1. Yini Jesu layisho ngemcebo losezulwini?

AKUSITO tonkhe tintfo lesingatibona. Ecinisweni, tintfo letingabonakali ngito letiligugu kakhulu. ENshumayelweni yakhe yaseNtsabeni, Jesu watsi umcebo losezulwini ngiwo lobaluleke kakhulu kwendlula imali. Waphindze watsi “lapho kunemcebo wakho khona, kulapho nenhlitiyo yakho itawuba khona.” (Mat. 6:19-21) Nangabe sitsatsa intfo njengalebaluleke kakhulu, loko kutawusenta kutsi setame kuyitfola. Sitibekela “umcebo ezulwini” ngekutsi sibe nebuhlobo lobuhle naNkulunkulu. Jesu watsi umcebo lonjalo ngeke webiwe nobe wonakale.

2. (a) Ngekusho kwa-2 Khorinte 4:17, yini Pawula lasikhutsata kutsi siyinake? (b) Sitawucoca ngani kulesihloko?

² Umphostoli Pawula usikhutsata kutsi ‘sihlale sibuke tintfo letingabonwa.’ (Fundza 2 Khorinte 4:17, 18.) Letintfo letingabonwa tingumcebo lofaka ekhatsi tibusiso lesitatijabulela emhlabeni lomusha lesiwetsenjiswe nguNkulunkulu. Kulesihloko sitawucoca ngetintfo letine lesingatiboni lesitijabulelako manje, bungani naNkulunkulu, umthantazo, umoya longcwele nekusekelwa lesikutfola kuJehova, kuJesu kanye netingilosi. Sitawuphindze sicoce ngekutsi singakhombisa njani kutsi siyabonga ngaletintfo lesingatiboni.

3. Ngumuphi umcebo wetfu lomkhulu longabonakali, futsi kwenteka njani kutsi siwutfole?

³ Umcebo wetfu lomkhulu longabonakali bungani lesinabo naJehova Nkulunkulu wetfu. (Hla. 25:14) Kwenteka njani kutsi Nkulunkulu abe ngumngani webantfu labanesono kodvwa ahlale angcwele? Uyakhona kukwenta loko ngobe umhlatjelo wesono saJesu ‘ususa sono selive’ kubantfu.  (Joh. 1:29) Jehova wati kusengaphambili kutsi Jesu bekatawetsembeka kuze kube sekufeni kuze asindzise bantfu. Kungako Nkulunkulu aba ngumngani webantfu labaphila ngaphambi kwekutsi Khristu afe.—Rom. 3:25.

4. Niketa tibonelo temadvodza laba bangani baNkulunkulu futsi laphila ngaphambi kwekutsi Jesu ete emhlabeni.

⁴ Cabanga ngemadvodza laphila ngaphambi kwekutsi Jesu ete emhlabeni laba bangani baNkulunkulu. Abrahama bekayindvodza lebeyinekukholwa lokucinile. Ngemuva kweminyaka lengu-1 000 Abrahama afile, Jehova wambita ngekutsi ‘ungumngani wakhe.’ (Isa. 41:8) Loko kusho kutsi nobe bantfu bangafa, Jehova utawuhlale abatsatsa njengebangani bakhe. Abrahama uyaphila enkhumbulweni yaJehova. (Luk. 20:37, 38) Lesinye sibonelo lesinaso saJobe. Ngesikhatsi tingilosi tihlangene ezulwini, Jehova wakhuluma ngekuciniseka ngaJobe. Jehova watsi “umsulwa, ucotfo ngenhlitiyo, ungumuntfu lowesaba Nkulunkulu nalokubalekelako lokubi.” (Jobe 1:6-8) Jehova wativa njani ngaDanyela lowamkhonta ngekwetsembeka iminyaka lengaba ngu-80 eveni lebantfu lebebangamkhonti? Tingilosi tayicinisekisa tikhatsi letintsatfu lendvodza lebeseyikhulile kutsi ‘beyitsandzekile’ kuNkulunkulu. (Dan. 9:23; 10:11, 19) Singaciniseka kutsi Jehova uyakulangatelela kuvusa bonkhe bangani bakhe labatsandzekako labafa.—Jobe 14:15.

5. Yini ledzingekako kuze umuntfu abe ngumngani waJehova?

⁵ Lamuhla, bangakanani bantfu labajabulela kuba bangani baJehova? Banyenti kakhulu. Loku siyakwati ngobe manyenti emadvodza, bafati nebantfwana labakhombisa ngetento tabo kutsi bafuna kuba bangani baNkulunkulu. Jehova ‘ungumngani lomkhulu walabalungile.’ [NW] (Taga 3:32) Bayakhona kuba bangani baNkulunkulu ngobe bayakholwa emhlatjelweni wesihlengo saJesu Khristu. Ngenca yalomhlatjelo wesihlengo, singaba bangani baJehova futsi singakhona kutinikela kuNkulunkulu siphindze sibhajatiswe. Nasenta letintfo letibaluleke kakhulu, sisuke siba yincenye yetigidzi temaKhristu latinikele aphindze abhajatiswa lajabulela “bungani lobusedvute” nemuntfu lomkhulu kakhulu emhlabeni!

6. Singakhombisa njani kutsi siyabonga ngekuba bangani baNkulunkulu?

⁶ Singakhombisa njani kutsi sibutsatsa njengalobuligugu bungani betfu naJehova? Ngisho nobe sesikhonte Jehova sikhatsi lesidze kulamalanga ekugcina lesiphila kuwo, kufanele sihlale setsembekile njenga-Abrahama naJobe labetsembeka kuNkulunkulu iminyaka lengetulu kwalelikhulu. NjengaDanyela, kufanele sibutsatse njengalobuligugu bungani betfu naNkulunkulu kunekuphila kwetfu. (Dan. 6:7, 10, 16, 22) Ngekusitwa nguJehova, singakhona kubeketelela nobe ngutiphi tinkinga lesingabhekana nato kuze sihlale sibangani naye.—Fil. 4:13.

7. (a) Ngekusho kwemBhalo weTaga 15:8, Jehova utiva njani ngemithantazo yetfu? (b) Jehova uyiphendvula njani imithantazo yetfu?

⁷ Lomunye umcebo lesingawuboni ngumthantazo. Bangani labatsandzanako bahlale bacoca ngetintfo labaticabangako nangendlela labativa ngayo. Kwenteka lokufanako nangabe sibangani baJehova. Jehova ukhuluma natsi asebentisa liVi lakhe, futsi usebentisa lona kuze asivetele indlela lativa ngayo nalacabanga ngayo. Sikhuluma naye ngemthantazo, futsi siyakhona  kutfulula sifuba setfu kuye. Jehova uyajabula nakalalela imithantazo yetfu. (Fundza Taga 15:8.) Njengobe angumngani lositsandzako, Jehova uyayilalela aphindze ayiphendvule imithantazo yetfu. Esikhatsini lesinyenti usheshe aphendvule. Ngaletinye tikhatsi, kungadzingeka sichubeke sithantaza ngendzaba letsite. Nobe kunjalo, singaciniseka kutsi imphendvulo sitayitfola ngesikhatsi lesifanele nangendlela lekahle. Kuliciniso kutsi imphendvulo lesitayitfola kuNkulunkulu, ingaba ngulokwehlukile kuloku lebesikulindzele. Nasi sibonelo, kunekutsi asuse inkinga lesinayo, Jehova angasinika kuhlakanipha nemandla ‘ekuyibeketelela.’—1 Khor. 10:13.

8. Singakhombisa njani kutsi siyabonga ngesipho lesingumthantazo?

⁸ Singakhombisa njani kutsi siyabonga ngesipho setfu lesiligugu lesingumthantazo? Lenye indlela lesingakwenta ngayo loku kutsi silandzele sicondziso saJehova sekutsi ‘sihlale sithantaza.’ (1 Thes. 5:17) Jehova akasiphoceleli kutsi sithantaze. Kunaloko, uyayihlonipha inkhululeko yetfu futsi uyasikhutsata kutsi ‘siphikelele emthantazweni.’ (Rom. 12:12) Ngako singakukhombisa kubonga kwetfu ngekutsi sithantaze ngaso sonkhe sikhatsi. Kuliciniso kutsi akukafanele sikhohlwe kumbonga nekumdvumisa Jehova emithantazweni yetfu.—Hla. 145:2, 3.

9. Lomunye umzalwane utiva njani ngemthantazo, futsi wena utiva njani ngawo?

⁹ Nasichubeka sikhonta Jehova futsi sibona nendlela laphendvula ngayo imithantazo yetfu, sitambonga kakhulu ngesipho lasiphe sona lesingumthantazo. Cabanga ngesibonelo semzalwane Chris, losekuphele iminyaka lengu-47 asemsebentini wasikhatsi sonkhe. Utsi, “Kuyangijabulisa kuvuka ekuseni kuze ngithantaze. Kuyajabulisa kukhuluma naJehova ekuseni lokwa nakuphuma lilanga futsi yonkhe indalo iyinhle. Loku kungenta kutsi ngimbonge ngato tonkhe tintfo langiphe tona, lokufaka ekhatsi nelilungelo lekuthantaza. Nasengitophumula ntsambama, ngiyathantaza futsi loko kungenteka ngilale nginanembeza lohlantekile.”

10. Kungani kufanele siwutsatse njengaloligugu umoya longcwele waNkulunkulu?

¹⁰ Umoya longcwele ungulesinye sipho lesingasiboni lokufanele sisitsatse njengalesiligugu. Jesu wasikhutsata kutsi sichubeke sithantazela umoya longcwele. (Luk. 11:9, 13) Jehova usebentisa umoya wakhe kuze asinike emandla, ‘lokungemandla lamakhulu kakhulu.’ (2 Khor. 4:7; Imis. 1:8) Ngekusitwa ngumoya longcwele waNkulunkulu, singakhona kubeketelela nobe ngubuphi bumatima lesihlangabetana nabo.

11. Umoya longcwele ungasisita ngayiphi indlela?

¹¹ Umoya longcwele ungasisita sikhone kwenta tabelo tetfu emsebentini waJehova. Umoya waNkulunkulu ungasisita sitfutfukise emakhono lesinawo. Siyati kutsi siyakhona kwenta tintfo letinhle emsebentini waNkulunkulu ngobe sisitwa ngumoya wakhe longcwele.

12. Ngekusho kweTihlabelelo 139:23, 24, yini lesingacela kutsi umoya longcwele usisite kuyo?

¹² Lenye indlela lesingakhombisa ngayo kutsi siyabonga ngemoya longcwele, kutsi sithantazele kutsi usisite sibone nobe ngutiphi tifiso letimbi kanye nemicabango lemibi enhlitiyweni yetfu. (Fundza Tihlabelelo 139:23, 24.) Nasikuthantazela loku, Jehova utawusebentisa umoya wakhe longcwele kuze usisite siyicaphele imicabango lemibi kanye netifiso letimbi. Nasesiyati lemicabango lemibi kanye naletifiso letimbi, kufanele sithantazele umoya longcwele waNkulunkulu kutsi usinike emandla ekulwisana nalemicabango lemibi naletifiso letimbi. Nasenta njalo sitawube sikhombisa kutsi sitimisele kugwema nobe yini lengenta Jehova ayekele kusisita ngemoya wakhe longcwele.—Eph. 4:30.

13. Singakukhombisa njani kubonga ngemoya longcwele?

¹³ Singakukhombisa kubonga ngemoya longcwele ngekutsi sicabange ngetintfo lomoya longcwele losentele tona kulamalanga lesiphila kuwo. Ngaphambi kwekutsi Jesu enyukele ezulwini, watjela bafundzi bakhe watsi: “Nine nitawutfola emandla nawufika kini umoya longcwele, futsi nitawuba bofakazi bami . . . nakuto  tonkhe tincenye temhlaba.” (Imis. 1:8) Lamavi ayagcwaliseka lamuhla. Ngekusitwa ngumoya longcwele, bantfu labangetulu kwetigidzi letingu-8.5 labachamuka emhlabeni wonkhe bayachubeka baba tikhonti taJehova. Njengobe sibantfu baNkulnkulu, sinekuthula ngobe umoya longcwele waNkulunkulu usisita kutsi sisebentele lobuntfu lobuhle lobufaka ekhatsi lutsandvo, injabulo, kuthula, kubeketela, umusa, buhle, kukholwa, umoya lomuhle nekutibamba. Lobuntfu ‘butitselo temoya.’ (Gal. 5:22, 23) Umoya longcwele usipho lesiligugu kakhulu!

14. Ngukuphi kusitwa lesingakuboni lesikutfolako njengobe senta umsebenti wekushumayela?

¹⁴ Sinesipho lesiligugu lesingasiboni ‘sekusebenta’ naJehova, naJesu kanye netingilosi. (2 Khor. 6:1) Sisebenta kanye nabo nasenta umsebenti wekwenta bafundzi. Ngesikhatsi Pawula akhuluma ngaye kanye nangalabenta umsebenti wekushumayela, watsi: “Sitisebenti letikanye naNkulunkulu.” (1 Khor. 3:9) Nasenta umsebenti wekushumayela, sisuke sikhombisa kutsi sitisebenti letikanye naJesu. Khumbula kutsi ngemuva kwekuyala balandzeli bakhe kutsi bente bantfu ‘bato tonkhe tive babe bafundzi,’ Jesu watsi kubo: “Mine nginani.” (Mat. 28:19, 20) Tingilosi tisisita ngani? Kusibusiso lesikhulu kucondziswa tingilosi njengobe simemetela ‘tindzaba letimnandzi taphakadze kulabo labahlala emhlabeni’!—Semb. 14:6.

15. Shano sibonelo lesiseBhayibhelini lesikhombisa umsebenti lobalulekile lowentiwa nguJehova emsebentini wekushumayela.

¹⁵ Lolusito loluvela ezulwini lesilutfolako lusisita kutsi sikhone kwentani? Njengobe sihlanyela umlayeto weMbuso, lenye inhlanyelo iwela enhlitiyweni levumako futsi ikhule. (Mat. 13:18, 23) Ngubani lowenta lenhlanyelo yeliciniso kutsi ikhule futsi itsele titselo? Jesu washo kutsi kute umuntfu longaba ngumlandzeli wakhe ngaphandle kwekutsi “Babe . . . amdvonse.” (Joh. 6:44) LiBhayibheli lisiniketa sibonelo lesicondzile ngaloku. Khumbula ngesikhatsi Pawula afakaza kulesinye sicumbi sebafati lebesingephandle kwelidolobha laseFiliphi. Naka loko liBhayibheli lelikushoko ngalomunye walabafati lokutsiwa nguLidiya, litsi: “Jehova wavula inhlitiyo yakhe kute inake tintfo lebetishiwo nguPawula.” (Imis. 16:13-15) NjengaLidiya, Jehova udvonse tigidzi tebantfu kutsi tite kuye.

16. Ngubani lokufanele advunyiswe nangabe siphumelela emsebentini wekushumayela?

¹⁶ Ngubani lokufanele simdvumise nangabe sitfola imiphumela lemihle emsebentini wekushumayela? Pawula wawuphendvula lombuto ngesikhatsi abhalela libandla laseKhorinte atsi: “Mine ngahlanyela, Apholosi wanisela, kodvwa Nkulunkulu wachubeka akhulisa, kuze loyo lohlanyelako naloyo loniselako bangabi lutfo, kodvwa kube nguNkulunkulu, lokunguye lokhulisako.” (1 Khor. 3:6, 7) Kufanele silingise Pawula ngekutsi ludvumo siluyise kuJehova nangabe sitfola imiphumela lemihle emsebentini wekushumayela.

17. Singakukhombisa njani kubonga ngekusebenta naNkulunkulu, naKhristu kanye netingilosi?

¹⁷ Singakhombisa njani kutsi siyabonga ngelilungelo lekusebenta naNkulunkulu, naKhristu kanye netingilosi? Loko singakwenta ngekutsi sitimisele kutjela bantfu tindzaba letimnandzi teMbuso. Tinyenti tindlela lesingakwenta ngato loku, kungaba ‘kushumayela embikwebantfu nasemtini ngemuti.’ (Imis. 20:20) Labanyenti bayakujabulela nekushumayela bangakahleli. Nabahlangana nemuntfu labangamati,  bambingelela kahle futsi bayetama kucala incociswano. Nangabe lomuntfu anesifiso sekukhuluma, ngekuhlakanipha babese bacoca naye ngetindzaba letinhle teMbuso.

18-19. (a) Siyinisela njani inhlanyelo yeliciniso? (b) Shano sibonelo lesikhombisa kutsi Jehova wamsita njani lomunye umfundzi weliBhayibheli.

¹⁸ Njengobe “sitisebenti letikanye naNkulunkulu,” akukafanele sihlanyele liciniso kuphela, kodvwa kufanele silinisele. Nangabe lotsite anesifiso sekufundza, sitawenta imetamo kuze sicoce naye nobe sicele lotsite kutsi achumane naye kuze bacalise sifundvo seliBhayibheli. Njengobe lomuntfu atfutfuka, sitawujabula kubona indlela Jehova latamsita ngayo kuze ashintje indlela lacabanga ngayo nalativa ngayo.

¹⁹ Cabanga ngesibonelo saRaphalalani lobekayinyanga eSouth Africa. Bekakutsandza loko lebekakufundza eBhayibhelini. Kwaba matima kutsi emukele loko liVi laNkulunkulu lebelikusho mayelana nekukhuluma nalabafile. (Dut. 18:10-12) Kancane kancane, wavumela liVi laNkulunkulu kutsi liyishintje indlela lebekacabanga ngayo. Ekugcineni, wayekela kuba yinyanga ngisho nobe loko bekungumsebenti wakhe wekutiphilisa. Raphalalani losekaneminyaka lengu-60 utsi: “Ngibabonga kakhulu boFakazi baJehova labangisita ngetindlela letinyenti, njengekungisita kutsi ngitfole umsebenti. Ngetulu kwako konkhe, ngimbonga kakhulu Jehova ngekungisita kutsi ngente lushintjo ekuphileni kwami kuze ngikhone kuwenta kahle umsebenti wekushumayela njengobe sengibhajatisiwe.”

20. Yini lotimisele kuyenta?

²⁰ Kulesihloko, sicoce ngetipho letine lesingatiboni. Sipho lesihamba embili kunato tonkhe, lilungelo lekuba bangani baJehova labasedvute. Nasiba bangani labasedvute naJehova, siyazuza nakuletinye tipho lesingatiboni, letifaka ekhatsi kuthantaza kuye, kutfola lusito lwakhe ngemoya longcwele kanye nekusekelwa lokuvela ezulwini nasenta umsebenti wekushumayela. Shengatsi singachubeka sitimisela kukhombisa kubonga ngato tonkhe letipho lesingatiboni. Sifuna nekuhlale simbonga Jehova ngekuba ngumngani wetfu lomkhulu.