KUNEMIBONO leminyenti leyehlukahlukene ngekufa kanye nekuphila. Labanye bakholelwa kutsi nasebafile batawuchubeka baphile kulesinye simo noma kulenye indzawo. Labanye bakholelwa kutsi batawutalwa kabusha baphile kulenye indzawo. Labanye solo bacabanga kutsi kufa kusiphetfo sako konkhe.

Kungenteka nawe kukhona lokukholelwako kulendzaba kuye ngelisiko lakho noma indzawo lokhulele kuyo. Njengoba imibono yalokwentekako kumuntfu nakafa yehlukene kakhulu, ukhona yini umuntfu noma indzawo lesingaya kuyo kuze sitfole timphendvulo letiliciniso nalesingatetsemba talombuto lodida bantfu labanyenti?

Sekuphele emakhulu eminyaka baholi benkholo bafundzisa kutsi umphefumulo wemuntfu awufi. Cishe balandzeli betinkholo letinyenti letifaka ekhatsi emaKhristu, ema-Hindu, emaJuda, ema-Muslim kanye naletinye, bakholelwa kutsi umphefumulo awufi futsi uchubeka uphila endzaweni yemoya ngemuva kwekufa kwemtimba. Ngakulolunye luhlangotsi, ema-Buddha akholelwa kutsi ngenca yekutalwa kabusha tikhatsi letinyenti, ingcondvo yemuntfu ibese iba sesimeni lesibitwa ngekutsi yi-Nirvana, lapho angasakukhumbuli lobekwenteka esikhatsini lesengcile.

Ngenca yaletimfundziso, bantfu labanyenti emhlabeni wonkhe sebakholelwa kutsi kufa kuyindlela lebamikisa kulenye indzawo kuze bachubeke baphila. Kulabanyenti kufa kusinyatselo lesibalulekile futsi bakubona kuyintsandvo yaNkulunkulu. Litsini liBhayibheli ngalendzaba? Imphendvulo yalombuto ingakumangalisa. Sicela ufundze lesihloko lesilandzelako.