Tigidzi tebantfu emhlabeni wonkhe tikholelwa kutsi ngaKhisimusi kusuke kugujwa lusuku lwekutalwa kwaJesu Khristu. Nobe kunjalo, uke wacabanga yini kutsi emaKhristu angelikhulu lekucala, ikakhulukati lawo bekasondzelene kakhulu naJesu, ake amgubha yini Khisimusi? Uyati yini kutsi litsini liBhayibheli ngekugujwa kwetinsuku tekutalwa? Kutfola timphendvulo talemibuto kungasisita sibone kutsi Khisimusi wacaliswa ngemaKhristu yini.

Kwekucala, liBhayibheli alisitjeli kutsi kwake kwaba nemicimbi yekugubha lusuku lwekutalwa kwaJesu nobe letinye tinceku taNkulunkulu lebetetsembekile. Kunaloko, imiBhalo ikhuluma ngebantfu lababili labagubha lusuku lwabo lwekutalwa. Bobabili labantfu bebangasibo bakhulekeli baJehova, Nkulunkulu lowabhala liBhayibheli, futsi benta tintfo letimbi ngalesikhatsi bagubha tinsuku tabo tekutalwa. (Genesisi 40:20; Makho 6:21) Ngekusho kwe-Encyclopædia Britannica, emaKhristu angelikhulu lekucala akazange sekahambisane “nelisiko lebantfu lebebangamkhonti Nkulunkulu, lekugubha emalanga ekutalwa.”

LiBhayibheli alisitjeli kutsi Jesu watalwa ngayiphi inyanga futsi ngaluphi lusuku. I-Cyclopedia ya-McClintock na-Strong, itsi: “Kute lapho sifundza khona ethestamenteni lelisha, ngelilanga lekutalwa kwaJesu nobe-ke, kulenye indzawo.” Ngako, nangabe Jesu bekafuna kutsi bafundzi bakhe bagubhe lusuku lwakhe lwekutalwa bekatawubatjela lilanga lelicondzile latalwa ngalo.

Kwesibili, liBhayibheli alisitjeli kutsi Jesu nobe lomunye webafundzi bakhe wake wagubha Khisimusi. Ngekusho kwe-New Catholic Encyclopedia, kugujwa kwaKhisimusi kwacala kukhulunywa ngako “ku-Chronograph ya-Philocalus, umdvwebi lebakedvumile, encwadzini yemlandvo yemaRoma lenetintfo letenteka kusukela nga-336 C.E.” Kuyacaca ke, kutsi loku kwenteka sekuphelile kubhalwa kweliBhayibheli futsi sekuphele emashumi eminyaka Jesu ahamba lapha emhlabeni. Ngako, bo-McClintock na-Strong bacaphela kutsi “kugujwa kwaKhisimusi akuveli kuNkulunkulu, futsi kute lakukhulunywa ngako khona ethestamenteni lelisha.” *

Jesu njengeMfundzisi Lomkhulu, waniketa bafundzi bakhe ticondziso taloko lebekafuna kutsi bakwente futsi leticondziso tibhalwe eBhayibhelini. Nobe kunjalo, kugubha Khisimusi akukho eBhayibhelini. Njengoba nathishela wesikolwa angafuni kutsi bantfwana besikolwa bente tintfo langakatisho, kanjalo naJesu akafuni bafundzi bakhe becele “ngale kwetintfo letibhaliwe” emiBhalweni leNgcwele.​—1 Khorinte 4:6.

Ngakulokunye, kunamunye umkhosi lobalulekile emaKhristu angelikhulu lekucala lebekawugubha​—lokuSikhumbuto sekufa kwaJesu. NguJesu matfupha lowatjela bafundzi bakhe kutsi bakhumbule lolusuku futsi wabatjengisa indlela yekulugubha. Imininigwane lecondzile mayelana nendlela yekugubha lomkhosi kanye nelusuku lwekufa kwakhe, kubhalwe eBhayibhelini.​—Lukha 22:19; 1 Khorinte 11:25.

Njengobe sesifundzile, Khisimusi lusuku lwekutalwa, futsi emaKhristu angelikhulu lekucala akazange sekalilandzele lolosiko lwemacaba. Ngetulu kwaloko liBhayibheli alisitjeli kutsi Jesu nobe lomunye umuntfu wake wagubha Khisimusi. Ngalamaciniso lesesiwafundzile tigidzi temaKhristu letisemhlabeni wonkhe tiphetse ngekutsi Khisimusi awusiwo wawo.