SIPHO LESIKHULU KAKHULU kufanele sisichube kutsi sikhombise kubonga. Jesu wasigcizelela lesifundvo ngesikhatsi elapha emadvodza lalishumi labenesifo lebesingelapheki ngaleso sikhatsi. Lenye yalamadvodza lalishumi “yabuyela emuva, yakhatimulisa Nkulunkulu ngelivi lelikhulu.” Jesu watsi: “Angitsi kuhlanjululwe emadvodza lalishumi? Pho aphi lalamanye layimfica?” (Lukha 17:12-17) Yini lesiyifundzako kuloku? Singasheshe sitikhohlwe tintfo letinhle bantfu labasentela tona!

Sihlengo sehlukile kuletinye tipho. Sisipho lesikhulu kunato tonkhe lesake satitfola. Ungakhombisa njani kutsi uyabonga ngaloko Nkulunkulu lakwentele kona?

• Mati kahle Nkulunkulu longuMuphi waso. Lenhlawulo ayimane nje yente umuntfu atfole kuphila lokuphakadze. Jesu nakathantaza kuNkulunkulu watsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Nangabe  lotsite angakucocela kutsi nawusemncane kukhona lowasindzisa imphilo yakho, bewungeke yini ufune kumati kancono loyo muntfu kanye nesizatfu sekutsi akusindzise? Nkulunkulu Jehova loyo lowakuniketa sipho senhlawulo lesindzisa kuphila kwakho, ufuna umati kancono uphindze ube nebuhlobo lobusedvutane naye. LiBhayibheli lisincusa litsi: “Sondzelani kuNkulunkulu, naye utawusondzela kini.”—Jakobe 4:8.

• Bani nekukholwa kulenhlawulo. “Lokholwa yiNdvodzana utawutfola kuphila lokuphakadze.” (Johane 3:36) Singakhombisa njani kutsi sinekukholwa? Singakhombisa ngetento, ngobe kubonakala ngato kutsi siyakholelwa kulenhlawulo. (Jakobe 2:17) Ngutiphi letento? Sipho siba sakho nangabe usemukela. Ngako kufanele uyemukele lenhlawulo. Ungakwenta njani loku? Kudzingeka ufundze kutsi Nkulunkulu ufuna uphile njani bese uphila ngaleyo ndlela. * Thantaza kuNkulunkulu ucele akutsetselele futsi akuphe nembeza lohlantekile. Nawuthantaza, kufanele uciniseke ngalokuphelele kutsi inhlawulo ingakhona kwenta labo labanekukholwa kutsi babe nekuthula, kulondzeka kanye nemphilo lenhle kuze kuphakadze!—Hebheru 11:1.

• Bani khona eSikhumbutweni sekufa kwaJesu. Jesu wacalisa umkhosi waminyaka yonkhe losikhumbuta ngenhlawulo. Mayelana nalomkhosi, watsi: “Chubekani nikwenta, ningikhumbula.” (Lukha 22:19) BoFakazi BaJehova batawube bakhumbula kufa kwaJesu ngaLesibili, April 11, 2017, ngemuva kwekushona kwelilanga. Kuloluhlelo lolutsatsa li-awa, kutawuba nenkhulumo lechaza kubaluleka kwekufa kwaJesu kanye nendlela lokutasiletsela ngayo tibusiso nyalo kanye nasesikhatsini lesitako. Kulomnyaka lophelile, bantfu labatigidzi letingu-20 emhlabeni wonkhe bebakhona eSikhumbutweni sekufa kwaJesu. Siyakumema nawe kutsi ube khona kulomkhosi ukhombise kubonga ngalesipho lesikhulu Nkulunkulu lasiphe sona.