsandza Jehova kufanele kube sizatfu lesiyinhloko sekuncuma kutsi ubhajatiswe. Ngenhlitiyo yakho yonkhe, kufanele uwakholelwe emaciniso lowafundzile ngeYise, ngeNdvodzana kanye nangemoya longcwele. Nawucabanga ngaloku lesesicoce ngako, ungawuphendvula njani lombuto lotsi, “Ngikulungele yini kubhajatiswa?”

17. Ngutiphi tintfo lokufanele utente ngaphambi kwekutsi ubhajatiswe?

¹⁷ Nawutiva ukulungele kubhajatiswa, kungenteka sekunalokunyenti lokwentile kuze usondzelane naJehova. * Ngenca yekutsi uhlale ulitadisha liBhayibheli, sewati lokunyenti ngaJehova naJesu. Sewuyakholwa. (Heb. 11:6) Ukholelwa mbamba etetsembisweni taJehova letitfolakala eBhayibhelini, futsi uyaciniseka kutsi kukholwa kwakho emhlatjelweni waJesu kungakusindzisa esonweni nasekufeni. Uphendvukile etonweni takho, uva buhlungu nawucabanga ngalokubi lobewukwenta, futsi sewucele Jehova kutsi akutsetselele. Sewugucukile, lokusho kutsi sewutishiye ngalokuphelele tindlela takho tekuphila letimbi futsi sewucale kuphila ngendlela lejabulisa Jehova. (Imis. 3:19) Ufisa kutjela labanye ngekukholwa kwakho. Wakulungela kuba ngummemeteli longakabhajatiswa futsi wacala kushumayela nelibandla. (Mat. 24:14) Jehova uyajabula ngekutsi wente letintfo letibalulekile. Umjabulise kakhulu.—Taga 27:11.

18. Yini lenye lokudzingeka uyente ngaphambi kwekutsi ubhajatiswe?

¹⁸ Ngaphambi kwekutsi ubhajatiswe kunetintfo letimbalwa lokudzingeka kutsi utente. Njengobe sifundzile ekucaleni, kufanele utinikele kuNkulunkulu. Thantaza kuye uwedvwana, futsi umetsembise kutsi utawusebentisa kuphila kwakho kuze wente intsandvo yakhe. (1 Phet. 4:2) Tjela umchumanisi wesigungu salabadzala kutsi sewufuna kubhajatiswa. Lomchumanisi utawucela labanye labadzala kutsi bakhulume nawe. Ungesabi kukhuluma nabo.  Khumbula kutsi labazalwane banemusa, bayakwati futsi bayakutsandza. Batawubuyeketa nawe timfundziso teliBhayibheli letiyinhloko lowatifundza. Bafuna kuciniseka kutsi uyaticondza yini letimfundziso nekutsi uyabubona yini bumcoka bekutinikela nekubhajatiswa. Nababona kutsi ukulungele, batakutjela kutsi ungabhajatiswa emhlanganweni lolandzelako.

19-20. Yini lokudzingeka uyente ngemuva kwekubhajatiswa, futsi ungakwenta kanjani?

¹⁹ Ngemuva kwekubhajatiswa, yini lokudzingeka uyente? * Khumbula kutsi kutinikela kusifungo futsi Jehova ulindzele kutsi usifeze. Ngako, ngemuva kwekubhajatiswa kufanele usigcine setsembiso losentile. Ungakwenta njani loko?

²⁰ Tihlanganise nelibandla lokulo. NjengemKhristu lobhajatisiwe, sewungulomunye ‘webazalwane’ labasemhlabeni wonkhe. (1 Phet. 2:17) Bazalwane nabodzadze labasebandleni lokulo sebafana nemndeni wakho. Ngekuba khona njalo emihlanganweni, usuke ucinisa bungani benu. Fundza liVi laNkulunkulu futsi uzindle ngalo onkhe malanga. (Hla. 1:1, 2) Ngemuva kwekufundza incenye letsite yeliBhayibheli, tinike sikhatsi sekucabangisisa ngaloko lokufundzako. Ngako lamavi atawutsintsa inhlitiyo yakho. ‘Chubeka uthantaza.’ (Mat. 26:41) Imithantazo yakho lesuka enhlitiyweni, itakwenta usondzelane naJehova. ‘Chubeka ufuna kucala uMbuso.’ (Mat. 6:33) Loko ungakwenta ngekutsi ubeke umsebenti wekushumayela ute kucala ekuphileni kwakho. Nawushumayela njalo, utawucinisa kukholwa kwakho futsi ungasita nalabanye kutsi batfole kuphila lokuphakadze.—1 Thim. 4:16.

21. Kubhajatiswa kutakuvulela maphi ematfuba?

²¹ Nawutinikela kuJehova futsi ubhajatiswa usuke wenta sincumo lesibalulekile ekuphileni kwakho. Kuliciniso kutsi kunalokutsite lokutakulahlekela. Kodvwa kubhajatiswa kubaluleke kwendlula konkhe lokungakulahlekela! Konkhe kuhlupheka lobhekana nako kulelive leliphelako, “kukwesikhashana futsi kumelula.” (2 Khor. 4:17) Ngalokwehlukile, kubhajatiswa kutakwenta ujabule ekuphileni futsi ube ‘nekuphila lokungukonakona’ esikhatsini lesitako. (1 Thim. 6:19) Ngako sicela ucabangisise futsi uthantaze ngalombuto lotsi, “Sengikulungele yini kubhajatiswa?”