Ungamlingisa Yini Finehasi Nawuhlangabetana Netinsayeya?

KUYINTFO leligugu kakhulu kukhonta njengalomdzala welibandla. Nanobe kunjalo, liVi laNkulunkulu liyavuma kutsi labadzala bayahlangabetana netinsayeya. Ngaletinye tikhatsi, kudzingeka kutsi behlulele emacala alabatsite labente bubi, futsi loko basuke ‘bakwentela Jehova.’ (2 Khr. 19:6) Lomdzala angase atfole sabelo lacabanga kutsi asimfaneli, njengobe nje naMosi enta, futsi ngekutfobeka wabuta: “Ngingubani mine kutsi ngingaya kuFaro?”—Eks. 3:11.

LiBhayibheli, leliphefumulelwe ngemoya lofanana naloyo lomisa labadzala, lisiniketa tibonelo tebabonisi lababeketelela kulingwa ngemphumelelo. Finehasi bekayindvodzana ya-Eleyazare futsi angumtukulu wa-Aroni, ngesizatfu saloko, bekaseluhlwini lwekuba ngumphristi lomkhulu. Tintfo letintsatfu letenteka ekuphileni kwakhe tiveta sidzingo sekutsi labadzala lamuhla bahlangabetane netinsayeya ngesibindzi, kucondza, kanye nangekwetsembela kuJehova.

“Washiya Sonkhe Sive”

Finehasi abelijaha ngesikhatsi ema-Israyeli akambise emaTsafeni akaMowabi. LiBhayibheli liyalandzisa: “Emadvodza acala kungenela kulalana nalabasikati besive semaMowabi. . . . Lamadvodza adla, akhotsama, akhonta labonkulunkulu bemaMowabi.” (Num. 25:1, 2) Jehova wabangela kutsi labantfu labebatiphatse kabi bahlaselwe yinhlupho lebulalako. Ucabanga kutsi yamphatsa njani Finehasi lemibiko yekutiphatsa lokubi kanye nalenhlupho leyabangelwa ngiko?

Kulandzisa kuchubeka kutsi: “Lenye indvodza yem-Israyeli yeta nalomsikati umMidiyani yamngenisa ethendeni layo, Mosi abuka, nesive sonkhe sema-Israyeli sisalila ekungeneni kwelithende lekuhlangana.” (Num. 25:6) Yini lebeyitakwentiwa ngumphristi longuFinehasi? Phela bekasemncane, kantsi futsi lomIsrayeli lobekente konkhe lokungcola bekahola etindzabeni letitsintsa kukholwa emkhatsini wesive.—Num. 25:14.

Nanobe kunjalo, Finehasi wesaba Jehova, hhayi bantfu. Ngesikhatsi abona lomIsrayeli kanye nalolomsikati labehamba naye, wavele wabamba sikhali sakhe ngesandla, walandzela lendvodza yaze yangena ethendeni layo, wafike wabagwaza bobabili. Jehova wasibheka njani sibindzi saFinehasi kanye nelikhono lakhe lekwenta tincumo? Wayicedza ngekushesha inhlupho lebekayitfumele esiveni, futsi wabusisa Finehasi ngekutsi ente sivumelwane naye sekutsi buphristi bebutawuhlala esitukulwaneni sakhe, ‘phakadze naphakadze.’—Num. 25:7-13.

Kuliciniso kutsi labadzala labangemKhristu lamuhla abahlanganyeli ebudloveni. Nanobe kunjalo, kufanele balingise Finehasi, bakulungele kwenta tincumo futsi babe nesibindzi. Nasi sibonelo: Ngesikhatsi Guilherme acelwa kutsi akhonte ekomidini yekwehlulela, besekakhonte njengalomdzala tinyanga letimbalwa nje kuphela. Umzalwane lobekatsintseka kulelicala bekungulomdzala lowasita Guilherme ngesikhatsi asemncane. Guilherme utsi: “Ngativa ngite emandla ekwenta lomsebenti. Bekumatima nekutsi ngilale ebusuku. Bengiloku ngicabanga ngekutsi ngingentani kute ngingavumeli imivelo yami ingiphatamise ekutseni ngehlulele lelicala ngekuvumelana  netimiso taJehova. Ngathandaza emalanga lamanyenti ngalendzaba, futsi ngacwaninga nasetincwadzini letisekelwe eBhayibhelini.” Kwenta kanjalo kwamsita kutsi abenesibindzi lebekasidzinga kute ahlangabetane nalesimo, futsi akwati kusita lomzalwane wakhe logulako ngekwakamoya.—1 Thim. 4:11, 12.

Nangabe labadzala baba nesibindzi futsi bakwati kwenta tincumo lapho kuvela sidzingo sekwenta njalo ebandleni, bangaba tibonelo tekukholwa kanye netekwetsembeka. Nalamanye emaKhristu kudzingeka abe nesibindzi nakufanele abike ngebubi lobutsite labubonako. Ngendlela lefananako, kudzingeka sibe nesibindzi kute sikwati kuyekela kutihlanganisa nemngani nobe sihlobo lesisusiwe ekuhlanganyeleni.—1 Khor. 5:11-13.

Kucondza Kuvimbela Inhlekelele

Sibindzi saFinehasi besingasiko nje kwenta tintfo ngemawala, lokuyintfo levame kwentiwa bantfu labasebasha. Cabanga ngendlela lenta ngayo ngekucondza kanye nangekuhlakanipha ngesikhatsi aphindze atfola lomunye umbiko. Sive sakaRubeni nesakaGadi kanye nencenye yesive sakaManase, takha lilati eceleni neMfula iJordane. Lamanye ema-Israyeli bekacabanga kutsi loku betikwentela kukhonta kwemanga, ngesizatfu saloko ahlela kuyolwa naletive.—Josh. 22:11, 12.

Wasabela njani Finehasi? Ngekuhlakanipha, yena kanye nebaholi bema-Israyeli, bacoca ngalendzaba kanye nalamadvodza labekakhe lelilati. Letive lebetisolwa tacacisa lesimo ngekutsi tichaze kutsi kahlekahle lelilati betilentele ‘kukhonta Simakadze.’ Ngesizatfu saloko, yavinjwa inhlekelele.—Josh. 22:13-34.

Nangabe umKhristu eva tinsolo nobe umbiko longasimuhle ngalenye inceku yaJehova, utawube enta kahle ngekulingisa Finehasi. Kucondza kuyasivimba kutsi siphatseke kabi nobe sitjele labanye ngaloko lesikuvile ngemzalwane wetfu.—Taga 19:11.

Kucondza kungabasita njani labadzala kutsi nabo balingise Finehasi? Naka loko lokwashiwo nguJaime, losekabe ngulomdzala iminyaka lengetulu kwalelishumi: “Nangabe ummemeteli angitjela ngekungevani kwakhe nalomunye, ngekushesha ngivele ngicele lusito kuJehova lwekutsi ngingatsatsi hlangotsi kodvwa ngimnikete sicondziso lesiseBhayibhelini. Lomunye dzadze weta kimi wangichazela indlela lomunye umzalwane lonemitfwalo kulelinye libandla lamphatse kabi ngayo. Njengobe lomzalwane bekungumngani wami, bekungaba melula kutsi ngikhulume naye. Kunaloko, ngakhetsa kutsi mine nalodzadze sihlole timiso teliBhayibheli letimbalwa. Lodzadze wavuma kutsi kube nguye lokhuluma nalomzalwane. (Mat. 5:23, 24) Kodvwa-ke, ayizange ilunge ngaleso sikhatsi indzaba yabo. Ngaleso sizatfu, ngacela lodzadze kutsi acabangele letinye timiso temiBhalo. Wakhetsa kuphindze athandaze ngalendzaba futsi etame kumtsetselela.”

Waba yini umphumela? Jaime uyakhumbula: “Ngemuva kwetinyanga letimbalwa, lodzadze weta kimi. Wangitjela kutsi lomzalwane ugcine atisolile ngaloko lakukhuluma. Wahlela  nekutsi basebente ndzawonye ensimini kute avete kubonga ngaloko lodzadze labekwentile. Lenkinga yalungiswa. Bekutawuba nemphumela lomuhle yini kube ngatsatsa luhlangotsi, ngase ngetama kuyilungisa ngekwami lenkinga?” LiBhayibheli liyasiyala: “Ungasheshi uye enkantolo ngaloko lokubonile.” (Taga 25:8) Labadzala labanekucondza benta kahle ngekukhutsata emaKhristu langevani kutsi asebentise timiso letiseBhayibhelini kute abe nekuthula aphindze akutfutfukise.

Wacela Lusito KuJehova

Finehasi wajabulela kukhonta njengemphristi webantfu baNkulunkulu labakhetsiwe. Njengobe kuvetiwe, bekanesibindzi kanye nekucondza lokungakavami ngisho nangesikhatsi asemncane. Nanobe kunjalo, kwetsembela kwakhe kuJehova ngiko lokwamsita wakwati kubeketelela tinsayeya labekahlangabetana nato.

Ngemuva kwesehlakalo sekutsi emadvodza aseGibeya lavela esiveni sakaBhenjamini adlwengule futsi abulala intfombi lengumLevi, leti letinye tive talungela kuyokulwa nebakaBhenjamini. (Khu. 20:1-11) Ngembikwekutsi tiyokulwa, tathandaza kuJehova, tacela lusito lwakhe, kodvwa tehlulwa tikhatsi letimbili, futsi kwafa bantfu labanyenti. (Khu. 20:14-25) Betitawuphetsa ngekutsi Jehova akazange awulalele yini umthandazo wato? Jehova bekanendzaba yini nekubabona batiphindziselela kulobubi lobebentiwe?

Ngekutetsemba lokucinile, Finehasi lobesekangumphristi lomkhulu wema-Israyeli, waphindze wathandaza kuJehova. Watsi: “Sikhuphuke yini njalo kuyakulwa nebanaketfu bakaBhenjamini, nobe cha?” Jehova waphendvula umthandazo wabo ngekutsi anikele sive sakaBhenjamini esandleni sabo, futsi iGibeya yokhelwa ngemlilo.—Khu. 20:27-48.

Ngusiphi sifundvo lesingasitfola kuloku? Letinye tinkinga lesihlangabetana nato ebandleni tiyachubeka ngisho nangetulu kwemetamo yalabadzala kanye nekuthandazela kwabo lusito lwaNkulunkulu. Nangabe loku kwenteka, labadzala benta kahle ngekukhumbula emavi aJesu latsi: “Celani [nobe thandazani], niyawunikwa; funani, niyawutfola; nconcotsani, niyawuvulelwa umnyango.” (Luk. 11:9) Ngisho nobe bangase babone ngatsi imithandazo yabo ayiphendvulwa ngekushesha, labadzala bangaciniseka ngekutsi Jehova utayiphendvula ngesikhatsi sakhe lesifanele.

Nasi sibonelo: Bazalwane base-Ireland bebadzinga liHholwa leMbuso, kodvwa umphatsi wetekwakha emmangweni wakubo akazange avume. Watala tonkhe ticelo labatifaka tekutsi batfole indzawo yekwakha. Lesinye sikhulu labacabanga kutsi singasemukela sicelo sabo bekungumphatsi lomkhulu wetekwakha eveni lonkhe. Umthandazo bewutawubasita yini njengobe waba lusito esikhatsini saFinehasi?

Lomunye lomdzala wakuleyondzawo uyalandzisa: “Ngemuva kwekuthandaza kanye nekuncusa, sahamba saya ehhovisini letekwakha lelikhulu eveni. Satjelwa kutsi kungenteka sisibone ngemuva kwemaviki lambalwa sikhulu setekwakha. Nanobe kunjalo, sakwati kusibona imizuzu lesihlanu nje kuphela. Ngemuva kwekutsi sesibone ipulani yetfu, sasiniketa imvume yekutsi singachubeka nekwakha. Nasisuka lapho, umphatsi wetekwakha emmangweni naye wenta konkhe lokusemandleni akhe kute asisite. Loku lokwenteka kwasikhombisa emandla emthandazo. Kusebaleni-ke kutsi Jehova uyayiphendvula imithandazo lecotfo yalabadzala labetsembele kuye.”

Finehasi bekanemisebenti leminyenti lobekufanele ayentele ema-Israyeli asendvulo, kodvwa ngesibindzi, kucondza kanye nekwetsembela kwakhe kuNkulunkulu, wakwati kuphumelela nangetulu kwetinsayeya labekahlangabetana nato. Indlela Finehasi lalinakekela ngayo libandla laNkulunkulu, beyemukeleka kuJehova. Ngemuva kweminyaka lengu-1 000, Ezra waphefumulelwa kutsi abhale: “Finehasi, umsa wa-Eleyazare, ekucaleni bekaphetse labomahlalesangweni, naSimakadze waba naye.” (1 Khr. 9:20) Shengatsi kungaba njalo nakulabo labahola bantfu baNkulunkulu lamuhla, nakuwo onkhe emaKhristu lakhonta Jehova ngekwetsembeka.