Ngekushesha nje, nasebonkhe bantfu babuswa nguhulumende waNkulunkulu, umhlaba utawuba yindzawo lejabulisako lapho bonkhe bantfu batawuphila khona ndzawonye ngebunye futsi bajabulele umsebenti wabo lomuhle nalowenetisako. Nkulunkulu ubeke Jesu kutsi abuse umhlaba. Ngalokungafani nebabusi balamuhla, Jesu utawunakekela tonkhe tidzingo tebantfu. Kubusa kwakhe kutawube kusekelwe elutsandvweni futsi utawuba yiNkhosi lenemusa, leneluvelo nalengakhetsi.​—Isaya 11:4.

Bantfu labatawube baphila emhlabeni angeke behlukaniswe buve nobe emasiko. Bantfu batawuba nebunye. (Sembulo 7:9, 10) Bonkhe bantfu labatawube baphila emhlabeni batawutsandza Nkulunkulu namakhelwane futsi batawusebenta ndzawonye ngekuthula kuze bafeze injongo yaNkulunkulu yasekucaleni yekunakekela likhaya labo lelingumhlaba.​—Tihlabelelo 115:16.

Nasekubusa uMbuso waNkulunkulu emhlabeni, uMdali utawulawula simo selitulu ngalokuphelele. (Tihlabelelo 24:1, 2) Ngesikhatsi Jesu alapha emhlabeni, waveta kancane bukhulu bemandla Nkulunkulu labekamnike wona ngekutsi athulise sivunguvungu kamelula nje. (Makho 4:39, 41) Ngephasi kwekubusa kwaJesu, kute lotawesaba tehlakalo temvelo. UMbuso waNkulunkulu utawuphindze ubuyisele kuvana lebekukhona emkhatsini webantfu nemvelo.​—Hoseya 2:18.

Bonkhe bantfu batawujabulela imphilo lenhle. Kute lotawugula, aguge nobe afe. (Isaya 35:5, 6) Bantfu batawujabulela kuphila endzaweni lenhle nalehlantekile lefana nalena bantfu bekucala labaphila kuyo engadzeni yase-Edeni. Emhlabeni lomusha, njengase-Edeni, umhlaba uyokhicita kudla ngebunyenti futsi bantfu labatawube baphila khona ngeke bakweswele. (Genesisi 2:9) Njengesive saNkulunkulu sema-Israyeli asendvulo, bonkhe bantfu labatawube baphila ePharadisi ‘batawudla sinkhwa [sabo] benetiseke.’​—Levithikhusi 26:4, 5.

Ngaphansi kwahulumende waNkulunkulu lotawubusa umhlaba wonkhe, bonkhe bantfu batawujabulela kuthula futsi baphatsane ngemusa nangekulunga. Kutawuba bete timphi, kube bete losebentisa kabi ligunya futsi wonkhe umuntfu utawuba nako konkhe lakudzingako. LiBhayibheli liyetsembisa: “Nguloyo naloyo utawuhlala ngephansi kwesihlahla sakhe semagilebisi nangephansi kwesihlahla sakhe semakhiwa, futsi kute lotabesabisa.”​—Mikha 4:3, 4.

Yonkhe imindeni itawuba nemakhaya ingesabi kutsi itawemukwa wona, futsi sitawuzuza kuwo wonkhe umsebenti lesitawube siwenta. LiBhayibheli litsi, labo labatawube baphila emhlabeni lomusha waNkulunkulu “angeke basebentele lite.”​—Isaya 65:21-23.

LiBhayibheli liyetsembisa: “Umhlaba uyawugcwala lwati ngaJehova.” (Isaya 11:9) Bantfu labatawube babuswa nguMbuso waNkulunkulu batawufundza ngenhlakanipho lenkhulu yeMdali wabo Jehova, nangetintfo letinhle latidalile. Ngeke basebentise lwati lwabo kuze bakhe tikhali nobe balimate labanye bantfu. (Isaya 2:4) Kunaloko, batawufundza kuhlalisana ngekuthula nendlela yekunakekela umhlaba.​—Tihlabelelo 37:11.

Nkulunkulu wawenta ngekucophelela umhlaba kuze sijabulele kuphila kuwo. Ufuna kutsi bantfu baphile kuwo kuze kube phakadze. (Tihlabelelo 37:29; Isaya 45:18) Kuze afeze injongo yakhe yasekucaleni, Nkulunkulu “uyawugwinya kufa kuze kube phakadze.” (Isaya 25:8) LiBhayibheli letsembisa kutsi “kufa ngeke kusaba khona, futsi kulila, nekukhala kanye nebuhlungu ngeke kusaba khona.” (Sembulo 21:4) Nkulunkulu utawuniketa bonkhe bantfu litfuba lekuphila phakadze, kokubili labo labatawusindza nakubhujiswa lelive lelibi kanye nalabo latawubavuswa emhlabeni lomusha lotako.​—Johane 5:28, 29; Imisebenti 24:15.

 Ngisho nanyalo, tigidzi tebantfu tilungiselela kuphila emhlabeni lomusha lotawufika madvutane. Ngisho nobe tinesono, tetama kuba luhlobo lwebantfu Nkulunkulu lalufunako emhlabeni wakhe lomusha. Kanjani? Ngekufundza ngaJehova Nkulunkulu nangaloyo lamtfuma lokunguJesu Khristu.​—Johane 17:3.

Fundza lokunyenti kutsi ungasindza njani nakuphela lelive futsi uphile emhlabeni lomusha lotawufika madvutane. Yemukela sifundvo seliBhayibheli samahhala kulomunye waBoFakazi BaJehova. Nitawufundza incwadzi letsi Jabulela Kuphila Kuze Kube Phakadze!