1. Ngutiphi tindlela bodzadze labasita ngato enhlanganweni yaJehova, kodvwa ngutiphi tinkinga labanyenti lababhekana nato? (Buka sitfombe lesisekhasini lekucala.)

SIJABULA kakhulu ngekuba nabodzadze labanyenti labasebenta kamatima emabandleni! Sibonelo saloko kutsi bayaphendvula emihlanganweni, babeka tinkhulumo futsi benta nemsebenti wekushumayela. Labanye bayasita ekunakekeleni emaHholwa eMbuso futsi bakhombisa kutsi bayabatsandza bazalwane nabodzadze. Kodvwa nabo baba netinkinga. Labanye babo banakekela batali babo lasebakhulile. Labanye babeketelela kuphikiswa ngemalunga emndeni. Labanye labakhulisa bantfwana babodvwa, basebenta kamatima kuze banakekele labantfwababo.

2. Kungani kufanele sente imetamo yekukhutsata bodzadze?

² Kungani kufanele sikhutsate bodzadze? Kungenca yekutsi labanye bantfu ababahloniphi labasikati. Kodvwa liBhayibheli lisikhutsata kutsi sibasekele. Nasi sibonelo, umphostoli Pawula watjela libandla laseRoma kutsi lemukele Foyibe futsi ‘lumnike nobe nguluphi lusito langahle aludzinge.’ (Rom. 16:1, 2) Ngesikhatsi Pawula asengumFarisi, kungenteka bekakholelwa kutsi labasikati abakabaluleki. Kodvwa ngemuva kwekutsi abe ngumKhristu, walingisa sibonelo saJesu, futsi waphatsa bafati ngenhlonipho nangemusa.—1 Khor. 11:1.

3. Jesu wabaphatsa njani labasikati, futsi bekativa njani ngalabo lebebenta intsandvo yaNkulunkulu?

³ Jesu bekabahlonipha bonkhe labasikati. (Joh. 4:27) Bekangabaphatsi ngendlela baholi benkholo lebebangemaJuda lebebabaphatsa ngayo. Ecinisweni lenye incwadzi lechaza liBhayibheli itsi: “Kute ngisho nakunye Jesu lakusho lebekukhombisa kutsi akabahloniphi bantfu labasikati.” Kodvwa Jesu bekabahlonipha kakhulu labasikati lebebenta intsandvo yaBabe wakhe. Wababita ngekutsi bodzadze wakhe, futsi  wababala kanye nemadvodza lebekawatsatsa njengemalunga emndeni wakhe.—Mat. 12:50.

4. Sitawucoca ngani kulesihloko?

⁴ Jesu bekahlale akulungele kusita labasikati lebebakhonta Nkulunkulu. Wabakhombisa kutsi bebabalulekile kuye, futsi wabavikela. Asesicoce ngekutsi singamlingisa njani Jesu ngekukhombisa kutsi siyabakhatsalela bodzadze wetfu.

5. Yini lengahle yente labanye bodzadze bakutfole kumatima kwakha bangani labakahle?

⁵ Ngisho nobe sibazalwane nobe sibodzadze, sonkhe siyakudzinga kuba nebangani labakahle. Kodvwa ngaletinye tikhatsi bodzadze bangahle bakutfole kumatima kwakha bangani labakahle. Leni? Naka naku lokushiwo ngulabanye babo. Lomunye dzadze lokutsiwa nguJordan * utsi: “Ngesizatfu sekutsi angikashadi, ngihle ngiva shengatsi angisiyo incenye yelibandla.” Kristen lolihlahlandlela futsi lowatfutsela kulenye indzawo kuze ente lokunyenti emsebentini wekushumayela, utsi: “Nawusandza kufika ebandleni, utiva ulahlekile.” Labanye bazalwane kuyenteka bative ngalendlela. Labo labahlala nemalunga emndeni langasibo BoFakazi BaJehova bangakutfola kumatima kusondzelana nemindeni yabo futsi nasebandleni bangase bative banganakwa. Labanye bodzadze bangahle bative banesitunge ngenca yekutsi bagulela emakhaya nobe banakekela tihlobo tabo letigulako. Annette utsi: “Bengingakhoni kucitsa sikhatsi nebazalwane nabodzadze ngobe benginakekela make wami.”

6. Ngekusho kwaLukha 10:38-42, Jesu wabasita njani boMata naMariya?

⁶ Jesu bekacitsa sikhatsi nabodzadze lebebatsandza Jehova, futsi bekangumngani mbamba kubo. Cabanga ngebungani lebakanabo naMariya kanye naMata, bobabili lebebangakashadi. (Fundza Lukha 10:38-42.) Jesu wabenta bativa bakhululekile ngaloko lebekakukhuluma nangetento takhe. Mariya wativa akhululekile kuhlala etinywaweni takhe. * Ngesikhatsi Mata akhatsatekile ngekutsi Mariya akamsiti, wativa akhululekile kutjela Jesu loko lebekumkhatsata. Njengobe bebahlangene kulombutsano, Jesu wasita labafati lababili kutsi bafundze tifundvo letibalulekile. Wakhombisa kutsi uyabakhatsalela bona kanye nemnakabo Lazaru ngekutsi ahle abavakashela. (Joh. 12:1-3) Ngesikhatsi Lazaru agula kamatima, Mariya naMata bebati kutsi bangamcela Jesu kutsi abasite.—Joh. 11:3, 5.

7. Nguyiphi lenye indlela lesingakhutsata ngayo bodzadze?

⁷ Kulabanye bodzadze, imihlangano ikuphela kwelitfuba lababanalo lekuba nebazalwane babo. Ngako sifuna kulisebentisa kahle lelitfuba kuze sibemukele, sikhulume nabo futsi sibente babone kutsi sinendzaba nabo. Jordan lesike sakhuluma ngaye ekucaleni utsi: “Kungikhutsata kakhulu kuva bazalwane bangibonga ngetimphendvulo lengitishoko emihlanganweni, bacela kuhamba nami ensimini, nobe bangikhombisa kutsi bayangitsandza.” Kufanele sibakhombise bodzadzewetfu kutsi babalulekile kitsi. Kia utsi: “Ngiyati kutsi nakwenteka ngingayi esifundvweni ngitawubona nje ngemlayeto ungibuta kutsi ngiyaphila yini. Loko kuyangikhombisa kutsi bazalwane nabodzadze bayangitsandza.”

8. Ngutiphi letinye tindlela lesingalingisa ngato Jesu?

 ⁸ NjengaJesu, natsi singasihlela sikhatsi kuze sibe nabodzadzewetfu. Singabamema emakhaya etfu kuze sidle nabo nobe sitijabulise nabo. Nangabe sibamemile, kufanele siciniseke kutsi tintfo lesitishoko tiyabakhutsata. (Rom. 1:11, 12) Labadzala belibandla kufanele babe nesimo sengcondvo lesifana nesaJesu. Jesu bekati kutsi kulabanye kutawuba matima kuhlala bangakashadi, kodvwa bekati kutsi kuze umuntfu ahlale ajabulile akuyi ngekutsi ushadile yini nangekutsi unabo yini bantfwana. (Luk. 11:27, 28) Kunaloko, injabulo lehlala njalo sitayitfola nangabe kukhonta Jehova kuyintfo leta kucala ekuphileni kwetfu.—Mat. 19:12.

9. Yini labadzala belibandla labangayenta kuze basite bodzadze?

⁹ Labadzala belibandla ngibo lokufanele bahambe embili ekuphatseni kahle bodzadze, kube shengatsi bomake babo nobe bosisi babo. (1 Thim. 5:1, 2) Labadzala benta kahle ngekusebentisa sikhatsi sabo kuze bakhulume nabodzadze ngaphambi kwemhlangano nobe ngemuva kwawo. Kristen utsi: “Lomunye lomdzala wabona kutsi ngimatasa kakhulu, futsi wabuta kutsi ngivame kwentani. Kwangijabulisa kubona kutsi bekanendzaba nami.” Nangabe labadzala batinika sikhatsi sekukhuluma nabodzadze ebandleni, basuke bakhombisa kutsi banendzaba nabo. *  Annette lesike sakhuluma ngaye uyachaza kutsi kubaluleke ngani kuhlale ukhuluma nalabadzala belibandla. Utsi: “Siyakhona kwatana kancono. Ngako nangiba nenkinga, ngiyakhona kucela lusito lwabo.”

10. Yini lengenta bodzadze kutsi bajabule?

¹⁰ Sonkhe siyajabula nangabe labanye bakubona loko lesikwentako futsi basibonga ngemsebenti lesiwentako. Kodvwa nangabe labanye bangakuboni lokuhle lesikwentako futsi bangasibongi ngalesikwentako, singaphelelwa ngemandla. Lelinye lihlahlandlela lelingakashadi lokutsiwa ngu-Abigail litsi ngalesinye sikhatsi litiva linganakwa. Abigail utsi: “Bati nje kutsi ngingusisi wabani nekutsi ngingumntfwana wabani. Ngaletinye tikhatsi ngiva shengatsi bantfu abanginaki.” Nobe kunjalo, naka naku lokwashiwo nguPam. Waba sitfunywa selivangeli iminyaka leminyenti angakashadi. Ngemuva kwesikhatsi, wabuyela ekhaya kuze ayonakekela batali bakhe. Nyalo useminyakeni yabo-70 futsi usachubeka alihlahlandlela. Pam utsi: “Lokungisite kakhulu kutjelwa ngulabanye kutsi bayabonga ngemsebenti lengiwentako.”

11. Jesu wakhombisa njani kutsi uyabonga ngemsebenti lobewentiwa bafati lebebahamba naye nakashumayela?

¹¹ Jesu walujabulela lusito lebekalutfola kubafati lebebesaba Nkulunkulu futsi lebebamsita “basebentisa tintfo tabo.” (Luk. 8:1-3) Akagcinanga nje ngekubavumela kutsi bamsite, kepha wabafundzisa emaciniso labalulekile ngentsandvo yaNkulunkulu. Sibonelo saloko kutsi wabatjela kutsi utawufa aphindze avuswe. (Luk. 24:5-8) Watjela labafati ngetinkinga lebebatawubhekana nato njengobe nje bekabatjelile nebaphostoli bakhe. (Mak. 9:30-32; 10:32-34) Ngisho nobe baphostoli bakhe babaleka ngesikhatsi aboshwa, labanye balabafati lebebamsekela bebaseceleni kwakhe ngalesikhatsi afa elugodvweni.—Mat. 26:56; Mak. 15:40, 41.

12. Ngumuphi umsebenti Jesu lawunika bafati?

¹² Jesu wanika bafati umsebenti lobalulekile. Nasi sibonelo, bafati labesaba Nkulunkulu baba bekucala kubona kutsi Jesu uvusiwe. Wacela labafati kutsi bayotjela baphostoli kutsi sewuvusiwe ekufeni. (Mat. 28:5, 9, 10) Kungenteka kutsi ngeliPhentekhoste langa-33 C.E. ngesikhatsi umoya longcwele utfululwa, nebafati bebakhona. Nangabe kunjalo, kungenteka kutsi nabo ngalokusimangaliso bakhuluma ngetilwimi futsi batjela labanye “tintfo letimangalisako taNkulunkulu.”—Imis. 1:14; 2:2-4, 11.

13. Yini leyentiwa bafati labangemaKhristu lamuhla lengasenta kutsi sibonge ngaloko labakwentako?

¹³ Bodzadzewetfu badzinga kubongwa ngako konkhe labakwentela Jehova. Loko kufaka ekhatsi kwakha nekulungisa takhiwo, kusekela emacembu aletinye tilwimi nekuyosita eBethel. Bayasita nakuvele tehlakalo, bahumushe tincwadzi tetfu futsi babe mahlahlandlela netitfunywa telivangeli. Njengebazalwane, nabodzadze bayaya esikolweni semahlahlandlela, eSikolweni Sebavangeli BeMbuso naseSikolweni saseGileyadi. Ngetulu kwaloko, bafati basita emadvodza abo kuze ente imisebenti yelibandla neyenhlangano yaJehova. Labazalwane ‘batipho letibantfu’ futsi benta tintfo letinyenti kuze basite labanye. Nobe kunjalo, bekungaba matima kuwenta lomsebenti kube bafati babo ababasiti. (Ef. 4:8) Tikhona yini tindlela longasita ngato labodzadze emsebentini labawentako?

14. Ngenca yaloko lokushiwo Tihlabelelo 68:11, yini labadzala labahlakaniphile labayentako?

¹⁴ Labadzala belibandla labahlakaniphile bayati kutsi bodzadze ‘basicumbi lesikhulu’ sebafati labafunako kusebenta futsi  bavamile kuba nelikhono lekufundzisa ngetindzaba letimnandzi. (Fundza Tihlabelelo 68:11.) Ngako labadzala bafuna tindlela tekufundza kulamakhono abo. Abigail lesike sakhuluma ngaye utsi uyakhutsateka nangabe bazalwane bambuta tindlela letiphumelelako nakacalisa tincociswano nakasensimini. Utsi: “Loko kungenta ngibone kutsi nginemsebenti lobalulekile enhlanganweni yaJehova.” Ngetulu kwaloko, labadzala bayati kutsi bodzadze labetsembekile futsi lasebakhulile banelikhono lekusita bodzadze labasebasha nabanetinkinga. (Thit. 2:3-5) Ngako-ke kufanele sibatsandze futsi sibabonge bodzadzewetfu!

15. Ngutiphi timo letingenta kutsi bodzadze badzinge kuvikelwa?

¹⁵ Ngalesinye sikhatsi bodzadze bangahle badzinge kuvikelwa nangabe babhekene nesimo lesitsite. (Isa. 1:17) Nasi sibonelo, dzadze loshonelwe ngumyeni wakhe nobe lodivosile angahle adzinge umuntfu longamsita amkhulumele nobe amentele tintfo lebetentiwa yindvodza yakhe. Dzadze losakhulile angahle adzinge lusito lwekukhuluma nabodokotela. Nobe dzadze lolihlahlandlela losita kuleminye imisebenti yenhlangano angahle adzinge lotsite longamkhulumela nangabe labanye bamsola ngekutsi akayi ensimini njengalamanye emahlahlandlela. Ngutiphi letinye tindlela lesingasita ngato bodzadzewetfu? Asesiphindze sicoce ngesibonelo saJesu.

16. Ngekusho kwaMakho 14:3-9, Jesu wamvikela njani Mariya?

¹⁶ Ngesikhatsi labanye bangaticondzi tintfo lebetentiwa ngulabanye bafati lebebesaba Nkulunkulu, Jesu wabavikela. Sibonelo saloko kutsi wamvikela Mariya ngesikhatsi Mata amsola. (Luk. 10:38-42) Waphindze wamvikela ngesikhatsi labanye bacabanga kutsi wente sincumo lesibi. (Fundza Makho 14:3-9.) Jesu wasicondza sizatfu lesenta Mariya wenta loko futsi wambonga, watsi: “Wente sento lesihle kimi. . . . Wente loko lokusemandleni akhe.” Waphindze waphrofetha kutsi loko lakwentile kutawukhulunywa ngako “nobe ngukuphi lapho letindzaba letimnandzi tishunyayelwa khona emhlabeni wonkhe,” futsi nguloko lokwentiwa ngulesihloko. Kujabulisa kakhulu kutsi Jesu watsi letindzaba letimnandzi titawushunyayelwa emhlabeni wonkhe ngesikhatsi advumisa Mariya ngesento sakhe semusa! Emavi aJesu amcinisekisa Mariya ngemuva kwekutsi bantfu bamsole!

17. Niketa sibonelo sekutsi kunini lapho kungahle kudzingeke khona kuvikelwe dzadze.

¹⁷ Uyabavikela yini bodzadze nakunesidzingo? Ase ucabange nganasi sibonelo. Labanye bamemeteli bayanaka kutsi lomunye dzadze lonendvodza lengasuye Fakazi uyephuta kufika emihlanganweni futsi ahambe ngekushesha nje nayiphela. Bayanaka nekutsi akavami kuta nebantfwabakhe. Ngako bayamsola ngobe bacabanga kutsi kufanele ente konkhe lokusemandleni akhe kuze ente indvodza yakhe imvumele ete nabantfwabakhe emihlanganweni. Kodvwa abati kutsi lodzadze wenta konkhe langakhona kukwenta. Minyenti kakhulu imisebenti lanayo, futsi akusuye lotsatsa sincumo ngebantfwabakhe. Yini longayenta nawuva labanye bamsola ngalendlela? Nangabe umncoma lodzadze ngemsebenti lawentako futsi utjela labanye ngemsebenti wakhe lomuhle lawentako, loko kungenta kutsi labanye bayekele kumsola.

18. Ngutiphi letinye tindlela lesingasita ngato bodzadze?

¹⁸ Singabakhombisa bodzadze kutsi siyabatsandza ngekutsi sibasite ngetintfo labatidzingako. (1 Joh. 3:18) Annette, dzadze lobekanakekela make wakhe logulako  utsi: “Labanye bazalwane nabodzadze bebeta ekhaya kuze bangisite khona ngitokhona kwenta letinye tintfo nobe baphatse kudla. Loko kwangenta ngativa ngitsandvwa futsi ngiyincenye yelibandla.” Jordan naye walutfola lusito lebekaludzinga. Lomunye umzalwane wamfundzisa indlela yekunakekela imoto. Utsi: “Kumnandzi kubona kutsi bazalwane nabodzadze bafuna ngihlale ngiphephile.”

19. Ngutiphi letinye tindlela labadzala belibandla labangasita ngato bodzadze?

¹⁹ Labadzala belibandla nabo bayetama kunakekela tidzingo tabodzadze. Bayati kutsi Jehova ufuna baphatfwe kahle bodzadze. (Jak. 1:27) Labadzala balingisa Jesu futsi bayacabangela, loko bakwenta ngekutsi bangabeki imitsetfo nangabe kudzingeka kutsi babe nemusa futsi babe nekucondza kuleso simo. (Mat. 15:22-28) Nangabe labadzala benta imetamo kuze babasite, bodzadze bativa batsandvwa nguJehova nayinhlangano yakhe. Ngesikhatsi umbonisi welicembu laKia eva kutsi utawutfutsela kulelinye likhaya, ngekushesha nje wenta tindlela tekutsi atfole lusito. Kia utsi: “Loko kwenta kutsi ngingakhatsateki kakhulu. Ngenca yekutsi bebangikhutsata futsi bangisita ngetintfo lengitidzingako, labadzala bangikhombisa kutsi ngibalulekile ebandleni nekutsi angisingedvwa nangiba setinkingeni.”

20-21. Singakhombisa njani kutsi sibatsandza bonkhe bodzadze labasebandleni?

²⁰ Kuwo onkhe emabandla, banyenti bodzadze labasebenta kamatima futsi lokufanele sibasekele. Njengobe sifundzile esibonelweni saJesu, singakhona kubasita nangabe sicitsa sikhatsi nabo futsi sibati kancono. Singakhombisa kutsi siyabonga ngaloko labakwentako emsebentini waNkulunkulu. Singabasita sibakhulumele nakunesidzingo.

²¹ Ngesikhatsi umphostoli Pawula ephetsa incwadzi layibhalela baseRoma, wabita bodzadze labangu-9 ngemagama. (Rom. 16:1, 3, 6, 12, 13, 15) Siyaciniseka kutsi labodzadze bakhutsateka ngesikhatsi ababingelela futsi ababonga. Ngendlela lefananako, natsi kufanele sibasekele bonkhe bodzadze labasebandleni letfu. Nasenta njalo, sisuke sikhombisa kutsi siyabatsandza njengobe bayincenye yelibandla.