1, 2. (a) Chaza kutsi kungani kubhajatiswa kuyintfo lebalulekile. (b) Yini umuntfu lokufanele aciniseke ngayo ngaphambi kwekutsi abhajatiswe futsi kungani?

UNGUMUNTFU losemusha lofuna kubhajatiswa yini? Nangabe kunjalo, leli lilungelo lelikhulu longaba nalo. Njengobe kuvetiwe esihlokweni lesendlulile, kubhajatiswa kusincumo lesibalulekile. Usuke ukhombisa labanye kutsi sewutinikele kuJehova, lokusho kutsi umetsembise kutsi utamkhonta kuze kube phakadze nekutsi kwenta intsandvo yakhe kuyintfo lebaluleke kakhulu ekuphileni kwakho. Njengobe lesi kusetsembiso lesibalulekile kuNkulunkulu, kufanele ubhajatiswe kuphela nasewuvutsiwe, futsi unesifiso sekwenta njalo. Kufanele futsi ubhajatiswe nangabe sewucondza kutsi kusho kutsini kutinikela kuNkulunkulu.

² Nobe kunjalo, kungenteka ucabanga kutsi awukakulungeli kubhajatiswa. Nome ungase ucabange kutsi ukulungele kodvwa  batali bakho bacabanga kutsi kusafanele ume uze ube mdzala futsi uvutfwe. Yini lokufanele uyente? Ungadvumali. Esikhundleni saloko sebentisa leso sikhatsi kute utfutfuke khona utewufaneleka kutsi ubhajatiswe. Ungase utibekele imigomo kunati tintfo letintsatfu: (1) kuloko lokukholelwako, (2) kuloko lokwentako, (3) nasendleleni lokhombisa ngayo kubonga.

3, 4. Ngusiphi sifundvo bantfu labasha labangasifundza esibonelweni saThimothi?

³ Cabanga ngendlela longayiphendvula ngayo lemibuto: Kungani ngikholelwa kutsi Nkulunkulu ukhona? Kungani ngikholelwa kutsi liBhayibheli labhalwa nguNkulunkulu? Kungani ngilalela imiyalo yaNkulunkulu esikhundleni sekutsi ngilingise bantfu bakulelive ngendlela labatiphatsa ngayo? Lemibuto ingakusita kutsi ulandzele seluleko lesashiwo ngumphostoli Pawula lesitsi: “Nititfolele nine loko lokuyintsandvo yaNkulunkulu, lenhle, leyemukelekako nalephelele.” (Roma 12:2) Kungani kufanele ukwente loko?

⁴ Sibonelo saThimothi singakusita. Bekayati kahle imiBhalo ngobe unina wakhe nagogo wakhe bebamfundzisile. Nobe kunjalo, Pawula watjela Thimothi watsi: “Chubeka etintfweni lowatifundza nalowentiwa kutsi utikholwe.” (2 Thimothi 3:14, 15) Lapha ligama lelitsi “nalowentiwa” lisho “kwenta umuntfu akholelwe kutsi intfo letsite iliciniso.” Ngako Thimothi bekufanele aciniseke kutsi liciniso lingatfolakala emiBhalweni. Walemukela hhayi ngobe nje unina nagogo wakhe bamtjela kutsi ente njalo, kodvwa kungobe wazindla ngaloko lebekakufundza futsi kwamenta walemukela.​—Fundza Roma 12:1.

5, 6. Kungani kubalulekile ngawe kusebentisa ‘emandla ekucabanga’ nawusemusha?

⁵ Kutsiwani ngawe? Mhlawumbe sewunesikhatsi lesidze ulati liciniso. Nangabe kunjalo, kwente umgomo wakho kucabanga ngetizatfu letikwenta ulikholelwe. Loko kutakusita kutsi ucinise kukholwa kwakho futsi ukubalekele kutsatsa tincumo letimbi ngenca yekucindzetelwa bontsanga, indlela bantfu bakulelive labacabanga ngayo nobe indlela lotiva ngayo.

⁶ Nawufundza kusebentisa ‘emandla ekucabanga’ ngesikhatsi usemusha, utawukwati kubaphendvula bontsanga yakho nabakubuta batsi: ‘Yini lekwenta wati kutsi Nkulunkulu ukhona? Nangabe Nkulunkulu asitsandza, kungani avumela kutsi tintfo letimbi tenteke? Yini lekwenta utsi Nkulunkulu bekasolo akhona?’ Nasewukulungele kubhajatiswa, imibuto lenjengalena angeke ikwente ungabate kodvwa itakukhutsata kutsi ulidadishe kakhulu liBhayibheli.

7-9. Chaza kutsi tingakucinisa kanjani kukholwa kwakho tihloko letiphuma njalo ku-jw.org ngephansi kwesihloko lesitsi “Lifundisani Ngempela IBhayibheli?”

⁷ Kuba nesifundvo lotichubela sona kungakusita kutsi ukwati kuphendvula imibuto, ususe kungabata longahle ube nako, futsi ucinise kukholwa kwakho. (Imisebenti 17:11) Sinetincwadzi letinyenti letingakusita kutsi ukwente loko. Labanyenti bakutfole kulusito kufundza incwajana letsi “The Origin  of Life—Five Questions Worth Asking” nencwadzi letsi “Is There a Creator Who Cares About You?” Bantfu labasha labanyenti bakujabulele futsi kwabazuzisa kungena ku-jw.org kute bafundze kwatiswa lokungephansi kwesihloko lesitsi “Lifundisani Ngempela IBhayibheli?” Lesihloko ungasitfola ngephansi kwalesitsi IZIMFUNDISO ZEBHAYIBHELI. Letihloko lotawutitfola lapha tilungiselelwe kutsi tikusite ucinise kukholwa kwakho ngendzaba leseBhayibhelini.

⁸ Njengobe ulifundza liBhayibheli, kungenteka uyatati timphendvulo talemibuto lekuletihloko. Kodvwa uyaciniseka yini ngetimphendvulo takho? Letihloko titakusita kutsi ucabangisise ngemibhalo leminyenti futsi tikukhutsate ubhale tizatfu letikwenta ukwetsembe loko lokukholelwako. Loko kutakwenta kutsi ukwati kuchaza loko lokukholelwako kulabanye. Nangabe uyakhona kungena ku-jw.org ufundze letihloko letiphuma njalo ngephansi kwalesitsi “Lifundisani Ngempela IBhayibheli?,” ungatisebentisa esifundvweni lotichubela sona kute tikusite ucinise kukholwa kwakho.

⁹ Kufanele utibonele wena kutsi loko lokufundzako kuliciniso. Loko kutakusita ukulungele kubhajatiswa. Lomunye dzadze loseminyakeni yekutfomba watsi: “Ngaphambi kwekutsi ngincume kubhajatiswa, ngafundza liBhayibheli futsi ngabona kutsi lena yinkholo yeliciniso. Njengobe ngichubeka ngiphila, ngikukholelwa kakhulu loko.”

10. Kungani kulindzeleke kutsi umKhristu lobhajatisiwe ente tintfo ngekuvumelana nekukholwa kwakhe?

¹⁰ LiBhayibheli litsi: “Nekukholwa nakute imisebenti kufile.” (Jakobe 2:17) Nangabe unekukholwa lokucinile, utakukhombisa ngetento. ‘Utatiphatsa ngalokungcwele nangetento tekutinikela kuNkulunkulu,’ njengobe kusho liBhayibheli.​—Fundza 2 Phetro 3:11.

11. Chaza kutsi kusho kutsini ‘kutiphatsa lokungcwele.’

 ¹¹ Kuyini ‘kutiphatsa lokungcwele’? Nangabe loko lokwentako kungcwele, usuke utiphatsa kahle. Nasi sibonelo: Cabanga ngetinyanga letisitfupha letendlulile. Ngesikhatsi ulingwa kutsi wente lokubi, wacabangisisa yini ngekutsi ngukuphi lokulungile nalokungakalungi? (Hebheru 5:14) Uyatikhumbula yini tikhatsi lapho walwisana khona nesilingo nobe kucindzetelwa bontsanga? Esikolweni, usibonelo lesihle yini kulabanye? Uhlale wetsembekile yini kuJehova, nobe ulingisa bontsanga yakho kute bangatohlekisa ngawe? (1 Phetro 4:3, 4) Kuliciniso kutsi sonkhe sinesono. Ngaletinye tikhatsi, ngisho nebantfu lasebakhonte Jehova iminyaka leminyenti bangaba nemahloni futsi bakutfole kumatima kushumayela. Kodvwa umuntfu lotinikele kuNkulunkulu utatigcabha ngekutsi unguFakazi WaJehova, futsi loko ukukhombisa ngekutiphatsa kahle.

12. Tiyini tento ‘tekutinikela kuNkulunkulu,’ futsi kufanele sititsatse njani?

¹² Tiyini ‘tento tekutinikela kuNkulunkulu’? Tifaka ekhatsi imisebenti loyenta ebandleni, njengekuya emihlanganweni nekushumayela. Tiphindze tifake ekhatsi netintfo lotenta labanye bangakuboni, njengemithantazo loyenta ngasense kuJehova nesifundvo lotichubela sona. Umuntfu lonikele kuphila kwakhe kuJehova akacabangi kutsi kwenta loku kungumtfwalo. Utativa ngendlela lefana neyeNkhosi Davide leyatsi: “Yebo, Nkulunkulu wami, kujabula kwami kusekwenteni intsandvo yakho, imiyalo yakho isenhlitiyweni yami.”​—Tihlabelelo 40:8.

13, 14. Yini lesinayo lengakusita kutsi ukwati kwenta ‘tento tekutinikela kuNkulunkulu,’ futsi bantfu labasebasha bazuze njani?

¹³ Kute sikusite ukwati kutibekela imigomo, kunelishadi lelisekhasini 308 na-309 encwadzini letsi “Intsha Iyabuza—Izimpendulo Ezisebenzayo,” Umqulu 2. Kulelishadi ungabhala timphendvulo temibuto lenjengalena: “Icondzile yini imithantazo yakho, futsi yembulani ngelutsandvo lonalo ngaJehova?” “Yini lothantaza ngayo emithantazweni lotentela yona?” “Uyaya yini emsebentini wekushumayela ngisho nalapho batali bakho bangayi?” Lelishadi liphindze libe nesikhala longabhala kuso imigomo longafisa kutibekela yona mayelana nemithantazo yakho, sifundvo lotichubela sona nekushumayela.

¹⁴ Bantfu labanyenti labasha labafuna kubhajatiswa babonile kutsi lelishadi libaluleke kakhulu. Dzadze losemusha ligama lakhe lokunguTilda utsi: “Ngalisebentisa lelishadi kute ngitibekele imigomo. Ngayifinyelela ngamunye ngamunye, futsi ngemuva kwemnyaka ngase ngikulungele kubhajatiswa.” Umzalwane losemusha ligama lakhe lokunguPatrick naye lamsita lelishadi. Utsi:  “Ngase ngivele ngiyati imigomo yami, kodvwa kuyibhala phansi kwangenta ngasebenta ngekutimisela kute ngiyifinyelele.”

15. Chaza kutsi kungani kutinikela kufanele kube sincumo lotitsatsela sona.

¹⁵ Lomunye umbuto lokulelishadi utsi: “Utamkhonta yini Jehova ngisho nobe batali bakho nebangani bakho bayekela kumkhonta?” Nangabe unikela kuphila kwakho kuJehova futsi ubhajatiswe, nguwe lotawuba nebuhlobo naye. Ngako-ke, loko lokwentela Jehova akukafaneli kuncike kubatali bakho nobe kulomunye umuntfu. Kutiphatsa kwakho lokungcwele netento tekutinikela kuNkulunkulu kukhombisa kutsi uyaciniseka kutsi ulitfolile liciniso nekutsi ufuna kugcina timiso taNkulunkulu. Ngekushesha utawufaneleka kutsi ubhajatiswe.

16, 17. (a) Yini lokufanele ikhutsate umuntfu kutsi abe ngumKhristu? (b) Kukhombisa kubonga ngenhlawulo singakufanekisa kanjani?

¹⁶ Ngalelinye lilanga indvodza lebeyiwati kahle uMtsetfo waMosi yabuta Jesu yatsi: “Ngumuphi umtsetfo lomkhulu?” Jesu wayiphendvula watsi: “Kufanele utsandze Jehova Nkulunkulu wakho ngayo yonkhe inhlitiyo  yakho, nangawo wonkhe umphefumulo wakho, nangayo yonkhe ingcondvo yakho.” (Matewu 22:35-37) Jesu wachaza kutsi kutsandza Jehova kufanele kube ngiso sizatfu lesenta umuntfu abhajatiswe abe ngumKhristu. Indlela lehamba embili yekucinisa lutsandvo lwetfu ngaJehova kucabanga ngenhlawulo, sipho lesikhulu kakhulu Nkulunkulu lasinika bantfu. (Fundza 2 Khorinte 5:14, 15; 1 Johane 4:9, 19.) Nawenta kanjalo, utawufuna kukhombisa kubonga ngalesipho lesibalulekile.

¹⁷ Indlela lokhombisa ngayo kutsi uyabonga ngenhlawulo ingachazwa ngalendlela: Ase utibone ngeliso lengcondvo ucwila bese kuta umuntfu lotsite atokutakula. Ungavele uhambe uye ekhaya yini ufike wome bese uyamkhohlwa lomuntfu lokusitile? Cha! Ungachubeka umbonga lomuntfu lokusindzisile. Ngendlela lefanako, kufanele simbonge kakhulu Jehova naJesu ngenhlawulo. Sibakweleta kuphila kwetfu. Basisindzisile esonweni nasekufeni. Ngenca yekutsi bayasitsandza, nyalo sinelitsemba lekuphila phakadze emhlabeni loliPharadisi.

18, 19. (a) Kungani kungakafaneli kukwesabise kuba ngumuntfu waJehova? (b) Kukhonta Jehova kukwenta njani kuphila kwakho kujabulise?

¹⁸ Uyabonga yini ngaloko Jehova lakwentele kona? Nangabe kunjalo, utawube wenta kahle nawutinikela uphindze ubhajatiswe. Nawutinikela usuke wetsembisa Nkulunkulu kutsi utawenta intsandvo yakhe kuze kube phakadze. Kufanele yini wesabe kwenta lesetsembiso? Cha! Jehova ukufunela lokuncono kakhulu, futsi utabanika umvuzo labo labenta intsandvo yakhe. (Hebheru 11:6) Nangabe unikela kuphila kwakho kuNkulunkulu futsi ubhajatiswa, kuphila kwakho kutawuba ncono kakhulu. Umzalwane loneminyaka lengu-24 budzala lowabhajatiswa ngaphambi kwekutsi afike eminyakeni yekutfomba utsi: “Bengingaticondza kancono timfundziso teliBhayibheli kube besengikhulile, kodvwa kutsatsa sincumo sekutinikela kuJehova kwangivikela ekufuneni umcebo walelive.”

¹⁹ Jehova ukufunela lokuncono kakhulu. Nobe kunjalo, Sathane unemona futsi akanendzaba nawe. Nawungumlandzeli wakhe kute lokuhle latakunika kona. Angakunika njani tintfo lete tona? Ute tindzaba letimnandzi, futsi alikho likusasa lelijabulisako lasetsembisa lona. Angakunika likusasa lelingajabulisi ngobe ngulelo likusasa naye latawuba nalo.​—Sembulo 20:10.

20. Yini umuntfu losemusha langayenta kute atfutfuke, atinikele futsi abhajatiswe? (Hlola libhokisi lelitsi: “Kuze Sikusite Utfutfuke.”)

²⁰ Kunikela kuphila kwakho kuJehova kusincumo lesibaluleke kakhulu longasenta. Sewukulungele yini kusenta? Nangabe sewukulungele, ungesabi kwenta leso setsembiso. Kodvwa nangabe ucabanga kutsi awukakulungeli, sebentisa loko lesicoce ngako kulesihloko kuze uchubeke utfutfuka. Pawula watjela bazalwane baseFiliphi kutsi bachubeke batfutfuka. (Filiphi 3:16) Nangabe ulandzela leso seluleko, ngekushesha utawunikela kuphila kwakho kuJehova futsi ubhajatiswe.