Kuke kwenteka yini wafisa kudvudvuta umuntfu lofelwe kodvwa wamane waphelelwa nje kutsi utawutsini? Ngalesinye sikhatsi siyaye singati kutsi senteni nobe sitsini kangangekutsi sigcine singakasho lutfo. Kodvwa kukhona lesingakwenta.

Imvamisa lokubalulekile kutsi ube khona, mhlawumbe usho emagama lalula njengekutsi “ncesi.” Kuletinye tindzawo kuhaga umuntfu loselusizini noma kumbamba sandla kukhombisa kutsi uyamvela. Nangabe lona lofelwe afuna kukhuluma, mlalelisise ukhombise kutsi uyamvela. Intfo lenhle longayenta kute usite umndeni lofelwe, kungaba kubentela imisebenti yasekhaya lenjengekupheka, kunaka bantfwana kanye nekubasita nabalungiselela umngcwabo, nangabe balwemukela lolo sito. Tento letinjengaleti tingakhombisa kutsi uvelana nabo mbamba kunekugcina ngekusho nje emavi latsite.

Ngekuhamba kwesikhatsi ungacoca ngetintfo letinhle umufi lebekatenta netikhatsi letimnandzi lowake waba nato naye. Loku kungamjabulisa lona loshonelwe. Naku lokushiwo nguPam losekuphele iminyaka lesitfupha ashonelwa yindvodza yakhe: “Ngalesinye sikhatsi bantfu bangicocela tintfo letinhle  lebetentiwa ngu-Ian lebengingatati, loku kungijabulisa kakhulu.”

Bacwaningi batsi bantfu labanyenti nabasandza kufelwa siyabadvudvuta, kodvwa ngekuhamba kwesikhatsi sibese siyakhohlwa ngabo sichubeke nemphilo yetfu. Ngako, kufanele sitibekele umgomo wekuchubeka sichumana nebantfu labafelwe. * Bantfu labanyenti labafelwe bayajabula nasichubeka sibahlola futsi loko kunciphisa buhlungu.

Cabanga ngaKaori waseJapan lowafelwa ngumake wakhe, kwatsi ngemuva kwetinyanga letingu-15 wafelwa ngusisi wakhe. Wasitwa kakhulu bangani bakhe labachubeka bamdvudvuta. Lomunye lowaba lusito nguRitsuko lobekamdzala kakhulu kunaKaori, wacela kuba ngumngani wakhe. Kaori utsi: “Nangikhuluma liciniso, ekucaleni loku akuzange kungijabulise. Bengingafuni kube nemuntfu lofuna kutsatsa sikhundla samake futsi bengingacabangi nekutsi ukhona umuntfu lobekangakhona kuvala sikhala sakhe. Kodvwa indlela make Ritsuko langiphatsa ngayo yenta sasondzelana. Njalo ngeliviki bekahamba nami siyoshumayela siphindze siye nasemihlanganweni yelibandla kanyekanye. Bekangimema kutsi siyonatsa litiya kakhe, angiletsele kudla futsi angibhalele tincwadzi nemakhadi tikhatsi letinyenti. Indlela make Ritsuko langiphatsa ngayo yangitsintsa kakhulu.”

Sekuphele iminyaka lengu-12 make waKaori ashona, nyalo Kaori nendvodza yakhe sebatikhonti tasikhatsi sonkhe. Kaori utsi: “Make Ritsuko solo nanyalo uyanginaka. Nangisekhaya ngiyamvakashela futsi ngiyatsandza kucoca naye ngobe uyangikhutsata.”

Poli longuFakazi WaJehova eCyprus naye bachubekile bamnaka ngemuva kwekufelwa. Sozos indvodza yaPoli, beyinemusa. Beyingulomdzala ebandleni futsi beyisibonelo lesihle, beyivamise kumema tintsandzane nebafelokati ekhaya labo kutsi batodla nabo baphindze bacoce. (Jakobe 1:27) Lokubuhlungu kutsi ngesikhatsi aneminyaka lengu-53, Sozos wabulawa sifo sengcondvo. Poli utsi: “Ngafelwa ngumyeni wami lebesekuphele iminyaka lengu-33 ngihlala naye.”

Ngemuva kwekungcwatjwa kwendvodza yakhe, Poli nendvodzana yakhe Daniel lebeyineminyaka lengu-15, batfutsela eCanada. Nabafika lapho bacala kuya ebandleni laBoFakazi BaJehova. Poli utsi: “Bangani lengabatfola kulelo bandla bebangasati simo setfu nekutsi besifelwe. Kodvwa bebasisita basidvudvuta. Loko kwabalusito kakhulu ikakhulukati njengobe indvodzana yami beyidzinga babe wayo. Bazalwane labadzala bamnaka kakhulu Daniel. Lomunye umzalwane abehamba naDaniel ngaso sonkhe sikhatsi nakayodlala ibhola nobe nakayovakashela bangani bakhe.” Lamuhla Poli nemntfwanakhe bachuba kahle.

Tinyenti tintfo lesingatenta kuze sidvudvute bantfu labashonelwe. LiBhayibheli likhuluma ngelitsemba lelijabulisako ngelikusasa.