BANTFU

Lokushiwo liBhayibheli: Nkulunkulu ‘akazange awudalele lite nje [umhlaba], kodvwa wawudalela kutsi kuhlalwe kuwo.’​—ISAYA 45:18.

IPLANETHI LENGUMHLABA

Lokushiwo liBhayibheli: “Situkulwane siyengca futsi kufike lesinye situkulwane, kodvwa umhlaba utawuhlala ukhona kuze kube phakadze.”​—UMSHUMAYELI 1:4.

LOKUKUSHOKO: Ngekusho kweliBhayibheli, umhlaba awuyoze ubhujiswe futsi utawuhlale unebantfu. Ngako, kushoni kuphela kwalelive?

CABANGA NGANAKU: LiBhayibheli lifananisa kuphela kwalelive lokusondzelako naloko lokwenteka ngesikhatsi saNowa. Ngaleso sikhatsi, umhlaba ‘bewugcwele budlova.’ (Genesisi 6:13) Nobe kunjalo, Nowa bekalungile. Ngako Nkulunkulu wabhubhisa bantfu lababi ngazamcolo, kodvwa wasindzisa Nowa nemndeni wakhe. Nalikhuluma ngaloko lokwenteka ngaleso sikhatsi, liBhayibheli litsi: “Live langaleso sikhatsi labhujiswa nalimbonywa ngemanti.” (2 Phetro 3:6) Loko kwaba kuphela kwelive langaleso sikhatsi. Nobe kunjalo, yini leyabhujiswa? Akuzange kubhujiswe umhlaba, kodvwa bantfu lababi lebebaphila kuwo. Ngako liBhayibheli nalikhuluma ngekuphela kwalelive, alikhulumi ngekubhujiswa kwaleplanethi. Kunaloko, likhuluma ngekuphela kwebantfu lababi labasemhlabeni kanye nendlela yabo yekubusa.

TINKINGA NEBUBI

Lokushiwo liBhayibheli: “Ngemuva nje kwesikhashana, bantfu lababi ngeke basaba khona; utawubuka lapho bebatfolakala khona, kepha batawube bangasekho. kodvwa labamnene batawudla lifa lemhlaba, futsi batawujabulela kuthula lokukhulu.”​—TIHLABELELO 37:10, 11.

LOKUKUSHOKO: Zamcolo wangesikhatsi saNowa awuzange ubucedze bubi ngalokuphelele. Ngemuva kwaZamcolo, bantfu lababi baphindze benta kuphila kwebantfu kwaba munyu. Nobe kunjalo, ngekushesha Nkulunkulu utawucedza bonkhe bubi. Kutawuba njengobe umhubi asho: “Lababi ngeke basaba khona.” Nkulunkulu utawusebentisa uMbuso wakhe kuze acedze bubi. LoMbuso nguhulumende losezulwini lobusa bantfu labalalela Nkulunkulu.

CABANGA NGANAKU: Babusi labasemhlabeni batakwemukela yini kubuswa nguMbuso waNkulunkulu? LiBhayibheli liveta kutsi angeke. Ngebulima, batawumelana neMbuso waNkulunkulu. (Tihlabelelo 2:2) Utawuba yini umphumela? UMbuso waNkulunkulu utawutsatsa sikhundla sabo bonkhe bohulumende bebantfu futsi ‘wona wodvwa ume kuze kube phakadze.’ (Danyela 2:44) Kudzingeke ngani kutsi indlela yebantfu yekubusa iphele?

Lokushiwo liBhayibheli: “Akusiko kwemuntfu kutsi aticondzisele yena imphilo yakhe.”​—JEREMIYA 10:23.

LOKUKUSHOKO: Bantfu bebangakadalelwa kutsi batibuse, ngobe bayehluleka kubusa labanye bantfu nekucatulula tinkinga tabo.

CABANGA NGANAKU: I-Britannica Academic yaveta kutsi kubonakala ngatsi bohulumende bebantfu “abakhoni kucatulula tinkinga letinjengebuphuya, indlala, tifo, tehlakalo temvelo, timphi kanye nebudlova.” Ichubeka itsi: “Labanye bakholelwa kutsi nguhulumende lotawubusa umhlaba wonkhe longakhona kucatulula letinkinga.” Nobe kunjalo, ngisho nobe bonkhe bohulumende bebantfu bangabusa ngekubambisana, umhlaba utawuchubeka ubuswa bantfu labanesono labangakhoni kucatulula letinkinga lesikhulume ngato. NguMbuso waNkulunkulu kuphela hulumende lonemandla ekuticedza ngalokuphelele tinkinga letisemhlabeni.

Ngako-ke, bantfu labalungile akudzingeki bakwesabe kuphela kwalelive ngobe ngekusho kweliBhayibheli, kuphela kwalelive, kusho kuphela kwebantfu lababi nendlela yabo yekubusa. Kunekutsi kubesabise, kufanele bakulangatelele ngobe lelive lelidzala lelonakele litawutsatselwa sikhundla live lelisha laNkulunkulu!

Kutawukwenteka nini konkhe loku? Sihloko lesilandzelako sitawuniketa imphendvulo leseBhayibhelini.