1-3. (a) Nguluphi lushintjo lokungaba matima ngatsi kulwenta ngemuva kwekubhajatiswa? (b) Nangabe kutfutfuka kumatima kunaloko lebesikulindzele, ngumiphi imibuto lesingatibuta yona? (Buka sitfombe lesisekucaleni kwalesihloko.)

KWAPHELA iminyaka leminyenti Kevin agembula, abhema, asidzakwa, futsi asebentisa tidzakamiva. ^[1] (Fundza kwatiswa lokusekugcineni.) Ngemuva kwaloko wafundza ngaJehova futsi abefuna kuba ngumngani wakhe. Kodvwa kute ente loko, kwadzingeka ente lushintjo lolukhulu ekuphileni kwakhe. Wakhona kulwenta ngelusito lwaJehova nangemandla eliVi lakhe, liBhayibheli.​—Hebheru 4:12.

² Nasekabhajatisiwe Kevin, kwakusadzingeka ashintje buntfu bakhe kute abe ngumKhristu lokahle. (Efesu 4:31, 32) Abevame kusheshe atfukutsele. Wamangala nakatfola kutsi kwakulukhuni kangakanani ngaye kulawula intfukutselo yakhe. Ecinisweni Kevin utsi kufundza kulawula intfukutselo yakhe kwakulukhuni kakhulu kwendlula kuyekela tintfo  letimbi lebekatenta ngaphambikwekutsi abhajatiswe. Kodvwa wakhona kwenta lolushintjo ngesizatfu sekutsi wacela Jehova kutsi amsite nangekufundza liBhayibheli ngalokujulile.

³ Ngaphambikwekutsi sibhajatiswe, labanyenti betfu kwadzingeka kutsi bente lushintjo lolukhulu ekuphileni kwabo kute baphile ngekuvumelana naloko lokushiwo liBhayibheli. Kodvwa ngisho nanyalo, siyabona kutsi kunesidzingo sekwenta lushitjo loluncane kute sifanane naNkulunkulu naKhristu. (Efesu 5:1, 2; 1 Phetro 2:21) Sibonelo saloku kutsi kungenteka siyabona kutsi sesikhonona kakhulu nobe sesivame kuhleba futsi sisho tintfo letimbi ngalabanye. Ngaletinye tikhatsi singase sesabe loko labanye labangase bakucabange nobe batsi asikwenti lokulungile. Mhlawumbe sekuphele iminyaka leminyenti setama kushintja kodvwa siyachubeka senta emaphutsa lafanako. Ngako singase sitibute: ‘Kungani kumatima kangaka ngami kutsi ngente lolushintjo loluncane? Kufanele ngenteni kute ngisebentise loko lokushiwo liBhayibheli futsi ngichubeke ngitfutfukisa buntfu bami?’

4. Kungani singakhoni kujabulisa Jehova kuto tonkhe tintfo lesitentako?

⁴ Siyamtsandza Jehova futsi sinesifiso lesikhulu sekumjabulisa. Kodvwa kuyadzabukisa kutsi asikhoni kumjabulisa ngaso sonkhe sikhatsi ngobe sinesono. Sivame kutiva njengemphostoli Pawula lowatsi: “Nginaso sifiso kodvwa angikwati kwenta lokuhle.”​—Roma 7:18; Jakobe 3:2.

5. Nguluphi lushintjo lesalwenta ngaphambi kwekutsi sibhajatiswe, kodvwa ngubuti butsakatsaka lokungenteka sisalwisana nabo?

⁵ Ngaphambikwekutsi sibe yincenye yelibandla, kufanele siyekele kwenta tintfo Jehova latenyanyako. (1 Khorinte 6:9, 10) Kodvwa solo sinesono. (Kholose 3:9, 10) Ngako siyachubeka senta emaphutsa ngisho nobe sesineminyaka leminyenti sibhajatisiwe. Njengobe sikhatsi sichubeka, singaba netifiso letimbi nemiva lengakalungi, nobe singakutfola kumatima kulawula butsakatsaka lobutsite lobukitsi. Kuliciniso kutsi kungenteka silwisane nalobo butsakatsaka iminyaka leminyenti.

6, 7. (a) Yini leyenta kube melula ngatsi kuba bangani baJehova ngisho nobe sinesono? (b) Kungani kungakafaneli siyekele kucela Jehova kutsi asitsetselele?

⁶ Ngisho nobe sinesono, singaba bangani baJehova futsi simkhonte. Hlale ukhumbula kutsi waba njani ngumngani waJehova ekucaleni. Nguye lowabona lokuhle kuwe futsi wafuna kutsi umati. (Johane 6:44) Bekati kutsi uyawenta emaphutsa futsi unebutsakatsaka lobutsite nekutsi utawuchubeka uwenta. Nobe kunjalo, Jehova wachubeka afuna kutsi ube ngumngani wakhe.

⁷ Jehova wasitsandza kakhulu kangangekutsi wasipha sipho lesiligugu. Watfumela iNdvodzana yakhe lenguJesu kute inikele ngekuphila kwayo kuhlawulele tono tetfu. (Johane 3:16) Nangabe senta liphutsa, singamcela Jehova kutsi asitsetselele. Ngenca yenhlawulo, singaciniseka kutsi utasitsetselela nekutsi sitawuchubeka sibangani bakhe. (Roma 7:24, 25; 1 Johane 2:1, 2) Khumbula kutsi Jesu wafela toni letiphendvukako. Ngako-ke, ngisho nome sitiva shengatsi loko losikwentile  kubi kakhuu, kufanele singayekeli kuthantaza kuJehova sicele intsetselelo. Nangabe singamceli kutsi asitsetselele, loko kutawufanana nekwala kugeza tandla tetfu natingcolile. Kusijabulisa kakhulu kwati kutsi Jehova wente kwaba melula ngatsi kutsi sibe bangani bakhe ngisho nobe sinesono.​—Fundza 1 Thimothi 1:15.

8. Kungani kungakafaneli singabunaki butsakatsaka lesinabo?

⁸ Kuliciniso kutsi angeke singabunaki butsakatsaka betfu nobe sihlale sibeka taba. Jehova usitjelile kutsi luhlobo lolunjani lwebantfu lafuna lube bangani bakhe. (Tihlabelelo 15:1-5) Ngako nasifuna kusondzela kuye, kufanele sichubeke simlingisa yena neNdvodzana yakhe. Kufanele futsi sichubeke setama kulawula tifiso tetfu letimbi, futsi singase sikhone kuyekela letinye tato. Ngisho nobe sesinesikhatsi lesingakanani sibhajatisiwe, kufanele sichubeke sitfutfukisa buntfu betfu.​—2 Khorinte 13:11.

9. Sati njani kutsi singakhona kuchubeka sigcoka buntfu lobusha?

⁹ Umpostoli Pawula watjela emaKhristu watsi: “Ngako-ke kufanele nilahle buntfu lobudzala lobuvumelana nendlela lebenitiphatsa ngayo, naloboniwa tifiso letikhohlisako. Kodvwa kufanele nichubeke nentiwe nibe basha emandleni enu ekucabanga, nigcoke buntfu lobusha lobentiwa ngekuvumelana nentsandvo yaNkulunkulu ngekulunga nangebucotfo lobungibo.” (Efesu 4:22-24) Loku kusho kutsi kufanele sichubeke senta imetamo yekushintja futsi ‘sigcoke buntfu lobusha.’ Ngisho nobe sesinesikhatsi lesidze sikhonta Jehova, singachubeka sifundza lokunyenti ngebuntfu bakhe. LiBhayibheli lingasisita sichubeke senta lushintjo ebuntfwini betfu kute sibe nebuntfu lobufana nebaNkulunkulu.

10. Yini lokudzingeka siyente kuze sichubeke senta lushintjo ngelusito lweliBhayibheli, futsi ngumiphi imibuto lesingahle sitibute yona?

¹⁰ Sonkhe sifuna kulalela loko lokushiwo liBhayibheli. Kodvwa kufanele sisebente kamatima nangabe sifuna kushintja. Kungani kufanele sisebente kamatima? Jehova ngeke sekakhone yini kusentela tintfo tibe melula kute sente lokulungile?

11-13. Kungani Jehova alindzele kutsi sente imetamo kute silwisane nebutsakatsaka betfu?

¹¹ Nasicabanga ngemhlaba nako konkhe lokukuwo, asingabati kutsi Jehova unemandla ekwenta nome ngabe yini. Nasi sibonelo: Wadala lilanga lelinemandla lamakhulu kakhulu. Njalo ngemzuzwana lilanga likhicita kukhanya nekushisa lokukhulu. Kodvwa kudzingeka silinganiso lesincane salo kute tintfo letisemhlabeni tichubeke tiphila. (Tihlabelelo 74:16; Isaya 40:26) Jehova uphindze anikete tinceku takhe letisemhlabeni emandla natiwadzinga. (Isaya 40:29) Kuyacaca-ke kutsi kube Jehova abefuna, bekatakwenta  kube melula kakhulu ngatsi kutsi silwe nebutsakatsaka betfu futsi siyekele kuba netifiso letimbi. Kodvwa kungani angakwenti loko?

¹² Jehova usinikete inkululeko yekutikhetsela. Uyasivumela sitikhetsele kutsi sitamlalela yini nobe cha. Nasikhetsa kumlalela futsi sisebente kamatima kute sente intsandvo yakhe, sikhombisa kutsi siyamtsandza futsi sifuna kumjabulisa. Sathane utsi Jehova ute lilungelo lekubusa. Kodvwa nasilalela Jehova, siyakhombisa kutsi sifuna abe nguMbusi wetfu. Siyaciniseka nekutsi Babe wetfu lonelutsandvo uyitsatsa njengalebalulekile imetemo lesiyentako kute simlalele. (Jobe 2:3-5; Taga 27:11) Nangabe senta konkhe lokusemandleni kute silawule butsakatsaka betfu ngisho nobe kungasimelula kwenta njalo, siyetsembeka kuJehova futsi siyakhombisa kutsi sifuna abe nguMbusi wetfu.

¹³ Jehova usitjela kutsi kufanele sitimisele kute silingise buntfu bakhe. (Kholose 3:12; fundza 2 Phetro 1:5-7.) Ulindzele nekutsi sente konkhe lokusemandleni etfu kutsi silawule indlela lesitiva ngayo. (Roma 8:5; 12:9) Siyajabula nangabe siphumelela kwenta lushintjo endleleni lebesiphila ngayo.

14, 15. Yini lesingayenta kute sitfutfukise buntfu lobufana nebaJehova? (Hlola libhokisi lelitsi: “ LiBhayibheli Nemthantazo Lakugucula Kuphila Kwabo.”)

¹⁴ Yini lokufanele siyente kute sibe nebuntfu lobutsandvwa nguJehova? Esikhundleni sekutsi sitincumele tsine loko lokufanele sente lushintjo kuko, kufanele sivumele Nkulunkulu kutsi asicondzise.  Roma 12:2 utsi: “Yekelani kwentiwa nifane nalelive, kodvwa gucukani ngekutsi nishintje tingcondvo tenu, kuze nititfolele nine loko lokuyintsandvo yaNkulunkulu, lenhle, leyemukelekako nalephelele.” Ngako-ke kute sitfole kutsi yini Jehova layifunako, kufanele silwetsembe lusito lasiniketa lona. Kufanele sifundze liBhayibheli onkhe malanga, sizindle ngaloko lesikufundzako, futsi sithantaze kuJehova kute asiphe umoya wakhe longcwele. (Lukha 11:13; Galathiya 5:22, 23) Nasenta njalo, Jehova angasisita sikucondze loko lokumjabulisako futsi singakwati kucabanga ngendlela lacabanga ngayo. Umphumela waloko utawuba kutsi loko lesikucabangako, lesikushoko nalesikwentako kutamjabulisa kakhulu Jehova, futsi sitayifundza indlela lesingalawula ngayo butsakatsaka betfu. Kodvwa ngisho nobe kunjalo, kutawudzingeka sichubeke silwa nabo.​—Taga 4:23.

¹⁵ Ngetulu kwekufundza liBhayibheli onkhe malanga, kufanele silidadishe sisebentisa tincwadzi tetfu letifaka ekhatsi Sicongosekulindza ne-Phaphama! Tihloko letinyenti kulabomagazini tisifundzisa indlela lesingalingisa ngayo buntfu baJehova nendlela lesingalwisana ngayo nebutsakatsaka betfu. Singase sitfole tihloko nobe imibhalo lengaba lusito kitsi. Singawagcina lamavesi netihloko kute sikufundze kanyenti.

16. Kungani kungakafaneli siphelelwe ngemandla nangabe singakhoni kwenta lushintjo ngekushesha?

 ¹⁶ Kutsatsa sikhatsi kufundza kulingisa buntfu baJehova. Ngako nangabe ubona shengatsi usengakalwenti lushintjo lofisa kulwenta, beketela. Ekucaleni kungadzingeka kutsi ufake umfutfo kute wente loko lokushiwo liBhayibheli. Kodvwa nawuchubeka ucabanga futsi wenta tintfo ngendlela Jehova lafuna ngayo, kutawuba melula ngawe kucabanga ngendlela lacabanga ngayo nekwenta lokulungile.​—Tihlabelelo 37:31; Taga 23:12; Galathiya 5:16, 17.

17. Nangabe setsembekile kuJehova, nguliphi likusasa lelijabulisako lesingabuka phambili kulo?

¹⁷ Sibuke phambili esikhatsini lapho sitawuba bete sono futsi sikhonte Jehova phakadze. Ngaleso sikhatsi angeke kudzingeke silwisane nebutsakatsaka futsi kutawuba melula kulingisa Jehova. Kodvwa ngisho nanyalo siyakhona kukhonta Jehova ngobe usinikete sipho lesiyinhlawulo. Ngisho nobe sinesono, singamjabulisa Jehova nasichubeka sisebenta ngekutimisela kute sente lushintjo futsi silalele lasifundzisa kona eBhayibhelini.

18, 19. Yini lengasenta siciniseke kutsi liBhayibheli linemandla ekuchubeka lishintja kuphila kwetfu?

¹⁸ Kevin wenta konkhe lokusemandleni akhe kute afundze kulawula intfukutselo. Wazindla ngaloko lebekakufundza eBhayibhelini futsi wetama kwenta lushintjo ekuphileni kwakhe. Waphindze walandzela seluleko lasiniketwa ngemaKhristu labekanye nawo. Ngisho nobe kwamtsatsa iminyaka lembalwa Kevin kutsi atfutfuke, ngemuva kwesikhatsi waba yinceku lesebentako. Sekuphele iminyaka lengu-20 angulomdzala welibandla. Kodvwa ngisho nanyalo uyati kutsi kufanele achubeke alwisana nebutsakatsaka bakhe.

¹⁹ NjengaKevin, singachubeka sitfutfukisa buntfu betfu. Nasenta njalo sitawusondzelana naJehova. (Tihlabelelo 25:14) Nasenta konkhe lokusemandleni etfu kute sente lushintjo lolutamjabulisa, utasisita kutsi siphumelele. Sitawuciniseka kutsi ngelusito lweliBhayibheli sitawuchubeka senta lushintjo ekuphileni kwetfu.​—Tihlabelelo 34:8.