Yebo, tikhona tingilosi letimbi. Tavela kuphi? Khumbula kutsi Nkulunkulu wadala tingilosi kutsi tibe nenkhululeko yekutikhetsela. Ngekushesha nje ngemuva kwekudalwa kwendvodza nemfati wekucala, Adamu na-Eva, ingilosi lebeyihlakaniphile yayisebentisa kabi lenkhululeko yayo yekutikhetsela futsi yabangela kuvukela emhlabeni. Yaphumelela ekwenteni bo-Adamu na-Eva kutsi bavukele Nkulunkulu. (Genesisi 3:1-7; Sembulo 12:9) LiBhayibheli alisitjeli libito lalengilosi nobe sikhundla lebeyikuso ezulwini ngaphambi kwekutsi ivukele. Kodvwa ngemuva kwekuvukela, liBhayibheli libese liyibita ngekutsi nguSathane, lokusho “Umphikisi,” kanye nangekutsi nguDeveli, lokusho kutsi “Umkhohlisi.”​—Matewu 4:8-11.

Lokubuhlungu kutsi, lokuvukela lokungakalungi akugcinanga lapho. Ngesikhatsi saNowa tingilosi letingatiwa kutsi betitingakhi, “tashiya indzawo yato yekuhlala lefanele” lebeyisezulwini. Tehlela emhlabeni futsi tatigucula tafana nebantfu kute tititsatsele bafati, lokuyintfo lebetingakadalelwa yona.​—Juda 6; Genesisi 6:1-4; 1 Phetro 3:19, 20.

Taphetselaphi letingilosi letimbi? Ngesikhatsi Nkulunkulu abhubhisa umhlaba ngazamcolo, letingilosi tagucuka taba ngumoya futsi tabuyela ezulwini. Nobe kunjalo, Nkulunkulu akazange ativumele letingilosi letimbi kutsi tibuyele ‘etikhundleni tato tasekucaleni.’ Kunaloko, watigcina endzaweni ‘yebumnyama lobukhulu,’ lobubitwa ngekutsi yiThartharusi. (Juda 6; 2 Phetro 2:4) Lamadimoni abuswa nguSathane Develi, “inkhosi yemadimoni,” lochubeka “atenta ingilosi yekukhanya.”​—Matewu 12:24; 2 Khorinte 11:14.

LiBhayibheli lisitjela kutsi uMbuso waNkulunkulu loholwa nguMesiya, lokunguhulumende wasezulwini, wacala kubusa nga-1914. * Ngemuva kwekumiswa kwawo, Sathane kanye nemadimoni bacoshwa ezulwini futsi bajikijelwa emhlabeni. Tintfo letinyenti letimbi kanye nekutiphatsa lokubi lokudlangile lamhlabeni kubufakazi bekutsi tiyatiphindziselela futsi tifuna kudukisa bantfu labanyenti.​—Sembulo 12:9-12.

Nobe kunjalo, lizinga lelikhulu lekutiphatsa kabi kanye nebudlova lobetfusako, kubufakazi bekutsi lelive lelibi selitophela. Ngekushesha nje, letidalwa temoya letimbi letinelunya titakwemukwa emandla ekwenta tintfo letimbi. Ngemuva kwekube uMbuso waNkulunkulu sewubuse umhlaba lolipharadisi iminyaka leyinkhulungwane, letidalwa temoya letimbi, titawukhululwa kwesikhashana kute tivivinye bantfu kwekugcina. Ngemuva kwaloko, titawubhujiswa phakadze.​—Matewu 25:41; Sembulo 20:1-3, 7-10.