1. Yini lesiyatiko ngebazalwane labasebasha?

NINE bazalwane lenisebasha, ningaba lusito kakhulu ebandleni. Labanyenti benu basenemandla. (Taga 20:29) Nenta lokunyenti kuze nisite bazalwane ebandleni. Kungenteka ukubuke ngalabovu kuba yinceku lesebentako. Nobe kunjalo, kungenteka uva shengatsi labanye bacabanga kutsi usemncane kutsi unganiketwa leminye imisebenti ebandleni. Nanobe usemncane, kunetintfo longatenta nyalo letingenta labanye ebandleni bakwetsembe futsi bakuhloniphe.

2. Sitawucoca ngani kulesihloko?

² Kulesihloko, sitawucoca ngeNkhosi Davide. Sitawuphindze sicoce ngalokwenteka ekuphileni kwa-Asa nekwaJehoshafati lebebangemakhosi akaJuda. Sitawucoca ngetinkinga lamadvodza lamatsatfu lahlangabetana nato, indlela laticatulula ngayo naloko bazalwane labasebasha labangakufundza kuwo.

3. Labasebasha bangabasita ngayiphi indlela lasebakhulile ebandleni?

³ Ngesikhatsi Davide asemusha, wafundza emakhono lebekabasita labanye. Kusebaleni kutsi bekanebuhlobo lobuhle naJehova. Wasebenta kamatima kuze abe ngumhlabeleli lonelikhono, futsi lelikhono lakhe walisebentisa kuze asite Sawula lobekayiNkhosi legcotjwe nguNkulunkulu. (1 Sam. 16:16, 23) Nine bazalwane labasebasha, ninalo yini likhono leningalisebentisa  kuze nisite labanye ebandleni? Labanyenti benu banalo. Nasi sibonelo, kungenteka ninakile kutsi lasebakhulile ebandleni bayajabula nanibafundzisa kusebentisa ema-tablet, kanye naletinye tintfo tebucwephesha kuze batidadishele futsi batisebentise nasemihlanganweni. Lolwati leninalo ngetebucwephesha lungabasita kakhulu lasebakhulile.

4. NjengaDavide, ngubuphi buntfu bazalwane labasebasha lokufanele babe nabo? (Buka sitfombe lesisekhasini lekucala.)

⁴ Davide wakhombisa kutsi labanye bantfu bangametsemba. Nasi sibonelo, ngesikhatsi aselijaha wasebenta kamatima kuze anekekele timvu tababe wakhe. Loyo bekungumsebenti loyingoti. Ngekuhamba kwesikhatsi, Davide wachazela iNkhosi Sawula watsi: “Ngesikhatsi inceku yakho yeluse timvu tababe wayo, kwachamuka libhubesi latibambela imvu kulomhlambi futsi ngalesinye sikhatsi kwachamuka libhele nalo latibambela imvu. Ngesuka ngatigijimisa futsi ngatishaya ngatilahla phansi, ngasindzisa letimvu emilonyeni yato.” (1 Sam. 17:34, 35) Davide bekati kutsi bekufanele atinakekele letimvu, ngako wativikela ngesibindzi. Bazalwane labasebasha bangamlingisa Davide ngekuwenta ngekutimisela umsebenti labaniketwe wona.

5. Ngekusho kweTihlabelelo 25:14 yini lebaluleke kakhulu bazalwane labasebasha labangayenta?

⁵ Ngesikhatsi Davide asemusha, bekanebuhlobo lobuhle naJehova futsi bebubaluleke kakhulu kwendlula sibindzi lebekanaso nobe likhono lebekanalo lekudlala tinsimbi temculo. Jehova bekangagcini ngekuba nguNkulunkulu waDavide, kodvwa bekaphindze abe nguMngani wakhe lomkhulu. (Fundza Tihlabelelo 25:14.) Nine bazalwane lenisebasha, lokubaluleke kakhulu leningakwenta kucinisa buhlobo benu naBabe wenu losezulwini, nanenta njalo ninganiketwa leminye imisebenti ebandleni.

6. Labanye bantfu bebacabanga ini ngaDavide?

⁶ Lenye inkinga Davide lebekanayo kutsi labanye bebacabanga kutsi usemncane kakhulu. Nasi sibonelo, ngesikhatsi Davide atsi utokulwa naGoliyathi, iNkhosi Sawula yetama kumvimba yatsi: “Wena usengumfana.” (1 Sam. 17:31-33) Ngaphambi kwaloko, umnakaboDavide wamsola ngekutsi akawenti kahle umsebenti lebekanikwe wona. (1 Sam. 17:26-30) Nobe kunjalo, Jehova bekangacabangi kutsi Davide usemncane kakhulu nobe  kutsi bekangawenti umsebenti lebekaniketwe wona. Bekamati kahle Davide, ngesizatfu sekutsi Davide wetsembela kuMngani wakhe Jehova, wakhona kumbulala Goliyathi.—1 Sam. 17:45, 48-51.

7. Yini longayifundza endzabeni yaDavide?

⁷ Yini longayifundza kulokwenteka kuDavide? Sifundza kutsi kufanele sibeketele. Kutawutsatsa sikhatsi kutsi labo labakwati kusukela usemncane babone kutsi sewukhulile. Kodvwa ungaciniseka kutsi Jehova akagcini nje ngekubuka indlela lobukeka ngayo, ukwati kahle futsi uyakwati naloko longakhona kukwenta. (1 Sam. 16:7) Cinisa buhlobo bakho naNkulunkulu. Davide wakwenta loko ngekubukisisa tintfo Jehova latidalile. Wacabangisisa ngekutsi letintfo timfundzisani ngeMdali. (Hla. 8:3, 4; 139:14; Rom. 1:20) Ungaphindze ucele Jehova kutsi akuphe emandla. Nasi sibonelo, lofundza nabo esikolweni bahlekisa ngawe yini ngenca yekutsi unguFakazi waJehova? Nangabe kunjalo, thantaza ucele Jehova akusite ubeketelele lenkinga. Sebentisa seluleko lesilusito lesitfolakala eVini lakhe nasetincwadzini letisekelwe eBhayibhelini nakuma-video. Ngaso sonkhe sikhatsi Jehova nakakusita uncobe inkinga letsite, utawumetsemba kakhulu, ngetulu kwaloko, labanye bantfu nababona kutsi wetsembele kuJehova nabo batakwetsemba.

8-9. Yini leyasita Davide kutsi akulindzele ngesineke kuba yiNkhosi, futsi bazalwane labasebasha bangafundzani esibonelweni sakhe?

⁸ Cabanga ngalenye inkinga Davide labhekana nayo. Ngemuva kwekutsi Davide asagcotjiwe kutsi abe yiNkhosi, kwadzingeka kutsi alindze iminyaka leminyenti ngaphambi kwekutsi acale kubusa njengeNkhosi yakaJuda. (1 Sam. 16:13; 2 Sam. 2:3, 4) Kuleso sikhatsi, yini leyamsita kutsi akhone kulindza ngesineke? Kunekutsi aphelelwe ngemandla, wasebentisa leso sikhatsi kuze anake tintfo lebekangakhona kutenta. Nasi sibonelo, ngesikhatsi Davide angumbaleki futsi ahlala endzaweni yemaFilisti, wasebentisa leso sikhatsi kuze alwe netitsa tema-Israyeli. Ngekwenta njalo, wavikela imincele yakaJuda.—1 Sam. 27:1-12.

⁹ Bazalwane labasebasha bangafundzani esibonelweni saDavide? Sebentisa ematfuba lakuvulekele kuze usite bazalwane bakho. Cabanga ngaloko lokwenteka kumzalwane Ricardo. * Kusukela asemncane bekafuna kuba lihlahlandlela lelivamile. Kodvwa bekasengakakulungeli. Kunekutsi aphelelwe ngemandla nobe atfukutsele, Ricardo wacitsa sikhatsi lesinyenti enta umsebenti wekushumayela. Utsi: “Nangibuka emuva, ngiyabona kutsi bekunalokunyenti lebekufanele ngikwente kuze ngitfutfuke. Bengiciniseka kutsi ngiyabuyela kubo bonkhe lebengicoce nabo lebebakhombise kutsi bayakutsandza kufundza, futsi bengilungiselela ngaso sonkhe sikhatsi nangibuyela kubo, ngaze ngatfola umuntfu lebengitofundza naye liBhayibheli. Njengobe bengicitsa sikhatsi lesinyenti ngishumayela, ngaba nesibindzi.” Nyalo, Ricardo ulihlahlandlela lelivamile futsi uyinceku lesebentako.

10. Ngalesinye sikhatsi, yini Davide layenta ngaphambi kwekutsi atsatse sincumo lesibalulekile?

¹⁰ Cabanga ngalokunye lokwenteka kuDavide. Ngesikhatsi abalekela Sawula, yena nemadvodza labekanawo bashiya imindeni yabo bayokulwa. Nabasengekho, kwefika sitsa sahlasela labebahlala khona futsi satfumba imindeni yabo. Ngenca yekutsi Davide abelichawe, abengahle acabange kutsi abengakhona  kukhulula lemindeni yabo lebeyitfunjiwe. Kunaloko, Davide wacela Jehova kutsi amcondzise. Asitwa ngumphristi Abiyatha, Davide wabuta kuJehova watsi: “Ngiwacoshe yini lamasotja langihlaselako?” Jehova watjela Davide kutsi akawacoshe futsi utawuphumelela. (1 Sam. 30:7-10) Ufundzani kulendzaba?

11. Yini longayenta ngaphambi kwekutsi wente tincumo?

¹¹ Cela seluleko kulabanye ngaphambi kwekutsi wente tincumo. Khuluma nebatali bakho. Ungasitfola neseluleko lesihle nawukhuluma nalabadzala belibandla. Jehova uyawetsemba lamadvodza futsi nawe ungawetsemba. KuJehova lamadvodza “atipho” telibandla. (Ef. 4:8) Nawulalela teluleko tawo letinhle, utawukhona kwenta tincumo letikahle futsi ulingise kukholwa kwawo. Nyalo asesicoce ngalako lesingakufundza eNkhosini Asa.

12. Ngubuphi buntfu iNkhosi Asa lebeyinabo nayisacala kubusa?

¹² Ngesikhatsi iselijaha, iNkhosi Asa beyitfobekile futsi inesibindzi. Nasi sibonelo, ngemuva kwekufa kwababe wakhe Abiya, Asa wacala kususa tithico eveni lakhe. Waphindze “watjela emaJuda kutsi awafune Jehova Nkulunkulu wabokhokho bawo futsi agcine uMtsetfo nemyalo.” (2 Khr. 14:1-7) Ngesikhatsi Zera umTopiya ahlasela live lakaJuda anemasotja langu-1 000 000, ngekuhlakanipha Asa wacela Jehova kutsi amsite, watsi: “Awu Jehova, akusho lutfo kuwe kutsi banyenti labo lobasitako nome bete emandla. Sisite, awu Jehova Nkulunkulu wetfu ngobe setsembele kuwe.” Lamavi lamnandzi akhombisa kutsi Asa bekaciniseka kutsi Jehova bekatamsindzisa yena nebantfu bakhe. Asa bekametsemba Babe wakhe wasezulwini futsi Jehova “wawehlula emaTopiya.”—2 Khr. 14:8-12.

13. Yini leyenteka ku-Asa ngekuhamba kwesikhatsi, futsi kungani?

¹³ Kwaba matima kakhulu ngesikhatsi emasotja langu-1 000 000 atomhlasela, kodvwa ngenca yekutsi Asa beketsembele kuJehova, waphumelela. Kodvwa lokubuhlungu kutsi ngesikhatsi anenkinga lehlukile, akazange etsembele kuJehova. Ngesikhatsi asongelwa yiNkhosi lembi yaka-Israyeli, lokunguBhasha, Asa wacela lusito eNkhosini yase Siriya. Lesincumo sakhe saba nemiphumela lemibi! Asebentisa umphrofethi Hanani, Jehova  watsi ku-Asa: “Ngobe wetsembele enkhosini yaseSiriya wangetsembeli kuJehova Nkulunkulu wakho, libutfo lenkhosi yaseSiriya seliphunyukile esandleni sakho.” Ecinisweni, kusukela ngaleso sikhatsi Asa bekahlale alwa timphi. (2 Khr. 16:7, 9; 1 Khos. 15:32) Yini lesiyifundzako?

14. Ungetsembela njani kuJehova, futsi ngekusho kwa-1 KuThimothi 4:12, yini lotoyitfola ngekwenta njalo?

¹⁴ Hlala utfobekile futsi uchubeke wetsembela kuJehova. Ngesikhatsi ubhajatiswa, wakhombisa kutsi uyakholwa nekutsi uyametsemba Jehova, futsi wajabula kakhulu kukwemukela emndenini wakhe. Lokufanele ukwente nyalo kutsi uchubeke wetsembela kuye. Kungabonakala kumelula kwetsembela kuJehova nangabe kufanele wente tincumo letibalulekile. Kodvwa kutsiwani ngaletinye tikhatsi? Kubaluleke kakhulu kutsi wetsembele kuJehova nawenta tincumo letifaka ekhatsi letimayelana nekutijabulisa, umsebenti wekutiphilisa, nemigomo lotibekele yona ekuphileni! Ungetsembeli ekuhlakanipheni kwakho, kunaloko buka timiso letiseBhayibhelini letingakusita kutsi wente sincumo futsi usisebentise. (Taga 3:5, 6) Nawenta njalo, utawujabulisa Jehova, futsi nalabanye ebandleni batakuhlonipha.—Fundza 1 KuThimothi 4:12.

15. Ngekusho kwa-2 Tikhronike 18:1-3; 19:2, ngumaphi emaphutsa lentiwa yiNkhosi Jehoshafati?

¹⁵ Sonkhe sinesono, futsi ngaletinye tikhatsi nawe utawenta emaphutsa. Nanobe kunjalo, loko kufanele kungakuvimbi kutsi wente konkhe longakwenta emsebentini waJehova. Cabanga ngesibonelo seNkhosi Jehoshafati. Bekanebuntfu lobuhle. Aselijaha, “wafuna Nkulunkulu wababe wakhe wagcina imiyalo yakhe.” Ngetulu kwaloko, watfuma tindvuna kutsi tifundzise bantfu ngaJehova kuwo onkhe emadolobha akaJuda. (2 Khr. 17:4, 7) Kodvwa ngaletinye tikhatsi bekenta tincumo letimbi. Ngenca yalesinye sincumo lesibi lasenta welulekwa ngulesinye sitfunywa saJehova. (Fundza 2 Tikhronike 18:1-3; 19:2.) Ungafundzani endzabeni yakhe?

16. Ungafundzani kulokwenteka kuRajeev?

¹⁶ Yemukela seluleko futsi usisebentise. Njengabo bonkhe bazalwane labasebasha, nakuwe kungenteka kumatima kutsi wente umsebenti waJehova ute kucala ekuphileni  kwakho. Ungapheli emandla. Naka lokwenteka kulomunye umzalwane losemusha lokutsiwa nguRajeev. Akhuluma ngesikhatsi aseseminyakeni yekutfomba utsi: “Ngaletinye tikhatsi bengingati kutsi ngifuna kwentani ngekuphila kwami. Njengalabanye labasebasha, bengitsandza kakhulu temidlalo kanye nekutijabulisa kunekutsi ngiye emihlanganweni nobe ensimini.” Yini leyamsita? Lomunye lomdzala welibandla lonemusa wameluleka. Rajeev utsi: “Wangisita ngacabangisisa ngesimiso lesiku-1 KuThimothi 4:8.” Rajeev abetfobekile futsi wasisebentisa leseluleko, wacabangisisa nangaloko lobekubaluleke kakhulu ekuphileni kwakhe. Utsi: “Ngancuma kutsi kukhonta Jehova kute kucala ekuphileni kwami.” Waba yini umphumela? Rajeev utsi: “Ngemuva kweminyaka lembalwa ngitfole leseluleko ngaba yinceku lesebentako.”

17. Lasebakhulile bativa njani nababona bazalwane labasebasha bakhonta Jehova?

¹⁷ Lasebakhulile bajabula kakhulu ngani nine bazalwane lenisebasha lenikhonta nabo Jehova nihlangene “lihlombe ngelihlombe”! (Zef. 3:9) Bayajabula nababona kutimisela kwenu nanenta umsebenti leniniketwe wona. Banitsandza kakhulu.—1 Joh. 2:14.

18. Njengobe kusho Taga 27:11, Jehova utiva njani ngebazalwane labasebasha labamkhontako?

¹⁸ Nine bazalwane lenisebasha ningakhohlwa kutsi Jehova uyanitsandza futsi uyanetsemba. Jehova washo kutsi emalangeni ekugcina bekutawuba nelibutfo lemajaha lasemasha labekatawutinikela kuye ngekutitsandzela. (Hla. 110:1-3) Uyati kutsi niyamtsandza futsi nifuna kumkhonta ngawo onkhe emandla enu. Ngako beketela futsi ubeketelele nalabanye. Nawenta emaphutsa, yemukela kuceceshwa kanye nesiyalo lositfolako futsi usitsatse njengalesivela kuJehova. (Heb. 12:6) Wente ngekutimisela umsebenti loniketwa wona futsi lokubaluleke kakhulu kutsi kuko konkhe lokwentako, wente Babe wakho losezulwini atigcabhe ngawe.—Fundza Taga 27:11.