SIHLOKO LESIFUNDVWAKO 41
Singabasita Njani Labo Lesibafundzela LiBhayibheli Kutsi Bagcine Babhajatisiwe?—Incenye 1
“Nine nikhombisa kutsi niyincwadzi yaKhristu lebhalwe ngitsi tsine tikhonti.”—2 KHOR. 3:3.
INGOMA 78 “Fundzisa Bantfu LiVi LaNkulunkulu”
LOKUTAWUCOCWA NGAKO KULESIHLOKO *
Libandla lijabula kakhulu nalibona umfundzi lelimtsandzako abhajatiswa. (Buka sigaba 1)
1. Yini leshiwo ngu-2 Khorinte 3:1-3 lesisita sibone kutsi sinelilungelo lelivela kuJehova lekufundzisa bantfu liBhayibheli nekubabona babhajatiswa? (Buka sitfombe lesisekhasini lekucala.)
UTIVA njani nawubona umuntfu lobekafundzelwa liBhayibheli ensimini yenu abhajatiswa? Siyaciniseka kutsi ujabula kakhulu! (Mat. 28:19) Nangabe lomuntfu bekafundzelwa nguwe, ujabula kakhulu nawumbona abhajatiswa! (1 Thes. 2:19, 20) Bafundzi labasandza kubhajatiswa ‘batincwadzi tekusincoma,’ hhayi nje talaba lebebafundza nabo kuphela kodvwa talo lonkhe libandla.—Fundza 2 Khorinte 3:1-3.
2. (a) Ngumuphi umbuto lobalulekile lokufanele sicabange ngawo, futsi kungani? (b) Yini sifundvo seliBhayibheli? (Buka umbhalo longentansi.)
2 Kuyajabulisa kutsi eminyakeni lemine leyendlulile, bekubikwa bantfu labacishe babe ngu-10 000 000 labafundzelwa liBhayibheli * njalo ngenyanga emhlabeni wonkhe. Kuleyo minyaka, bantfu labangetulu kwa-280 000 babhajatiswa futsi baba BoFakazi BaJehova kanye nebafundzi baJesu labasha. Singatisita njani letigidzi tebantfu letifundzelwa liBhayibheli kutsi tibhajatiswe? Jehova usanika bantfu litfuba lekutsi babe boFakazi bakhe, kungako senta konkhe lokusemandleni etfu kuze sibasite batfutfuke futsi babhajatiswe ngekushesha. Sikhatsi siyaphela!—1 Khor. 7:29a; 1 Phet. 4:7.
3. Yini lesitayifundza kulesihloko mayelana nekuchuba tifundvo teliBhayibheli?
3 Ngesizatfu sekutsi kubaluleke kakhulu kwenta bafundzi nyalo, Sigungu Lesibusako sabuta emahhovisi eligatja kutsi yini lengentiwa kuze kusitwe bantfu labanyenti lesifundza nabo liBhayibheli kutsi batfutfuke futsi babhajatiswe. Kulesihloko nakuleso lesilandzelako, sitawubona kutsi yini lesingayifundza kumahlahlandlela lasanesikhatsi, kulabo labatitfunywa telivangeli nakubabonisi labajikelato. * (Taga 11:14; 15:22) Bachaza loko lokungentiwa ngumfundzisi naloyo lofundzelwako kuze lesifundvo sitawuba lusito kulona lofundzelwako. Kulesihloko, sitawucoca ngetintfo letisihlanu letingentiwa ngumfundzi kuze atfutfuke agcine sekabhajatisiwe.
FUNDZANI MAVIKI ONKHE
Buta umfundzi kutsi ningahlala yini phansi kuze nicoce ngeliBhayibheli (Buka tigaba 4-6)
4. Yini lokufanele siyati ngesifundvo seliBhayibheli lesichutjwa emnyango?
4 Bazalwane nabodzadze labanyenti bachuba tifundvo teliBhayibheli beme emnyango. Ngisho nobe lena kuyindlela lekahle yekukhulisa sifiso semuntfu sekufundza liBhayibheli, ngalokuvamile letincociswano tiba timfisha futsi atibi khona maviki onkhe. Kuze bachubeke bakhulisa sifiso semuntfu lotsandza kufundza liBhayibheli, labanye bamemeteli bacela inombolo yakhe kuze bamshayele nobe bambhalele umlayeto futsi bamcocele ngemBhalo lotsite. Kungaphela tinyanga solo bacoca. Kodvwa lomfundzi angatfutfuka yini aze abhajatiswe nangabe kunguleso kuphela sikhatsi nemandla lawacitsako kuze afundze liVi laNkulunkulu? Angeke.
5. Yini Jesu layisho kuLukha 14:27-33 lesingayisebentisa kuze sisite labo lesifundza nabo liBhayibheli?
5 Asebentisa umfanekiso, Jesu wachaza kutsi yini umuntfu lokufanele ayente nangabe afuna kuba ngumfundzi wakhe. Wakhuluma ngemuntfu lobekafuna kwakha umboshongo nangenkhosi lebeyifuna kuya emphini. Jesu watsi lomuntfu lofuna kwakha kufanele ‘acale ahlale phansi abale tindleko’ atocedza kwakha lomboshongo, nalenkhosi kufanele ‘icale ihlole’ kute ibone kutsi libutfo layo litawukhona yini kuncoba emphini. (Fundza Lukha 14:27-33.) Ngendlela lefanako, Jesu bekati kutsi umuntfu lofuna kuba ngumfundzi wakhe kufanele ahlolisise kutsi yini lokufanele ayente kuze amlandzele. Ngenca yaloko, kufanele sikhutsate bantfu lesifundza nabo liBhayibheli kutsi sifundze nabo njalo ngeliviki. Singakwenta njani loko?
6. Yini lesingetama kuyenta kuze sibe netifundvo letitfutfukako?
6 Sikhulise kancane kancane sikhatsi lenisicitsa nifundza emnyango. Njalo nawumvakashele, ngeta lelinye livesi ngetulu kwalawa lenivame kuwafundza. Nangabe lomnikati welikhaya sekajwayele kutsi nicoca sikhatsi lesidze, mbute kutsi ikhona yini lenye indzawo leningahlala kuyo kuze nichubeke nicoca. Imphendvulo yalomnikati welikhaya itawukhombisa kutsi utimisele kanganani kufundza liBhayibheli. Ngekuhamba kwesikhatsi, kuze umsite atfutfuke, ungase umbute kutsi uyafuna yini kufundza kabili evikini. Nobe kunjalo, kunyenti lokulindzelekile ngaphandle nje kwekufundza kanye nobe kabili evikini.
LUNGISELELA NGAPHAMBI KWEKUCHUBA SIFUNDVO
Lungiselela kahle ngaphambi kwekutsi uyochuba sifundvo futsi ukhombise umfundzi kutsi kulungiselelwa njani (Buka tigaba 7-9)
7. Umfundzisi angasilungiselela njani kahle sifundvo?
7 Njengobe ungumfundzisi, kufanele ulungiselele kahle ngaphambi kwekuchuba sifundvo. Ungacala ngekufundza lencwadzi futsi ubuke nemibhalo lekuyo. Tfola emaphuzu layinhloko. Cabanga ngesihloko salesifundvo, tihlokwana, imibuto, imibhalo letsi “fundza,” titfombe nema-video langakusita uchaze lesifundvo. Cabanga nangemuntfu lomfundzela liBhayibheli nekutsi utawachaza kanjani emaphuzu ngendlela lemelula nalecacile kuze umfundzi awacondze kahle futsi awasebentise.—Neh. 8:8; Taga 15:28a.
8. Emavi emphostoli Pawula lakuKholose 1:9, 10 asifundzisani ngekuthantazela labo lesifundza nabo liBhayibheli?
8 Nawusalungiselela, mthantazele lona lomfundzelako futsi uthantazele netidzingo takhe. Cela Jehova akusite umfundzise liBhayibheli ngendlela letawutsintsa inhlitiyo yakhe. (Fundza Kholose 1:9, 10.) Tibute kutsi kukhona yini lomfundzi latakutfola kumatima kukucondza nobe langeke avumelane nako. Hlale ukhumbula kutsi umgomo wakho kumsita kutsi atfutfuke agcine abhajatisiwe.
9. Chaza kutsi umfundzisi angamsita njani umfundzi kutsi alungiselele sifundvo sakhe.
9 Sinelitsemba lekutsi nangabe lesifundvo seliBhayibheli sichutjwa njalo, sitawusita lomfundzi abonge ngaloko Jehova naJesu labakwentile futsi afune kufundza lokunyenti. (Mat. 5:3, 6) Kuze azuze kulesifundvo, lomfundzi kufanele akunake loko lakufundzako. Kuze umsite akwente loko, mchazele kutsi kubaluleke ngani kutsi alungiselele sifundvo ngasinye ngaphambi kwekutsi nifundze nekutsi loko lakufundzako angakusebentisa njani. Ungamsita njani kutsi alungiselele? Lungiselelani sifundvo ndzawonye kuze abone kutsi kwentiwa njani. * Mkhombise kutsi angayitfola njani imphendvulo yembuto nekutsi kudvwebela emagama layinhloko kungamsita njani akhumbule imphendvulo. Ngemuva kwaloko, mcele aphendvule ngemagama akhe. Nakenta njalo, utawubese uyabona kutsi bekakucondza yini loko lebenifundza ngako. Kunalokunye longakhutsata umfundzi kutsi akwente.
MFUNDZISE KUTSI AKHULUME NAJEHOVA ONKHE MALANGA
Fundzisa lofundza naye liBhayibheli kutsi angakhuluma njani naJehova (Buka tigaba 10-11)
10. Kungani kubalulekile kutsi umfundzi afundze liBhayibheli onkhe malanga, futsi yini lokufanele ayente kuze azuze ngalokugcwele?
10 Ngetulu kwekufundza nemfundzisi wakhe maviki onkhe, lomfundzi angazuza ngekutentela letinye tintfo onkhe malanga. Kufanele akhulume naJehova. Kanjani? Ngekutsi alalele Jehova futsi akhulume naye. Angamlalela Nkulunkulu ngekutsi afundze liBhayibheli onkhe malanga. (Josh. 1:8; Hla. 1:1-3) Mkhombise kutsi angalusebentisa njani “Luhlelo Lwekufundza LiBhayibheli” lolutfolakala ku-jw.org. * Kuze azuze ngalokugcwele kulokufundza liBhayibheli, mkhutsate kutsi azindle ngaloko liBhayibheli lelimfundzisa kona ngaJehova nekutsi angakusebentisa njani ekuphileni kwakhe.—Imis. 17:11; Jak. 1:25.
11. Yini lengasita umfundzi kutsi athantaze kahle, futsi kungani kubalulekile kutsi athantaze njalo kuJehova?
11 Khutsata umuntfu lomfundzelako kutsi athantaze kuJehova onkhe malanga. Thantaza ngalokusuka enhlitiyweni nanicalisa sifundvo nalapho nisiphetsa futsi ulifake ligama lakhe nawuthantaza. Njengobe alalela imithantazo yakho, utawufundza kuthantaza ngalokusuka enhlitiyweni futsi athantaze kuJehova Nkulunkulu ngeligama laJesu Khristu. (Mat. 6:9; Joh. 15:16) Kufundza liBhayibheli onkhe malanga (kulalela Jehova) nekuthantaza (kukhuluma naJehova) kutamsita lomfundzi kutsi asondzelane naNkulunkulu. (Jak. 4:8) Nangabe loko akwenta onkhe malanga, kutamsita kutsi atfutfuke aze abhajatiswe. Yini lenye letamsita?
MSITE KUTSI AKHE BUNGANI NAJEHOVA
12. Umfundzisi angamsita njani umfundzi kutsi akhe bungani naJehova?
12 Loko lokufundvwa ngumfundzi esifundvweni sakhe seliBhayibheli kufanele kungahlali engcondvweni kuphela kodvwa kube nasenhlitiyweni yakhe. Leni? Tinhlitiyo tetfu, lokufaka ekhatsi tifiso tetfu kanye nendlela lesitiva ngayo kusikhutsata kutsi sente lokutsite. Jesu bekafundzisa bantfu tintfo letinyenti futsi bebakutsandza kufundza kuye. Kodvwa bantfu bebamlandzela ngobe bekatsintsa netinhlitiyo tabo. (Luk. 24:15, 27, 32) Umuntfu lomfundzelako kufanele abone Jehova njengeMuntfu mbamba, umuntfu langakha bungani naye futsi amtsatse njengaBabe wakhe, Nkulunkulu wakhe neMngani wakhe. (Hla. 25:4, 5) Nawusamfundzisa, msite abone buntfu baNkulunkulu lobuhle. (Eks. 34:5, 6; 1 Phet. 5:6, 7) Ngisho nobe nifundza siphi sihloko, msite abone kutsi Jehova ungumuntfu lonjani. Sita lomfundzi abone buntfu baJehova lobuhle lobufaka ekhatsi lutsandvo, umusa neluvelo. Jesu watsi “umtsetfo lomkhulu newekucala” kutsi “utsandze Jehova Nkulunkulu wakho.” (Mat. 22:37, 38) Sita umfundzi kutsi atsandze Jehova.
13. Niketa sibonelo lesingasita umfundzi kutsi afundze ngebuntfu baJehova lobuhle.
13 Nawucoca nemuntfu lomfundzelako, mchazele kutsi kungani umtsandza kakhulu Jehova. Loko kungasita umfundzi abone kutsi naye kufanele abe ngumngani waJehova futsi afundze kumtsandza kakhulu. (Hla. 73:28) Nasi sibonelo, akhona yini emavi lakulencwadzi leniyifundzako nobe lasembhalweni latsintsa inhlitiyo yakho futsi lachaza lokutsite ngaJehova, kungaba lutsandvo lwakhe, kuhlakanipha, kulunga nobe emandla akhe? Watjele umuntfu lomfundzelako futsi umtjele kutsi lesi ngulesinye sizatfu lesikwenta utsandze Babe wetfu losezulwini. Kodvwa kunalokunye lokufanele kwentiwe ngumfundzi kuze atfutfuke agcine abhajatisiwe.
MKHUTSATE KUTSI AYE EMIHLANGANWENI YELIBANDLA
Ngekushesha, khutsata lofundza naye kutsi acale kuya emihlanganweni yelibandla! (Buka tigaba 14-15)
14. Hebheru 10:24, 25, usitjelani ngemihlangano yelibandla lengasita bafundzi beliBhayibheli kutsi batfutfuke?
14 Sonkhe siyafuna kutsi bantfu lesibafundzelako batfutfuke baze babhajatiswe. Lenye indlela lesingabasita ngayo kubakhutsata kutsi baye emihlanganweni yelibandla. Bafundzisi lesebanesikhatsi batsi umfundzi locala kuya emihlanganweni ngekushesha, uyashesha nekutfutfuka. (Hla. 111:1) Labanye bafundzisi bachazela labo lababafundzelako kutsi kuze bafundze lokunyenti ngeliBhayibheli kufanele baye emihlanganweni. Fundza Hebheru 10:24, 25 nemfundzi, futsi umchazele kutsi utawuzuza ngani ngekuya emihlanganweni yelibandla. Mdlalele i-video letsi Yini Leyentekako EHholweni LeMbuso? * Msite atimisele kutsi angalovi emihlanganweni yelibandla.
15. Yini lesingayenta kuze sikhutsate umfundzi kutsi abe khona njalo emihlanganweni yelibandla?
15 Yini longayenta nangabe umuntfu lomfundzelako asengakase weta emihlanganweni nobe nakangeti njalo? Ngemdlandla, mtjele tintfo losandza kutifundza emihlanganweni yelibandla. Loko kutamkhutsata kakhulu kunekumane nje umtjele kutsi aye emihlanganweni. Mnikete Sicongosekulindza nobe Kuphila KwemaKhristu Nemsebenti Wawo lokufundvwako kuleloviki. Mkhombise kutsi kutawube kufundvwa ngani emihlanganweni evikini lelilandzelako futsi umbute kutsi nguyiphi incenye layitsandzako. Loko umfundzi latakuva futsi akubone emhlanganweni wakhe wekucala welibandla, kutawuba ncono kwengca loko lake wakubona futsi wakuva emihlanganweni yenkholo. (1 Khor. 14:24, 25) Utawati labanye bantfu labatibonelo letinhle langatilingisa futsi labatamsita atfutfuke aze abhajatiswe.
16. Yini lokufanele siyente kuze sichube tifundvo teliBhayibheli letigcina tibhajatisiwe, futsi yini lesitawucoca ngayo esihlokweni lesilandzelako?
16 Singatichuba njani tifundvo teliBhayibheli letitfutfuka tize tibhajatiswe? Singasita umfundzi ngamunye kutsi abone kutsi sibaluleke kanganani sifundvo sakhe ngekutsi simkhutsate kutsi afundze maviki onkhe futsi alungiselele sifundvo ngasinye. Sifuna nekumkhutsata kutsi akhulume naJehova onkhe malanga futsi akhe bungani naye. Sifuna kukhutsata bafundzi kutsi baye emihlanganweni yelibandla. (Buka libhokisi lelitsi “ Yini Lokufanele Yentiwe Bafundzi Kuze Batfutfuke Futsi Babhajatiswe?”) Esihlokweni lesilandzelako sitawufundza ngaletinye tintfo letisihlanu letingentiwa bafundzisi letitawusita labo lababafundzelako kutsi babhajatiswe.
INGOMA 76 Utiva Kanjani?
^ sig. 5 Kufundzisa umuntfu intfo letsite kusho kumsita “acabange, ative futsi ente tintfo ngendlela leyehlukile.” Matewu 28:19 longumBhalo wemnyaka wa-2020, usikhumbute ngekubaluleka kwekutadisha liBhayibheli nebantfu nekubafundzisa kutsi bangenta njani kuze bagcine babafundzi baJesu Khristu lababhajatisiwe. Lesihloko naleso lesilandzelako, sitasisita sibone kutsi singawenta njani lomsebenti lobalulekile.
^ sig. 2 INCHAZELO YELIGAMA: Nangabe ucoca njalo nemuntfu lotsite nangendlela lehlelekile usebentisa liBhayibheli, usuke uchuba sifundvo seliBhayibheli. Ungasibika lesifundvo nasewusichube tikhatsi letimbili ngemuva kwekutsi sewumtjengisile kutsi nitawufundza njani futsi sewuciniseka kutsi lesifundvo sitawuchubeka.
^ sig. 3 Letihloko tinemaphuzu labalulekile latfolakala eluchungechungeni lolutsi “Ukuqhuba Izifundo ZeBhayibheli Ezithuthukayo” lolwavela kuMsebenti Wetfu WeMbuso wa-July 2004 kuya ku-May 2005, lotfolakala ngesiZulu.
^ sig. 9 Bukela i-video letsi Kufundzisa Lesifundza Nabo Kutsi Balungiselele letsatsa imizuzu lemine. Ku-JW Library®, chafata MEDIA > OUR MEETINGS AND MINISTRY > IMPROVING OUR SKILLS.
^ sig. 10 Chafata BIBLE TEACHINGS > BIBLE STUDY TOOLS.
^ sig. 14 Ku-JW Library®, chafata MEDIA > OUR MEETINGS AND MINISTRY > TOOLS FOR THE MINISTRY.
