1-2. Ngekusho kwa-1 Thimothi 6:20, yini Thimothi labenikwe wona?

KUYENTEKA sicele labanye kutsi banakekele tintfo tetfu letiligugu. Sibonelo saloko kutsi siyayibeka imali yetfu ebhange. Loko sikwenta sinelitsemba lekutsi imali yetfu itawuhlala kahle futsi ngeke ilahleke nobe yetjiwe. Ngako siyacondza kutsi kusho kutsini kunika umuntfu intfo yakho leligugu kutsi akugcinele yona.

² Fundza 1 Thimothi 6:20. Umphostoli Pawula wakhumbuta Thimothi kutsi unikwe lokutsite lokuligugu, lokuliciniso lolungulonalona ngaNkulunkulu nangenjongo yakhe ngebantfu. Jehova bekanike Thimothi nelilungelo ‘lekushumayela livi nelekwenta umsebenti wemvangeli.’ (2 Thim. 4:2, 5) Pawula wakhutsata Thimothi kutsi akunake loko lebekanikwe kona. NjengaThimothi natsi sinikwe tintfo letiligugu. Tiyini? Kungani kufanele sililondvolote lelilungelo Jehova lasiphe lona?

3-4. Ngutiphi letinye tizatfu letenta emaciniso laseBhayibhelini abe ligugu?

³ Jehova usinike lwati lolungulonalona lwemaciniso laseVini lakhe liBhayibheli. Lamaciniso aligugu ngobe asifundzisa ngendlela yekuba nebuhlobo lobuhle naJehova futsi asichazela ngekutsi yini leletsa injabulo mbamba ekuphileni. Nangabe siwemukela lamaciniso futsi siwasebentisa ekuphileni kwetfu, siyakhululeka ekugcilatweni timfundziso temanga nasekutiphatseni lokubi.—1 Khor. 6:9-11.

⁴ Lesinye sizatfu lesenta lamaciniso laseVini laNkulunkulu abe ligugu, kutsi Jehova uwembulele labatfobekile ‘nalabatimisele.’ (Imis. 13:48) Bantfu labatfobekile  bayemukela kutsi sisebenti lesetsembekile nalesihlakaniphile ngiso lesisifundzisa lamaciniso laseBhayibheli kulesikhatsi lesiphila kuso. (Mat. 11:25; 24:45) Ngeke siwacondze lamaciniso laseBhayibhelini ngaphandle kwelusito futsi kute lokuligugu kwendlula kuwacondza.—Taga 3:13, 15.

5. Yini lenye Jehova lasinike yona?

⁵ Jehova usinike lilungelo lekufundzisa labanye liciniso ngaye nangetinjongo takhe. (Mat. 24:14) Lomlayeto lesiwushumayelako uligugu kakhulu ngobe usita bantfu kutsi babe yincenye yemndeni waJehova futsi ubanika litfuba lekutfola kuphila lokuphakadze. (1 Thim. 4:16) Ngisho nobe sishumayela bantfu labanyenti nobe labancane, sinesandla kulomsebenti lobaluleke kakhulu lowentiwa kulesikhatsi lesiphila kuso. (1 Thim. 2:3, 4) Kulilungelo lelikhulu kusebenta naNkulunkulu!—1 Khor. 3:9.

6. Yini leyenteka kulabanye labehluleka kunaka loko lebebanikwe kona?

⁶ Ngesikhatsi kusaphila Thimothi, lamanye emaKhristu ehluleka kukutsatsa njengalokulilungelo kuba tisebenti letikanye naNkulunkulu. Ngesizatfu sekutsi Demasi bekatsandza lelive, wayekela lilungelo lekusebenta naPawula. (2 Thim. 4:10) BoFigelusi naHemogenesi bayekela kushumayela ngesizatfu sekutsi bebesaba kuphatfwa kabi njengobe bebabona kwenteka kuPawula. (2 Thim. 1:15) Humenayosi, Alekzanda naFiletusi bahlubuka futsi bashiya Jehova. (1 Thim. 1:19, 20; 2 Thim. 2:16-18) Bebake bamtsandza Jehova kodvwa base bayayekela kutitsatsa njengaletiligugu tintfo lebekabanike tona.

7. Ngumaphi emachinga Sathane lawasebentisako?

⁷ Sathane wetama njani kusemuka lelilungelo Jehova lasinike lona? Naka nawa lamanye emachinga akhe. Usebentisa tekutijabulisa, lesikubukelako nalesikufundzako kuze asente siyekele kutsandza Jehova kanye nemiyalo yakhe. Wetama kusesabisa ngaloko bantfu labakushoko ngatsi nobe ngekuphatfwa kabi kuze siyekele kushumayela. Wetama kusilinga kutsi silalele loko “lokutsiwa ‘lwati’ kube kungasilo” lokushiwo tihlubuki kuze sishiye liciniso.—1 Thim. 6:20, 21.

8. Yini loyifundzako kulokwenteka kuDaniel?

⁸ Nasingakanaki, singatikhandza sishiya liciniso kancane kancane. Cabanga ngalokwenteka kuDaniel * lobekatsandza  imidlalo ye-video. Utsi: “Ngacala kudlala imidlalo ye-video ngesikhatsi ngineminyaka lengaba ngu-10. Ekucaleni, bengidlala imidlalo lekahle. Kodvwa ngekuhamba kwesikhatsi, besengidlala imidlala lenebudlova nebudimoni.” Ekugcineni, besekadlala ema-awa langaba ngu-15 ngelilanga. Daniel utsi: “Ngekhatsi enhlitiyweni, bengati kutsi lemidlalo lengiyidlalako nesikhatsi lengisicitsa kuyo, bekungikweshisa kuJehova. Kodvwa bengititjela kutsi akudzingeki ngente loko lokushiwo liBhayibheli.” Nasingakanaki, kutijabulisa kungasenta kutsi singasalibambisisi liciniso. Nangabe loko kwenteka, singahle silahlekelwe tintfo letiligugu Jehova lasinike tona.

9. Ngekusho kwa-1 Thimothi 1:18, 19, Pawula wamfananisa nani Thimothi?

⁹ Fundza 1 Thimothi 1:18, 19. Pawula wafananisa Thimothi nelisotja futsi wamkhutsata kutsi ‘achubeke alwa kulwa lokuhle.’ Pawula bekangakhulumi ngemphi lebakhona emkhatsini wemasotja. Kodvwa emaKhristu afana njani nemasotja lasemphini? Ngubuphi buntfu lokudzingeka sibe nabo njengemasotja aKhristu? Ase sicoce ngetifundvo letisihlanu lesingatifundza emfanekisweni waPawula. Letifundvo titasisita sibambelele ecinisweni.

10. Kuyini kutinikela kuNkulunkulu, futsi kungani kubalulekile?

¹⁰ Tinikele kuNkulunkulu. Lisotja lelikahle ngulelitsembekile. Lilwa kamatima kuze livikele umuntfu lelimtsandzako nobe intfo leligugu. Pawula wakhutsata Thimothi kutsi atinikele kuNkulunkulu, lokusho kunamatsela kuNkulunkulu ngekwetsembeka. (1 Thim. 4:7) Nangabe simtsandza kakhulu Nkulunkulu futsi sitinikele kuye, sitawuba nesifiso lesikhulu sekubambisisa liciniso.—1 Thim. 4:8-10; 6:6.

11. Kungani kufanele siticeceshe kutsi sente lokulungile?

¹¹ Ticeceshe kutsi wente lokulungile. Lisotja kufanele liticeceshe kuze lilungele imphi. Thimothi bekahlale anebuhlobo lobuhle naNkulunkulu ngobe walalela seluleko saNkulunkulu sekutsi abalekele tifiso letimbi, waba nebuntfu lobuhle futsi watihlanganisa nalamanye emaKhristu. (2 Thim. 2:22) Loko bekudzinga kutsi aticeceshe kuze ente lokulungile. Sidzinga kuticecesha kutsi sente lokulungile kuze sincobe tifiso letimbi. (Rom. 7:21-25) Ngetulu kwaloko, sidzinga kuticecesha kuze sikhumule buntfu lobudzala futsi sigcoke buntfu lobusha. (Ef. 4:22, 24) Ngemuva kwekuba nelilanga lelidze, ngalesinye sikhatsi kungadzingeka sitihudvule kuze siye emihlanganweni yelibandla.—Heb. 10:24, 25.

12. Singayitfutfukisa njani indlela lesisebentisa ngayo liBhayibheli?

¹² Lisotja kufanele lifundze kusebentisa tikhali talo. Nalifuna kutisebentisa kahle, kufanele lihlale liticecesha. Ngendlela lefanako, natsi kufanele sikwati kulisebentisa kahle liVi laNkulunkulu. (2 Thim. 2:15) Singafundza letinye taletindlela emihlanganweni yelibandla. Kodvwa nangabe sifuna labanye betsembe kutsi liciniso leliseBhayibhelini lingabasita, kufanele sihlale silitadisha. Kufanele sisebentise liVi laNkulunkulu kuze sicinise kukholwa kwetfu. Loko kusho lokungetulu nje kwekumane sifundze liBhayibheli. Kusho kutsi kufanele sizindle ngaloko lesikufundzako futsi sicwaninge etincwadzini tetfu kuze siyicondze kahle imiBhalo futsi siyisebentise. (1 Thim. 4:13-15) Nasenta njalo, sitawukhona  kusebentisa liVi laNkulunkulu nasifundzisa labanye. Loko kusho kutsi angeke sigcine nje ngekubafundzela emavesi. Kunaloko, sitawetama kwenta labo labasilalele kutsi bawacondze futsi babone kutsi bangawasebentisa njani. Ngako nasihlale sitadisha liBhayibheli, sitawutfutfuka endleleni lesifundzisa ngayo labanye.—2 Thim. 3:16, 17.

13. Ngekusho kwaHebheru 5:14, yini lokufanele siyente kuze sehlukanise lokulungile nalokungakalungi?

¹³ Hlukanisa lokulungile nalokungakalungi. Lisotja kufanele likwati kubona ingoti futsi liyibalekele. Natsi kufanele sitibone tintfo letingasilimata bese senta lokutsite kuze sitibalekele. (Taga 22:3; fundza Hebheru 5:14.) Nasi sibonelo, kufanele sitikhetse ngekuhlakanipha tintfo lesitijabulisa ngato. Kutiphatsa lokubi kugcwele etinhlelweni tema-TV nakuma-movie. Siyakubalekela kutijabulisa lokunjena ngobe siyati kutsi kancane kancane kutawucedza lutsandvo lwetfu ngaJehova. Siyati kutsi Jehova uyakwenyanya kutiphatsa lokubi nekutsi bantfu labatiphatsa kabi batilimata bona kanye nalabanye.—Ef. 5:5, 6.

14. Kwamsita njani Daniel kukhona kwehlukisa lokulungile nalokungakalungi?

¹⁴ Daniel lesike sakhuluma ngaye, wagcine abonile kutsi kukabi kudlala imidlalo ye-video lenebudlova nebudimoni. Wacwaninga ku-Watchtower Library kuze atfole lokungamsita kulenkinga yakhe. Kwamsita njani loko? Wayekela kudlala imidlalo lemibi ye-video, futsi wayekela nekudlala nalabanye badlali. Daniel utsi: “Kunekutsi ngidlale imidlalo ye-video, ngacala kwenta imisebenti leyentiwa ngephandle futsi ngatihlanganisa nebangani bami ebandleni.” Nyalo Daniel ulihlahlandlela futsi ungulomdzala welibandla.

15. Kungani tindzaba letingemanga tiyingoti?

¹⁵ NjengaThimothi, natsi kufanele sisheshe siyibone ingoti yetindzaba letingemanga letisakatwa tihlubuki. (1 Thim. 4:1, 7; 2 Thim. 2:16) Nasi sibonelo, kungenteka tisakate tindzaba letingemanga ngebazalwane betfu nobe tisente sicale kuyingabata inhlangano yaJehova. Tindzaba letinjalo tingakulimata kukholwa kwetfu. Kufanele singatetsembi tindzaba letinjalo. Leni? Ngobe tindzaba letinjalo tisakatwa  “bantfu labanetingcondvo letonakele nalabete liciniso.” Umgomo wabo kutsi kube ‘nekucabana nekuphikisana.’ (1 Thim. 6:4, 5) Bafuna kusenta siwetsembe lamanga abo futsi singabetsembi bazalwane betfu.

16. Ngutiphi tintfo letingasiphazamisa lokufanele sitibalekele?

¹⁶ Tibalekele tintfo letingakuphazamisa. ‘Njengelisotja lelihle laKhristu Jesu,’ Thimothi bekufanele ahlale anake umsebenti wekushumayela kunekuphazanyiswa ngumsebenti wekutiphilisa nemcebo. (2 Thim. 2:3, 4) NjengaThimothi, kufanele sikubalekele kuphazanyiswa sifiso sekuba nemcebo. “Kuyenga kwemcebo” kungasenta kutsi singasamtsandzi Jehova, singasabongi ngeliVi lakhe futsi sibe bete sifiso sekusita labanye. (Mat. 13:22) Kufanele sichubeke sente kuphila kwetfu kube melula, sisebentise sikhatsi setfu kanye nemandla etfu kuze ‘sichubeke sifuna kucala uMbuso.’—Mat. 6:22-25, 33.

17-18. Yini lesingayenta kuze sivikele buhlobo betfu naJehova?

¹⁷ Hlale ukulungele kwenta ngekulunga. Lisotja kufanele lihlele kusenesikhatsi kutsi litativikela njani. Nangabe sifuna kutivikela tintfo Jehova lasinikete tona, kufanele sisheshe sente lokutsite nasibona ingoti. Yini lengasisita kutsi sikwente loko? Kufanele sicabange kusenesikhatsi kutsi sitokwenta njani nakuvela ingoti.

¹⁸ Ase sibekise, nangabe umenywe emcimbini, nine lenimenyiwe nicelwa kutsi nibuke umnyango losedvute nani ngaphambi kwekutsi kucale umcimbi. Leni? Kuze nitophuma ngekushesha nakuvela simo lesiphutfumako. Ngendlela lefanako, natsi kufanele sitilungiselele kutsi sitokwenta njani nakuvela kutiphatsa kabi, budlova nobe nakuvela lokutsite lokuchamuka kumuntfu losihlubuki ku-Internet, ku-movie nobe etinhlelweni te-TV. Nangabe sitilungiselela kusenesikhatsi ngaloko lokungahle kwenteke, singenta lokutsite ngekushesha kuze sivikele buhlobo betfu naJehova futsi sihlale sihlantekile emehlweni akhe.—Hla. 101:3; 1 Thim. 4:12.

19. Ngutiphi tibusiso lesitatitfola nangabe sitilondvolota tintfo letiligugu Jehova lasinikete tona?

¹⁹ Kufanele sitilondvolote tintfo letiligugu Jehova lasinikete tona, lokufaka ekhatsi emaciniso laligugu laseBhayibhelini kanye nelilungelo lekufundzisa labanye ngawo. Nasenta njalo, sitawuba nanembeza lohlantekile, kuphila kwetfu kutawuba nenjongo futsi sitakujabulela kusita labanye kutsi bati Jehova. Ngelusito lwakhe, sitawukhona kukulondvolota loko lesiniketwe kona.—1 Thim. 6:12, 19.