1. Kungani siciniseka kutsi siphila ‘emalangeni ekugcina’?

UTALWE ngemuva kwemnyaka wa-1914 yini? Nangabe kunjalo, kusho kutsi uphile ‘emalangeni ekugcina’ ekuphela kwalelive. (2 Thim. 3:1) Sonkhe sitivile tintfo Jesu lakhuluma ngato mayelana nalesikhatsi. Loku kufaka ekhatsi timphi, kutamatama kwemhlaba, tifo letingumshayabhuce, kwandza kwetintfo letimbi, kanye nekuphatfwa kabi kwebantfu baJehova. (Mat. 24:3, 7-9, 12; Luk. 21:10-12) Sibabonile bantfu batiphatsa ngendlela umphostoli Pawula latsi batatiphatsa ngayo. (Fundza libhokisi lelitsi “ Indlela Bantfu Labatiphatsa Ngayo Nyalo.”) Tsine BoFakazi BaJehova siyaciniseka kutsi siphila ‘emalangeni ekugcina.’—Mik. 4:1.

2. Ngumiphi imibuto lesitayiphendvula?

² Njengobe sisinyenti sikhatsi lesesendlulile kusukela nga-1914, kufanele kutsi nyalo siphila ekupheleni ‘kwemalanga ekugcina.’ Njengobe kuphela kwalelive sekusedvute, kufanele sitati timphendvulo tanayi imibuto lebalulekile: Ngutiphi tintfo letitakwenteka ekupheleni ‘kwemalanga ekugcina’? Yini Jehova lalindzele kutsi siyente njengobe sitawube sisamele letintfo kutsi tenteke?

3. Ngekusho kwesiphrofetho lesisembhalweni wa-1 Thesalonika 5:1-3, ngusiphi simemetelo lesitawukhishwa baholi bemhlaba?

³ Fundza 1 Thesalonika 5:1-3. Pawula ukhuluma ‘ngelilanga laJehova.’ Njengobe lamavi atfolakala kulombhalo, asho sikhatsi lokutawucala ngaso kuhlaselwa ‘kweBhabhulona Lenkhulu,’ lokungumbuso wenkholo yemanga, bese siphela nge-Amagedoni.  (Semb. 16:14, 16; 17:5) Litawutsi nje lisengakacali ‘lelilanga,’ tive titawube timemetela titsi: “Kuthula nekulondzeka!” (Lamanye emahumusho atsi: “Kunekuthula nenhlalakahle.”) Baholi bemhlaba bavame kusebentisa inkhulumo lephose ifane nabakhuluma ngekutfutfukisa budlelwane emkhatsini wemave. * Nobe kunjalo, lesimemetelo ‘sekuthula nekulondzeka’ lesichazwa liBhayibheli sitawube sehlukile. Kanjani? Sitawutsi nasiphuma lesimemetelo, bantfu labanyenti batawucabanga kutsi baholi bemhlaba sebaphumelele ekwenteni lomhlaba waba yindzawo lephephile futsi levikelekile. Kodvwa ‘kuhlupheka lokukhulu’ kutawucala futsi ‘kubhujiswa kutawubatuma ngekushesha lokukhulu.’—Mat. 24:21.

4. (a) Yini lesingayati mayelana nesimemetelo ‘sekuthula nekulondzeka’? (b) Yini lesiyatiko ngalesimemetelo?

⁴ Kukhona lesikwatiko mayelana nesimemetelo ‘sekuthula nekulondzeka.’ Nobe kunjalo, kukhona nalesingakwati. Asati kutsi yini letawenta baholi bemhlaba bakhiphe lesimemetelo nekutsi sitawukhishwa kanjani. Asati nekutsi titawuba tinyenti yini timemetelo letitawuphuma nobe kutawuphuma sinye nje. Kunobe yini letawenteka, naku lesikwatiko: Baholi bemhlaba ngeke baletse kuthula emhlabeni, ngako lesimemetelo labatawusikhipha ngeke sisiyenge. Esikhundleni saloko, sitawube sati kutsi ngulesimemetelo lesatjelwa kutsi sisilindzele. Sitawube siluphawu lwekutsi selitawucala “lilanga laJehova!”

5. Umbhalo wa-1 Thesalonika 5:4-6 usitjela kutsi senteni kuze sililungele “lilanga laJehova”?

⁵ Fundza 1 Thesalonika 5:4-6. Seluleko saPawula sisitjela loko lokufanele sikwente kuze sililungele “lilanga laJehova.” Kufanele ‘singalali njengabo bonkhe labanye,’ kunaloko kufanele ‘sihlale siphapheme.’ Nasi sibonelo, kufanele sicaphelisise kuze singatingeneli tindzaba telipoliki. Nangabe sitingenela, singabese siba ‘yincenye yelive.’ (Joh. 15:19) Siyati kutsi nguMbuso waNkulunkulu kuphela lotawuletsa kuthula emhlabeni.

6. Yini lesifuna kusita labanye kutsi bayente, futsi leni?

⁶ Akusitsi kuphela lesifuna kuhlala siphapheme, kodvwa sifuna kusita nalabanye bafundze loko liBhayibheli lelakusho ngalokutawenteka emhlabeni. Loku kufanele sikwente nyalo kusengakacali kuhlupheka lokukhulu, ngobe nasekucalile kutawube sekwephutile kutsi bantfu bacale ngaleso sikhatsi kukhonta Jehova. Kungako kubalulekile kutsi sishumayele nyalo! *

7. Yini Jehova lalindzele kutsi siyente nyalo?

⁷ Kulesikhatsi lesincane lesisele ngaphambi kwekutsi kucale ‘lelilanga,’ Jehova ulindzele kutsi sichubeke simatasa emsebentini wekushumayela. Kufanele siciniseke kutsi ‘sihlale sinalokunyenti kwekukwenta emsebentini weNkhosi.’ (1 Khor. 15:58) Jesu waphrofetha  ngalokolesitawukwenta. Ngesikhatsi akhuluma ngetintfo letiyinhloko lebetitawenteka emalangeni ekugcina, watsi: “Netindzaba letimnandzi kufanele tishunyayelwe etiveni tonkhe kucala.” (Mak. 13:4, 8, 10; Mat. 24:14) Ase ucabange nganaku: Njalo nawuyoshumayela, usuke usita kuze kufezeke lesiphrofetho lesesiBhayibhelini!

8. Sati njani kutsi umsebenti wekushumayela uyachubeka uphumelela?

⁸ Umsebenti wekushumayela uphumelele njani? Njalo ngemnyaka, banyenti bantfu labeva tindzaba letimnandzi teMbuso. Nasi sibonelo, cabanga ngekukhula kwelinani lebamemeteli beMbuso emhlabeni wonkhe kulamalanga ekugcina. Ngemnyaka wa-1914, bekunebamemeteli labangu-5 155 emaveni langu-43. Lamuhla, kunebamemeteli labangaba tigidzi letingu-8.5 emaveni langu 240! Nobe kunjalo, umsebenti wetfu usengakapheli. Kufanele sichubeke sitjela labanye kutsi nguMbuso waNkulunkulu kuphela lotawucedza tonkhe tinkinga tebantfu.—Hla. 145:11-13.

9. Kungani kufanele sichubeke sishumayela ngemlayeto weMbuso?

⁹ Ngeke siyekele kushumayela kuze kube ngulapho Jehova atsi asiyekele. Ngako bantfu basalelwe sikhatsi lesinganani kutsi bati Jehova Nkulunkulu kanye naJesu Khristu? (Joh. 17:3) Asati. Lesikwatiko kutsi labo ‘labatimisele kutfola kuphila lokuphakadze’ batawutemukela tindzaba letimnandzi futsi batawukhetsa kukhonta Jehova ngaphambi kwekucala kwekuhlupheka lokukhulu. (Imis. 13:48) Singabasita njani labantfu kusengakephuti?

10. Nguluphi lusito Jehova lasiniketa lona kuze sifundzise bantfu liciniso?

¹⁰ Jehova usebentisa inhlangano yakhe kute isinikete konkhe lesikudzingako kuze sifundzise bantfu liciniso. Nasi sibonelo, siceceshwa maviki onkhe emihlanganweni yasekhatsi neliviki. Lemihlangano isisita kutsi sikwati lokufanele sikusho nasicoca nemuntfu kwekucala nalapho sesibuyela kuye. Iphindze isifundzise kutsi singatichuba njani tifundvo teliBhayibheli. Inhlangano yaJehova iphindze yasiniketa Emathuluzi Ekufundzisa. Lamathuluzi asisita kutsi . . .

• sicale tincociswano,

• sikhulise sifiso semuntfu sekufundza,

• sikhutsate bantfu kutsi bafune kufundza lokunyenti ngeliBhayibheli,

• sifundzise liciniso kulesifundza nabo liBhayibheli, nekutsi

• sikhutsate labatsandza kufundza kutsi bangene  ku-website yetfu futsi basivakashele emaHholweni etfu eMbuso.

Liciniso likutsi akukeneli nje kutsi sibe nawo lamathuluzi. Kufanele siwasebentise. * Nasi sibonelo, nawucedza kucoca nemuntfu lokhombise sifiso lesikhulu sekufundza, umshiyela lipheshana nobe magazini, futsi lomuntfu utawuchubeka atifundzela kuze kube ngulapho niphindze nihlangana. Kungumtfwalo wetfu kutsi sichubeke simatasa ngekushumayela ngeMbuso njalo ngenyanga.

11. Kungani kwentiwa luhlelo Lwekutidadishela LiBhayibheli Usebentisa I-internet?

¹¹ Jehova uphindze asebentise luhlelo Lwekutidadishela LiBhayibheli Usebentisa I-internet lolutfolakala ku-jw.org^®, kuze asite bantfu kutsi bafundze liciniso. (Chafata incenye letsi BIBLE TEACHINGS > ONLINE LESSONS.) Kungani kwentiwe letifundvo? Njalo ngenyanga, banyenti kakhulu bantfu labasemhlabeni wonkhe labangena ku-Internet kuze bafune tifundvo letiseBhayibhelini. Tifundvo letiku-website yetfu tingabasita labantfu kutsi bacale kufundza liciniso leliseVini laNkulunkulu. Kungenteka labanye bantfu lococa nabo abavumi kuchutjelwa sifundvo seliBhayibheli. Nangabe kunjalo, bakhombise incenye letsi Kutidadishela LiBhayibheli Usebentisa I-internet leku-website yetfu nobe ubatfumelele i-link letabayisa kulencenye. *

12. Yini umuntfu langayifundza encenyeni letsi Kutidadishela LiBhayibheli Usebentisa I-internet?

¹² Incenye letsi Kutidadishela LiBhayibheli Usebentisa I-internet icoca ngetihloko letitsi: “LiBhayibheli kanye neMbhali walo,” “Bantfu Labagcamile eBhayibhelini,” kanye nalesitsi “Umlayeto WeliBhayibheli Loniketa Litsemba.” Umuntfu nakafundza kulencenye, utawubona kutsi:

• LiBhayibheli lingamsita njani

• Ungubani Jehova, ungubani Jesu nekutsi tibobani tingilosi

• Kungani Nkulunkulu adala bantfu

• Kungani kunekuhlupheka kanye nebubi

Lencenye iphindze icoce ngekutsi Jehova . . .

• utakucedza njani kuhlupheka nekufa,

• utawuvusa labafile, nangekutsi

• utawususa yonkhe imibuso yebantfu bese ubeka uMbuso waNkulunkulu.

13. Luhlelo lwekutidadishela liBhayibheli lungena esikhundleni setifundvo teliBhayibheli lesitichubela bantfu yini? Chaza.

¹³ Luhlelo lwekutidadishela liBhayibheli alungeni esikhundleni setifundvo teliBhayibheli lesitichubela bantfu. Jesu unikete tsine lelilungelo lekwenta bafundzi. Siyetsemba kutsi labo labanesifiso sekufundza liBhayibheli batayihlola lencenye letsi Kutidadishela LiBhayibheli Usebentisa I-internet, futsi batakutsandza loko labatakufundza kuyo baphindze bafune kufundza lokunyenti. Nangabe kunjalo, kungenteka basemukele sifundvo seliBhayibheli. Ekugcineni kwesifundvo ngasinye lesitfolakala kulencenye, umfundzi ukhutsatwa kutsi atfumele sicelo semuntfu langafundza naye liBhayibheli. Njalo ngelilanga, inhlangano yaJehova itfola ticelo letingaba ngu-230 ku-website yetfu letivela kubantfu labasemhlabeni wonkhe labafuna kuchutjelwa tifundvo teliBhayibheli! Kubaluleke kakhulu kutsi kube nemuntfu lokuchubela sifundvo seliBhayibheli!

14. Ngekusho kweticondziso taJesu letibhalwe kuMatewu 28:19, 20, yini lesetama kamatima kuyenta, futsi leni?

¹⁴ Fundza Matewu 28:19, 20. Njengobe sichuba tifundvo teliBhayibheli, kufanele setame  ngako konkhe lokusemandleni etfu ‘kwenta bafundzi, sibafundzise kugcina konkhe [Jesu] lasitjele kona.’ Kufanele sisite bantfu bacondze kutsi kubaluleke ngani kukhonta Jehova nekusekela uMbuso wakhe. Loku kusho kwetama kukhutsata bantfu kutsi balitsandze liciniso ngekutsi bakusebentise loko labakufundzako, batinikele kuJehova futsi babhajatiswe. Nguloko kuphela lokutabasita kutsi basindze ngelilanga laJehova.—1 Phet. 3:21.

15. Yini lesite sikhatsi sayo, futsi kungani?

¹⁵ Njengobe kuvetiwe ekucaleni, sesincane kakhulu sikhatsi lesisele nyalo ngaphambi kwekutsi kuphela kwalelive kufike. Ngenca yaloko, site sikhatsi sekuchubeka sifundza liBhayibheli nebantfu labangalwenti lushintjo endleleni labaphila ngayo kuze bakhombise kutsi bafuna kukhonta Jehova. (1 Khor. 9:26) Umsebenti wekushumayela uyaphutfuma! Banyenti kakhulu bantfu lokufanele beve umlayeto weMbuso kusengakephuti.

16. Ngekusho kwembhalo weSembulo 18:2, 4, 5, 8, yini lokufanele kutsi sonkhe siyente? (Buka umbhalo longentasi.)

¹⁶ Fundza Sembulo 18:2, 4, 5, 8. Lamavesi aveta lokutsite Jehova lalindzele kutsi bantfu labamkhontako bakwente. Onkhe emaKhristu eliciniso kufanele angatihlanganisi nenkholo yemanga. Kungenteka kutsi umfundzi weliBhayibheli bekalilunga lenkholo yemanga ngaphambi kwekutsi afundze liciniso. Kungenteka bekaya etinkonzweni takhona futsi ahlanganyela nasemisebentini lebeyitenta. Ungatfola nekutsi bekanikela ngemali enkholweni lebekakuyo. Ngaphambi kwekutsi umfundzi weliBhayibheli emukelwe njengemmemeteli longakabhajatiswa, kufanele atehlukanise ngalokuphelele nenkholo yemanga. Kufanele abhalele lisontfo lakhe incwadzi nobe inhlangano letsite leyincenye yenkholo yemanga asho kutsi akasesilo lilunga layo. *

17. Nguluphi luhlobo lwemsebenti wekutiphilisa umKhristu lokufanele alugweme, futsi leni?

¹⁷ UmKhristu weliciniso kufanele aciniseke kutsi umsebenti lawentako wekutiphilisa awuhlangani sanhlobo nenkholo yemanga. (2 Khor. 6:14-17) Sibonelo saloko kutsi ngeke abe sisebenti selisontfo lelitsite. Ngetulu kwaloko, umKhristu locashwe ngulenye inkampane ngeke avume kwenta umsebenti lomnyenti esakhiweni lesisetjentiselwa kukhonta kwemanga. Nangabe umKhristu anelibhizinisi, ngeke etame kutfola umsebenti nobe emukele sicelo sekuyosebenta esakhiweni senkholo yemanga. Kungani kungakafaneli sikutsatse kamelula  loku? Kungobe asifuni kuhlanganyela emsebentini kanye nasetonweni tenkholo yemanga, njengobe loko kungcolile kuNkulunkulu.—Isa. 52:11. *

18. Lomunye umzalwane wakuvumela njani kucondziswa timiso teliBhayibheli nakutiwa endzabeni yekwenta umsebenti wekutiphilisa?

¹⁸ Ngalomunye umnyaka, lomunye umzalwane longulomdzala welibandla futsi lobekanelibhizinisi lekubata wacelwa ngulenye indvodza kutsi ayowenta umsebenti lotsite wekubata esontfweni lebelisedolobheni lebekahlala kulo. Lendvodza beyati kutsi lomzalwane bekahlale asho kutsi ngeke asebente emasontfweni. Kodvwa ngaleso sikhatsi, lendvodza beyimfuna mbamba umuntfu lobekatawenta lomsebenti. Nobe kunjalo, lomzalwane wavumela kucondziswa timiso teliBhayibheli futsi akazange avume kuwenta lomsebenti. Evikini lelalandzela, liphephandzaba lakulelidolobha laveta sitfombe salenye indvodza leyawemukela lomsebenti ifaka siphambano kulelisontfo. Kube umzalwane wetfu akazange avumele kucondziswa timiso teliBhayibheli, ngabe kwavela sitfombe sakhe kuleliphephandzaba. Loko bekutalilimata kakhulu lidvumela lakhe kulamanye emaKhristu! Cabanga nangendlela Jehova lebekatawutiva ngayo!

19-20. (a) Yini lesiyifundzile kuze kube ngunyalo? (b) Yini lenye lokusafanele siyifundze?

¹⁹ LiBhayibheli litsi siphrofetho lesibaluleke kakhulu lesitawugcwaliseka masinyane sitawuba ngesikhatsi lapho babusi bemhlaba bakhipha simemetelo ‘sekuthula nekulondzeka.’ Ngenca yaloko Jehova lasifundzise kona, siyati kutsi tive ngeke tikutfole kuthula mbamba nalokutawuhlala njalo. Yini lokufanele siyente ngaphambi kwekutsi kuphume lesimemetelo futsi kufike ne-Amagedoni? Jehova ulindzele kutsi sichubeke simatasa ngekushumayela ngemlayeto weMbuso nekutsi setame kwenta bantfu labanyenti babe bafundzi. Kufanele singatihlanganisi sanhlobo nenkholo yemanga. Loko kusho kutsi kufanele siyekele kuba ngemalunga eBhabhulona Lenkhulu futsi siyekele nekwenta imisebenti lehlobene nayo.

²⁰ Kunaletinye tintfo letitawenteka ekupheleni ‘kwemalanga ekugcina.’ Ngetulu kwaloko, kunaletinye tintfo Jehova lalindzele kutsi sitente. Tiyini letintfo, futsi singakulungela njani konkhe lokutawenteka ngekushesha? Sitawucoca ngako esihlokweni lesilandzelako.