“Sitjele Kutsi Letintfo Tiyakwenteka Nini”?
“Kuyakwentekani lokuyawukhombisa kutsi sesikhatsi sekubuya kwakho nekutsi sekuphela kwetikhatsi?”—MAT. 24:3.
1. Njengebaphostoli, yini lesifuna kuyati?
UMSEBENTI waJesu wasemhlabeni bewuya ngasekupheleni, nebafundzi bakhe bebanesifiso lesikhulu sekwati kutsi likusasa libaphatseleni. Ngako-ke, ngemalanga lambalwa ngaphambi kwekufa kwakhe, bafundzi bakhe labane bambuta: “Sitjele kutsi letintfo tiyakwenteka nini, kuyakwentekani lokuyawukhombisa kutsi sesikhatsi sekubuya kwakho nekutsi sekuphela kwetikhatsi?” (Mat. 24:3; Mak. 13:3) Jesu waphendvula ngesiphrofetho lesichaza kabanti, lesibhalwe kuMatewu sehluko 24 na-25. Kuleso siphrofetho, Jesu wabiketela ngetintfo letinyenti letimangalisako lebetitawenteka. Emavi akhe abaluleke kakhulu kitsi ngobe natsi sinesifiso lesikhulu sekwati kutsi likusasa lisiphatseleni.
2. (a) Eminyakeni leminyenti leyendlulile, yini lebesifuna kuyicondza ngalokucacile? (b) Ngumiphi imibuto lemitsatfu lesitawucoca ngayo?
2 Eminyakeni leminyenti leyendlulile, tinceku taJehova tifundze siphrofetho saJesu lesimayelana nemalanga ekugcina ngelusito lwemthantazo. Letinceku titfole ngalokucacile sikhatsi sekugcwaliseka kwalamavi aJesu. Kute sibone kutsi ilungiswe njani indlela lebesicondza ngayo, ase sicoce ngemibuto lemitsatfu lephatselene nekutsi tatiyowenteka “nini” letintfo labekhulume ngato. Kucala nini “kuhlupheka lokukhulu”? Jesu utehlulela nini “timvu netimbuti”? Jesu ‘uta’ nobe afike nini?—Mat. 24:21; 25:31-33.
KUCALA NINI KUHLUPHEKA LOKUKHULU?
3. Kadzeni, besisicondza njani sikhatsi sekuhlupheka lokukhulu?
3 Sekuphele iminyaka leminyenti sicabanga kutsi kuhlupheka lokukhulu kwacala nga-1914 ngeMphi Yelive Yekucala nekutsi ‘lawo malanga afinyetwa’ nguJehova nga-1918 nayiphela lemphi kute insali ibe nesikhatsi sekushumayela tindzaba letimnandzi etiveni tonkhe. (Mat. 24:21, 22) Nasekuphele umsebenti wekushumayela, umbuso waSathane utawubhujiswa. Ngaleso sizatfu, bekucatjangwa kutsi kuhlupheka lokukhulu kuhlukene katsatfu: Bekutawuba nesicalo (1914-1918), lokuhlupheka bekutawuphatanyiswa (kusukela nga-1918 kuchubeke), bese kuphela e-Amagedoni.
4. Ngukuphi kucondza lokwacacisa siphrofetho saJesu lesimayelana nemalanga ekugcina?
4 Ngekuchubeka kwentiwa lucwaningo mayelana nesiphrofetho saJesu, satfola kutsi incenye yesiphrofetho saJesu lemayelana nemalanga ekugcina igcwaliseka kabili. (Mat. 24:4-22) Yekucala yagcwaliseka eJudiya ngelikhulu lekucala leminyaka C.E., lenye itawugcwaliseka ngesikhatsi setfu emhlabeni wonkhe. Loko kucondza kwacacisa tintfo letinyenti. *
5. (a) Ngusiphi sikhatsi lesimatima lesacala nga-1914? (b) Leso sikhatsi sekucindzeteleka sifanana njani nesikhatsi selikhulu lekucala leminyaka C.E.?
5 Siphindze satfola kutsi incenye yekucala yekuhlupheka lokukhulu ayizange icale nga-1914. Kungani kunjalo? Kungobe tiphrofetho teliBhayibheli tiveta kutsi kuhlupheka lokukhulu kusetawucala, hhayi ngekulwa kwetive, kodvwa ngekuhlaselwa kwenkholo yemanga. Ngako, loko lokwenteka nga-1914 bekungasiso sicalo sekuhlupheka lokukhulu, kodvwa ‘bekukucala kwemihelo.’ (Mat. 24:8) ‘Lemihelo’ ifanana naloko lokwenteka eJerusalema naseJudiya kusukela nga-33 C.E. kuya ku-66 C.E.
6. Yini letawukhombisa kucala kwekuhlupheka lokukhulu?
6 Yini letawukhombisa kucala kwekuhlupheka lokukhulu? Jesu wabiketela: “Ngako-ke nanibona sinengisoncitsakalo sime endzaweni lengcwele, njengobe asho umphrofethi Danyela, (lofundzako akacaphele inchazelo yaloku,) labo labaseJudiya ababalekele etintsabeni.” (Mat. 24:15, 16) Ekugcwalisekeni kwekucala, ‘kuma endzaweni lengcwele’ kwenteka nga-66 C.E. ngesikhatsi libutfo lemaRoma (“sinengisoncitsakalo”) lihlasela iJerusalema nelithempeli lalo (lokuyindzawo lengcwele kumaJuda). Ekugcwalisekeni kwaso lokukhulu, ‘kuma’ kutawenteka lapho Mhlabuhlangene (“sinengisoncitsakalo” salamuhla) ahlasela Tinkholo Letitsi TebuKhristu (letingcwele kulabo labatibita ngekutsi bangemaKhristu) nalo lonkhe liBhabhulona Lelikhulu. Lokuhlasela lokufanako kuchaziwe kuSembulo 17:16-18. Loko kutawuba sicalo sekuhlupheka lokukhulu.
7. (a) Bantfu ‘basindziswa’ njani ngelikhulu lekucala leminyaka? (b) Yini lokufanele silindzele kutsi yenteke esikhatsini lesitako?
7 Jesu waphindze wabiketela kutsi: “Lawo malanga ayawufinyetwa.” Ekugcwalisekeni kwalesiphrofetho kwekucala, loku kwenteka nga-66 C.E. ngesikhatsi libutfo lemaRoma ‘lifinyeta’ kuhlasela kwalo. NemaKhristu lagcotjiwe aseJerusalema newaseJudiya abaleka kute ‘asindzise’ kuphila kwawo. (Fundza Matewu 24:22; Mal. 3:17) Ngako-ke, yini lokufanele siyilindzele kutsi yenteke ngesikhatsi lesitako sekuhlupheka lokukhulu? Jehova ‘utawufinyeta’ kuhlasela kwaMhlabuhlangene ahlasela inkholo yemanga, kute inkholo yeliciniso ingabhujiswa kanye nenkholo yemanga. Loko kutawucinisekisa kutsi bantfu baNkulunkulu batawusindza.
8. (a) Yini letawenteka nasekwendlule incenye yekucala yekuhlupheka lokukhulu? (b) Kunini lapho lilunga lekugcina lalabo labangu-144 000 litawutfola umvuzo walo wasezulwini? (Fundza kwatiswa lokusekugcineni.)
8 Yini letawenteka nasekwendlule incenye yekucala yekuhlupheka lokukhulu? Emavi aJesu aveta kutsi kutawuba nesikhatsi lesitawuchubeka kuze kube ngulapho kucala i-Amagedoni. Yini letawenteka ngaleso sikhatsi? Imphendvulo itfolakala kuHezekeli 38:14-16 naku-Matewu 24:29-31. (Fundza.) * Ngemuva kwaloko, kutawufika i-Amagedoni, siphelo sekuhlupheka lokukhulu, lokufanana nekubhujiswa kweliJerusalema nga-70 C.E. (Mal. 4:1) Kuhlupheka lokukhulu lokutako kutawuba ngulokukhetsekile ngobe kutawuphelela emphini ye-Amagedoni—letawuba sikhatsi ‘lesingazange sesibe khona kusukela seloku kwasekelwa umhlaba.’ (Mat. 24:21) Naseyendlulile, kutawucala Kubusa KwaKhristu Kweminyaka Leyinkhulungwane.
9. Siphrofetho saJesu lesimayelana nekuhlupheka lokukhulu sibatsintsa njani bantfu baJehova?
9 Lesiphrofetho lesimayelana nekuhlupheka lokukhulu siyasicinisa. Kungani kunjalo? Kungobe sisicinisekisa ngekutsi ngisho nobe bungaba bunyenti kangakanani bumatima lesihlangabetana nabo, tsine njengelicembu lebantfu baJehova, sitawendlula ekuhluphekeni lokukhulu. (Semb. 7:9, 14) Ngetulu kwaloko, siyajabula ngobe e-Amagedoni Jehova utawulwela bukhosi bakhe aphindze angcwelise libito lakhe lelingcwele.—Hla. 83:18; Hez. 38:23.
JESU UTEHLULELA NINI TIMVU NETIMBUTI?
10. Kadzeni, besikucondza njani kwehlulelwa kwebantfu njengetimvu netimbuti?
10 Nyalo cabanga ngalenye incenye yesiphrofetho saJesu—umfanekiso wekwehlulelwa kwetimvu netimbuti. (Mat. 25:31-46) Ekucaleni, besicabanga kutsi kwehlulelwa kwebantfu njengetimvu nobe timbuti bekutawucala ngesikhatsi semalanga ekugcina kusukela nga-1914 kuchubeke. Saphetsa ngekutsi labo labangawulaleli umlayeto weMbuso futsi labafa ngaphambi kwekuhlupheka lokukhulu batawufa batimbuti—bete litsemba lekuvuswa.
11. Yini lekhombisa kutsi kwehlulelwa kwebantfu njengetimvu nobe timbuti akuzange kucale nga-1914?
11 Ngabo-1990, Sicongosekulindza saphindze sawuchaza umbhalo waMatewu 25:31, lotsi: “INdvodzana yeMuntfu nayita ngenkhatimulo yayo netingilosi tayo tonkhe, iyawuhlala esihlalweni sayo sebukhosi.” Kwatfolakala kutsi Jesu waba yiNkhosi yeMbuso waNkulunkulu nga-1914, kodvwa akazange ‘ahlale esihlalweni sakhe sebukhosi’ njengeMehluleli ‘wato tonkhe tive.’ (Mat. 25:32; catsanisa naDanyela 7:13.) Nobe kunjalo, umfanekiso wetimvu netimbuti uchaza Jesu njengeMehluleli. (Fundza Matewu 25:31-34, 41, 46.) Njengobe Jesu abengesiye umehluleli wato tonkhe tive nga-1914, kusho kutsi kwehlulela kwakhe bantfu njengetimvu nobe timbuti akuzange kucale ngalowo mnyaka. * Nangabe kunjalo, wacala nini Jesu kwehlulela?
12. (a) Jesu utawuba nini nguMehluleli wato tonkhe tive kwekucala ngca? (b) Ngutiphi tintfo letitawenteka letibhalwe kuMatewu 24:30, 31 naMatewu 25:31-33, 46?
12 Siphrofetho saJesu lesimayelana nemalanga ekugcina sikhombisa kutsi utawuba nguMehluleli wato tonkhe tive kwekucala ngca ngemuva kwekubhujiswa kwenkholo yemanga. Njengobe kuchaziwe esigabeni 8, lokunye kwaloko lokutawenteka ngaleso sikhatsi kubhalwe kuMatewu 24:30, 31. Nawuhlola lamavesi, utawubona kutsi Jesu ukhuluma ngetintfo letifanana naleto latichaze emfanekisweni wetimvu netimbuti. Nasi sibonelo: INdvodzana yeMuntfu ita ngenkhatimulo yayo netingilosi tayo tonkhe; tonkhe tive temhlaba tiyahlangana; labo labehlulelwa njengetimvu ‘baphakamisa tinhloko tabo’ ngobe balindzele ‘kuphila lokuphakadze.’ * Labo labehlulelwa njengetimbuti ‘bayawukhala’ ngobe babona kutsi ‘batawujeziswa phakadze.’—Mat. 25:31-33, 46.
13. (a) Jesu utabehlulela nini bantfu njengetimvu nobe timbuti? (b) Lokucondza kuwutsintsa njani umbono wetfu ngemsebenti wekushumayela?
13 Ngako-ke, singaphetsa ngani? Jesu utawehlulela bantfu bato tonkhe tive njengetimvu nobe timbuti nakabuya ngesikhatsi sekuhlupheka lokukhulu. E-Amagedoni, lokusiphetfo sekuhlupheka lokukhulu, labanjengetimbuti ‘batawujeziswa’ ngalokuphelele. Lokucondza kuwutsintsa njani umsebenti wetfu wekushumayela? Kuyasisita kute sibone kubaluleka kwalomsebenti. Njengobe kuhlupheka lokukhulu kusengakacali, bantfu banesikhatsi sekushintja indlela labacabanga ngayo bese bahamba endleleni lencane “leyisa ekuphileni.” (Mat. 7:13, 14) Kuliciniso kutsi nyalo bantfu bangase babonakale banjengetimvu nobe timbuti. Nobe kunjalo, kufanele sikhumbule kutsi kwehlulela kwekugcina kwekutsi bobani labatimvu nalabo labatimbuti, kutawenteka ngesikhatsi sekuhlupheka lokukhulu. Ngako-ke, sinesizatfu lesihle sekuchubeka siniketa bantfu labanyenti litfuba lekulalela nelekwemukela umlayeto weMbuso.
Njengobe kuhlupheka lokukhulu kusengakefiki, bantfu banesikhatsi sekushintja indlela labacabanga ngayo (Fundza sigaba 13)
JESU UTA NOBE AFIKE NINI?
14, 15. Ngumiphi imibhalo lemine lekhuluma ngekuta kwaKhristu njengeMehluleli?
14 Kuhlolisiswa kwesiphrofetho saJesu kukhombisa kutsi indlela lesicondza ngayo sikhatsi lokutawenteka ngaso letinye tintfo letitawubonakala kudzingeka ilungiswe yini? Lesiphrofetho ngekwaso siyawuphendvula lombuto. Ase sibone kutsi njani.
15 Encenyeni yesiphrofetho sakhe lesikuMatewu 24:29–25:46, Jesu unake ngalokuyinhloko loko lokutawenteka ngemalanga ekugcina nangesikhatsi sekuhlupheka lokukhulu lokuseta. Kulombhalo, Jesu ukhuluma ngetintfo letisiphohlongo ‘tekuta’ nobe tekufika kwakhe. * Mayelana nekuhlupheka lokukhulu, utsi: ‘Batawubona iNdvodzana yemuntfu ita ngemafu.’ “Anilati lilanga iNkhosi yenu leyawubuya ngalo.” “INdvodzana yeMuntfu iyawufika ngesikhatsi leningakasibheki.” Nasemfanekisweni wakhe wetimvu netimbuti, Jesu utsi: ‘INdvodzana yeMuntfu ita ngenkhatimulo yayo.’ (Mat. 24:30, 42, 44; 25:31) Ngamunye kulemibhalo lemine ukhuluma ngekufika kwaKhristu njengeMehluleli. Esiphrofethweni saJesu siyitfola kuphi lena leminye imibhalo lemine lekhuluma ngaloku?
16. Kufika kwaJesu kuchazwe nakumiphi leminye imibhalo?
16 Mayelana nesisebenti lesetsembekile nalesihlakaniphile, Jesu utsi: “Sibusisiwe leso sisebenti lesiyawukhandvwa yinkhosi yaso senta njalo.” Emfanekisweni wetintfombi, Jesu utsi: “Tatsi tisehambile tiyewutsenga, wefika umyeni.” Emfanekisweni wemathalenta, Jesu uyalandzisa: “Emvakwesikhatsi lesidze lenkhosi yefika.” Kulowo mfanekiso, lenkhosi itsi: ‘Nangifika lemali bengitayikhandza seyinentalo.’ (Mat. 24:46; 25:10, 19, 27) Lamavesi lamane akhuluma ngasiphi sikhatsi sekufika kwaJesu?
17. Yini lesayisho mayelana nekuta lokuchazwe kuMatewu 24:46?
17 Esikhatsini lesendlulile, sabhala etincwadzini tetfu kutsi lemibhalo lemine yekugcina isho kuta kwaJesu nobe kufika kwakhe nga-1918. Kute sente sibonelo, ase sicabange ngemavi aJesu lamayelana ‘nesisebenti lesetsembekile nalesihlakaniphile.’ (Fundza Matewu 24:45-47.) Sacondza kutsi ‘kuta’ lokukhulunywa ngako evesini 46 kwakufananiswa nesikhatsi Jesu leta ngaso kute ahlole emaKhristu lagcotjiwe nga-1918 nekutsi kugcotjwa kwalesisebenti kutsi sinakekele tonkhe tintfo teNkhosi kwenteka nga-1919. (Mal. 3:1) Nobe kunjalo, kuhlolisiswa kwesiphrofetho saJesu kuveta kutsi kudzingeka kwentiwe lushintjo endleleni lesicondza ngayo sikhatsi lokwenteka ngaso letinye tincenye talesiphrofetho. Kungani kunjalo?
18. Kucabanga ngaso sonkhe siphrofetho saJesu kusenta siphetse ngekutsini mayelana nekuta kwakhe?
18 Emavesi landvulela Matewu 24:46, ligama lelitsi ‘kuta’ lisho ngalokucondzile sikhatsi Jesu latawuta ngaso kute amemetele aphindze akhiphe sehlulelo ngesikhatsi sekuhlupheka lokukhulu. (Mat. 24:30, 42, 44) Njengobe sifundzile esigabeni 12, ‘kuta’ kwaJesu lokukhulunywa ngako kuMatewu 25:31 nako kusho sikhatsi lesitako sekwehlulela. Ngako kufanele siphetse ngekutsi kuta kwaJesu kute abeke sisebenti lesetsembekile kutsi sinakekele lokukwakhe, lokukhulunywa ngako kuMatewu 24:46, 47, nako kusho kuta kwakhe esikhatsini lesitako, ngesikhatsi sekuhlupheka lokukhulu. * Kuliciniso kutsi kucabanga ngaso sonkhe lesiphrofetho saJesu kwenta kucace kutsi umbhalo ngamunye kulena lesiphohlongo lekhuluma ngekuta kwakhe isho sikhatsi lesitako sekwehlulela nasekufike kuhlupheka lokukhulu.
19. Nguluphi lushintjo lesicoce ngalo, futsi ngumiphi imibuto lesitayiphendvula etihlokweni letilandzelako?
19 Nasesibuketa, yini lesiyifundzile? Ekucaleni kwalesihloko, sibute imibuto lemitsatfu lephatselene nekutsi “nini.” Sicale sakhuluma ngekutsi kuhlupheka lokukhulu akuzange kucale nga-1914 kodvwa kutawucala ngesikhatsi Mhlabuhlangene ahlasela liBhabhulona Lelikhulu. Siphindze sahlola kutsi kungani sehlulelo saJesu setimvu netimbuti singazange sicale nga-1914 kodvwa sitawucala ngesikhatsi sekuhlupheka lokukhulu. Saphetsa ngekuhlola kutsi kungani kufika kwaJesu atobeka sisebenti lesetsembekile kutsi sinakekele konkhe lokukwakhe kungazange kucale nga-1919 kodvwa kutawucala ngesikhatsi sekuhlupheka lokukhulu. Ngako-ke, yonkhe lemibuto lemitsatfu lephatselene nekutsi “nini” ibhekisela esikhatsini sinye lesitako—kuhlupheka lokukhulu. Lolushintjo lukutsintsa njani kucondza kwetfu ngemfanekiso wesisebenti lesetsembekile? Likutsintsa njani kucondza kwetfu leminye imifanekiso yaJesu legcwaliseka kulesikhatsi sekuphela? Lemibuto lebalulekile sitawucoca ngayo etihlokweni letilandzelako.
^ sig. 4 Sigaba 4: Kute utfole kwatiswa lokwengetiwe, fundza Sicongosekulindza, sangaFebruary 15, 1994, emakhasini 8-21 nesaMay 1, 1999, emakhasini 8-20, [ngesiZulu.]
^ sig. 8 Sigaba 8: Lokunye lokwentekako lokukhulunywa ngako kulamavesi ‘kubutfwa kwabo bonkhe labakhetsiwe.’ (Mat. 24:31) Ngako-ke, kubonakala ngatsi bonkhe labagcotjiwe labatawube basele emhlabeni nasekugwcaliseke incenye yekucala yekuhlupheka lokukhulu, nasekwendlule sikhatsi batawenyukela ezulwini ngaphambi kwekutsi kucale imphi ye-Amagedoni. Loku kushintja loko lesakusho ku-Sicongosekulindza sa-August 15, 1990, ekhasini 30, ngaphansi kwesihloko lesitsi “Imibuto Levela Kubafundzi,” [ngesiZulu.]
^ sig. 11 Sigaba 11: Fundza Sicongosekulindza sa-October 15, 1995, emakhasini 18-28, [ngesiZulu.]
^ sig. 12 Sigaba 12: Fundza umfanekiso lokuLukha 21:28.
^ sig. 15 Sigaba 15: Lamagama latsi ‘kuta’nalelitsi ‘kufika’ ahunyushwe asuselwa ebitweni lesiGriki lelitsi er′kho·mai.
^ sig. 18 Sigaba 18: Njengobe kuvetiwe leligama lesiGriki lelihunyushwe ngekutsi ‘kuta’ lelikuMatewu 24:46 lisho umcondvo lofanana nalelo lesiGriki lelihunyushwe ngekutsi ‘kufika’ lelikuMatewu 24:30, 42, 44.
