Bewati Yini Ngaloku?
Lithempeli laseJerusalema lagcine lakhiwe kabusha yini ngemuva kwa-70 C.E.?
JESU watsi kute ngisho nalinye litje ethempelini laJehova leliyawusala lihleti—siphrofetho lesagcwaliseka ngesikhatsi libutfo lemaRoma lebeliholwa nguThithu lihlasela iJerusalema nga-70 C.E. (Mat. 24:2) Ngemuva kwaloko, uMbusi Julian wahlela kulakha kabusha lelithempeli.
Julian abebitwa ngekutsi ngumbusi waseRoma wekugcina labengamkhonti Nkulunkulu. Lomshana waConstantine Lomkhulu watfola imfundvo lebeyibitwa ngekutsi yebuKhristu. Nobe kunjalo, ngemuva kwekubekwa kutsi abe ngumbusi nga-361 C.E., wamelana nalemfundvo nendlela yekutiphatsa lembi yemaKhristu angesikhatsi sakhe wakhetsa kungamkhonti Nkulunkulu. Tincwadzi temlandvo timbita ngekutsi “siHlubuki.”
Julian abeyitondza inkholo yebuKhristu. Lesinye sizatfu saloko kutsi ngesikhatsi aneminyaka lesitfupha budzala, wabona emalunga alenkholo abulala uyise wakhe netihlobo. Ngekusho kwetati temlandvo wemasontfo, Julian wakhutsata emaJuda kutsi akhe kabusha lithempeli lawo, anelitsemba lekutsi loko bekutawuveta kutsi Jesu abengumphrofethi wemanga. *
Asikungabati kutsi Julian wahlela kutsi lakhiwe kabusha lithempeli. Tati temlandvo tiphikisana ngekutsi Julian wawucala yini lomsebenti wekwakha lithempeli, nangabe wawucala, yini leyenta lomsebenti wangasachubeki. Intfo lesiciniseka ngayo kutsi Julian wabulawa ingakapheli iminyaka lemibili abekwe kutsi abe yinkhosi, nemsebenti wakhe wekwakha wafa kanye naye.
Indlela lithempeli lokungenteka belibukeka ngayo ngesikhatsi saJesu, kubekwe sitfombe salo etikwetakhiwo talamuhla
^ sig. 5 Jesu akazange atsi lelithempeli angeke liphindze lakhiwe kabusha, kodvwa watsi litawubhujiswa njengobe kwenteka nga-70 C.E.
